Read Dagara, Northern Mise 6 Bible Online

Mise 6 - Dagara, Northern bible

Mise 6

¹Nyɩ bɛrɛ wone a lɛ a Sore na yere a: «Ìr cen tɩ dɩ ƴɛ̀rʋ ƴɛ̀r kpɛ m, yel a lɛ ɩ̃ na nyɛ̃ a, a tã-bɛrɛ nɩ a tãli niŋé.»

²Nyɩɩm tan ɩ, nyɩ bɛrɛ wone, nɩ nyɩɩm tẽsɔw pɛ́ɛ na bɛ be na dam a: a Sore tɛr'ɩ nɩ a ʋ nɩbɛ ƴɛ̀rʋ, ʋ sowre nɩ yele a Ɩsɩrayɛl nɩbɛ.

³Ʋ sowre bɛ na: «Ɩ̃ nɩbɛ ɛ, bʋ̃ʋ n'ʋ ɩ̃ ɩ nyɩ? Bʋ̃ʋ n'ʋ ɩ̃ ɩ bàl nyɩ? Nyɩ sɔw kʋ̀ m!

⁴Ɩ̃ na tɛr nyɩ yi n a Eziptɩ tẽw a n'a bɩɩ? Ɩ̃ na faa nyɩ a gbãgbaalʋ pʋɔ a n'a so bɩɩ? Bɩɩ ɩ̃ na ƴãw a Moyiir, a Aarɔ̃ nɩ Miriyam[9] de nyɩ niwn a n'a so o?

⁵Ɩ̃ nɩbɛ ɛ, nyɩ lɛb tɩɛrɩ a lɛ a Mowab tẽw nãà Balakɩ na tɩ bɔbr k'ʋʋ ɩ nyɩ faa a. Nyɩ lɛb tɩɛrɩ a lɛ a Bewɔɔr bidɛb Balaam na tɩ sɔw ʋ a. Al pùorí, ɩ̃ bɩɛlɩ nyɩ nɩ a Sitim tẽw tɩ sãá nɩ a Gilgal tẽw. Lɛ n'a nyɩ tʋ̃ɔ́ nyɛ̃ a gãda-tome a mãa Sore na tõ a nyɩ ƴãw a.»

⁶«Bʋ̃ʋ n'ʋ ɩ̃ na tɛr wa n a Sore niŋé? Bʋ̃ʋ n'ʋ ɩ̃ na gbĩ n dume a Sore, a Naaŋmɩn-na-do-saa-bɛ-pɩɛl-a niŋé? Yũon-been nadeli n'a ɩ̃ na maal'ɩ nyɩw-a-za-bagɛ kʋ̀ ʋ bɩɩ?

⁷Pʋ́rɩ na yãwmɛ bɛ tɛr nʋɔr a n'a a Sore bɔbr bɩɩ? Kãá na gbɔlɛ mɛ̃ mamɛ kʋ̃ɔ a n'a bɩɩ? A ɩ̃ bidɛb-dãw n'ʋ ɩ̃ na de tɩr a ɩ̃ sãwna ƴãw bɩɩ? A ɩ̃ bʋ̃-dɔwra n'ʋ ɩ̃ na tɩr a ɩ̃ yel-bier ƴãw bɩɩ?»

⁸Nɩsaal i, a Sore ɩ na fʋ bãw a ʋlɩ bom nɛ na vɩɛl a, nɩ a ʋlɩ bom nɛ ʋ na bɔbr a fʋ zie a: bom za bɛ n'ʋ, a bɛ ɩ kɛ́ fʋ tuur a yel-mɩnʋ, kɛ́ fʋ tɛr nɔ̃wfʋ ɩ-ɩrɩ, ɛ́ tɛr fʋ tʋɔra-siwru a fʋ Naaŋmɩn zie ɩ.

⁹A Sore ƴɛ̀rɛ nɩ a Zerizalɛm tẽ-kpɛ̃ɛ nɩbɛ zie, ʋʋ na faa nɩ a bɛlɩ dem na ƴãwnɛ ʋ a. «Nyɩ bɛrɛ wone, Zuda dɔwlʋ nɩbɛ ɛ, nyɩɩm za na ɓã taa a tẽw pʋɔ a.

¹⁰A nyãnyu-bome a po-to-dem na mɩ́ bɔ gbõ taa a bɛ yie pʋɔ a, a bʋ̃-mánɩ na bɛ ɩ a ɛ́ bɛ manɛ nɩ a, — ɛ́ a lɛ bɛ vɩɛl towtow a —, ɩ̃ na tʋ̃ɔ́ na nyɛ̃ kɛ́ bɛr bɩɩ?

¹¹A bɛlɩ dem na mɩ́ manɛ nɩ bʋ̃-keri na bɛ tori a, ɛ́ ƴãw a tɩbrʋ bʋ̃-mánɩ na bɛ ɩ a a bɛ vʋɔrɩ pʋɔ a, ɩ̃ na tʋ̃ɔ́ na yel kɛ́ bɛ bɛ tɛr sãwna ɩ?

¹²A tẽw ŋa tɛra dem tɛr'ɩ po-to-fãw-ɩb yaga za, a ʋ nɩbɛ ŋmarɛ nɩ ziri bɛ̀lɛ nɩ a bɛ taabɛ.

¹³A lɛ n'a so ɩ̃ tĩ ŋmɩɛr nyɩ, ŋmɩɛrʋ na na wa n a nyɩ loba, a nyɩ yel-bebe zũú a.

¹⁴Nyɩ na mɩ́ dɩ na, ɛ́ kʋ̃ tɩw ɛ, a nɩbɛ na kone nɩ kɔ̃ a nyɩ tẽw! A al nyɩ na mɩ́ gbab bin a kʋ̃ mɩ́ gã ɩ, ɛ́ nyɩmɛ wa maal bin bom a, ɩ̃ na ɩ na zɛbr ìr sãw ʋ bɛr.

¹⁵Nyɩ na mɩ́ bʋ̀r'a, ɛ́ kʋ̃ cɛ ɩ. Nyɩ na mɩ́ tɔ n a olivʋ tɩ-wɔmɛ kãá, ɛ́ kʋ̃ zɛ a kãá ɩ. Nyɩ na mɩ́ nɛb'ɩ a divɛ̃ tɩ-wɔmɛ, ɛ́ kʋ̃ nyũ a divɛ̃ ɩ.

¹⁶Nyɩ tuur'ɩ a nãà Omiri[10] nɩ a ʋ bidɛb Akab yir ɩ-faar nɛ́ɛ. A bɛ wulu n'a nyɩ tuur. A lɛ n'a so ɩ̃ na ɩ a nyɩ tẽw ʋ lo, ɛ́ ɩ a nyɩɩm na kpɩɛr a ʋ pʋɔ a, nyɩ ɩ nɩ-ɩ-laarɩ. Ɛ́ nyɩ na nyɛ̃ nɩ a vĩ ʋl a ɩ̃ nɩ-bʋʋrɛ na nyɛ̃ a.»