Read Dagara, Northern Zakari 8 Bible Online

Zakari 8 - Dagara, Northern bible

Zakari 8

¹A Sore, a Kpɛnʋ-za-sob, tɩ ƴɛ̀r'ɩ ƴɛ̀rʋ ŋa kʋ̀ m:

²«A mãa, a Sore, ɩ̃ nɔnɛ nɩ a Zerizalɛm vũuvũu, a nɔ̃wfʋ ŋa dɩrɛ mɛ̃ na mɛ̃ vũu a.

³Alɛ n'a so, mãa n'ʋ yere: ɩ̃ lɛbr'a waar a Zerizalɛm, ɩ̃ lɛb'a kpɩɛr a Sɩyɔ̃ tẽw. Bɛ na bʋɔlɛ nɩ a Zerizalɛm kɛ́ “Tẽ-kpɛ̃ɛ na bɛ lɛb pùor a”, ɛ́ a Sɩyɔ̃ tãw ɩ̃ na so a, yúor na dɩ na kɛ́ “Tãw-sõw”.

⁴Sɩza n'a, mãa n'ʋ yere, a dɛb-nyamɛ nɩ a pɔw-nyamɛ na dibr dàa a, a bɛ yome na yãwmɛ a ƴãw a, bɛ na mɩ́ lɛb'a zɩ̃ a Zerizalɛm nɩ-yaga tuor-taa ziir.

⁵A pɔlbili nɩ a pɔwsɩrali na mɩ́ lɛb'a wa yãwmɛ yaga, wa dɩ̃ɛnɛ a tẽ-kpɛ̃ɛ sɛ́ɛ pʋɔ.

⁶A Sore, a Kpɛnʋ-za-sob, yere na: a yel ŋa sãá nɩ a Ɩsɩrayɛl nɩbɛ na cɛ a zie mɛ̃ ʋ kʋ̃ tʋ̃ɔ́ a, ɛcɛ a mãa Sore, a Kpɛnʋ-za-sob, ɩ̃ na tʋ̃ɔ́ na yel k'ʋʋ kʋ̃ tʋ̃ɔ́ bɩɩ?

⁷Mãa n'ʋ yere kʋ̀rɛ nyɩ, ɩ̃ na faa nɩ a ɩ̃ nɩ-bʋʋrɛ bɛ na diw cen nɩ a saa-pɛrɩ́ tẽw lowr, nɩ a mʋ̃tɔ̃w-kpɛb-lowr tẽw lowr a.

⁸Ɩ̃ na ɩ na bɛ yi a be lɛb wa wa kpɩɛr a Zerizalɛm. Bɛ na ɩ n a ɩ̃ nɩ-bʋʋrɛ, ɩ̃ɩ ɩ a bɛ Naaŋmɩn. Ɩ̃ na dɩrɛ nɩ naalʋ a bɛ zu, nɩ yel-mɩŋa nɩ mɩnʋ.»

⁹À ŋá n'a a Sore, a Kpɛnʋ-za-sob, yere: «Nyɩ ƴãw fãw! Nyɩ̀ wone nɩ a ƴɛrɛŋa, a ƴɛ̀rʋ á ŋá ɩ̃ na tɩ dãw ƴãw a ƴɛ̀r-manbɛ ƴɛ̀r, a lɛn daar bɛ na tɩ lɔb a yir-kpɛ̃ɛ pɛr, a ʋ mɛb ƴãw a.

¹⁰A koro za a, nɩr bɛ mɩ́ tɩ ya a nɩsaalbɛ ton nɩ a dʋn dem ɛ. A dɔ̃ dem ƴãw a, nɩr bɛ mɩ́ tɩ bɛr yã kɛ́ cere ɩ, bʋ̃ʋ n'ʋ vɛ̃, ɩ̃ tɩ bɛr'ɩ a nɩbɛ za bɛ dɔwrɛ taa.

¹¹Ɛcɛ ƴɛrɛŋa a, mãa n'ʋ yere, a mãa Sore, a Kpɛnʋ-za-sob, ɩ̃ kʋ̃ lɛb dɔwrɩ a nɩ-bʋʋrɛ bɛ ŋa nɩbɛ na cɛ a, mɛ̃ a lɛ ɩ̃ na tɩ dɔwrɩ bɛ a koro za a ɩ.

¹²Ɩ̃ na ƴãw nɩ ƴã-ɓaarʋ a tẽw zu: a divɛ̃ tɩɩr na mɩ́ wɔ̃ na, a tẽsɔw bʋ̃-kʋ́ɔrɩ na mɩ́ maal'a, sa-bɛrɛ na yi n a salom zu lo. Ɩ̃ na kʋ̀ n a maalʋ á ŋá za, a ɩ̃ nɩ-bʋʋrɛ nɩbɛ bɛl na cɛ a.

