Read Dagara, Northern Aze 2 Bible Online

Aze 2 - Dagara, Northern bible

Aze 2

¹A Daarisɩ naalʋ-dɩb yome ayi sob daar, a cuwr ayopõi sob bibie lɩzɛr'ɩ been sob, a Sore tɩ lɛb'a ƴɛ̀r a ʋ ƴɛ̀r-manɛ Aze zie yel:

²Ƴɛ̀r a Saltɩɛl bidɛb Zorobabɛl, na ɩ a na-kpɛ̃ɛ-lɩɛrɛ a Zuda tẽw a zie, nɩ a Yehosadakɩ bidɛb Zozue, na ɩ a bàwr-maal-kara a zie, nɩ a Naaŋmɩn nɩ-bʋʋrɛ bɛl za na tɩ cɛ lɛb wa a, ƴɛ̀r a bɛ zie yel bɛ:

³«Ãa n'ʋ cãà a nyɩ pʋɔ, ɛ́ tɩ nyɛ̃ a yir ŋa dãwdãw vɩɛlʋ? Ɛ́ ŋmɩŋmɩn n'a nyɩ nyɛ̃ ʋ a ƴɛrɛŋa? Ʋ bɛ mɩ́ sãá a nyɩ zie mɛ̃ ʋ bɛ ɩ bom za ɩ?

⁴Alɛ n'a so, a mãa, a Sore, ɩ̃ yere na kʋ̀rɛ nyɩ: Zorobabɛl ɩ, ƴãw fãw! Yehosadakɩ bidɛb Zozue e, fʋ̃ʋ na ɩ a bàwr-maal-kara a, ƴãw fãw! Nyɩɩm, a tẽw nɩbɛ za, nyɩ mɩ̀ ƴãw fãw! Nyɩ nyɔw a tome, ɩ̃ na be n a nyɩ zie, a mãa, a Sore, a Kpɛnʋ-za-sob.

⁵Mɛ̃ a lɛ ɩ̃ na tɩ maal'ɩ nyɩ a wõ-taa, a nyɩ Eziptɩ tẽw yib daar a, nɩ a ɩ̃ Vʋʋrʋ na be a nyɩ sɔgɔ a ƴãw a: nyɩ ta zɔrɛ bom za ɩ!

⁶A mãa, a Sore, a kpɛnʋ-za-sob, yere na: ka nɩ blã a, ɩ̃ na dam'ɩ a salom nɩ a tẽw, a kʋ̃ɔ-bɛrɛ nɩ a tẽsɔw-kõw[2].

⁷Ɩ̃ na dam'ɩ a nɩ-bʋʋr-yoru za, ɛ́ a bɛ na-bome na wa n yaga a ka, ɩ̃ɩ na kʋ̀ n vɩɛlʋ yaga a yir-kpɛ̃ɛ ŋa. A mãa Sore, a Kpɛnʋ-za-sob'ʋ yere.

⁸Bʋ̃ʋ n'ʋ vɛ̃, mãa so a tẽ-daa salm-zɩɛ nɩ a salm-pla.

⁹A na ɩ à ŋá a, a yir-kpɛ̃ɛ ŋa vɩɛlʋ na gãw nɩ a dãwdãw yir-kpɛ̃ɛ vɩɛlʋ, ɛ́ a zie ŋa pʋɔ n'a ɩ̃ na ƴãw a ƴã-ɓaarʋ, a mãa Sore, a Kpɛnʋ-za-sob, mãa n'ʋ yere.»

¹⁰A Daarisɩ naalʋ-dɩb yome ayi sob, a cuwr piwaɩ sob bibie lɩzɛr'ɩ anaar sob daar, a Sore tɩ ƴɛ̀r'ɩ a ʋ ƴɛ̀r-manɛ Aze zie à ŋá:

¹¹«À ŋá n'a a Sore, a Kpɛnʋ-za-sob, yere: zɛlɩ wulu kãw a bàwr-maalbɛ zie, sowri bɛ à ŋá:

¹²Nɩr wa pili nɛn-sõw nɩ a ʋ kparʋ, ɛ́ a kparʋ zie nɛ wa tɔ dipɛ̃, zɛ-vaar, divɛ̃, kãá, bɩɩ bʋ̃-dɩra kãw za a, a na ɩ n bʋ̃-son bɩɩ?» A bàwr-maalbɛ sɔw kɛ́: «Ʋ̃ʋ'hʋ̃!»

¹³A Aze lɛb yel: «Nɩr wa tɛr dɛwr, ʋ na tɔ kũu a, ɛ́ wa tɔ a bome á ŋá kãw a, a ʋlɩ bom nɛ na tɛr'ɩ dɛwr bɩɩ?» A bàwr-maalbɛ sɔw: «Ʋ na tɛr'ɩ dɛwr!»

