Read Dagara, Northern Mise 5 Bible Online

Mise 5 - Dagara, Northern bible

Mise 5

¹A Sore yere na: «Ɛ́ fʋ̃ʋ Bɛtɩlɛm Efarata a, fʋ ɩ n tẽle lɛ a Zuda dɔwlʋ ten pʋɔ. Ɛcɛ a fʋ pʋɔ n'a ɩ̃ na ɩ a sob nɛ na na dɩrɛ naalʋ a Ɩsɩrayɛl bʋʋrɛ zu a ɩ̃ yúor ƴãw a, ʋ yi. A tẽ-kor daar za n'a ʋ tɩ be.

²A Sore na jɛ n a ʋ nɩ-bʋʋrɛ bɛr, ɛ́ gùre a daar nɛ a pɔw, a na fɛr k'ʋʋ dɔw a, nãà wa dɔw a. Lɛ n'a a bɛlɩ dem na na cãà vʋʋrɛ a gbãgbaalʋ pʋɔ, a diw-cenu pùorí a, na lɛb wa wa páw a Ɩsɩrayɛl nɩbɛ ŋmaarɛ.

³Ɛ́ a nãà ʋl na na wa a, ʋ na kaarɛ nɩ a ʋ nɩbɛ zie, nɩ a Sore fãw, nɩ a Sore ʋ Naaŋmɩn yúor-vɩɛlʋ-danʋ. A ʋ nɩbɛ na tɛr'ɩ ƴã-ɓaarʋ, bʋ̃ʋ n'ʋ vɛ̃, ʋ na ɩ n kpɛ̃ɛ tɩ tɔ a tẽw baarʋ zie.

⁴Ʋlɛ n'ʋ na wa n a ƴã-ɓaarʋ. A Asiiri tẽw dem wa kpɛ paalɩ a tɩ tẽw ɛ́ kpɩɛr a tɩ yir-vɩɛlɩ vɩɛlɩ pʋɔ a, tɩ na ƴãw na na-mɩnɛ yaga yaga yi a bɛ ƴãw.

⁵Bɛ na dɩ n naalʋ a Asiiri tẽw nɩ a Nemirodi[8] tẽw zu nɩ a bɛ zɛbr bome. A nãà na na wa a na faa tɩ nɩ a Asiiri nɩbɛ nuru pʋɔ, bɛlɛ wa gãw a tɩ tʋr-bɔw, ɛ́ kpɛ paalɩ a tɩ tẽw a.»

⁶A Ɩsɩrayɛl nɩbɛ na cɛ nɩ-bʋʋr-yoru viiri koli a, na ɩ na mɛ̃ Sore ɓɩɛlʋ a, mɛ̃ saa na mɩ́ wa ƴãw a mʋ̃ɔ a. Bɛ bɛ gùre bom za nɩsaal zie ɩ, bɛ bɛ tɩɛrɛ bom páwfʋ nɩsaal zie ɩ.

⁷A Ɩsɩrayɛl nɩbɛ na cɛ nɩ-bʋʋr-yoru viiri koli a, na kpɛmɛ na mɛ̃ gbẽw wɛ-dʋn sɔgɔ a, mɛ̃ gbẽw-pɔl píir sɔgɔ a. Be za ʋ na mɩ́ tɔlɛ a, ʋ mɩ́ nyɔwr'ɩ a bome tawr ŋmarɛ, ɛ́ nɩr kʋ̃ tʋ̃ɔ́ faa a, a ʋ zie ɩ.

⁸«Ìr a fʋ dɔ̃ dem ƴãw, ŋma bɛ pʋrpʋr bɛ za!»

⁹A Sore yere na: «Bio waar'a na vɩɛ, ɩ̃ na kʋ a nyɩ wie pàw pɛr, ɛ́ ɩ a nyɩ zɛbr-torkori a bɔr.

¹⁰Ɩ̃ na ŋmɛr'ɩ a nyɩ tẽw tẽ-bɛrɛ bɛr, ɩ̃ na dà n a nyɩ zɛbr-yir-kpɛn lɔb.

¹¹Ɩ̃ na ɩ na a nyɩ sɔ-yele za baarɩ, ɩ̃ na ŋmɛ n tɩtɩblʋ za na be a nyɩ nuru pʋɔ a lɔb.

¹²Ɩ̃ na ŋmɛ n a nyɩ tɩbɛ ŋmɛr, nɩ a nyɩ kʋsɛ-teli, nyɩ kʋ̃ lɛb puori a nyɩ nuru bʋ̃-maalɩ ɛ.

¹³Ɩ̃ na vɔ̃ n a nyɩ dà-barɩ bɛr, ɛ́ ŋmɛr a nyɩ tẽ-bɛrɛ bɛr.

¹⁴A ɩ̃ su-yãyaar na ìr'a, ɩ̃ na yáa nɩ a san a nɩ-bʋʋrɛ bɛl na bɛ sàw a ɩ̃ nʋɔr a zu.»