Read Dagara, Northern Sɔr-nɛ́ɛ 5 Bible Online

Sɔr-nɛ́ɛ 5 - Dagara, Northern bible

Sɔr-nɛ́ɛ 5

¹A Sore tɩ yel'ɩ a Moyiir à ŋá:

²«Yel a Ɩsɩrayɛl nɩbɛ kɛ́ bɛ diw a bɛlɩ dem za na tɛr dɛwr a bɛr a laɩ pʋɔ: a bɛl na tɛr kɔnʋ bʋʋrɛ kãw a, bɩɩ a bɛl a bɛ dɛblʋ bɩɩ a bɛ pɔwlʋ na tɛr bàalʋ a, bɩɩ a bɛl na tɔ kũu a.

³Nyɩ na diw bɛ na bɛr a laɩ pʋɔ, a pɔwbɛ nɩ a dɛbr za, kɛ̀ bɛ ta dɛw a Ɩsɩrayɛl nɩbɛ laɩ bɛr ɛ, bɛl sɔgɔ ɩ̃ na kpɩɛr a.»

⁴A Ɩsɩrayɛl nɩbɛ tɩ ɩ n a lɛ a Sore na yel kʋ̀ a Moyiir a: bɛ tɩ diw nɩ a bɛlɩ dem za na tɛr dɛwr a bɛr a laɩ pʋɔ.

⁵A Sore tɩ yel'ɩ a Moyiir á ŋá:

⁶«Ƴɛ̀r à ŋá a Ɩsɩrayɛl nɩbɛ zie: dɛb bɩɩ pɔw wa màl nɩr a, ʋ tɛr'ɩ sãwna a Sore zie.

⁷A fɛr'a k'ʋʋ wo a sãwna ʋ na sãw a, ɛ́ lɛb tɩr a sãwna bom kʋ̀ a ʋ sob, ɛ́ cãà lɛb dɔwl'ʋ a bom nɛ daarʋ na põ ziir anũu a zi-been sob ƴãw pʋɔ.

⁸A bom sob wa kpi, ɛ́ a ʋ nɩr kãw za bɛ ka be bɛ na kʋ̀ ʋ a bom a, a Sore n'ʋ bɛ na kʋ̀ a bom nɛ, a pɛr lɛ k'aa bàwr-maalɛ n'ʋ bɛ na kʋ̀. A sãwna sob na tɩr'ɩ pʋ́ra ƴãw pʋɔ lɛb-kpɛ-taa bàwr maalʋ ƴãw, a bàwr-maalɛ tʋ̃ɔ́ tu n a suur-dɩ-kʋ̀b tub a ʋ ƴãw.

⁹A Ɩsɩrayɛl nɩbɛ wa ír bom de-kʋ̀b bom pʋɔ bɛ na kʋ̀ a Naaŋmɩn a, a bàwr-maalɛ so a ʋlɩ bom nɛ.

¹⁰Nɩr wa de bom kʋ̀ a Sore a, a bàwr-maalɛ n'ʋ bɛ mɩ́ kʋ̀. Bom nɛ nɩr na kʋ̀ bàwr-maalɛ a, a bàwr-maalɛ so ʋ.»

¹¹A Sore tɩ yel'ɩ a Moyiir à ŋá:

¹²«Ƴɛ̀r a Ɩsɩrayɛl nɩbɛ zie yel bɛ à ŋá: “Pɔw na kul sɩr a na tʋ̃ɔ́ na ɩ ɩb na bɛ vɩɛl a, zu a sɩr.

¹³Ʋ sãw nɩ a ʋl mɩŋa yúor, sɔwlɩ gã nɩ dɛb-yũo. A ʋ sɩr kʋ̃ tʋ̃ɔ́ manɩ wul kɛ́ sɩza n'a ɩ, nɩr za na bɛ nyɛ̃ a ƴãw, ɛ́ bɛ mɩ̀ bɛ nyɔw ʋ a faa maalʋ zu a ƴãw.

¹⁴Ɛcɛ nyuur tɩ̀ɛrʋ kpɛ n a sɩr, ʋ tɩ́ɛrɛ k'aa ʋ pɔw tõ n vĩ-tome. Dɛb mɩ̀ na tʋ̃ɔ́ na tɩɛrɛ k'aa ʋ pɔw tõ n vĩ-tome, ɛ́ a bɛ ɩ sɩza ɩ.

¹⁵A yele ayi á ŋá pʋɔ a, a sɩr na tɛr'ɩ a ʋ pɔw cen nɩ a bàwr-maalɛ zie, lãw tɛr'ɩ a de-kʋ̀b bom na càarɩ a ʋ pɔw a, a pɛr lɛ kɛ́ ɔɔzʋ zɔ̃ kilo[6] ata. Ʋ bɛ cire kãá ƴãwn a zɔ̃ á ŋá zu ɛ, mɩ̀ bɛ ƴãwnɛ tɩ-suur-zɔ̃-na-nyùur-vla-vla-a ɩ. Bʋ̃ʋ n'ʋ vɛ̃, nyuur tɩ́ɛrʋ de-kʋ̀b bom'ʋ, sãwna bɛ na bɔbr kɛ́ bɛ wo a ƴãw.

¹⁶A bàwr-maalɛ na tɛr'ɩ a pɔw cen nɩ a zi-sõw pʋɔ, ʋ tɩ àr a ɩ̃ bàwr-maal-kuur niŋé.

