Read Dagara, Northern Zakari 13 Bible Online

Zakari 13 - Dagara, Northern bible

Zakari 13

¹«A lɛn daar a, kʋ̃ɔ na bule na yire a Daviir bʋʋrɛ nɩ a Zerizalɛm nɩbɛ yel-bebe nɩ a bɛ dɛwr pɛwfʋ ƴãw.»

²A Sore, a Kpɛnʋ-za-sob, yere na: «A lɛn daar a, ɩ̃ na ír'ɩ a tɩbɛ za bɛr ɛ́ nɩr kʋ̃ cãà pore a yúor ɛ. Ɩ̃ mɩ̀ na diw nɩ a naaŋmɩn-ƴɛ̀r-man-ziri dem bɛr a tẽw pʋɔ, ɛ́ ɩ nyɩ bɛ cãà nɔnɛ a tɩbɛ maalʋ ɛ.

³Nɩr wa yel k'ʋʋ na cãà na ƴɛ̀rɛ naaŋmɩn-ƴɛ̀r-manɛ ƴɛ̀rʋ a, a ʋ sãà mɩŋa nɩ a ʋ mã mɩŋa na yel ʋ na: “A fɛr'a kɛ́ fʋ kpi, bʋ̃ʋ n'ʋ vɛ̃, ziri n'a fʋ ŋmarɛ, ɛ́ yel k'aa Sore yúor ƴãw n'a fʋ ƴɛ̀rɛ.” Ɛ́ ʋ na cãà na ƴɛ̀rɛ a naaŋmɩn-ƴɛ̀r-manɛ ƴɛ̀rʋ, ɛ́ a sãà nɩ a mã tɛɛ za cɔ̀r ʋ col kʋ.

⁴A lɛn daar a, vĩ na ɩrɛ nɩ a naaŋmɩn-ƴɛ̀r-manbɛ a naaŋmɩn-ƴɛ̀r-manɛ ƴɛ̀rʋ ƴãw, nɩ a bɛ bʋ̃-nyɛrɩ manʋ ƴãw, bɛ kʋ̃ mɩ́ lɛb sàw su a kɔblʋ kpar-bɛrɛ, a naaŋmɩn-ƴɛ̀r-manbɛ na suur a, bɛ̀lɛ nɩ a nɩbɛ ɩ.

⁵Ŋa za na mɩ́ yere na: “Mãa a, ɩ̃ nãá bɛ ɩ naaŋmɩn-ƴɛ̀r-manɛ ɩ, ka-kʋɔra nɛ m, a ɩ̃ pɔ̀lʋ daar za n'a ɩ̃ tɛr póru.”

⁶Ɛ́ nɩr wa sowr'ʋ: “Ɛ́ bʋ̃ʋ n'ɩ a natɩɛ[18] á ŋá na be a fʋ nyãa zu a?” Ʋ na sɔw na: “A ɩ̃ bárɩ yir'a, ɩ̃ páw a!”»

⁷À ŋá n'a a Sore, a Kpɛnʋ-za-sob, yere: «Zɛbr-sɔ-kpɛ̃ɛ ɛ, ìr a pi-cɩ̃ɩnɛ ƴãw, a ɩ̃ bá na kpɛ socir a ƴãw, kʋ a pi-cɩ̃ɩnɛ, ɛ́ a píir zɔ yaarɩ a ziir za, ɩ̃ɩ na lɩɛb'ɩ a péli ƴãw.»

⁸A Sore cãà na yel: «A tẽw nɩbɛ na põ ziir ata a, ziir ayi nɩbɛ na kpi na, ɛ́ a zi-been nɩbɛ cãà vʋʋrɛ.

⁹Ɩ̃ na ɩ n a bɛl na na cãà vʋʋrɛ a, bɛ tu yi a vũumí, ɩ̃ na ɩ na bɛ vɩɛl, mɛ̃ a lɛ bɛ na mɩ́ ɩ a salm-pla ʋ vɩɛl a. Ɩ̃ na ɩ bɛ na kaa bãw a bɛ ŋmɛ̃a, mɛ̃ a lɛ bɛ na mɩ́ ɩ salm-zɩɛ kaa a. Lɛ n'a bɛ na puore mɛ̃, ɩ̃ɩ na mɩ́ sàw nɩ a bɛ puoru. Ɩ̃ na mɩ́ yel bɛ na: “Ɩ̃ nɩ-bʋʋrɛ n'ɩ nyɩ”, ɛ́ a bɛl yel mɛ̃: “Sore e, fʋ̃ʋ n'ɩ a tɩ Naaŋmɩn.”»