Read Dagara, Northern 1 Makabe mɩnɛ 11 Bible Online

1 Makabe mɩnɛ 11 - Dagara, Northern bible

1 Makabe mɩnɛ 11

¹A Eziptɩ tẽw nãà, Pitoleme, tɩ bɔ n gbee yaga ɓã taa, nɩ zɛbr-nɩbɛ na yãwmɛ mɛ̃ a kʋ̃ɔ-kpɛ̃ɛ nʋɔr biire a, ɛ́ tɩ bɔbr k'ʋʋ maalɩ yã de a Alɛsãdɩr naalʋ-tẽw ƴãw pʋɔ a ʋ naalʋ-tẽw ƴãw.

²A Pitoleme tɩ cen nɩ a Siiri tẽw nɩ ƴã-ɓaarʋ ƴɛ̀rʋ. A nɩbɛ mɩ́ tɩ yuo ʋ nɩ a bɛ tẽ-bɛrɛ dɩ̃dɛɛ, ɛ́ yi tuori ʋ. Bʋ̃ʋ n'ʋ vɛ̃, a Alɛsãdɩr tɩ tɩr'ɩ a nʋɔr kɛ́ bɛ mɩ́ de ʋ a sãanʋ, ʋ na tɩ ɩ a ʋ dɩɛm-sãà a ƴãw.

³Ɛcɛ a Pitoleme na mɩ́ tɩ kpɩɛr tẽ-kpɛ̃ɛ za pʋɔ wa báarɛ a, ʋ mɩ́ ƴãw nɩ zɛbr-nɩbɛ bɛ gù a zie.

⁴Ʋ na tɩ ta pɩɛlɩ Azotɔsɩ a, bɛ wul ʋ nɩ a Dagon yir na dɩ a, a tẽ-kpɛ̃ɛ nɩ a zi-pɩɛlɩ na lo a, a kũuni bɛ na lɔb bɛr a ziir za a, nɩ a kũuni a vũu na dɩ cɛ ŋmãa a zɛbr daar a: bʋ̃ʋ n'ʋ vɛ̃, bɛ tɩ wob bɛ na gbõ taa a be a nãà na na tu tɔl a.

⁵Bɛ tɩ manɩ nɩ a alɩ bome nɛ a Zonatã na ɩ a kʋ̀ a Pitoleme, bɔbr k'ʋʋ yel k'aa bɛ sɛw ɛ, ɛcɛ ʋ bɛ tɩ ƴɛ̀r ƴɛ̀rʋ ɛ.

⁶A Zonatã tɩ cen nɩ a Zope nɩ dɛpaalʋ k'ʋʋ tɩ tuori a nãà. Bɛ tɩ puor'ɩ taa ɛ́ gã a be ìr.

⁷A Zonatã tɩ bɩɛl'ɩ a nãà tɩ ta n a man bɛ na bʋɔlɛ Eletɛɛr[93] a, al pùorí ʋ lɛb kul a Zerizalɛm.

⁸A Pitoleme ʋl a, ʋ tɩ zɛb'a de a kʋ̃ɔ-kpɛ̃ɛ nʋɔr tẽ-bɛrɛ tɩ ta n a kʋ̃ɔ-kpɛ̃ɛ nʋɔr Selesi[94]. Ʋ tɩ cãà na tɩɛrɛ tɩɛr-faar a Alɛsãdɩr ƴãw.

⁹Ʋ tɩ tõ n nɩbɛ a nãà Demetiriyisi zie kɛ́ bɛ tɩ yel ʋ à ŋá: «Wa a ka, tɩ wa lãw maalɩ wõ-taa. Ɩ̃ na kʋ̀ b'ɩ a ɩ̃ pɔwyaa, Kilewopaatɩr, na ɩ a Alɛsãdɩr pɔw a, ɛ́ fʋ na dɩrɛ nɩ naalʋ a fʋ sãà naalʋ-tẽw zu.