¹⁷Ʋ na ɩ n kʋ̃ɔ-sõw[7] ƴãw tanɛ bom pʋɔ, ɛ́ 'wɔ̃w a kpɛb-zi-sõw tẽsɔw tanɛ ƴãw.

¹⁸Ʋ na cɛ̀r'ɩ a pɔw na àr a mãa Sore niŋé a zukɔbɛ[8] bɛr, al pùorí ʋ de a de-kʋ̀b bom na na wo a sãwna a ƴãw a pɔw nuru pʋɔ, a pɛr lɛ k'aa nyuur tɩ̀ɛrʋ de-kʋ̀b bom. Ʋl mɩŋa na tɛr'ɩ a ŋmɛ-ƴãw kʋ̃ɔ-tuo a ʋ nuru pʋɔ.

¹⁹A bàwr-maalɛ na ƴãw na a pɔw pɔ, ʋʋ yel ʋ à ŋá: “Alɛ bɛ wa ɩ sɩza dɛb gã nɩ fʋ, fʋ ɩ ɩb na bɛ vɩɛl a, fʋ zu a fʋ sɩr sãw a fʋ̃ʋ mɩŋa yúor a, a kʋ̃ɔ-tuo á ŋá ŋmɛ-ƴãw, a ta páw fʋ ɛ!

²⁰Ɛcɛ sɩza wa n'a fʋ zu a fʋ sɩr sãw a fʋ̃ʋ mɩŋa yúor a, dɛb-yũo na bɛ ɩ a fʋ sɩr a wa gã nɩ fʋ a,

²¹a Sore, ʋ ɩ a fʋ pʋɔ ʋ ɩ pʋ-ãan, ɛ́ fʋ kpel púor! A fʋ tẽ-bi-taabɛ mɩ́ wa pɔrɛ lãwnɩ ŋmɛ-ƴãw a, bɛ̃ɛ por a fʋ yúor.

²²A kʋ̃ɔ á ŋá na waar'ɩ ŋmɛ-ƴãw a, a kpɛ a fʋ púorí ɩ fʋ kpel púor, ɛ́ a fʋ pʋɔ ɩ pʋ-ãan!” A pɔw na sɔw na: “Amɛn! Ʋ̃ʋ, a ɩ a lɛ!”

²³A bàwr-maalɛ na sɛb'ɩ a ŋmɛ-ƴãw ƴɛ̀r-bie, ɛ́ tõ a a kʋ̃ɔ-tuo pʋɔ pɛ́w a ƴãw.

²⁴Ʋ na kʋ̀ n a kʋ̃ɔ-tuo a pɔw ʋ nyũ, k'aa kʋ̃ɔ á ŋá na waar'ɩ ŋmɛ-ƴãw a kpɛ a ʋ púorí.

²⁵Ɛcɛ ʋ na de nɩ niwn lɛb de a nyuur de-kʋ̀b bom a pɔw nuru pʋɔ. Ʋ na tur ʋ na kʋ̀ a Sore, mɛ̃ a lɛ bɛ na mɩ́ tu de a bom tɩr a, ɛ́ wa n ʋ a bàwr-maal-kuur pɛr.

²⁶Ʋ na 'wɔ̃w nɩ nũ-ɓal zɔ̃ bɛ na bʋɔlɛ “cãà-bãwnɩ[9]” a nyɩw a bàwr-maal-kuur zu. Al pùorí ʋ ƴãw a pɔw nyũ a kʋ̃ɔ.

²⁷Ʋlɛ wa nyũ a, yel ŋa n'ʋ na ɩ: ʋlɛ wa sɩrɩ sãw a ʋ yúor, zu a ʋ sɩr a, a kʋ̃ɔ na waar'ɩ a ŋmɛ-ƴãw a na kpɛ n a ʋ púorí ɩ ʋ kpel púor ɛ́ a ʋ pʋɔ ɩ pʋ-ãan. Lɛ n'a a ʋ tẽ-bi-taabɛ wa ŋmɩɛr ƴãwn a, a ʋ yúor'ʋ bɛ na mɩ́ por.

²⁸Ɛcɛ a pɔw bɛ wa sãw a ʋ yúor a, ʋ bɛ tɛr dɛwr ɛ, bɛ na yel'a k'ʋʋ bɛ tɛr sãwna ɩ, ʋʋ na tʋ̃ɔ́ na cãà dɔwr bibiir.»

²⁹«A nʋɔr'ɩ à ŋà na càarɩ a nyuur tɩ́ɛrʋ a. Ʋ càar'ɩ pɔw na bɛ ɩrɛ vla, ɛ́ sãwnɛ a ʋl mɩŋa yúor zure nɩ a ʋ sɩr a.

³⁰Ʋ mɩ̀ càar'ɩ dɛb nyuur tɩ́ɛrʋ na kpɛ, ʋ tɩ́ɛrɛ k'aa ʋ pɔw zure ʋ na a. A sɩr na ɩ na a pɔw wa a Sore niŋé, a bàwr-maalɛ wa tu a tub á ŋá za a ʋ zie.

³¹Sãwna za bɛ bere a sɩr zie ɩ, ɛcɛ a pɔw wa sãw a, ʋlɛ n'ʋ na tuo a ʋ sãwna.»