Read Dagara, Northern Sɔr-nɛ́ɛ 8 Bible Online

Sɔr-nɛ́ɛ 8 - Dagara, Northern bible

Sɔr-nɛ́ɛ 8

¹A Sore tɩ yel'ɩ a Moyiir à ŋá:

²«Ƴɛ̀r a Aarɔ̃ zie yel ʋ à ŋá: Fʋ̃ʋ wa tɔ̃wnɛ a fɩ̃tɩlɩ a, a fɛr'a k'aa za ayopõi caalɛ a fɩ̃tɩlɩ dɔwlʋ zie nidaa.»

³A lɛ n'a a Aarɔ̃ tɩ ɩ: ʋ tɩ dɔwl'ɩ a fɩ̃tɩlɩ k'aa tʋ̃ɔ́ caalɛ a nidaa, mɛ̃ a lɛ a Sore na tɩ ƴãw a nʋɔr kʋ̀ a Moyiir a.

⁴Salm-zɩɛ n'a bɛ tɩ ŋmɛ n 'hama maal'ɩ a fɩ̃tɩlɩ dɔwlʋ zie, a sɩɛ ƴãw tɩ tɔ a tɩ-puur-pɛ-baara. Bɛ tɩ maal'ʋ na ʋ ɩ mɛ̃ a bʋ̃-mã a Sore na tɩ wul a Moyiir a.

⁵A Sore tɩ yel'ɩ a Moyiir à ŋá:

⁶«Ír a levitɩ mɩnɛ a Ɩsɩrayɛl nɩbɛ pʋɔ, tʋ̃ɔ́ so a bɛ dɛwr bɛr bɛ.

⁷Nyɛ̃ a lɛ a bɛ dɛwr-so-bɛrʋ na na tu a: fʋ na mɩr bɛ na nɩ dɛwr-so-bɛrʋ kʋ̃ɔ, al pùorí bɛ põ a bɛ ƴã-gamɛ kɔblʋ za bɛr, ɛ́ pɛ́w a bɛ kparɩ. Bɛ na lɛb'a vɩɛl a pùorí.

⁸Bɛ na nyɔw nɩ nadɛr, lãwnɩ kukur bome de-kʋ̀b zɔ̃ bɛ na naw nɩ kãá a, ɛ́ a fʋ̃ʋ mɩŋa nyɔw a nadɛr ƴen sob, yel-bier ír-bɛrʋ bàwr maalʋ ƴãw.

⁹Fʋ na bʋɔl'ɩ a Ɩsɩrayɛl nɩbɛ lãw za ɓã taa. Al pùorí fʋ ƴãw a levitɩ mɩnɛ taw ta a ɩ̃ niŋé, a tuor-taa pɛn-sɛw ƴãw. A Ɩsɩrayɛl nɩbɛ na ír'ɩ a nuru dɔwlɩ a bɛ zu.

¹¹A Aarɔ̃ na de nɩ a levitɩ mɩnɛ kʋ̀ m, mɛ̃ de-kʋ̀b bom bɛ na mɩ́ de tɩr a, bɛ ɩ a Ɩsɩrayɛl nɩbɛ de-kʋ̀b bom, ɛ́ bɛ na be n a ɩ̃ tome tob ƴãw.

¹²Al pùorí a, a levitɩ mɩnɛ na ír'ɩ a nuru dɔwlɩ a nadɛɛ ayi zurú. A Aarɔ̃ na kʋ n a kãw kʋ̀ m, a ɩ a yel-bier ír-bɛrʋ bàwr, ɛ́ kʋ a kãw a ɩ nyɩw-a-za-bàwr, ʋʋ bãw tu a yel-bebe suur-dɩ-kʋ̀b tub a levitɩ mɩnɛ ƴãw.

¹³Fʋ na ƴãw na a levitɩ mɩnɛ àr a Aarɔ̃ nɩ a ʋ bidɛbr niŋé, ɛ́ fʋ de bɛ kʋ̀ m, mɛ̃ de-kʋ̀b bom bɛ na de tɩr a.

¹⁴À à ŋá n'a fʋ na ɩ, a levitɩ mɩnɛ be bɛ tʋɔra a Ɩsɩrayɛl nɩbɛ pʋɔ, ɛ́ ɩ a ɩ̃ nɩ-sori.