¹⁰Mãa tɩ bãw kɛ́ lɛ, ɩ̃ kʋ̃ʋ kʋ̀ a ɩ̃ pɔwyaa a nɩr ŋa ɩ, bʋ̃ʋ n'ʋ vɛ̃, ʋ bɔ n a ɩ̃ kʋb.»

¹¹A Pitoleme tɩ manɛ nɩ a Alɛsãdɩr sãwna à à ŋá, ʋ na tɩ bɔbr k'ʋʋ de a ʋ naalʋ-tẽw a ƴãw.

¹²Lɛ n'a ʋ tɩ lɛb de a ʋ pɔwyaa a Alɛsãdɩr zie, kʋ̀ a Demetiriyisi, ɛ́ bɛ cãà ɩrɛ a Alɛsãdɩr zie mɛ̃ a koro za a ɩ, a bɛ dɔ̀nʋ sãá.

¹³A Pitoleme tɩ kpɛ n a Ãtɩɔsɩ tẽw pʋɔ, ɛ́ yel k'ʋʋ ɩ n a Siiri-Kpɛ̃ɛ[95] nãà. Lɛ n'a ʋ tɩ vɔblɩ nãà-kpawʋʋr ayi, a Eziptɩ naalʋ-tẽw kpawʋɔ nɩ a Siiri-Kpɛ̃ɛ naalʋ-tẽw kpawʋɔ.

¹⁴A ʋlɩ daar nɛ, a nãà Alɛsãdɩr tɩ be n Silisi, a vuo ŋa pʋɔ nɩbɛ na tɩ gaarɩ a ƴãw.

¹⁵Ʋ na tɩ wõ a lɛ a Pitoleme na ɩ a, ʋ tuori ʋ na k'ʋʋ zɛb'ɩ ʋ. Ɛcɛ a Pitoleme tɩ tuori ʋ na nɩ zɛbr-nɩbɛ na ta zɛbr-nɩbɛ a, zɛb tʋ̃ɔ́ ʋ.

¹⁶A Alɛsãdɩr tɩ zɔ na cen Arabi, ɛ́ a nãà Pitoleme zɛb tʋ̃ɔ́.

¹⁷Arabʋ kãw, na dɩ Zabɩdɩɛl a, tɩ ŋmãa nɩ a Alɛsãdɩr zu, tɩr kʋ̀ a Pitoleme.

¹⁸Ɛcɛ a Pitoleme tɩ kpi n a bibie ayi pùorí. Lɛ n'a a tẽ-kpɛn kpɛn nɩbɛ tɩ kʋ a sojarɩ ʋ na ƴãw a ten á ŋá pʋɔ a.

¹⁹À à ŋá n'a a Demetiriyisi tɩ lɩɛbɩ a nãà a yome lɩz'a ani nɩ ayopõi[96] (167) sob daar.

²⁰A ʋlɩ daar nɛ, a Zonatã tɩ ɓã n a Zude tẽw nɩbɛ taa, k'ʋʋ zɛb de nɩ a Zerizalɛm zɛbr-yir-kpɛ̃w. Ʋ tɩ ƴãw na bɛ maalɩ zɛbr-bʋ̃-yaga a mɩnɛ kãw, k'ʋʋ zɛb de nɩ ʋ.

²¹Zifʋ bɛ mɩnɛ kãw, na bɛ bãw bʋ̃ʋ n'ɩ a Naaŋmɩn puoru nɩ bʋ̃ʋ n'ɩ nʋɔr na ƴãw a, ɛ́ hɩ̃ɛn a bɛ nɩ-bʋʋrɛ a, tɩ cen nɩ a Demetiriyisi zie tɩ yel ʋ k'aa Zonatã piw nɩ a zɛbr-yir-kpɛ̃w k'ʋʋ zɛb de ʋ.

²²A Demetiriyisi na tɩ wõ a lɛ a, ʋ nyɛ̃ nɩ suur, ɛ́ ìr daadaalɛ cen a Pitolemayisɩ. Ʋ tɩ sɛb'ɩ a Zonatã yel k'ʋʋ bɛr a zɛbr-yir-kpɛ̃w piwfʋ, ɛ́ wa a Pitolemayisɩ fɔ̃wlɛ bɛ wa ƴɛ̀r sɔw taa.

