Read Dagara, Northern Sɔr-nɛ́ɛ 3 Bible Online

Sɔr-nɛ́ɛ 3 - Dagara, Northern bible

Sɔr-nɛ́ɛ 3

¹A Aarɔ̃ nɩ a Moyiir yir dem tɩ n'ɩ bɛ ŋa, a lɛn daar a Sore na tɩ ƴɛ̀r a Moyiir zie a Sinayi tãw zu a:

²a Aarɔ̃ tɩ tɛr'ɩ bidɛbr anaar, a bidɛb-dãw dɩ kɛ́ Nadavʋ, ɛ́ a bɛl na cɛ a, dɩ Avihu, Eleazaar nɩ Itamaar.

³Bɛ tɩ ka n nũu ƴãw[3] bɛ, bɛ ɩ bàwr-maalbɛ de a bàwr-maalʋ tõ-nʋɔr.

⁴Ɛcɛ a Nadavʋ nɩ a Avihu tɩ kpi n a zi-sõw niŋé, a Sinayi wɛja-kpalɛ pʋɔ[4]. Bʋ̃ʋ n'ʋ vɛ̃, bɛ tɩ nyɩw nɩ parfɛ̃ kʋ̀ a Sore vũu-sãsaralɛ zu. Bɛ bɛ tɩ tɛr bidɛbr ɛ. A Eleazaar nɩ a Itamaar tɛwr nɛbɛ tɩ cɛ tone a bàwr-maal-tome a bɛ sãà Aarɔ̃ lõbowrí.

⁵A Sore tɩ yel'ɩ a Moyiir:

⁶«Ƴãw a Levi dɔwlʋ nɩbɛ bɛ wa, fʋ wa de bɛ kʋ̀ a Aarɔ̃ na ɩ a bàwr-maalɛ a, bɛ sõwne ʋ.

⁷Bɛ na tone nɩ a ʋ tome, nɩ a Ɩsɩrayɛl nɩbɛ lãw za tome, a tuor-taa pɛn-sɛw niŋé, ɛ́ tone a tome al za na càarɩ a kpɛb-zi-sõw a.

⁸Bɛ na kaarɛ nɩ a tuor-taa pɛn-sɛw bome za zie, ɛ́ ɩ a Ɩsɩrayɛl nɩbɛ tõ-tõ-biir a kpɛb-zi-sõw tome tob ƴãw.

⁹Fʋ na de nɩ a levitɩ mɩnɛ kʋ̀ a Aarɔ̃ nɩ a ʋ bidɛbr. Bɛ na sɩrɩ na ɩ nɩbɛ a Ɩsɩrayɛl nɩbɛ na de kʋ̀ ʋ, kɛ́ bɛ sõwne ʋ a.

¹⁰Ɛcɛ gù vla a Aarɔ̃ nɩ a ʋ bidɛbr tɛwr tone a bàwr-maal-tome, nɩ-zawla wa pʋɔ tone a, a fɛr'a bɛ kʋ ʋ.»

¹¹A Sore tɩ cãà na lɛb yel a Moyiir:

¹²«Mãa mɩŋa n'ʋ kaa ír a levitɩ mɩnɛ a Ɩsɩrayɛl nɩbɛ pʋɔ, kɛ́ bɛ lɩɛrɩ a Ɩsɩrayɛl nɩbɛ bidɛb-dãw-dɔwrɩ. Mãa só a levitɩ mɩnɛ.

¹³Bʋ̃ʋ n'ʋ vɛ̃, a ʋlɩ bibir nɛ ɩ̃ na kʋ a Eziptɩ tẽw bʋ̃-dãw-dɔwrɩ za a, ɩ̃ de nɩ a Ɩsɩrayɛl nɩbɛ bidɛb-dan nɩ a bɛ dʋn bil-dan za só bɛ[5]. Mãa n'ɩ a Sore.»

¹⁴A Sore tɩ yel'ɩ a Moyiir a Sinayi wɛja-kpalɛ pʋɔ à ŋá:

¹⁵«Sɔr a Levi dɔwlʋ nɩbɛ, a yie yie nɩ a dɔwlʋ dɔwlʋ. Fʋ na sɔr'ɩ a dɛbr za nɩ a dɛbli za na tɛr cuw-been nɩ dɔwlɛ a.»

¹⁶A Moyiir tɩ sɔ́r bɛ na mɛ̃ a lɛ a Sore na tɩ ƴãw a nʋɔr kʋ̀ ʋ a.

¹⁷A Levi bidɛbr yée tɩ dɩ na kɛ́ Gɛrson, Kehatɩ nɩ Merari.

¹⁸A Gɛrson bidɛbr, Livini nɩ Simeyi tɩ n'ɩ a dɔwlʋ al na tɛr a bɛ yée a, sãàkʋm-kore.

¹⁹Kehatɩ bidɛbr, Amɩram, Yisehaar, Ebrɔ̃ nɩ Uzɩɛl, mɩ̀ tɩ n'ɩ a bɛ dɔwlʋ sãàkʋm-kore.

