Read Dagara, Northern Zakari 14 Bible Online

Zakari 14 - Dagara, Northern bible

Zakari 14

¹A Sore bibir[19] pɩɛl'a, Zerizalɛm nɩbɛ ɛ, a nyɩ mimirí n'a bɛ na pṍ a nyɩ bome.

²Bʋ̃ʋ n'ʋ vɛ̃, a Sore na ɓã n a nɩ-bʋʋr-yoru za taa, kɛ́ bɛ zɛb'ɩ a Zerizalɛm: bɛ na de nɩ a tẽw, bɛ na wob'ɩ a yie bome, ɛ́ fɛr a pɔwbɛ gã nɩ bɛ, bɛ na diw nɩ a nɩbɛ põ-zɛ̃-taa zie cen nɩ tẽ-yũo, ɛ́ a nɩbɛ ŋmãa na cɛ a, na cãà na kpɩɛr a tẽw pʋɔ.

³Al pùorí, a Sore na zɛb'ɩ nɩ a nɩ-bʋʋr-yoru bɛ ŋa, ʋ na zɛb'a mɛ̃ a lɛ ʋ na mɩ́ zɛb, a zɛbr daar a.

⁴A lɛn daar a, ʋ na àr'ɩ a Olivʋ tɩɩr tãw zu na pɩɛlɩ a Zerizalɛm, a tẽw saa-pɛrɩ́ a. A Olivʋ tɩɩr tãw na ɓar'ɩ ziir ayi, ɛ́ fʋɔl-kpɛ̃ɛ sãá, yi a saa-pɛrɩ́ ɛ́ cen tɩ ta a mʋ̃tɔ̃w-kpɛb-lowr. A tãw lõbowr kãw na taw na cen a saa-pɛrɩ́-gʋba-lowr, ɛ́ a lõbowr kãw taw cen a saa-pɛrɩ́-dʋrʋ-lowr.

⁵Nyɩ na tu n a fʋɔla ŋa na be a tan cara pʋɔ a zɔ. Bʋ̃ʋ n'ʋ vɛ̃, a fʋɔla na cen na tɩ ta a Asal tẽw. Nyɩ na zɔ na mɛ̃ a nyɩ sãàkʋm-kore na tɩ zɔ, a Zuda tẽw nãà Ozɩasɩ daar, a tẽsɔw-kɔbr damnʋ bibir a. Lɛ n'a a Sore ɩ̃ Naaŋmɩn na ta, ʋlɛ nɩ a malkɩ mɩnɛ na tone a ʋ tome a.

⁶A lɛn daar a, a cãà kʋ̃ lɛb tɛr yel-ɩra ɩ, ƴawr nɩ kʋ̃ɔ na gúr kpawlɩ a kʋ̃ cãà ɩ.

⁷Daar kãw a Sore yõ na bãw a, a zie na mɩ́ nyɛrɛ nɩ kʋralɛ, mʋ̃tɔ̃w nɩ tɩ̃ɩsɔw kʋ̃ cãà be ɩ, a zaanʋɔra tɛɛ za a, a zie na mɩ́ nyɛrɛ na.

⁸A lɛn daar a, kʋ̃ɔ na bule na yire a Zerizalɛm, a ŋmãa zɔrɛ cere a Kʋ̃ɔ-kpɛ̃ɛ-kũu lowr, ɛ́ a ŋmãa zɔrɛ cere a Mediterane kʋ̃ɔ-kpɛ̃ɛ lowr, a yũon za, a ũon nɩ a sɩ̃ɔ.

⁹A lɛn daar a, a Sore na dɩrɛ nɩ naalʋ a tẽw za zu. Ʋl yõ n'ʋ bɛ na puore nɩ tʋɔra-siwru mɛ̃ Naaŋmɩn a, a ʋ yúor yõ n'ʋ a nɩsaalbɛ za na bãw.

¹⁰A vuo ʋl za na viiri koli a Zerizalɛm a na lɩɛb'ɩ zi-tɩ̃tal, yi a Geva na be a saa-pɛrɩ́-gʋba-lowr a, ɛ́ tɩ ta a Irimon a saa-pɛrɩ́-dʋrʋ-lowr. A Zerizalɛm na do na gãw a zie na jil koli ʋ a, ɛ́ a tẽw na yi n a Bɛ̃zamɛ dɩ̃dɔr ƴãw ɛ́ cen tɩ tɔ a Dacĩ-gõgon dɩ̃dɔr, a be a dɩ̃dɔr kʋra na tɩ be a, ɛ́ lɛb yi a Hananeyɛl yir-cõcowla ƴãw, ɛ́ cen tɩ ta a nãà divɛ̃ tɩɩr wɔmɛ nɛbrʋ ziir.

