Read Dagara, Northern Sɔr-nɛ́ɛ 36 Bible Online

Sɔr-nɛ́ɛ 36 - Dagara, Northern bible

Sɔr-nɛ́ɛ 36

¹Zuzɛb bʋʋrɛ nɩbɛ bɛ mɩnɛ, na ɩ a Galaadɩ dɔwlʋ yie nɩ-bɛrɛ ɛ́ ɩ Makɩɩr bidɛbr nɩ Manase yan a, tɩ wa na wa páw a Moyiir nɩ a Ɩsɩrayɛl nɩbɛ dɔwlʋ nɩ-bɛrɛ.

²Bɛ tɩ yel'a: «Moyiir i, a lɛ a Sore na tɩ yel kɛ́ fʋ ŋmɛ a gbãw põ a tẽw a Ɩsɩrayɛl nɩbɛ dɔwlʋ a, ʋ mɩ̀ tɩ yel'a kɛ́ fʋ kʋ̀ a tɩ yɛb Selofeadɩ tẽsɔwr a ʋ pɔwyaar[72].

³Ɛcɛ bɛlɛ wa ɩ mɛ̃ bɛ kul'ɩ dɔwlʋ yũo nɩbɛ a, a bɛ tẽsɔwr na ŋmãa nɩ a tɩ dɔwlʋ dem pʋɔ, cen tɩ ƴãw a bɛ dɔwl-paala dem pʋɔ. A lɛ pʋɔ a, a tɩ tẽsɔwr bɛ na ŋmɛ a gbãw ír kʋ̀ tɩ a kʋ̃ cãà zɛ̃ a zɛ̃a ɩ.

⁴Lɛb waar mɩ̀, a Pʋ-pɩɛlʋ[73] yũon wa ta a, a bɛ tẽsɔwr na ɩ n a bɛ dɔwl-paala sób a baarɩ.»

⁵A lɛ n'a a Sore tɩ ƴãw a Moyiir ƴãw a nɛ́ɛ á ŋá kʋ̀ a Ɩsɩrayɛl nɩbɛ: «A Zuzɛb bʋʋrɛ nɩbɛ bɛ ŋa tɛr'ɩ yel-mɩŋa.

⁶A na ɩ à ŋá a, nyɛ̃ a lɛ a Sore na yere a Selofeadɩ pɔwyaar ƴãw a: Bɛ na tʋ̃ɔ́ na kul sob nɛ bɛ na bɔbr a, ɛcɛ a ɩ a bɛ sãà yir dɔwlʋ nɩr kãw.

⁷À à ŋá n'a a Ɩsɩrayɛl nɩbɛ tẽsɔwr kʋ̃ mɩ́ ɩ dɔwlʋ ŋa sób, lɛb wa ɩ dɔwlʋ ŋa sób ɛ. Ɩsɩrayɛl nɩr za na mɩ́ ƴãw nɩ fãw tɛr a tẽsɔwr bɛ na kʋ̀ a ʋ dɔwlʋ a.

⁸A dɔwlʋ kãw pʋɔ pɔw wa dɩ gbãw so tẽsɔwr a, a fɛr'a k'ʋʋ kul nɩr na ɩ a ʋ sãà dɔwlʋ nɩr a, a Ɩsɩrayɛl dɔwlʋ za mɩ́ tʋ̃ɔ́ tɛr a tẽsɔwr a ʋ sãàkʋm-kore na kʋ̀ ʋ a.

⁹À ŋá n'a a tẽsɔwr kʋ̃ mɩ́ ɩ dɔwlʋ ŋa sób, lɛb wa ɩ dɔwlʋ ŋa sób ɛ. Ɩsɩrayɛl dɔwlʋ za na mɩ́ ƴãw nɩ fãw tɛr a ʋ tẽsɔwr.»

¹⁰A Selofeadɩ pɔwyaar tɩ ɩ n a lɛ a Sore na yel kʋ̀ a Moyiir a.

¹¹A Mala, Tɩrsa, Hogɩla, Mɩlka nɩ Nowa tɩ kul'ɩ a bɛ sãà yɛbr bidɛbr,

¹²nɩbɛ na ɩ a Zuzɛb bidɛb Manase bʋʋrɛ a. A na ɩ à ŋá a, a tẽsɔwr bɛ na tɩ dɩ a gbãw de a tɩ cãà na be a bɛ sãà dɔwlʋ tẽsɔwr pʋɔ.

¹³A nɛ-ƴãwnɩ nɩ a tub n'ɩ à á ŋá a Sore na tɩ kʋ̀ a Ɩsɩrayɛl nɩbɛ a. Moyiir'ʋ ʋ tɩ tu kʋ̀ bɛ, a Mowab tɩ̃talɛ pʋɔ, a Zurdɛ̃ man nʋɔr, tori a Zeriko.