Read Dagara, Northern Sɔr-nɛ́ɛ 32 Bible Online

Sɔr-nɛ́ɛ 32 - Dagara, Northern bible

Sɔr-nɛ́ɛ 32

¹Urubɛn nɩ Gadɩ bʋʋrɛ tɩ tɛr'ɩ dʋn na yãwmɛ ɛ́ ta dʋn a. Bɛ tɩ nyɛ̃ nɩ a Yazɛɛr vuo nɩ a Galaadɩ tẽw a vɩɛl a dʋn guolu ƴãw.

²Lɛ so bɛ tɩ cen tɩ páw a Moyiir, a bàwr-maalɛ Eleazaar nɩ a Ɩsɩrayɛl lãw nɩ-bɛrɛ yel bɛ à ŋá:

³«A tẽ-bɛrɛ á ŋá: Atarɔtɩ, Divon, Yazɛɛr, Nɩmɩra, Hɛsɩbon, Eleale, Sevam, Nebo nɩ Bewon pʋɔ nɩ a tẽw

⁴a Sore na sõw a Ɩsɩrayɛl nɩbɛ zɛb de a pʋɔ. A vuo maal'ɩ nɩ dʋn guolu, ɛ́ tɩ tɛr dʋn.»

⁵Bɛ tɩ yel'ɩ à ŋá ƴãw pʋɔ: «Moyiir i, fʋ̃ʋ wa sàw a, fʋ̃ʋ kʋ̀ tɩ a vuo ŋa tɩ só ʋ. Ta tɛr tɩ gãw nɩ a Zurdɛ̃ gãwn ɛ.»

⁶A Moyiir tɩ sɔw bɛ na: «Ɛ́ bʋnʋ yaa? A nyɩ yɛbr na cen nɩ a zɛbr zie, ɛ́ nyɩɩm zɩ̃ zoom a ka a?

⁷Bʋ̃ʋ n'ʋ so nyɩ bɔbr k'aa Ɩsɩrayɛl nɩbɛ kanyir baarɩ, bɛ ta kpɛ a tẽw a Sore na kʋ̀ bɛ a pʋɔ?

⁸À à ŋá tɔr za n'a a nyɩ sãà mɩnɛ tɩ ɩ, a lɛn daar ɩ̃ na tɩ tõ bɛ, bɛ yi a Kadɛsɩ-Barneya ɛ́ cen tɩ cɔlɩ nyɛ̃ a Kanãa tẽw a.

⁹Bɛ tɩ cen na tɩ ta Ɛsɩkɔl fʋɔla pʋɔ, nyɛ̃ a tẽw, ɛ́ lɛb wa diw a Ɩsɩrayɛl nɩbɛ bɛr, kɛ́ bɛ ta cen a tẽw a Sore na kʋ̀rɛ bɛ a pʋɔ ɩ.

¹⁰A Sore tɩ nyɛ̃ nɩ suur a ʋlɩ bibir nɛ, ɛ́ pɔ yel à ŋá:

¹¹“A nɩbɛ bɛl na yi a Eziptɩ, ɛ́ tɛr yome lɩzɛr'ɩ dɔwlɛ a, a bɛ been kãw za bɛ nyɛrɛ a tẽw ɩ̃ na yel k'ɩ̃ɩ na kʋ̀ n a Abraham, a Ɩzaakɩ nɩ a Zakɔb a ɩ. Bʋ̃ʋ n'ʋ vɛ̃, bɛ bʋnɩ nɩ a ɩ̃ pùor-tub ƴãw.

¹²Yefune bidɛb Kalɛb na ɩ Kenaazɩ dɔwlʋ nɩr a, nɩ Nun bidɛb Zozue, bɛl tɛwr nɛbɛ na kpɛ a Kanãa tẽw pʋɔ, bɛ na tu a ɩ̃ pùor, ɛ́ bɛ bʋnɩ a ƴãw.”»

¹³A Moyiir tɩ cãà na lɛb yel à ŋá: «A ɩ à à ŋá a Sore tɩ nyɛ̃ nɩ a Ɩsɩrayɛl nɩbɛ suur, ƴãw bɛ viiri a wɛja-kpalɛ pʋɔ yome lɩz'a ayi, a bʋʋrɛ bɛl tɩ baarɩ bɛ za, a bɛl na tɩ ɩ a ɩb a bɛ pɛlɩ a ʋ pʋɔ a.

