Read Dagara, Northern Malasɩ 2 Bible Online

Malasɩ 2 - Dagara, Northern bible

Malasɩ 2

¹Kpaalʋ ŋa n'ʋ, a mãa, Sore Kpɛnʋ-za-sob, kpaalɛ a nyɩɩm bàwr-maalbɛ: «Nyɩmɛ bɛ wa bɛrɛ wone, ɛ́ ƴãw fãw ƴãwnɛ mɛ̃, mɛ̃ a lɛ a na fɛr kɛ́ nyɩ ƴãwnɛ mɛ̃ a, nɔ-faa n'ʋ ɩ̃ na ƴɛ̀r ƴãw nyɩ, ɛ́ mɩ́ lɩɛbɩ a nɔ-vɩɛlɩ nyɩ na ƴɛ̀rɛ a, a ɩ nɔ-faar. Ɩ̃ na sɩrɩ na ɩ a lɛ, nyɩ na mɩ́ de dɩ̃ɛnʋ ƴãw bom za ƴãw a zũú.

³Ɩ̃ tĩ na bɛ bɛrɛ a nyɩ bʋʋrɛ ɩ. Ɛ́ a nyɩɩm a, ɩ̃ na cir'ɩ bine waarɩ a nyɩ niŋé, a dʋn nyɩ na kʋ a nyɩ cuwr ƴãw a bine, ɛ́ bɛ na pɩɩrɩ nyɩ na lãwnɩ a.

⁴Lɛn daar'a nyɩ na bãw k'aa mãa, a Sore Kpɛnʋ-za-sob, mãa n'ʋ kpaalɩ nyɩ à à ŋà, k'aa wõ-taa ɩ̃ na maal'ɩ a Levi bʋʋrɛ a gã kʋralɛ.

⁵A ɩ̃ wõ-taa a bɛ zie tɩ ɩ n nyɔ-vʋʋrʋ nɩ ƴã-ɓaarʋ ɩ̃ na kʋ̀ bɛ a, kɛ́ bɛ zɔrɛ mɛ̃, ɛ́ bɛ zɔ m'a. Bɛ tɩ tɛr'ɩ mawfʋ a ɩ̃ niŋé.

⁶A yel-mɩŋa n'a bɛ tɩ wul a nɩbɛ, ɛ́ bɛ ŋmãa ziri za ɩ. Bɛ tɩ lãw nɩ mɛ̃ na vʋʋrɛ nyɔ-vʋʋrʋ na tu sɔ́r a, ɛ́ ɩ nɩ-yaga bɛr a faalʋ.

⁷Bʋ̃ʋ n'ʋ vɛ̃, a bàwr-maalɛ tõ-nʋɔr'ɩ k'ʋʋ wule a nɩbɛ bɛ bãw a Naaŋmɩn, ʋlɛ n'ʋ a nɩbɛ mɩ́ sowri bãw a Wulu[4], ʋ na ɩ a Sore kpɛnʋ-za-sob nɩ-tona a ƴãw.

⁸Ɛcɛ, a nyɩɩm bàwr-maalbɛ, nyɩ nɩ̃ɛ na bɛr a sɔ́r. A nyɩ wulu tuli nɩ nɩ-yaga, nyɩ sãw nɩ mãa nɩ a levitɩ mɩnɛ wõ-taa bɛr, mãa n'ʋ yere, a mãa Sore Kpɛnʋ-za-sob.

⁹A mãa mɩ̀ a, ɩ̃ na ɩ na nyɩ ɩ nɩ-ɩ-laarɩ nɩ nɩ-bɛ-tɛr-bir mɩnɛ a Ɩsɩrayɛl nɩbɛ za zie. Bʋ̃ʋ n'ʋ vɛ̃, nyɩ bɛ tuur a ɩ̃ sɛ́ɛ ɩ, ɛ́ a wulu tub pʋɔ nyɩ owre.»

¹⁰«Sãà-been bɛ n'ʋ tɩ za lãw ɛ? Naaŋmɩn-been bɛ n'ʋ ír tɩ ɛ? Ɛ́ bʋ̃ʋ n'ʋ so tɩ mɩlɛ taa, sãwnɛ a wõ-taa na be a Naaŋmɩn nɩ a tɩ sãàkʋm-kore cara pʋɔ a bɛrɛ?