²⁰Merari bidɛbr, Mali nɩ Musi, mɩ̀ tɩ ɩ n a bɛ dɔwlʋ sãàkʋm-kore. A nɩbɛ bɛ ŋa za tɩ kʋ̀ n a bɛ yée a Levi dɔwlʋ yie.

²¹Gɛrson tɩ n'ɩ a Gɛɛrsonitɩ mɩnɛ sãàkʋm-kʋra. Bɛ tɩ põ nɩ dɔwlʋ ayi: a Livinitɩ dɔwlʋ nɩ a Simeyi dɔwlʋ.

²²A sɔ́rʋ daar a, bɛ tɩ ɩ n nɩbɛ túr ayopõi dɔwlɩ kɔbr anũu (7 500), a dɛb-bɛrɛ nɩ a dɛbli na tɛr ta cuw-been nɩ dɔwlɛ a.

²³A Gɛɛrsonitɩ mɩnɛ laɩ tɩ be n a kpɛb-zi-sõw pùorí, a mʋ̃tɔ̃w-kpɛb-lowr.

²⁴A bɛ nɩ-kpɛ̃ɛ tɩ n'ɩ Layɛl bidɛb Eliyasafʋ.

²⁵A Gɛɛrsonitɩ mɩnɛ nɛbɛ tɩ kaarɛ a tuor-taa pɛn-sɛw ziir á ŋá zie: a kpɛb-zi-sõw, a pɛn-sɛw, a pɛn-sɛw pàwra, a pɛn-sɛw dɩ̃dɔr pɛn-yawla,

²⁶a davʋra na jil koli a kpɛb-zi-sõw nɩ a bàwr-maal-kuur a pɛnɛ, nɩ a ʋ dɩ̃dɔr pɛn-yawla, a pɛn-sɛw mié. Bɛlɛ tɩ so a bome á ŋá za kaafʋ.

²⁷Kehatɩ tɩ n'ɩ a Kehatɩ mɩnɛ sãàkʋm-kʋra. Bɛ tɩ põ nɩ dɔwlʋ anaar: Amɩram dɔwlʋ, Yisehaar dɔwlʋ, Ebrɔ̃ dɔwlʋ nɩ Uzɩɛl dɔwlʋ.

²⁸Bɛ tɩ ɩ n nɩbɛ túr ani dɔwlɩ kɔbr ayʋɔb (8 600), a dɛb-bɛrɛ nɩ a dɛbli na tɛr ta cuw-been nɩ dɔwlɛ a. Bɛlɛ tɩ so a kpɛb-zi-sõw bʋ̃-son kaafʋ.

²⁹A Kehatɩ mɩnɛ dɔwlʋ laɩ tɩ be n a kpɛb-zi-sõw saa-pɛrɩ́-dʋrʋ-lowr.

³⁰A Uzɩɛl bidɛb, Elisafan, n'ʋ tɩ ɩ a bɛ nɩ-kpɛ̃ɛ.

³¹A Kehatɩ mɩnɛ nɛbɛ tɩ kaarɛ a daw-sõw zie, a dipɛ̃ tabal, a fɩ̃tɩlɩ dɔwlʋ zie, a bàwr-maal-kube, a zi-sõw bome bʋ̃-ƴãwnɩ nɩ a kpɛb-zi-sõw pʋ̃ɔmɩ pɛn-yawla. Bɛlɛ tɩ so a bome á ŋá za kaafʋ.

³²A levitɩ mɩnɛ nɩ-kpɛ̃ɛ za tɩ n'ɩ a Aarɔ̃ na ɩ a bàwr-maalɛ a bidɛb Eleazaar. Ʋlɛ n'ʋ tɩ jɩ́rɛ a nɩbɛ bɛ na ƴãw bɛ tone a zi-sõw pʋɔ a.

³³Merari tɩ n'ɩ a Merari dɔwlʋ sãàkʋm-kʋra. Bɛ tɩ põ nɩ dɔwlʋ ayi: a Mali dɔwlʋ nɩ a Musi dɔwlʋ.

³⁴A sɔ́rʋ daar a, bɛ tɩ ɩ n nɩbɛ túr ayʋɔb dɔwlɩ kɔbr ayi (6 200), a dɛb-bɛrɛ nɩ a dɛbli na tɛr ta cuw-been nɩ dɔwlɛ a.

³⁵A bɛ nɩ-kpɛ̃ɛ tɩ n'ɩ Avihayil bidɛb Suuriyɛl. A kpɛb-zi-sõw saa-pɛrɩ́-gʋba-lowr'a a bɛ laɩ tɩ be.

³⁶A Merari dɔwlʋ nɩbɛ nɛbɛ tɩ kaarɛ a kpɛb-zi-sõw dà-tɩɛrɩ zie, a dà-garjɩrɩ, a kpule, a kpule dɔwlʋ ziir nɩ a bʋ̃-kpɛ̃kpɛrsɩ za na cɛ a. Bɛlɛ tɩ so a bome á ŋá za kaafʋ.

