Read Dagara, Northern Sɔr-nɛ́ɛ 30 Bible Online

Sɔr-nɛ́ɛ 30 - Dagara, Northern bible

Sɔr-nɛ́ɛ 30

¹A Moyiir tɩ yel'ɩ a lɛ za a Sore na ƴãw a nʋɔr kʋ̀ ʋ a, kʋ̀ a Ɩsɩrayɛl nɩbɛ.

²Al pùorí, a Moyiir tɩ ƴɛ̀r'ɩ a Ɩsɩrayɛl nɩbɛ dɔwlʋ nɩ-bɛrɛ zie yel à ŋá: Yele a mɩnɛ n'ɩ á ŋá a Sore na yel a:

³«Nɩr wa kõ nʋɔr k'ʋʋ na kʋ̀ n bom a Sore a, bɩɩ ʋlɛ wa pɔ yel k'ʋʋ na bɛr'ɩ bom ɩb a, ʋ kʋ̃ tʋ̃ɔ́ bɛ tu a lɛ ʋ na yel a ɩ. A fɛr'a k'ʋʋ tu a lɛ tɔr za ʋ na yel a[61].

⁴Ɛcɛ, a ɩ mɛ̃ pɔwsɩrale cãà na be a ʋ sãà yir ɛ́ kõ nʋɔr a Sore zie, bɩɩ pɔ yel k'ʋʋ na ɩ n bom.

⁵A sãà wa wõ a ɛ́ bɛ yel yel kʋ̀ ʋ a, a fɛr'a k'aa pɔwsɩrale tu a lɛ ʋ na yel a.

⁶Ɛcɛ a sãà wa wõ a a ʋlɩ bibir nɛ, ɛ́ bɛ sàw kʋ̀ ʋ a, a bɛ fɛrɛ a pɔwsɩrale k'ʋʋ tu a ʋ nɛ́ɛ ɩ. A Sore na dɩ n suur kʋ̀ ʋ, a ʋ sãà na bɛ sàw ʋ na tu a ʋ nɛ́ɛ a ƴãw.

⁷Ƴɛrɛŋa a, a ɩ mɛ̃ pɔwsɩrale bɛ tɩɛrɩ tɔ ɩ, ɛ́ kõ nʋɔr bɩɩ pɔ yel k'ʋʋ na ɩ n bom. Al pùorí, ʋ kul sɩr.

⁸A sɩr wa wõ a a ʋlɩ bibir nɛ ɛ́ bɛ yel yel kʋ̀ ʋ a, a fɛrɛ ʋ na k'ʋʋ tu a ʋ nɛ́ɛ.

⁹Ɛcɛ a sɩr bɛ wa sàw kʋ̀ ʋ a ʋlɩ bibir nɛ ʋ na wõ a a, ʋ ɩ na a nʋɔr a pɔw na ƴãw a bɛ cãà pʋɔ ɩ. A Sore na dɩ n suur kʋ̀ a pɔw a nʋɔr ŋa bɛ-tub ƴãw.

¹⁰Pɔw-kʋɔr bɩɩ pɔw a sɩr na zawrɩ bɛr a wa kõ nʋɔr a, a fɛrɛ ʋ na k'ʋʋ tu a lɛ ʋ na yel a.

¹¹Ɛcɛ a ɩ mɛ̃ pɔw na kul sɩr a kõ n nʋɔr, bɩɩ pɔ na yel k'ʋʋ na ɩ n bom.

¹²A ʋ sɩr wa wõ a ɛ́ bɛ yel bom kʋ̀ ʋ a, a fɛrɛ ʋ na k'ʋʋ tu a lɛ ʋ na yel a.

¹³Ɛcɛ a sɩr wa wõ a a ʋlɩ bibir nɛ ɛ́ yel k'aa bɛ pʋɔ a, a nɛ́ɛ á ŋá tub bɛ fɛrɛ a pɔw ɛ. A Sore na dɩ n suur kʋ̀ ʋ, a ʋ sɩr na yel k'aa nɛ́ɛ bɛ pʋɔ a ƴãw.

¹⁴A na ɩ à ŋá a, pɔw wa kõ nʋɔr bɩɩ pɔ yel k'ʋʋ na bɛr'ɩ bom ɩb a, a sɩr na tʋ̃ɔ́ na yel k'aa pʋɔ na, bɩɩ k'aa bɛ pʋɔ ɩ.

¹⁵A sɩr wa wõ a ɛ́ bɛ yel bom kʋ̀ ʋ tɩ dãw bio a, ʋ sàw nɩ a nɛ́ɛ al za a ʋ pɔw na ƴãw a, a gbili ʋ na ɩ a ƴãw.

¹⁶Ɛcɛ a pùorí, ʋlɛ wa yel k'aa bɛ pʋɔ a, ʋl mɩŋa n'ʋ tɛr sãwna, a nɛ́ɛ a ʋ pɔw na bɛ tu a ƴãw.»

¹⁷A nɛ́ɛ n'ɩ à á ŋá a Sore na kʋ̀ a Moyiir càar'ɩ a nɛ́ɛ pɔw na kul sɩr a na kõ a, bɩɩ pɔwsɩrale na cãà a ʋ sãà yir a na kõ a.