¹⁴Lɛ n'a a Aze tɩ lɛb yel: «À ŋá n'a a Sore yere: à ŋá n'a a nɩbɛ bɛ ŋa ŋmɛ̃, à ŋá n'a a nɩ-bʋʋrɛ bɛ ŋa ŋmɛ̃ a ɩ̃ niŋé. À ŋá n'a a bɛ nuru tome za ŋmɛ̃, bom nɛ za bɛ na dier kʋ̀rɛ mɛ̃ a bàwr-maal-kuur zu a, ʋ mɩ́ tɛr'ɩ dɛwr.»

¹⁵A Sore tɩ lɛb'a yel: «A ƴɛrɛŋa a, nyɩ cɛlɛ be vla nyɛ̃ a ʋlɩ bom nɛ na na ɩ, a na dɛ tĩ a dɩ̃a a. Nyɩ na bɛ tɩ tĩ wobr a kʋsɛbɛ ɓanɛ taa a ɩ̃ yir-kpɛ̃ɛ ŋmãafʋ ƴãw a,

¹⁶ŋmɩŋmɩn n'a a tɩ ŋmɛ̃ nyɩ? Nɩr mɩ́ tɩ cen na k'ʋʋ tɩ ɩ bʋ̃-mána nɛ́ɛ lɩzɛr ble a bowrí, ɛ́ mɩ́ tɩ nyɛ̃ a ɩ pie tɛwr. Nɩr cen k'ʋʋ tɩ 'wɔ̃w divɛ̃ litɩr lɩz'a ayi nɩ pie a dʋw pʋɔ, ɛ́ tɩ nyɛ̃ litɩr lɩzɛr tɛwr.

¹⁷A alɩ bome nɛ za nyɩ na tõ páw a, ɩ̃ sãw a na bɛr: ɩ̃ ɩ n a nyɩ bʋ̃-bie ko bɩɩ pɔ̃ a dàar zu, ɩ̃ ɩ na sa-bi-kube lo, ɛ́ nyɩ bɛ lɛb wa a mãa Sore zie ɩ.

¹⁸Nyɩ cɛlɛ be vla nyɛ̃ a ʋlɩ bom nɛ na na ɩ, a na dɛ tĩ a dɩ̃a a. A bibir ŋa bɛ na sʋ̃ɔ́ a ɩ̃ yir-kpɛ̃ɛ pɛr a, ɩ n a cuwr piwaɩ sob bibie lɩzɛr'ɩ anaar sob, nyɩ bãwnɩ ʋ vla.

¹⁹Bʋ̃-bir cãà nɩ a bowrí i? A divɛ̃ tɩɩr tɛɛ za, a kãkã-tɩɩr, nɩ a girenadɩ tɩɩr, nɩ a olivʋ tɩɩr bɛ wɔ̃ wɔm za ɩ. Ɛcɛ a na dɛ tĩ a dɩ̃a bibir a, ɩ̃ na maalɩ nyɩ na.»

²⁰A Sore tɩ lɛb'a ƴɛ̀r a Aze zie a gb'a ayi sob ƴãw, a cuw bibie lɩzɛr'ɩ anaar sob daar.

²¹Ʋ tɩ yel ʋ na: Ƴɛ̀r a Zuda tẽw na-kpɛ̃ɛ-lɩɛrɛ Zorobabɛl zie, yel ʋ: «Ɩ̃ na dam'ɩ a salom nɩ a tẽw.

²²Ɩ̃ na vɩr'ɩ naalʋ-dà-kɔwr lɔb, ɛ́ ɩ a tẽw zu naalʋ-ten fãw baarɩ. Ɩ̃ na cã n a zɛbr-torkori nɩ a bɛlɩ dem na dãanɛ a a lɔb. A wie nɩ a zɔmnbɛ na lo na, ɛ́ a wi-zɔmnbɛ kʋ taa nɩ a bɛ zɛbr-sɔ-bɛrɛ.

²³Ɛcɛ a ʋlɩ bibir nɛ a, ɩ̃ na kʋ̀ b'ɩ tõ-nʋɔr, Saltɩɛl bidɛb Zorobabɛl ɩ, fʋ̃ʋ na ɩ a ɩ̃ tõ-tone a, ɩ̃ na ɩ na fʋ ɩ mɛ̃ a nũ-tʋʋr bɛ na mɩ́ ƴãw nɩ bãwfʋ a, a fʋ̃ʋ na n'ʋ ɩ̃ kaa ír a ƴãw. À à ŋá n'a a mãa Sore, a kpɛnʋ-za-sob, yere.»