Read Dagara, Northern Habakukɩ 1 Bible Online

Habakukɩ 1 - Dagara, Northern bible

Habakukɩ 1

¹A ƴɛ̀rʋ ŋa n'ʋ a Naaŋmɩn ɩ a ʋ ƴɛ̀r-manɛ Habakukɩ bãw, yel-nyɛra pʋɔ.

²Sore e, debor'a ɩ̃ na bʋɔlɩ fʋ a ɩ̃ faafʋ ƴãw tɩ ta, ɛ́ fʋ bɛ bɛrɛ wone? Ɩ̃ kone nɩ a po-to-fãw-ɩb na ɩrɛ a ƴãw, ɛ́ fʋ bɛ faarɛ tɩ ɛ.

³Bʋ̃ʋ n'ʋ so fʋ ɩ ɩ̃ nyɛrɛ a faalʋ? Ŋmɩŋmɩn za n'a fʋ sàw jɩ́rɛ a tɩ kpɩɛrʋ? Dɔwrʋ nɩ po-to-fãw-ɩb'ɩ á ŋá a ɩ̃ niŋé, ƴɛ̀rʋ-dɩb nɩ zɛbr be n a ziir za.

⁴Bɛ bɛ cãà tuur a nɛ-ƴãwnɩ ɛ, a ƴɛ̀rʋ bɛ cãà dɩrɛ a tore ɩ, a nɩ-faa tʋ̃ɔ́ nɩ a nɩ-mɩŋa, ɛ́ a ƴɛ̀rʋ na mɩ́ dɩ a bɛ mɩ́ tu sɔ́r ɛ.

⁵A Sore yere na: «Nyɩ jɩ́r a nɩ-bʋʋr-yoru pʋɔ nyɛ̃. Nɔ-ɓãan, ʋ́ nyɔw nyɩ! Ton kãw na tõ n a nyɩ daar, kɛ̀ nɩr tɩ n'ʋ manɛ ʋ kʋ̀rɛ nyɩ a, nyɩ kʋ̃ʋ sàw ɛ.

⁶Bʋ̃ʋ n'ʋ vɛ̃, ɩ̃ ƴãw na a Babɩlɔn tẽw nɩbɛ waar, nɩ-bʋʋrɛ na kpɛ po-tuo ɛ́ tʋlɛ a. Bɛ zɔrɛ na cɔlɛ a tẽ-daa na cere 'hɛbɛpɛpɛ a, kɛ́ bɛ fa ziir bɛ na bɛ so a tɛr.

⁷Bɛ ɩrɛ nɩ dɛ̃bɩ̃ɛ, ɛ́ bɛ tɛr dɩ̃ɛnʋ ɛ, bɛlɛ nɛbɛ mɩ́ ŋmɛ nyãa yel a lɛ-na-tu-sɔr-a, nɩ a bɛ na tɛr fãw zuo nɩbɛ za a.

⁸A bɛ wie garɛ na zuo nyoru, a zɔrɛ nɩ fɔ̃w zuo a wɛ-baar na mɩ́ bawlɛ a zaanʋɔra a. A bɛ wi-zɔmnbɛ garɛ na, bɛ yi n zi-zãána ɛ́ waar, bɛ ƴaw na waar mɛ̃ sɩla na siwr fiii a ʋ bʋ̃-dɩra zu a.

⁹Bɛ waar'ɩ bɛ za a po-to-fãw-ɩb ƴãw, a bɛ niŋe tori nɩ nidaa, bɛ nyɔwr'ɩ a nɩ-pàwrɩ ɓanɛ taa, bɛ́ yãwmɛ mɛ̃ biire a.

¹⁰Bɛ ɩrɛ nɩ a na-mɩnɛ laar, ɛ́ a ten nɩ-bɛrɛ ɩ nɩ-ɩ-laarɩ a bɛ zie. Bɛ tobr bɛ ka zɛbr-yir-kpɛn ƴãw ɛ: bɛ mɩ́ kaal'ɩ tanɛ ɓã taa a do, ɛ́ bɛ zɛb de a been been.

¹¹Bɛ tɔlɛ na mɛ̃ sɛsɛb kpɛ̃ɛ a, bɛ dãwnɛ nɩ taa wɩɛr zi-yoru, bɛl na mɩ́ de a bɛ fãw ʋ ɩ ŋmɩn a.»

¹²A pɛr-tib daar za, fʋ̃ʋ n'ɩ a Sore, fʋ ɩ n a ɩ̃ Naaŋmɩn, na ɩ sõw ɛ́ bɛ tɛr kũu daar a. Sore e, fʋ̃ʋ ɩ̃ pìir na gùre mɛ̃ a, fʋ kaa na ír a nɩ-bʋʋrɛ bɛ ŋa, a Babɩlɔn tẽw dem, ɩ kɛ̀ bɛ kpɛmɛ, kɛ́ bɛ tʋ̃ɔ́ tu a lɛ fʋ na dɩ n tɩ a ƴɛ̀rʋ bin a.

¹³A fʋ mimie vɩɛl'a zuo, nɩ a yel-faa fʋ na na jɩ́rɛ a, fʋ kʋ̃ tʋ̃ɔ́ sàw jɩ́rɛ a kpɩɛrʋ ɛ. Ɛ́ bʋ̃ʋ n'ʋ so fʋ sàw bɛlɛ a gɛgɛrɩ bɛ ŋa ɩb, ɛ́ bɛ ƴɛ̀rɛ ƴɛ̀rʋ? Bʋ̃ʋ n'ʋ so a nɩ-faar mɩ́ báarɛ nɩbɛ na ɩ nɩ-mɩn zuo bɛ a, ɛ́ fʋ ɩ gbili?

¹⁴Bʋ̃ʋ n'ʋ so fʋ de a nɩsaalbɛ bɛ ɩ mɛ̃ kʋ̃ɔ-kpɛ̃ɛ zʋ́mɛ́ a, mɛ̃ bʋ̃-vuri na bɛ tɛr kaarɛ a?

¹⁵A Babɩlɔn tẽw dem nyɔwr'ɩ a nɩbɛ mɛ̃ zʋ́m bɛ na nyɔw nɩ zʋm-pĩi a, bɛ mɩ́ nyɔw bɛ nɩ a bɛ mɩ̃ɛnɩ pʋɔ. Lɛ n'a nʋ̃ɔ̀ mɩ́ ɩrɛ bɛ, bɛ cɩlɛ bɛ za.

¹⁶Bɛ mɩ́ maal'ɩ bàwr kʋ̀ a bɛ mɩ̃ɛnɩ, ɛ́ nyɩw tɩ-suur-zɔ̃-na-nyùur-vla-vla-a kʋ̀ a, alɛ na n'a mɩ́ so bɛ páw bʋ̃-dɩrɩ a, bʋ̃-dɩ-yaga, bʋ̃-dɩ-nʋʋr a.

¹⁷A ɩ à ŋá, bɛ kʋ̃ bɛr a bɛ zɛbr-sɔ-bɛrɛ vɔb towtow, bɛ na mɩ́ vɔnɛ kʋrɛ nɩ a nɩ-bʋʋr-yoru, ɛ́ bɛ zɔrɛ nɩbaalʋ ʋ?