¹⁴Ɛ́ ƴɛrɛŋa, a nyɩɩm, yel-bebe dem bʋʋrɛ bɛ ŋa, nyɩ bɔbr kɛ́ nyɩ tu a nyɩ sãà mɩnɛ gbɛ́ɛ, ɩ a Sore suur lɛb ìr a Ɩsɩrayɛl nɩbɛ ƴãw!

¹⁵A nyɩɩm, Urubɛn nɩ Gadɩ nɩbɛ, nyɩmɛ bɛ wa tu a Sore pùor a, ʋ na cãà na bɛr a tɩ nɩbɛ a wɛja-kpalɛ pʋɔ, ɛ́ nyɩmɛ nɛbɛ na so a bɛ bɔrʋ.»

¹⁶A nɩbɛ bɛ ŋa tɩ lɛb'a taw ta a Moyiir zie yel ʋ à ŋá: «Tɩ na ŋmãa nɩ píir zawr a ka, a tɩ dʋn ƴãw, ɛ́ mɛ tẽ-bɛrɛ a tɩ bibiir ƴãw.

¹⁷Al pùorí, tɩ na de nɩ a zɛbr bome fɔ̃wlɛ, de nɩ a Ɩsɩrayɛl nɩbɛ ŋmãa niwn, tɩ ɩ bɛ kpɛ a tẽw bɛ na kʋ̀rɛ bɛ a pʋɔ. A tɩ yie dem bɛl na be n a ka, a tẽ-bɛrɛ tɩ na cɔbrɩ a kpɛmɛ a pʋɔ, a tẽw dem kʋ̃ tʋ̃ɔ́ páw bɛ a.

¹⁸Tɩ na lɛb'a wa a tɩ yie pʋɔ a lɛn daar Ɩsɩrayɛl nɩr za nãà wa zɩ̃ a ʋ tẽsɔw pʋɔ a.

¹⁹Ɛcɛ tɩ bɛ bɔbr kɛ́ tɩ tɛr tẽsɔwr mɛ̃ a bɛl a, a Zurdɛ̃ gãwn ɛ, bʋ̃ʋ n'ʋ vɛ̃, a tɩ tẽsɔwr be n a gãwn ka, a Zurdɛ̃ saa-pɛrɩ́.»

²⁰A Moyiir tɩ yel bɛ na: «Nyɩ ɩ a lɛ nyɩ na yel a. Nyɩ de a nyɩ zɛbr bome cen nɩ a Sore tɩ wule nyɩ, nyɩ zɛbr.

²¹A bɛlɩ dem za na tɛr a bɛ zɛbr bome a, bɛ lo gãw a Zurdɛ̃ mɛ̃ a lɛ a Sore na bɔbr a. Bɛ tɩ be a be ɛ́ gù a Sore tɩ diw a ʋ dɔ̃ dem za,

²²ɛ́ a tẽw za sàw a ʋ nɩ-kpɛ̃ɛnʋ. Al pùorí, nyɩ na tʋ̃ɔ́ na lɛb kul a nyɩ tẽw, bʋ̃ʋ n'ʋ vɛ̃, nyɩ kʋ̃ tɛr sãwna a Sore zie nɩ a Ɩsɩrayɛl nɩbɛ ŋmãa zie ɩ. A lɛn daar a, a Sore na sàw na nyɩ so a tẽw na be a Zurdɛ̃ gãwn ka a.

²³Ɛcɛ nyɩmɛ bɛ wa ɩ à à ŋá a, nyɩ bãwnɩ a vla, nyɩ na maal'ɩ yel-bier a Sore zie, ɛ́ a na tuur nyɩ na.

²⁴Nyɩ mɛ a tẽ-bɛrɛ a nyɩ yie dem ƴãw, nɩ a zawr a nyɩ píir nɩ a nyɩ bʋʋr ƴãw, ɛcɛ nyɩ tu a lɛ nyɩ na háa a nʋɔr yel a.»

²⁵A Urubɛn nɩ a Gadɩ nɩbɛ tɩ sɔw na: «Tɩ na ɩ n a lɛ fʋ na yel a.

²⁶Tɩ na bɛr'ɩ a tɩ bibiir, a tɩ pɔwbɛ, a tɩ zawr dʋn nɩ a tɩ dʋn za a ka, a Galaadɩ tẽ-bɛrɛ pʋɔ.

