Read Dagara, Northern Zakari 2 Bible Online

Zakari 2 - Dagara, Northern bible

Zakari 2

¹Ɩ̃ tɩ zɛw nɩ zu nyɛ̃ bʋ̃-nyɛra kãw: ɩ́lɛ́ anaar tɩ n'a.

²Ɩ̃ tɩ sowr'ɩ a malkɩ na tɩ ƴɛ̀rɛ a ɩ̃ zie a: «Bʋ̃ʋ n'ʋ a ɩ́lɛ́ á ŋá wule?» Ʋ tɩ sɔw mɛ̃ na: «Alɛ n'ɩ a ten al na tɛr fãw, diw a Zuda, a Ɩsɩrayɛl nɩ a Zerizalɛm nɩbɛ yaarɩ a.»

³Al pùorí, a Sore tɩ wul mɛ̃ nɩ sãa-kpɩɛrbɛ anaar.

⁴Ɩ̃ tɩ sowr'a: «Bʋ̃ʋ n'ʋ bɛ waar kɛ́ bɛ wa ɩ?» Ʋ tɩ sɔw mɛ̃ na: «Bɛ wa na kɛ́ bɛ wa ƴãw a tẽ-kpɛn dɛ̃bɩ̃ɛ, ɛ́ ŋmɛ a lɔb, al na ìr àr a Zuda tẽw ƴãw, diw a nɩbɛ yaarɩ kɛ̀ nɩr za bɛ tʋ̃ɔ́ bà gbɛ́r a niŋé a.»

⁵Ɩ̃ tɩ zɛw nɩ zu nyɛ̃ bʋ̃-nyɛra kãw: nɩr na tɛr miw-máná a.

⁶Ɩ̃ tɩ sowr'ʋ na: «Nyɩnɛ na fʋ cere?» Ʋ sɔw mɛ̃: «Zerizalɛm'a, k'ɩ̃ɩ tɩ manɩ a ʋ wogo nɩ a ʋ yɛ̀lʋ.»

⁷Lɛ n'a a malkɩ na tɩ ƴɛ̀rɛ a ɩ̃ zie a, tɩ cere malkɩ ƴen sob zie na tɩ tuore ʋ a.

⁸Ʋ tɩ yel ʋ na: «Zɔ cen tɩ yel a pɔlbile na tɛr a miw-máná a: Dacine kʋ̃ mɛ viiri koli a Zerizalɛm ɛ, a nɩbɛ nɩ a dʋn na na yãwmɛ a ʋ pʋɔ bɛ dɩ vuo a ƴãw.

⁹À ŋá n'a a Sore yel a yel ŋa ƴãw: “Mãa mɩŋa, ɩ̃ na be n be, ɩ mɛ̃ vũu dacin na viiri koli ʋ a, ɩ̃ɩ na ɩ n a ʋ yúor-vɩɛlʋ-danʋ a ʋ pʋɔ.”»

¹⁰Yel ŋa n'ʋ a Sore yere kʋ̀rɛ nyɩ: «Alɛ! Nyɩɩm ɩ̃ na diw yaarɩ a tẽw zu ziir za a, nyɩ zɔrɛ ƴɛrɛŋa, nyɩ yi kɛ́ bɛr a saa-pɛrɩ́-gʋba-lowr ten!

¹¹Alɛ! Zerizalɛm nɩbɛ bɛ na diw cen nɩ a Babɩlɔn a, nyɩ paw fɔ̃w zɔ cɩ̃ɛ.»

¹²A Sore Kpɛnʋ-za-sob na kʋ̀ m tõ-nɔ-kpɛ̃ɛ a, yere nɩ à ŋá a nɩ-bʋʋrɛ bɛl na fá nyɩ a ƴãw: «Nɩr za na tʋɔr nyɩ a, a ɩ̃ bʋ̃-tuo n'ʋ ʋ tʋɔr.

¹³Sɩza, ɩ̃ na wa n a nɩ-bʋʋr-yoru ƴãw: a bɛ gbãgbaar mɩ̀ na fá n a bɛ bome.» A yele á ŋá wa ɩ a, nyɩ na bãw na k'aa Sore Kpɛnʋ-za-sob sɩrɩ n'ʋ tõ m.

¹⁴A Sore cãà na yere: «Nyɩ cɩlɛ ŋmɩɛr'ɩ nʋ̃ɔ̀ cɛlsɩ, Sɩyɔ̃ tẽw dem i, ɩ̃ waar'a k'ɩ̃ɩ wa kpɩɛr a nyɩ sɔgɔ. A yele á ŋá wa ɩ a, nyɩ na bãw na k'aa Sore Kpɛnʋ-za-sob sɩrɩ n'ʋ tõ m a nyɩ zie.

¹⁵A ʋlɩ bibir nɛ a, nɩ-bʋʋr-yoru yaga na tu m'a, a mãa, Sore, ɛ́ bɛ na lɩɛb'ɩ a ɩ̃ nɩ-bʋʋrɛ. Ɛcɛ a nyɩɩm sɔgɔ n'a ɩ̃ na kpɩɛr.» A yele á ŋá wa ɩ a, nyɩ na bãw na k'aa Sore Kpɛnʋ-za-sob sɩrɩ n'ʋ tõ m a nyɩ zie.

¹⁶A Zuda tẽw na lɛb'a ɩ a Sore bʋ̃-sora a tẽw ʋl ʋ na so a pʋɔ, ɛ́ a Zerizalɛm lɛb ɩ a tẽ-kpɛ̃ɛ ʋ na kaa ír a.

¹⁷Bʋ̃-vʋʋra za, ʋ ɩ gbili a Sore niŋé, bʋ̃ʋ n'ʋ vɛ̃, bɛ nãà wa bere na ʋ yi a ʋ kpɛb-zi-sõw pʋɔ!