²³A Zonatã na tɩ páw a sɛb-tʋɔla ŋa a, ʋ yel'a kɛ́ bɛ cãà piw a zɛbr-yir-kpɛ̃w. Ʋ tɩ kaa na ír a Ɩsɩrayɛl nɩbɛ nɩ-bɛrɛ bɛ mɩnɛ, nɩ bàwr-maalbɛ bɛ mɩnɛ, kɛ́ bɛ bɩɛlɩ ʋ, ʋʋ bãwnɩ a kũu ɛ́ lo a sɔ́r.

²⁴Ʋ tɩ tɛr'ɩ salm-pla, salm-zɩɛ, bʋ̃-suuri nɩ bʋ̃-kʋ̀rɩ yaga a mɩnɛ cen nɩ a nãà zie a Pitolemayisɩ, ʋ tɩ tɛr pʋ-pɩɛlʋ a ʋ ƴãw.

²⁵Ɩsɩrayɛl nɩbɛ na bɛ tuur a Naaŋmɩn wulu a tɩ manɩ nɩ a Zonatã sãwna,

²⁶ɛcɛ a nãà tɩ ɩ n a ʋ zie mɛ̃ a lɛ a na-mɩnɛ na de ʋ niwn a, na tɩ ɩ ʋ a: ʋ tɩ ɩ na k'ʋ nyɛ̃ ƴãwfʋ yaga a «Nãà bárɩ[97]» za niŋé.

²⁷Ʋ tɩ cãà na bɛr ʋ a ʋ bàwr-maal-kara tõ-nʋɔr, nɩ a ƴãwfʋ al za ʋ na tɩ dãw nyɛ̃ a. Ʋ mɩ̀ tɩ ƴãw na ʋ pʋɔ a «Nãà bárɩ» bɛl na de a niwn a pʋɔ.

²⁸A Zonatã tɩ zɛlɩ nɩ a nãà k'aa Zude tẽw, nɩ a Samaari tẽ-ŋma-kʋ̀rɩ ata ta cãà yarɛ a zuru-yar ɛ, ɛ́ tɩ yel k'ʋʋ na kʋ̀ ʋ nɩ salm-pla kilo[98] túr-ani dɔwlɩ kʋba (8 100) lɩɛr'ɩ.

²⁹A nãà tɩ sàw nɩ a lɛ, ɛ́ sɛb a Zonatã yel à ŋá:

³⁰«A nãà Demetiriyisi puore nɩ a ʋ yɛb Zonatã nɩ a Zifʋ nɩ-bʋʋrɛ.

³¹A sɛb-tʋɔla tɩ na sɛb a nyɩ ƴãw kʋ̀ a “Nãà nɩbɛ[99]” nɩr kãw, Lasɩtɛn a, a ʋ ƴɛ̀r-bie tɛɛ za n'ɩ à á ŋá tɩ tɩrɛ kʋ̀rɛ nyɩ, kɛ́ nyɩ bãwnɩ a:

³²“A nãà Demetiriyisi puore nɩ a ʋ sãà Lasɩtɛn[100].

³³Ɩ̃ yel'a k'ɩ̃ɩ na maal'ɩ a Zifʋ nɩ-bʋʋrɛ vla, bɛ na tu mɛ̃ a ƴãw. A Zifʋ mɩnɛ ɩ n a tɩ bárɩ, ɛ́ ɩrɛ a tɩ zie mɛ̃ a lɛ a na sɛw kɛ́ bɛ ɩrɛ a.

