Read Dagara, Northern Mise 1 Bible Online

Mise 1 - Dagara, Northern bible

Mise 1

¹Ƴɛ̀rʋ á ŋá n'a a Sore tɩ ƴɛ̀r kʋ̀ a Moresɛtɩ[1] tẽw Mise, a Zuda tẽw na-mɩnɛ Yotam, Akaazɩ nɩ Ezekɩasɩ daar. A bʋ̃-nyɛrɩ ʋ na nyɛ̃ a, a càar'ɩ a Samaari nɩ a Zerizalɛm ten.

²Nyɩɩm nɩ-bʋʋrɛ za a, nyɩ bɛrɛ wone. Tẽw i, cɛlɛ vla, fʋ̃ʋ nɩ bom za na paalɩ fʋ a! A Sore Naaŋmɩn na be n a ʋ kpɛb zie na ɩ sõw a pʋɔ, ɛ́ yere a nyɩ sãwna.

³A Sore n'ɩ ŋan yire a ʋ kpɛb zie, ʋ siwr'a waar, ʋ cere nɩ a tẽw tan nyɛɛ zu.

⁴A tan nyɩlɛ nɩ a ʋ gbɛ́ɛ pile, ɛ́ a tan fʋɔlɩ wɛrɛ mɛ̃ sɩ-suur na mɩ́ nyɩl vũumí a, mɛ̃ kʋ̃ɔ na mɩ́ yi gbĩgbin zu gbɔlɛ siwr a.

⁵A Zakɔb bʋʋrɛ bɛ-wonu, a Ɩsɩrayɛl yir dem yel-bebe n'a so à á ŋá za. Ãa n'ʋ so a Zakɔb bʋʋrɛ[2] bɛ-wonu? A Samaari tẽw bɛ n'ʋ ɛ? Ãa n'ʋ so a Zuda nɩbɛ na ƴãwnɛ a tɩbɛ a? A Zerizalɛm tẽw bɛ n'ʋ ɛ?

⁶À ŋá n'a a Sore yere: «Ɩ̃ na ɩ na a Samaari tẽw lɩɛbɩ deboru, ʋ lɩɛbɩ divɛ̃ tɩɩr tẽsɔw-kʋ́ɔra. Ɩ̃ na ɩ n a ʋ kʋsɛbɛ bili siw a fʋɔla pʋɔ, ɩ̃ na ɩ n a ʋ dacine pɛ́ɛ a sãá.

⁷Bɛ na ŋmɛr'ɩ a ʋ ŋmɩmɛ dasuli za bɛr, ɛ́ a bʋ̃-kʋ̀rɩ́ ʋ na páw a, bɛ na lɔb a na ƴãw vũu-zɛlɛ pʋɔ. Ɩ̃ na ƴãw na bɛ ŋmɛr a ʋ tɩbɛ cʋmcʋm, bʋ̃ʋ n'ʋ vɛ̃, ʋ dà n a bome á ŋá za nɩ a ʋ pɔw-yɛm ɩ-ɩrɩ sã-ya libie. A mɩ̀ na lɩɛb'ɩ pɔw-yɛm ɩ-ɩrɩ a mɩnɛ sã-ya libie[3].»

⁸A mãa Mise a, ɩ̃ na kone na ŋmɩɛr'ɩ cɛlsɩ, ɩ̃ na cere nɩ nɩ gbɛ-zawlɛ, ɛ́ tɛr ƴã-gã-kpãkpol. Ɩ̃ na ùore na mɛ̃ a gbõgbo-cili a. Ɩ̃ na kone nɩ a ɩ̃ kpɩɛrʋ kon mɛ̃ kʋlãdisowli a.

⁹A dɔwrʋ na páw a Samaari a bɛ tɛr tɩ̃ɩ ɛ, a ta n a Zuda tẽw tɛɛ za, a Zerizalɛm dɩ̃dɛɛ ƴãw, a be a ɩ̃ nɩ-bʋʋrɛ na kpɩɛr a.

¹⁰Nyɩ ta manɛ a yel ŋa a Gatɩ tẽw pʋɔ ɩ, nyɩ ta cire mʋta-kʋ̃ɔ ɩ. Nyɩ ɓiile a tanɛ pʋɔ a Bɛtɩ-Leafʋra tẽw pʋɔ[4].

¹¹Safɩɩr tẽw dem i, nyɩ yi lo a tẽ-yũo sɔ́r, nyɩ tɔlɛ nɩ a nyɩ ƴã-gã-kpãkpole vĩ. A Saanan tẽw dem bɛ sàwr yire a bɛ tẽw pʋɔ ɩ. A Bɛtɩ-Esɛl tẽw dem kone na, taw-lanʋ zie kãw za bɛ cãà be a ʋ pʋɔ ɩ.

¹²A Marɔtɩ tẽw dem zɔrɛ nɩ dɛ̃bɩ̃ɛ a bɛ ƴã-ɓaarʋ ƴãw. Bʋ̃ʋ n'ʋ vɛ̃, a kpɩɛrʋ na yi a Sore zie a, ta n a Zerizalɛm dɩ̃dɛɛ ƴãw.

¹³Lakisɩ tẽw dem i, nyɩ caw a wie a torkori, nyɩ cɔwr'ɩ a Ɩsɩrayɛl nɩbɛ sãwna, taw a Zerizalɛm ƴãw a yel-bier pʋɔ.

¹⁴Alɛ n'a a fɛr kɛ́ nyɩɩm nɩ a Moresɛtɩ-Gatɩ tẽw dem bʋ́r taa. A Akizivʋ tẽw ƴãw a, ʋ kʋ̃ tɛr sõwfʋ kãw za a Ɩsɩrayɛl nɩbɛ na-mɩnɛ ƴãw ɛ.

¹⁵Maaresa tẽw dem i, a Sore na bɛr'a nɩ-yũo lɛb zɛb tʋ̃ɔ́ nyɩ. A Ɩsɩrayɛl na-yée na zɔ na cen tɩ sɔwlɩ a Adulam tãw bɔw pʋɔ.

¹⁶Nyɩ põ a nyɩ zuru, nyɩ fɔr a bɛr, Zerizalɛm tẽw dem i! A nyɩ zuru, a kpal mɛ̃ sidum zu a, nyɩ kone a nyɩ bibiir nyɩ na nɔnɛ a, bʋ̃ʋ n'ʋ vɛ̃, bɛ na diw bɛ nɩ a bɛ tẽw pʋɔ cen nɩ gbãgbaalʋ pʋɔ, bɛ zãá nɩ nyɩ.