¹³Zuda nɩ Ɩsɩrayɛl naalʋ ten i, a nɩ-bʋʋr-yoru sɔgɔ a, nyɩ tɩ ɩ n nɩ-bʋʋrɛ bɛ na ŋmɛ ƴãw a bãwfʋ. Ɛcɛ ƴɛrɛŋa a, ɩ̃ faarɛ nyɩ na, nyɩ na ɩ n nɩ-bʋʋrɛ na nyɛ̃ maalʋ a bãwfʋ. Nyɩ ta cãà zɔrɛ dɛ̃bɩ̃ɛ ɩ! Nyɩ ƴãw fãw!»

¹⁴Nyɛ̃ a lɛ a Sore, a Kpɛnʋ-za-sob, na yere a: «A lɛ ɩ̃ na tɩ yel k'ɩ̃ɩ na ɩ na a kpɛ nyɩ, a nyɩ sãàkʋm-kore na tɩ ɩ k'ɩ̃ nyɛ̃ suur a ƴãw a, ɩ̃ bɛ lɛb bɛr ɛ.

¹⁵Ƴɛrɛŋa a, ɩ̃ nɩ̃ɛ na yel k'ɩ̃ɩ na maalɩ nyɩ na, Zerizalɛm tẽw dem, nɩ Zuda naalʋ-tẽw za dem i. Nyɩ ta cãà zɔrɛ dɛ̃bɩ̃ɛ ɩ.

¹⁶Nyɩ nyɛ̃ a lɛ a na fɛr kɛ́ nyɩ ɩrɛ a: Nyɩ yere a yel-mɩŋa kʋ̀rɛ taa. A nyɩ ƴɛ̀rʋ-dɩb ziir a, nyɩ mɩ́ dɩ a ƴɛ̀rʋ a tu yel-mɩŋa, ɛ́ wa n ƴã-ɓaarʋ!

¹⁷Nyɩ ta mɩ́ tɩ́ɛrɛ kɛ́ nyɩ maalɩ taa faa ɩ, nyɩ zawrɩ a pɔ-ziri pɔb, bʋ̃ʋ n'ʋ vɛ̃, ɩ̃ bɛ nɔnɛ a yele á ŋá taabɛ ɩ, mãa n'ʋ yere, a mãa Sore.»

¹⁸A Sore, a Kpɛnʋ-za-sob, tɩ ƴɛ̀r'ɩ ƴɛ̀rʋ ŋa kʋ̀ m:

¹⁹«Ɩ̃ yere na kʋ̀rɛ nyɩ, a mʋta-tuo nyɩ na mɩ́ tɛr, a yũon cuwr anaar sob, anũu sob, ayopõi sob nɩ a pie sob a, a na lɩɛb'ɩ cuw-bɛrɛ na tɛr cɩlʋ, nɩ nʋ̃ɔ̀ a, a Zuda nɩbɛ ƴãw.» «Ɛcɛ, nyɩ bɔbr a yel-mɩŋa nɩ a ƴã-ɓaarʋ gãw bom za!»

²⁰À ŋá n'a a Sore, a Kpɛnʋ-za-sob, yere: «Nɩ-bʋʋr-yoru, tẽ-bɛrɛ yaga nɩbɛ na lɛb'a waar a Zerizalɛm.

²¹Tẽ-kpɛ̃ɛ ŋa nɩbɛ na mɩ́ yel'ɩ tẽ-kpɛ̃ɛ ŋa dem: “Nyɩ wa, tɩ cere na kɛ́ tɩ tɩ puori a Sore, a Kpɛnʋ-za-sob, ɛ́ bɔbr kɛ́ tɩ be a ʋ zie.” Bɛ na sɔw na: “Tɩ mɩ̀ cere na.”

²²Sɩza n'a, nɩ-bʋʋr-yaga nɩ ten na tɛr fãw a na wa n a Zerizalɛm, wa bɔbr kɛ́ bɛ be a ɩ̃ zie, ɛ́ zɛlɛ mɛ̃ nɩ a bɛ puoru.

²³A lɛn daar a, mãa n'ʋ yere, nɩ-sãanbɛ pie a ƴɛ̀rʋ na ɩ tɛɛtɛɛ a na mɩ́ nyɔw nɩ Zifʋ been kparʋ ƴãw ɛ́ yel ʋ: “Tɩ bɔbr'a kɛ́ tɩ páw nyɩ cen, bʋ̃ʋ n'ʋ vɛ̃, tɩ wõ na kɛ́ a Naaŋmɩn be n a nyɩ zie.”»