³⁷A kpule nɩ a kpule dɔwlʋ ziir na ƴãw viiri koli a davʋra a, a kpawbie nɩ a mié a, bɛlɛ mɩ̀ tɩ cãà so a kaafʋ.

³⁸A Moyiir, a Aarɔ̃ nɩ a ʋ bidɛbr laɩ tɩ be n a tuor-taa pɛn-sɛw niŋé, a saa-pɛrɩ́. Bɛlɛ tɩ so a zi-sõw tome a Ɩsɩrayɛl nɩbɛ yúor ƴãw. Nɩ-zawla tɩ ɩ mɛ̃ ʋ bɔbr'a k'ʋʋ pʋɔ a tome á ŋá pʋɔ a, bɛ nãá kʋ ʋ na.

³⁹A levitɩ mɩnɛ za nʋɔr, a dɛb-bɛrɛ nɩ a dɛbli na tɛr ta cuw-been nɩ dɔwlɛ a, tɩ ɩ n tùr-lɩzɛr'ɩ ayi (22 000). A Moyiir nɩ a Aarɔ̃ nɛbɛ tɩ sɔ́r bɛ, a dɔwlʋ dɔwlʋ, mɛ̃ a lɛ a Naaŋmɩn na tɩ yel kʋ̀ bɛ a.

⁴⁰A Sore tɩ yel'ɩ a Moyiir à ŋá: «Sɔr a Ɩsɩrayɛl nɩbɛ bidɛb-dãw-dɔwrɩ za na tɛr cuw-been nɩ dɔwlɛ a, ɛ́ sɛb a bɛ yée.

⁴¹Al pùorí, fʋ na ƴãw nɩ a levitɩ mɩnɛ bɛ tʋɔra zie, bɛ ɩ a mãa Sore sób, lɩɛrɩ a Ɩsɩrayɛl nɩbɛ bidɛb-dãw-dɔwrɩ. Lɛ n'a fʋ mɩ̀ na de a levitɩ mɩnɛ dʋn kʋ̀ m, lɩɛr'ɩ a Ɩsɩrayɛl nɩbɛ dʋn bil-dãw-dɔwrɩ.»

⁴²Lɛ n'a a Moyiir tɩ sɔ́r a Ɩsɩrayɛl nɩbɛ bidɛb-dãw-dɔwrɩ za, mɛ̃ a lɛ a Sore na tɩ ƴãw a nʋɔr kʋ̀ ʋ a.

⁴³A bidɛb-dãw-dɔwrɩ za na tɛr ta cuw-been nɩ dɔwlɛ ɛ́ bɛ sɛb a yée a tɩ ɩ n tùr-lɩzɛr'ɩ ayi dɔwlɩ kɔbr ayi lɩz'a ata nɩ pie nɩ ata (22 273).

⁴⁴A Sore tɩ yel'ɩ a Moyiir à ŋá:

⁴⁵«Ƴãw a levitɩ mɩnɛ bɛ tʋɔra zie bɛ ɩ a mãa Sore sób, lɩɛrɩ a Ɩsɩrayɛl nɩbɛ bidɛb-dãw-dɔwrɩ. Mɩ̀ de a levitɩ mɩnɛ dʋn kʋ̀ m, lɩɛr'ɩ a Ɩsɩrayɛl nɩbɛ dʋn bil-dan.

⁴⁶Ɛcɛ a na fɛr'a bɛ ya de a Ɩsɩrayɛl nɩbɛ bidɛb-dãw-dɔwrɩ kɔbr ayi lɩz'a ata nɩ pie nɩ ata (273) na dɔwlɩ a levitɩ mɩnɛ nʋɔr zu a.

⁴⁷A bɛ been been ƴãw a, fʋ na de nɩ salm-pla libie anũu —a al bɛ na dɩrɛ a zi-sõw pʋɔ, ɛ́ a been za tɩbrʋ mɩ́ ɩ gɩram pie a—,

⁴⁸fʋ na de nɩ a libie á ŋá kʋ̀ a Aarɔ̃ nɩ a ʋ bidɛbr, à à ŋá n'a bɛ na ya de a bidɛb-dãw-dɔwrɩ bɛl nʋɔr na dɔwlɩ a.»

⁴⁹A Moyiir tɩ de nɩ a libie bɛ na na ya de nɩ a bɛlɩ dem a levitɩ mɩnɛ na bɛ lɩɛrɩ a.

⁵⁰A libie za ʋ na tɩ páw a Ɩsɩrayɛl nɩbɛ bidɛb-dãw-dɔwrɩ zie a, a tɩ ɩ n salm-pla libie túr dɔwlɩ kɔbr ata lɩz'a ata nɩ anũu (1365), a al bɛ na dɩrɛ a zi-sõw pʋɔ a.

⁵¹Ʋ tɩ de a na kʋ̀ a Aarɔ̃ nɩ a ʋ bidɛbr mɛ̃ a lɛ a Sore na tɩ ƴãw a nʋɔr kʋ̀ ʋ a.