Read Dagara, Northern Habakukɩ 2 Bible Online

Habakukɩ 2 - Dagara, Northern bible

Habakukɩ 2

¹Mãa a, ɩ̃ na àr'ɩ a ɩ̃ zi-gùre àrʋ zie, ɩ̃ na àr'a gù mɛ̃ zi-piwre na àr a dacĩ-kpɛ̃ɛ zu a, k'ɩ̃ɩ tʋ̃ɔ́ bãw a ʋlɩ bom nɛ a Naaŋmɩn na na yel kʋ̀ m a, nɩ a lɛ ʋ na na sɔw a ɩ̃ kpɩɛrʋ kʋ̀ m a.

²A Sore tɩ sɔw mɛ̃ nɩ à ŋá: Sɛb a yel ŋa ɩ̃ na wule fʋ a, wi ʋ́ ƴãw dà-pɛwli zu, bɛ mɩ́ tʋ̃ɔ́ kanɩ ʋ mɔlɛ.

³A daar ʋl a yel ŋa na na ɩ a, bɛ ta sɛr ɛ. Ɛcɛ a ʋ yel-mɩŋa na sãá nɩ a ʋ daar. Bɛr tɩɛrʋ ɛ́ gùre, alɛ saa sãá mɛ̃ a cɛlɛ na a: a ʋlɩ bom nɛ ɩ̃ na yere a na ta na, bʋnʋ bɛ ka be ɩ, a bɛ lɛb kɔwrɛ ɩ.

⁴Sɛb yel: a tɩɛr-faa sob fãw siwre na, ɛcɛ a nɩ-mɩŋa vʋʋrɛ na ʋ na tu a Naaŋmɩn bɛ lɛb pùor a zũú.

⁵Sɩza n'a, a tɛra bɛ vɩɛl ɛ, a pɔ̀lʋ dem bɛ bãw pɩ̃ɛnʋ towtow ɛ, bɛ dɩrɛ nɩ gbogbo mɛ̃ a kpɩmɛ tẽw a, bɛ bɛ tɛr sɛwfʋ ɛ, mɛ̃ a kũu a, bɛ zɛbr'a dier a ten za, bɛ so nɩ a nɩ-bʋʋrɛ za.

⁶Ɛcɛ a nɩ-bʋʋrɛ bɛl bɛ na zɛb tʋ̃ɔ́ a, kʋ̃ lãw taa bɛ za lɔbr zʋkpaɩ kʋ̀rɛ bɛ, ɛ́ ɩrɛ bɛ laar ɛ? Nyɛ̃ a lɛ bɛ na na yere a: Baw-bio páw nyɩ na! Nyɩ wobr'ɩ bome nyɩ na bɛ so a, gbone taa na tɩ ta n debor? A nyɩ san tɩbrʋ dɔwlɛ na cere.

⁷A nyɩ samɛ dem kʋ̃ʋ wa ùr wa ɩ? A bɛlɩ dem na na dam dam nyɩ a, bɛ kʋ̃ ìr bɩɩ? Bɛ mɩ̀ na fa n a nyɩ bome.

⁸Nyɩ fá n nɩ-bʋʋr-yaga, a nɩ-bʋʋrɛ bɛl na cɛ a mɩ̀ na fá nyɩ na. A nɩsaal zɩ̃ɩ nyɩ na ɩ a cir a ƴãw, a po-to-fãw-ɩb nyɩ na ɩ, a tẽw za, a tẽ-bɛrɛ nɩ a nɩbɛ na kpɩɛr a pʋɔ a ƴãw.

⁹Baw-bio páw nyɩ na! Nyɩ páwr'ɩ dɔwlɛ na bɛ sɛw a kʋ̀rɛ a nyɩ nɩbɛ, kɛ́ nyɩ tʋ̃ɔ́ tɛr àrʋ zie na zɛw a, a kpɩɛrʋ taa páwr nyɩ ɛ.

¹⁰A lɛ nyɩ na tɩɛrɩ a, vĩ n'a a waar'ɩ a nyɩ yir dem ƴãw: a nɩ-bʋʋr-yaga yaga nyɩ na kʋ pàw pɛr a, a nyɩɩm mɩŋa nyɔ-vʋʋrʋ n'ʋ nyɩ sãw.