³⁴A na ɩ lɛ a, ɩ̃ yel'a kɛ́ bɛlɛ cãà so a Zude tẽw nɩ a Aferema, Lida nɩ a Aramatayim tẽ-ŋma-kʋ̀rɩ ata. A tẽ-ŋma-kʋ̀rɩ ata á ŋá nɩ a ziir al za a na so a, bɛ ír a nɩ a Samaari tẽw pʋɔ tɩ ƴãw a Zude tẽw pʋɔ, a bɛlɩ dem za na cere a Zerizalɛm tɩ maalɛ bagɛ a vla ƴãw. Dɩ̃a na ta a, a Zifʋ mɩnɛ kʋ̃ cãà yarɛ a nãà yar a na mɩ́ tɩ fɛr kɛ́ bɛ ya yũon za a tẽsɔw bʋ̃-kʋ́ɔrɩ nɩ a tɩɩr wɔmɛ ƴãw a ɩ.

³⁵Ɩ̃ mɩ̀ bɛr bɛ nɩ a zuru-yar a mɩnɛ ɩ̃ na so a: a tɛra ziir piir, a yar al na yarɛ a kʋralɛ a, a nyaarʋ yar nɩ a nãà zuru-yar al ɩ̃ na so a.

³⁶A yele á ŋá na yel a, been kãw za bɛ íre bɛrɛ a ƴɛrɛŋa nɩ a nɩdaar ɛ.”

³⁷A na ɩ à ŋá a, nyɩ cɛlɛ be lɛb sɛb a sɛb-tʋɔla ŋa ƴɛ̀r-bie tɛɛ za kʋ̀ a Zonatã, ʋ bin a sãá a Ŋmɩn-yir-kpɛ̃ɛ tãw zu.»

³⁸A nãà Demetiriyisi na tɩ nyɛ̃ a tẽw ʋ tɛr ƴã-ɓaarʋ a ʋ nɩ-kpɛ̃ɛnʋ dɩb zũú, ɛ́ nɩr za bɛ bàrɛ gbɛ́r a ʋ niŋé a, ʋ tɩ lɛb'a bɛr a ʋ zɛbr-nɩbɛ za, soja ŋa mɩ́ lɛb kul a ʋ yir. Ɛcɛ ʋ tɩ cãà na tɛr a nɩ-bʋʋr-yoru sojarɩ ʋ na tɩ ír a Mediterane kʋ̃ɔ-kpɛ̃ɛ-sɔgɔ-ten pʋɔ a. Alɛ n'a so a na-mɩnɛ bɛl na de ʋ niwn a, zɛbr-nɩbɛ bɛ tɩ nɔnɛ ʋ ɛ.

³⁹Zɩ̃ kɛ́ Tɩrɩfɔ̃[101] na tɩ dãw pʋɔ a Alɛsãdɩr nɩbɛ pʋɔ a, tɩ nyɛ̃ na k'aa zɛbr-nɩbɛ za yere nɩ a Demetiriyisi. Lɛ n'a ʋ tɩ cen tɩ páw Ɩamɩlɩkɔsɩ na ɩ Arabʋ ɛ́ guole a Alɛsãdɩr bidɛble Ãtiokisi a.

⁴⁰A Tɩrɩfɔ̃ tɩ zɛlɛ ʋ nɩ kʋralɛ, k'ʋʋ kʋ̀ ʋ a bie, ʋ tɩ lɩɛrɩ a sãà dɩ a naalʋ. A Tɩrɩfɔ̃ tɩ yel'ɩ a lɛ a Demetiriyisi na yel a kʋ̀ ʋ, nɩ a lɛ a zɛbr-nɩbɛ na bɛ tɩ nɔnɛ a nãà a. Ʋ tɩ kpɛ n a Ɩamɩlɩkɔsɩ zie cɛlɩ.

⁴¹A Zonatã mɩ̀ tɩ ƴãw na bɛ yel a nãà Demetiriyisi k'ʋʋ ír a ʋ sojarɩ a Zerizalɛm zɛbr-yir-kpɛ̃w pʋɔ, nɩ a Zude tẽw tẽ-bɛrɛ al a dacine na viiri koli a pʋɔ, bɛ na tɩ zɛbr'ɩ a Ɩsɩrayɛl nɩbɛ kʋralɛ a ƴãw.

