Read Dagara, Northern Sofoni 2 Bible Online

Sofoni 2 - Dagara, Northern bible

Sofoni 2

¹Nɩbɛ na bɛ zɔrɛ vĩ a, nyɩ ƴãw fãw tɩɛrɩ nyɛ̃, nyɩ nyɔw nyɩ tʋɔra,

²ɛ́ wa bãw ɩ mɛ̃ a ùr na mɩ́ bɔr bibi-been a, ɛ́ a Sore su-tʋlʋ-kpãkpã wa bãw páw nyɩ, ɛ́ a bibir ʋl a suur ŋa na na ìr a, wa bãw vɩɛ.

³Nyɩ bɔbr a Sore, nyɩɩm tẽw bãbàalbɛ za a, nyɩɩm na sàwr a ʋ nɛ-ƴãwnɩ a. Nyɩ bɔbr a mɩnʋ, nyɩ bɔbr a tʋɔra-siwru. Kapaw, nyɩ nãà cɩ̃ɛ nɩ a Sore suur ìru bibir.

⁴Bɛ na zɔ na kɛ́ bɛr a Gaza tẽw, bɛ na ŋmɛr'ɩ a Asɩkalon tẽw bɛr, bɛ na ír'ɩ a Asɩdɔdɩ tẽw nɩbɛ mʋ̃tɔ̃-tuo, ɛ́ diw a Ekiron[6] nɩbɛ bɛr a bɛ tẽ-kpɛ̃ɛ pʋɔ.

⁵Baw-bio dem n'ɩ nyɩ, nyɩɩm na yi a Kafɩtɔɔr[7] wa a, nyɩɩm na kpɩɛr a kʋ̃ɔ-kpɛ̃ɛ nʋɔr a! A Sore ƴɛ̀rɛ nɩ ƴɛ̀rʋ ŋa cáarɛ nɩ nyɩ: «Kanãa, Filisɩtɛ̃ mɩnɛ tẽw i, ɩ̃ na sãw fʋ na bɛr, fʋ kʋ̃ cãà tɛr nɩbɛ ɩ.

⁶A fʋ zie na lanɩ a kʋ̃ɔ-kpɛ̃ɛ a, na lɩɛb'ɩ dʋn mʋ̃ɔ 'wɔbrʋ zie, zie a dʋ̃-cɩ̃ɩnbɛ na so cɔlɛ, ɛ́ maalɛ a bɛ píir zawr a.»

⁷A Zuda nɩbɛ na cɛ a na so nɩ a zie ʋl. Bɛ na àrɛ nɩ nɩ a bɛ dʋn a be, ɛ́ a zaanʋɔra bɛ mɩ́ kpɛ a Asɩkalon yie pʋɔ tɩ gã. Bʋ̃ʋ n'ʋ vɛ̃, a Sore bɛ Naaŋmɩn na wa n a bɛ maalʋ ƴãw, ʋ na lɩɛb'ɩ a bɛ yele.

⁸«Ɩ̃ wõ n a Mowab nɩ a Amɔ̃[8] ten dem na ɩrɛ a ɩ̃ nɩ-bʋʋrɛ laar ɛ́ kpɔwrɛ bɛ a. Bɛ tʋ tʋ bɛ na, ɛ́ kpow a ɩ̃ nɩ-bʋʋrɛ, ŋmãa a bɛ tẽw cow nɩ a bɛl tẽw, ʋ yɛ̀lɩ.

⁹A na ɩ à ŋá a, mãa bɛ wa be a n'a, alɛ bɛ ɩ lɛ, ɩ̃ yere na, a mãa, a tẽ-daa za Sore, a Ɩsɩrayɛl Naaŋmɩn: a Mowab nɩ a Amɔ̃ ten na sãw nɩ a za, mɛ̃ a Sodɔm nɩ a Gomɔɔr[9] ten a. A bɛ zie nɩr za na kʋ̃ cãà kpɩɛr a, na ɩ n gʋʋr nɩ nyaarʋ bɔwrɩ tɛwr. A ɩ̃ nɩbɛ na cɛ a na wa na wa fa bɛ, ɛ́ de a bɛ tẽw.»

¹⁰A dɔwrʋ n'ɩ à ŋá bɛ na na páw, a bɛ pɔ̀l-ɩb zũú a: bʋ̃ʋ n'ʋ vɛ̃, bɛ tʋ tʋ n a tẽ-daa Sore nɩbɛ, ɛ́ kpow bɛ, ɩ a bɛl zie ʋ kpɛ kpɛ̃ɛ dɔwlɩ.

¹¹A Sore kʋ̃ tɛr dɩ̃ɛnʋ a bɛ zie ɩ, ʋ na sãw nɩ a nɩsaalbɛ ŋmɩmɛ za bɛr. Lɛ n'a a ten al na zãá zuo a za a na ƴãwnɛ ʋ, ŋa za a ʋ tẽsɔw zu.

¹²«A nyɩɩm, Etiopi nɩbɛ mɩ̀, ɩ̃ na ɩ na nyɩ kpi zɛbr zie.»

¹³A Sore mɩ̀ na ìr'ɩ a saa-pɛrɩ́-gʋba-lowr dem ƴãw, ʋ na ŋmɛr'ɩ a Asiiri tẽw bɛr. Ʋ na ɩ na a Nɩnɩɩvʋ[10] tẽw ʋ sãw ʋ za, lɩɛbɩ wɛja-kpalɛ kõw.

¹⁴Dʋn na kpɩɛr'ɩ a tẽw sɔwlɩsɔw. Dʋ̃-bʋʋrɛ za: a vìí nɩ a vii-kpãakpul na ganɛ nɩ a ʋ kpule saa-zu a tɩ̃ɩsɔw. Bɛ na mɩ́ wone nɩ a lili kon, a yie tokori vɛɛ ƴãw. Fʋ na mɩ́ kpɩɛr'a wa báarɛ, ɛ́ nyɛ̃ a dacine na lo lo a, nɩ a sɛɛdɩr tɩɛ wɛwr na sãá sãá a.

¹⁵À ŋá n'a a tẽw ŋa na ɩrɛ pɔ̀lʋ a, nãà ŋmɛ̃. A ʋ nɩbɛ tɩ tɩɛrɛ kɛ́ bom kʋ̃ ɩ bɛ ɩ, ɛ́ tɩ tɩɛrɛ à ŋá: «Nɩr bɛ ŋmɛ̃ taa nɩ tɩ ɛ!» Ɛcɛ ʋlɛ n'ɩ ŋan lore ʋ za, lɩɛbɩ dʋn gaa zie! Nɩr za na tɔlɛ pɩɛlɛ ʋ a, mɩ́ fuole na tɛr'ɩ ɩ-lab ɩ-ɩrɩ.