¹¹A Zuda tẽw dem bɛ tu a nɛ́ɛ bɛ na ƴãw a ɩ. Bɛ maal'ɩ yel-faar na bɛ maal'ɩ wob a, a Zerizalɛm nɩ a Ɩsɩrayɛl tẽw za pʋɔ. Bʋ̃ʋ n'ʋ vɛ̃, a zi-sõw a Sore na nɔnɛ a, bɛ dɛw[5] ʋ na bɛr, bɛ na kul pɔwbɛ na puore ŋmɩn-yoru a ƴãw.

¹²Nɩr wa ɩrɛ à à ŋá a, a Sore, ʋ ír a ʋ yir dem za bɛr a Ɩsɩrayɛl nɩ-bʋʋrɛ pʋɔ! Nɩr ta cãà be, mɩ́ wa n de-kʋ̀b bome wa kʋ̀ a Sore kpɛnʋ-za-sob, a ʋ yúor ƴãw ɛ!»

¹³«À ŋá n'a nyɩ mɩ̀ cãà lɛb ɩrɛ: nyɩ mɩ́ kõ na cir mʋta-kʋ̃ɔ laarɩ a Sore bàwr-maal-kuur. Nyɩ mɩ́ kone na siwre nɩ, a Sore na bɛ cãà ŋmɛlɛ kaar a nyɩ de-kʋ̀b bome a ƴãw, ʋ na bɛ cãà sàwr dier a bome nyɩ na kʋ̀rɛ ʋ a.

¹⁴Nyɩ mɩ́ sowre na kɛ́ bʋ̃ʋ n'ʋ so. Nyɩ tɩ ƴãw nɩ nʋɔr a Sore niŋé kɛ́ ŋa za na tɛr'ɩ a pɔw ʋ na kul a ʋ pɔ̀lʋ daarɩ́ a. A nyɩ taabɛ tɩ nɛbɛ, nyɩmɛ nɛbɛ tɩ kaa ír bɛ, ɛcɛ nyɩ zawrɩ bɛ na bɛr.

¹⁵A Sore bɛ tʋ̃ɔ́ ɩ ŋa mɩ́ ɩ nɩ-been lãwnɩ a ʋ pɔw, a ƴã-gan ƴãw nɩ a tɩɛrʋ ƴãw ɛ? Ɛ́ bʋ̃ʋ n'ʋ a nɩ-been ŋa bɔbr? Bibiir Naaŋmɩn na tɩrɛ a bɛ n'a ɩ? A na ɩ lɛ a, nyɩ gùre nyɩ tʋɔra! Nyɩ taa zawrɛ a nyɩ pɔ̀lʋ daarɩ́ pɔw bɛrɛ ɩ.

¹⁶Bʋ̃ʋ n'ʋ vɛ̃, à ŋá n'a a Sore, a Ɩsɩrayɛl Naaŋmɩn, yere: “Nɩr wa hɩ̃ɛn a ʋ pɔw, zawrɩ ʋ bɛr a, ʋ tɛr'ɩ po-to-fãw-ɩb sãwna.” A Sore kpɛnʋ-za-sob'ʋ ƴɛ̀rɛ. A na ɩ lɛ a, nyɩ gùre nyɩ tʋɔra! Nyɩ ta bɛr a nɛ́ɛ nyɩ na ƴãw a tub ɛ.»

¹⁷«Nyɩ bàlɛ nɩ a Sore nɩ a nyɩ ƴɛ̀rʋ. Ɛcɛ nyɩ sowre na: “Nyɩn lowr'a tɩ bàlɛ ʋ?” Nyɩ na mɩ́ yere: “Yel-fa-maalɛ za ɩ n nɩ-vla a Sore zie, a nɩ-bɛ-ŋa-taabɛ yele n'a ʋ nɔnɛ.” Bɩɩ nyɩ na mɩ́ yere: “Nyɩnɛ n'a a Naaŋmɩn na mɩ́ dɩ a ƴɛ̀rʋ nɩ mɩnʋ a be?”»