⁴²A Demetiriyisi tɩ sɔw nɩ a Zonatã à ŋá: «A lɛ fʋ na zɛlɩ fʋ̃ʋ nɩ a fʋ nɩ-bʋʋrɛ ƴãw a tɛwr bɛ n'a ɩ̃ na ɩ ɛ, ɩ̃ mɩ̀ na ɩ na nyɩ nyɛ̃ ƴãwfʋ, mãa dɛ wa tʋ̃ɔ́ a lɛn daar a.

⁴³Ƴɛrɛŋa a, a yel-vla ʋl fʋ na na tʋ̃ɔ́ maalɩ a n'ɩ kɛ́ fʋ tɩr sojarɩ kʋ̀ m, bɛ wa lãwnɩ mɛ̃ zɛb, a ɩ̃ zɛbr-nɩbɛ za na gaarɩ a ɩ̃ zu a ƴãw.»

⁴⁴A Zonatã tɩ tɩr'ɩ a ʋ zɛbr-nɩbɛ nɩ-vɩɛlɩ zie túr-ata (3 000) kʋ̀ ʋ a Ãtɩɔsɩ. A bɛ waa tɩ ɩ n a Demetiriyisi nʋ̃ɔ̀ yaga.

⁴⁵Bʋ̃ʋ n'ʋ vɛ̃, a tẽw nɩbɛ tùr-lɩz'a ayʋɔb (120 000) tɩ ɓã n taa a tẽ-kpɛ̃ɛ sɔwlɩsɔw, bɔbr kɛ́ bɛ kʋ a nãà.

⁴⁶A Demetiriyisi tɩ zɔ na kpɛ a nãà yir, ɛ́ a zu-sɛbla yɛ́r pàw a sɛ́ɛ, ɛ́ tĩ a zɛbr.

⁴⁷A nãà tɩ bʋɔl'ɩ a Zifʋ mɩnɛ kɛ́ bɛ wa sõw ʋ, bɛ zɔ wa fɔ̃w bɛ za. Al pùorí bɛ yɛ́r pàw a tẽ-kpɛ̃ɛ kʋ ta nɩbɛ tùr-kʋba (100 000) a ʋlɩ bibir nɛ.

⁴⁸Bɛ tɩ ƴãw nɩ vũu a tẽ-kpɛ̃ɛ, wob zɛbr na-bome yaga, ɛ́ faa a nãà.

⁴⁹A Ãtɩɔsɩ tẽw dem na tɩ nyɛ̃ a Zifʋ mɩnɛ bɛ de a tẽ-kpɛ̃ɛ mɛ̃ a lɛ bɛ na bɔbr a, a bɛ kanyir tɩ baar'a, ɛ́ bɛ cen tɩ ŋmɩɛr cɛlsɩ a nãà zie, zɛlɛ nɩ ʋ yãayãa yere:

⁵⁰«Kʋ̀ tɩ a ƴã-ɓaarʋ, ɛ́ yel a Zifʋ mɩnɛ kɛ́ bɛ bɛr a zɛbr bɛ na zɛbr'ɩ tɩɩm nɩ a tẽ-kpɛ̃ɛ a.»

⁵¹Bɛ tɩ lɔb'ɩ a bɛ zɛbr bome bɛr, ɛ́ ɩ ƴã-ɓaarʋ lɛb be bɛlɛ nɩ a nãà cara pʋɔ. A Zifʋ mɩnɛ tɩ nyɛ̃ nɩ yo-kpɛ̃ɛ a nãà Demetiriyisi nɩ a ʋ naalʋ-tẽw dem niŋé. A bɛ yúor tɩ yi n a naalʋ-tẽw za pʋɔ. Bɛ tɩ lɛb'a kul a Zerizalɛm nɩ zɛbr na-bome yaga.

⁵²A nãà Demetiriyisi tɩ tɛr'ɩ fãw dɔwlɩ, ɛ́ a tẽw tɛr ƴã-ɓaarʋ a ʋ nɩ-kpɛ̃ɛnʋ dɩb pʋɔ.

⁵³Ɛcɛ, ʋ bɛ tɩ tu a lɛ za ʋ na yel a ɩ, ɛ́ lɩɛbɩ a Zonatã dɔ̃ sob. