Read Dagara, Northern Zakari 12 Bible Online

Zakari 12 - Dagara, Northern bible

Zakari 12

¹Ƴɛ̀rʋ a Sore na ƴɛ̀r a Ɩsɩrayɛl ƴãw a. Nyɛ̃ a lɛ a Sore na yere a, ʋl na dɔl a salom a, ʋl na sʋ̃ɔ́ a tẽsɔw pɛr, ɛ́ kʋ̀ a nyɔ-vʋʋrʋ a nɩsaal a:

²«Ɩ̃ na ɩ na a Zerizalɛm ɩ koli-nyúura[15] na paalɩ a ɩ̃ suur divɛ̃ a: ʋ na ƴãw nɩ niw-viir a nɩ-bʋʋrɛ za na kpɩɛr viiri koli ʋ a. A niw-viir na páw nɩ a Zuda tẽw dem za, a lɛn daar a dɔ̃ dem nãà wa piw a Zerizalɛm a.

³A lɛn daar, ɩ̃ na ɩ na a Zerizalɛm ɩ kʋsɛ-kpɛ̃ɛ a nɩ-bʋʋrɛ na na bɔbr kɛ́ bɛ zɛw ìr'ɩ a. A bɛlɩ dem nãà wa yel kɛ́ bɛ ɩ kaa a, na ƴãw nɩ natɩɛ bɛ tʋɔra. Lɛ n'a a tẽw zu nɩ-bʋʋrɛ za na lãw taa zɛbr'ɩ ʋ.

⁴A lɛn daar a, mãa n'ʋ yere, a mãa Sore, ɩ̃ na ɩ na pʋl-vʋ̃ɔ nyɔw a bɛ wie za, ɛ́ yãyaar tɛr a bɛ wur-zɔmnbɛ. Ɩ̃ na gù n a Zuda nɩbɛ, ɛ́ ɩ a nɩ-bʋʋr-yoru wie za a zɔ̃w.

⁵A Zuda niw-dierbɛ na yere nɩ bɛ tʋɔra: “A Sore, a Kpɛnʋ-za-sob, a Naaŋmɩn zie n'a a Zerizalɛm tẽw dem nyɛrɛ a bɛ fãw.”

⁶A lɛn daar a, ɩ̃ na ɩ na a Zuda niw-dierbɛ ɩ mɛ̃ vũu na nyɔw dàar dɩrɛ a, bɩɩ mɛ̃ mɔ̃-'lena vũu bɛ na tõ ƴãw ble-dor pile a. A lõbowe za a, bɛ na sãw nɩ a nɩ-bʋʋrɛ na viiri koli bɛ a bɛr. Ɛcɛ a Zerizalɛm nɩbɛ na cãà na kpɩɛr a bɛ tẽw pʋɔ.»

⁷A Sore na de nɩ niwn faa a Zuda yie nɩbɛ, k'aa Daviir bʋʋrɛ nɩ a Zerizalɛm tẽw dem taa tɩ́ɛrɛ kɛ́ bɛ gãw nɩ a Zuda nɩbɛ ŋmaarɛ ɩ.

⁸A lɛn daar a, a Sore na gù n a Zerizalɛm nɩbɛ: a bɛl na bɛ tɛr fãw kãw za a bɛ pʋɔ a na kpɛmɛ na mɛ̃ a Daviir a, ɛ́ a Daviir bʋʋrɛ ɩ mɛ̃ a Naaŋmɩn a bɛ zie a, mɛ̃ a Sore malkɩ na de bɛ niwn a.

⁹A Sore yere na: A lɛn daar a, ɩ̃ na ƴãw nɩ fãw kʋ a nɩ-bʋʋrɛ bɛl za na na wa wa zɛbr'ɩ a Zerizalɛm a pàw pɛr.

¹⁰Ɩ̃ na ƴãw nɩ a Daviir bʋʋrɛ nɩ a Zerizalɛm tẽw dem tɩɛrʋ na vɩɛl a, nɩ puoru tɩɛrʋ. Bɛ na jɩ́rɛ nɩ a ɩ̃ lowr, a sob nɛ bɛ na cɔ̀r col a ƴãw[16]. Bɛ na kõ ʋ na, mɛ̃ bidɛb-been na kpi bɛ kone a, bɛ na kõ ʋ na mɛ̃ bi-dãw-dɔwra na bɛ cãà be a.

¹¹A lɛn daar a, ko-kpɛ̃ɛ na maal'ɩ a Zerizalɛm, mɛ̃ a lɛ bɛ na mɩ́ maalɩ Hadadɩ Irimon[17] kuor a Megido fʋɔla pʋɔ a.

¹²A tẽw dɔwlʋ za na mɩ́ maal'ɩ a kuor ʋ tɛwr zie: a Daviir bʋʋrɛ dɔwlʋ pʋɔ a, dɛbr bɛ tʋɔra, pɔwbɛ bɛ tʋɔra. A Natan bʋʋrɛ dɔwlʋ pʋɔ a, dɛbr bɛ tʋɔra, pɔwbɛ bɛ tʋɔra.

¹³A Levi bʋʋrɛ dɔwlʋ pʋɔ a, dɛbr bɛ tʋɔra, pɔwbɛ bɛ tʋɔra. A Simeyi bʋʋrɛ dɔwlʋ pʋɔ a, dɛbr bɛ tʋɔra, pɔwbɛ bɛ tʋɔra.

¹⁴Lɛ mɩ̀ n'a a dɔwlʋ al za na cɛ a, mɩ̀ na maalɩ a kuor dẽdeni, a dɛbr bɛ tʋɔra, pɔwbɛ bɛ tʋɔra.