²⁷Tɩɩm ƴãw a, tɩ na de nɩ a zɛbr bome cen nɩ a zɛbr, a Sore tɩ wule tɩ tɩ zɛbr, mɛ̃ a lɛ fʋ na yel a.»

²⁸A Moyiir tɩ tɩr'ɩ nʋɔr a bɛ ƴãw, a bàwr-maalɛ Eleazaar zie, a Nun bidɛb Zozue zie, nɩ a Ɩsɩrayɛl dɔwlʋ yie nɩ-bɛrɛ zie.

²⁹À ŋá n'a ʋ tɩ yel kʋ̀ bɛ: «A Gadɩ nɩ a Urubɛn nɩbɛ wa de a zɛbr bome lãw nɩ nyɩ gãw a Zurdɛ̃ tɩ zɛbr a zɛbr, a Sore wule bɛ, bɛ zɛbr a, bɛlɛ wa sõw nyɩ nyɩ zɛb tʋ̃ɔ́ a tẽw a, nyɩ na kʋ̀ bɛ nɩ a Galaadɩ tẽw, ʋ ɩ a bɛ tẽw.

³⁰Ɛcɛ bɛlɛ bɛ wa ɩ a lɛ a, a na fɛr'a bɛ kʋ̀ bɛ tẽsɔwr lãw nɩ nyɩ a Kanãa tẽw.»

³¹A Gadɩ nɩ a Urubɛn nɩbɛ tɩ lɛb'a maal yel à ŋá: «Tɩ na ɩ n a lɛ a Sore na yel kʋ̀ tɩ a.

³²Tɩ na de nɩ a zɛbr bome kpɛ n a Kanãa tẽw, a Sore wule tɩ tɩ zɛbr, kɛ́ tɩ tʋ̃ɔ́ páw a tɩ tẽsɔwr a Zurdɛ̃ gãwn ka.»

³³A Moyiir tɩ de nɩ a Amoritɩ mɩnɛ nãà Sihon naalʋ-tẽw, nɩ a Basan nãà Ɔgɩ naalʋ-tẽw, lãwnɩ a tẽ-bɛrɛ nɩ a tẽsɔwr al na pɩɛl'a a, kʋ̀ a Gadɩ nɩ a Urubɛn dɔwlʋ, nɩ Zuzɛb bidɛb Manase dɔwlʋ nɩbɛ ŋmãa.

³⁴A Gadɩ bʋʋrɛ tɩ lɛb'a mɛ a tẽ-bɛrɛ á ŋá: Divon, Atarɔtɩ, Arowɛɛr,

³⁵Atʋrɔtɩ-Sofan, Yazɛɛr, Yogboha,

³⁶Bɛtɩ-Nɩmɩra nɩ Bɛtɩ-Haran. Bɛ tɩ ɩ na a ɩ tẽ-bɛrɛ bɛ na cɔbrɩ a kpɛmɛ a. Bɛ mɩ̀ tɩ mɛ n zawr a bɛ dʋn ƴãw.

³⁷A Urubɛn bʋʋrɛ tɩ lɛb'a mɛ Hɛsɩbon, Eleale, Kiriyatayim,

³⁸Nebo, Baal-Mewon nɩ Sivima, ɛ́ por yo-paalɛ a tẽ-bɛrɛ a mɩnɛ bɛ na tɩ lɛb mɛ a.

³⁹A Manase bidɛb Makɩɩr bʋʋrɛ tɩ cen nɩ a Galaadɩ vuo pʋɔ tɩ zɛb de a vuo ʋl, diw a Amoritɩ mɩnɛ na tɩ kpɩɛr a be a bɛr.

⁴⁰Lɛ n'a a Moyiir tɩ kʋ̀ bɛ a vuo ʋl bɛ zɩ̃.

⁴¹A Manase bidɛb kãw na dɩ kɛ́ Yayiir a bʋʋrɛ tɩ cen na tɩ zɛb de a Amoritɩ mɩnɛ tẽli a mɩnɛ, por a kɛ́ «Yayiir tẽli.»

⁴²Nova pãa baa cen tɩ zɛb de Kenatɩ, nɩ tẽli-kpɔwlɩ a mɩnɛ. Ʋ tɩ de nɩ a ʋ yúor por'ɩ a tẽ-kpɛ̃ɛ, kɛ́ Nova.