¹¹A dacine kʋsɛbɛ tɛɛ za na cɩɩrɛ nɩ a nyɩ sãwna, ɛ́ a dĩo wɛwr sɔwr a.

¹²Baw-bio páw nyɩ na! A tẽ-bɛrɛ tɛra a, nyɩ mɩ́ ɩ na a yi a nɩbɛ nyɩ na kʋrɛ ɛ́ dɔwrɛ a zie.

¹³Alɛ so, vũu so a nɩ-bʋʋrɛ tome na dɩ, ɛ́ a ten ten nɩbɛ bàlɛ bɛ tʋɔra zawla. À á ŋá za a, a Sore kpɛnʋ-za-sob zie bɛ n'a a yi ɛ?

¹⁴Yel-mɩŋa, a Sore yúor-vɩɛlʋ-danʋ a nɩbɛ na na bãw a, na paal'ɩ a tẽw, mɛ̃ a lɛ a kʋ̃ɔnɩ na paalɩ pàw a kʋ̃ɔ-kpɛ̃ɛ a.

¹⁵Baw-bio páw nyɩ na! Nyɩ mɩ́ ƴãw nɩ a nyɩ taabɛ bɛ nyũ dãa na bɛ vɩɛl, ɛ́ ɩ mɛ̃ lɔw a, kɛ́ bɛ kuoli yaarɩ a bɛ bʋ̃-suuri, nyɩ nyɛ̃ a bɛ faalʋ.

¹⁶Vĩ n'a nyɩ ƴãwnɛ nyɩ tʋɔra, yúor bɛ n'ʋ nyɩ páwr ɛ. Nyɩ mɩ̀ nyũ a, ɛ́ wul a nyɩ faalʋ! A Sore na fɛr nyɩ na ƴãw nyɩ mɩ̀ nyũ a ʋ suur koli-nyúura pʋɔ divɛ̃ za: a ƴãwfʋ nyɩ na nyɛrɛ a, na lɩɛb'ɩ vĩ.

¹⁷A yele nyɩ na sãw a Libã tẽw a, na lɛb'a lo a nyɩ zu. Nyɩ sãw nɩ dʋn faa faa, dʋn mɩ̀ na ƴãw nyɩ nɩ pʋl-vʋ̃ɔ! À á ŋá za na ta na, a nɩsaalɛ zɩ̃ɩ nyɩ na cir a ƴãw, nɩ a po-to-fãw-ɩb nyɩ na ɩ a tẽw za, a tẽ-bɛrɛ nɩ a nɩbɛ na kpɩɛr a pʋɔ a ƴãw.

¹⁸A tɩbɛ yel-ɩra n'ɩ bo a tɩɩb-maalɛ na mɩ́ maal'a bin a? Kure bʋ̃-maalɩ na mɩ́ ŋmarɛ ziri bɛ mɩ́ sàw de a tɛwr'a. Bʋ̃ʋ ƴãw n'a a nɩsaalɛ na mɩ́ ƴãw a ʋ tɩɛrʋ, a tɩbɛ á ŋá ƴãw na bɛ tɛr nʋɔr ƴɛ̀rɛ, ɛ́ ɩ ʋl mɩŋa n'ʋ maal'a a?

¹⁹«Baw-bio páw nyɩ na! Nyɩ mɩ́ yel'ɩ dà-ŋmãa: “Ìr, ta gúre ɩ!” Ɛ́ yel kʋsɩɛr na gã bɛ ƴɛ̀rɛ a: “Ìr àr!” Ɛcɛ alɛ n'ɩ a ŋan kʋ̃ tʋ̃ɔ́ wul nyɩ bom za nyɩ bãw ɛ. Bɛ na saa nyɩl salm-zɩɛ nɩ salm-pla pàw a a, a bɛ vʋʋrɛ towtow ɛ.

²⁰Ɛcɛ a Sore ʋl be n a ʋ yir-sõw pʋɔ. A tẽ-daa za nɩbɛ, bɛ ŋmãa vʋʋrʋ a ʋ niŋé!»