Read Dagara, Northern Malasɩ 3 Bible Online

Malasɩ 3 - Dagara, Northern bible

Malasɩ 3

¹«À ŋá n'a a Sore, a kpɛnʋ-za-sob, sɔwr nyɩ: “Ɩ̃ tone nɩ a ɩ̃ nɩ-tona k'ʋʋ tɩ puo a sɔ́r bɛr mɛ̃. Bɛ nãà wa bere na, a Sore nyɩ na bɔbr a, kpɛ a ʋ yir-kpɛ̃ɛ pʋɔ. A wõ-taa nɩ-tona nyɩ na gùre a, ʋlɛ n'ɩ ŋan waar.”

²Ãa n'ʋ na tʋ̃ɔ́ cãà, ʋlɛ wa ta a ʋlɩ bibir nɛ a? Ãa n'ʋ na cãà àr saaƴẽwn, ʋlɛ wa sãá a? Bʋ̃ʋ n'ʋ vɛ̃, ʋ ɩ na mɛ̃ kur-nyɩlɛ vũu a, mɛ̃ fɔbr pɛ́wrbɛ sɩfan a.

³Ʋ na zɩ̃ na nyɩl a salm-pla ír a dɛwr bɛr ʋ vɩɛl. A bàwr-maalbɛ na ɩ a Levi bʋʋrɛ a, ʋ na cɔbrɩ bɛ na bɛ vɩɛl, ʋ na ɩ na bɛ vɩɛl, mɛ̃ a lɛ bɛ na mɩ́ ɩ salm-zɩɛ nɩ salm-pla a vɩɛl a. Lɛ n'a bɛ na tʋ̃ɔ́ mɩ́ kʋ̀ de-kʋ̀b bome a Sore, mɛ̃ a lɛ a na tu sɔ́r a.

⁴Lɛ n'a a Zuda nɩ a Zerizalɛm tẽw dem de-kʋ̀b bome na mɩ́ pɛlɩ a Sore pʋɔ mɛ̃ a koro za a, a yome al na tɔl a.

⁵A Sore, a kpɛnʋ-za-sob, yere nɩ à ŋá: “Ɩ̃ na wa n a nyɩ sɔgɔ, wa dɩ n nyɩ a ƴɛ̀rʋ. Ɩ̃ na yel'ɩ a sɔbr sãwna fɔ̃wlɛ, nɩ a pɩ̃ɔ-yel-maalbɛ, nɩ a pɔ-ziri dem, nɩ a bɛlɩ dem na nɛbr a bɛ tõ-tõ-biir, a pɔw-kɔbɛ nɩ a bi-kpebe a, a bɛlɩ dem na ɩrɛ a kpɩɛr a nʋʋrɩ a, a bɛlɩ dem za na bɛ ƴãwnɛ mɛ̃ a.”»

⁶«A mãa Sore, ɩ̃ bɛ lɩɛbɛ ɩ. Ɛcɛ a nyɩɩm a, nyɩ cãà na ɩ a Zakɔb bibiir[6].

⁷Nyɩ bɛr'ɩ a ɩ̃ wulu, mɛ̃ a nyɩ sãàkʋm-kore a, nyɩ bɛ tu a ɩ. Nyɩ lɛb wa a ɩ̃ zie, ɩ̃ɩ na lɛb'a wa a nyɩ zie, mãa n'ʋ yere, a mãa, a Sore kpɛnʋ-za-sob. Ɛcɛ nyɩ sowre na: “Ŋmɩŋmɩn n'a tɩ na ɩ lɛb wa a fʋ zie?”

⁸Ɩ̃ sɔwr nyɩ na: Nɩsaal na tʋ̃ɔ́ na bɛlɩ Naaŋmɩn ɩ? Ɛcɛ, nyɩ bɛlɛ mɛ̃ na. Ɛ́ nyɩ lɛb sowre mɛ̃: “Nyɩn lowr'a tɩ bɛlɩ fʋ?” Ɩ̃ sɔw nyɩ: A nyɩ bʋ̃-tɛrɩ ziir pie sob, nɩ a nyɩ de-kʋ̀b bome tɩrʋ pʋɔ n'a.

⁹Ŋmɛ-ƴãw tuur nyɩ na, nyɩ na bɛlɛ mɛ̃ a ƴãw, nyɩɩm ɩ̃ nɩ-bʋʋrɛ za a.

¹⁰Nyɩ wa n a nyɩ bʋ̃-tɛrɩ ziir pie sob ʋ za, a bʋ̃-bini dĩó, kɛ̀ bʋ̃-dɩrɩ mɩ́ be a ɩ̃ yir-kpɛ̃ɛ pʋɔ kʋralɛ. A mãa, a Sore kpɛnʋ-za-sob, mãa n'ʋ yere: nyɩ ɩ m kaa a ka lowr ɛ́ nyɛ̃, mãa bɛ wa yuo a salom kʋ̃ɔnɩ kʋ̀ nyɩ a, mãa bɛ wa paalɩ nyɩ nɩ maalʋ tɩ gʋ̀r bɛr a.

¹¹Ɩ̃ na tanɩ nɩ a sãsowe bɛr, a ta lɛ 'wɔb a nyɩ bʋ̃-kʋ́ɔrɩ ɛ, a ta ɩ a nyɩ divɛ̃ tɩɩr a bɛ wɔnɛ ɩ. Mãa n'ʋ yere à à ŋá kʋ̀rɛ nyɩ, mãa, a Sore kpɛnʋ-za-sob.