¹¹A nɩbɛ na kpɩɛr'ɩ a tẽw, bɛ kʋ̃ lɛb ŋmɛr ʋ bɛr ɛ, ɛ́ a nɩbɛ na ɓãá nɩ ƴãw kpɩɛr a be.

¹²A bʋ̃-faar al na na páw a nɩ-bʋʋrɛ bɛl na zɛb'ɩ a Zerizalɛm a, n'ɩ á ŋá: bɛ na cãà na vʋʋrɛ ɛ́ a bɛ ƴã-gamɛ pɔ̃, a bɛ mimie na pɔ̃ n a mimi-bɔwrɩ pʋɔ, ɛ́ a bɛ zɛlɛ pɔ̃ a bɛ nɛ̃ɛ́.

¹³A lɛn daar a, a Sore na ƴãw bɛ nɩ dɛ̃bɩ̃ɛ na ta dɛ̃bɩ̃ɛ a, bɛ na mɩ́ ìr'a taw tuori taa, ŋa za na mɩ́ ìr'a lo a ʋ tɔ sob zu.

¹⁴A Zuda nɩbɛ na zɛbr'ɩ a Zerizalɛm tẽw pʋɔ, bɛ na fa n a tẽ-kpɔwlɩ na-bome za: salm-zɩɛ, salm-pla, nɩ kparɩ na yãwmɛ bɛ tɛr tɛwr a.

¹⁵A dɔ̃ dem laɩ pʋɔ dʋn za a, a wie nɩ a mílɛ̀[20], a nyɔ̃wmɩ nɩ a bòn a, bʋ̃-faar-been nɛ n'a na páw a, a bʋ̃-faar al na páw a nɩbɛ a.

¹⁶A lɛn daar a, a nɩ-bʋʋrɛ bɛl na zɛb'ɩ a Zerizalɛm a, a bɛ nɩbɛ na cɛ a na mɩ́ do n a Zerizalɛm yũon za, tɩ puori a Sore, a Kpɛnʋ-za-sob, ɛ́ maalɩ a Pɛn-sɛwr cuw.

¹⁷A tẽw zu dɔwlʋ ƴen sob kãw bɛ wa cen a Zerizalɛm, k'ʋʋ tɩ puori a Nãà, a Sore, a Kpɛnʋ-za-sob a, saa kʋ̃ wa a ʋ tẽw pʋɔ ɛ.

¹⁸A Eziptɩ tẽw dem wa zawrɩ na cen a Zerizalɛm tɩ maalɩ a Pɛn-sɛwr cuw a, a bʋ̃-faa na páw bɛ na mɛ̃ a nɩ-bʋʋr-yoru bɛl, na kʋ̃ cen tɩ maalɩ a cuw ŋa a.

¹⁹A dɔwrʋ n'ɩ à à ŋá a Eziptɩ tẽw nɩ a nɩ-bʋʋr-yoru bɛl na kʋ̃ maalɩ a cuw ŋa a, na na páw a.

²⁰A lɛn daar a, sɛbrʋ ŋa na be n a wie gbelsɩ tɛɛ za zu “A Sore so.” A Ŋmɩn-yir-kpɛ̃ɛ ziduwli na ɩ n bʋ̃-son mɛ̃ a zɩ̃ɩ-mɩrɩ lali, na mɩ́ be a bàwr-maal-kuur niŋé a.

²¹A Sore, a Kpɛnʋ-za-sob, na so nɩ a ziduwli za na be a Zerizalɛm nɩ a Zuda tẽw pʋɔ a. A bɛlɩ dem na mɩ́ wa bàwr maalʋ ƴãw a, na mɩ́ de a na dʋw nɩ a nɛn. A daar ŋa wa ta a, yɛ-yɛrɛ kãw za kʋ̃ lɛb be a Sore, a Kpɛnʋ-za-sob, yir-kpɛ̃ɛ pʋɔ ɩ.