¹⁵Al pùorí, a levitɩ mɩnɛ na tʋ̃ɔ́ na tone a bɛ tome a tuor-taa pɛn-sɛw pʋɔ.» «A na fɛr'a fʋ ɩ a levitɩ mɩnɛ bɛ vɩɛl, ɛ́ fʋ de bɛ kʋ̀ m bɛ ɩ a ɩ̃ nɩ-sori.

¹⁶Bʋ̃ʋ n'ʋ vɛ̃, mãa so bɛ, mãa sɩrɩ so bɛ a Ɩsɩrayɛl nɩbɛ pʋɔ. Ɩ̃ tɛr bɛ na lɩɛr'ɩ a Ɩsɩrayɛl nɩbɛ bi-dãw-dɔwrɩ.

¹⁷Bʋ̃ʋ n'ʋ vɛ̃, mãa so a Ɩsɩrayɛl nɩbɛ bʋ̃-dãw-dɔwrɩ za, a nɩsaalbɛ dem nɩ a dʋn dem. A na dɛ tĩ a ʋlɩ bibir ɩ̃ na ɩ a Eziptɩ tẽw bʋ̃-dãw-dɔwrɩ za kpi a, ɩ̃ de nɩ a Ɩsɩrayɛl nɩbɛ bi-dãw-dɔwrɩ só bɛ[15].

¹⁸Ɛcɛ ɩ̃ de nɩ a levitɩ mɩnɛ lɩɛr'ɩ a Ɩsɩrayɛl nɩbɛ bidɛb-dãw-dɔwrɩ,

¹⁹ɛ́ de bɛ a Ɩsɩrayɛl nɩbɛ pʋɔ, kʋ̀ a Aarɔ̃ nɩ a ʋ bidɛbr. Bɛ na tone nɩ a bɛ tome a tuor-taa pɛn-sɛw pʋɔ, a Ɩsɩrayɛl nɩbɛ ŋmaarɛ ƴãw, ɛ́ mɩ́ páw a bɛ yel-bebe suur-dɩ-kʋ̀b kʋ̀ bɛ. À à ŋá n'a ɩ̃ kʋ̃ ƴãw dɔwrʋ a bɛlɩ dem nãà wa tawr pɩɛlɛ a zi-sõw zuo a ɩ.»

²⁰A Moyiir, a Aarɔ̃ nɩ a Ɩsɩrayɛl nɩbɛ lãw za tɩ ɩ n a lɛ tɔr za a Sore na tɩ yel kʋ̀ a Moyiir a levitɩ mɩnɛ ƴãw a:

²¹a levitɩ mɩnɛ tɩ so n a bɛ dɛwr bɛr, ɛ́ pɛ́w a bɛ kparɩ. Al pùorí a Aarɔ̃ de bɛ kʋ̀ a Sore, mɛ̃ de-kʋ̀b bom bɛ na mɩ́ de tɩr a, ɛ́ tu a yel-bebe suur-dɩ-kʋ̀b tub nɩ a dɛwr-so-bɛrʋ tub a bɛ ƴãw.

²²A na wa baar'a, a levitɩ mɩnɛ tĩ nɩ a bɛ tome a tuor-taa pɛn-sɛw pʋɔ, ɛ́ a Aarɔ̃ nɩ a ʋ bidɛbr wule bɛ. À à ŋá n'a bɛ tɩ ɩ a lɛ a Sore na tɩ ƴãw a nʋɔr kʋ̀ a Moyiir a levitɩ mɩnɛ ƴãw a.

²³A Sore tɩ cãà na lɛb yel a Moyiir à ŋá:

²⁴«Nyɛ̃ a lɛ fʋ na na tu a levitɩ mɩnɛ ƴãw a: a levitɩ mɩnɛ dɛ mɩ́ wa tɛr yome lɩzɛr'ɩ anũu a, bɛ na mɩ́ ír bɛ na ƴãw bɛ tone a bɛ tome a tuor-taa pɛn-sɛw pʋɔ.

²⁵Bɛlɛ wa tɛr yome lɩz'a ayi nɩ pie a, bɛ na bɛr'ɩ a tome, bɛ kʋ̃ cãà tone ɩ.

²⁶Bɛ na tʋ̃ɔ́ na mɩ́ sõwne a levitɩ mɩnɛ bɛl na cãà tone a, a tuor-taa pɛn-sɛw kaafʋ ƴãw, ɛcɛ bɛ kʋ̃ tʋ̃ɔ́ cãà tɛr bɛ tʋɔra tõ-nʋɔr ɛ. À à ŋá n'a fʋ na cɔbrɩ a levitɩ mɩnɛ tõ-nʋɔr.»