¹²A nɩ-bʋʋr-yoru za na yere na kɛ́ zu-nʋ̃ɔ̀ dem n'ɩ nyɩ, bʋ̃ʋ n'ʋ vɛ̃, a nyɔ-vʋʋrʋ na nʋmɛ nɩ za a nyɩ tẽw pʋɔ, mãa n'ʋ yere, a mãa Sore kpɛnʋ-za-sob.»

¹³A Sore yere na: «A nyɩ ƴɛ̀rʋ nyɩ na càarɛ nɩ mɛ̃ a, a kpɛ̃w tɔ. Ɛ́ nyɩ mɩ́ sowre: “Bʋ̃ʋ ƴɛ̀rʋ n'a tɩ ƴɛ̀r càar'ɩ fʋ?”

¹⁴À ŋá n'a nyɩ yel: “A Naaŋmɩn tome tob bɛ tɛr pɛr ɛ. Tɩ sàw nɩ a ʋ nɛ́ɛ, ɛ́ tu a kpɩɛrʋ[7] daar tub a Sore kpɛnʋ-za-sob niŋé, ɛ́ a ɩ zawla.

¹⁵Ƴɛrɛŋa a, tɩ nyɛ̃ na k'aa bɛlɩ dem na wone a nʋ̃ɔ̀ a, a pɔ̀lʋ dem nɛbɛ, ɛ́ a bɛlɩ dem yele na cere vla a, a yel-fa-maalbɛ nɛbɛ. Bɛlɛ saa ɩrɛ a Naaŋmɩn kaar a, a mɩ́ ɩ n vla a bɛ zie kʋralɛ!”»

¹⁶À à ŋá n'a a bɛlɩ dem na zɔrɛ a Sore a, tɩ ƴɛ̀rɛ sɔwr taa. A Sore tɩ cɛlɩ nɩ be bɛr wõ bɛ. A bɛlɩ dem na zɔrɛ a Sore ɛ́ ƴãwnɛ ʋ a, bɛ tɩ sɛb'ɩ a bɛ yée ƴãw sɛbɛ pʋɔ a ʋ niŋé.

¹⁷Al pùorí, a Sore kpɛnʋ-za-sob tɩ yel: «A bibir ʋl ɩ̃ na cɔbrɛ a vɩɛfʋ daar a, bɛ na ɩ n a ɩ̃ nɩ-sori, a ɩ̃ nɩ-bʋʋrɛ ɩ̃ na so a. Ɩ̃ na zɔ n bɛ nɩbaalʋ, mɛ̃ sãà na zɔrɛ a ʋ bie, na tone a ʋ tome a, nɩbaalʋ a.

¹⁸Lɛ n'a nyɩ na lɛb nyɛ̃ a nɩ-mɩn nɩ a nɩ-faar na bɛ ɩ been a, a bɛlɩ dem na tone a Naaŋmɩn tome nɩ a bɛlɩ dem na bɛ tone a ʋ tome a.

¹⁹A mãa, a Sore kpɛnʋ-za-sob, yere na: A ɩ̃ bibir tarɛ na, ʋ tʋlɛ nɩ kpãkpã mɛ̃ vũu a. A ʋlɩ bibir nɛ a, a pɔ̀lʋ dem nɩ a yel-fa-maalbɛ na dɩ n vũu mɛ̃ mʋ̃ɔ a, bɛ tɩ cɛ nyɩwr nɩ váar ɛ.

²⁰Ɛcɛ a nyɩɩm na sàw a ɩ̃ nɩ-kpɛ̃ɛnʋ a, mɩnʋ mʋ̃tɔ̃w na pur'ɩ a nyɩ zu, tɛr a sanʋ a ʋ gbɛ́ɛ pʋɔ. Nyɩ na yi na, ɛ́ mɩ́ cɩlɩ ƴaw do saa, mɛ̃ náli na yi a zaw pʋɔ a.

²¹A bibir ɩ̃ na cɔbrɛ a wa vɩɛ a, nyɩ na nɛb'ɩ a nɩ-faar nɩ gbɛ́ɛ. Bɛ na ɩ n tanɛ a nyɩ gbɛ́ɛ nɛbr, mãa n'ʋ yere, a mãa Sore kpɛnʋ-za-sob.»

²²«Nyɩ cãà bãwnɩ a ɩ̃ tõ-tõ-bie Moyiir wulu. Ɩ̃ kʋ̀ ʋ nɩ nɛ-ƴãwnɩ nɩ tub a Orɛb tãw zu, a Ɩsɩrayɛl nɩbɛ za ƴãw.»

²³«Ɩ̃ na tõ n a ɩ̃ ƴɛ̀r-manɛ Eli[8] a nyɩ zie, ɛ́ a Sore bibir wa bãw vɩɛ, bibi-kpɛ̃ɛ nɩ bibir na bɛ tɛr dɩ̃ɛnʋ a.

²⁴Ʋ na ɩ na a sãà mɩnɛ nɩ a bɛ bibiir lɛb kpɛ taa, a bibiir nɩ a bɛ sãà mɩnɛ lɛb kpɛ taa, ɩ̃ taa wa waar wa sãwnɛ a tẽw bɛrɛ ɩ.»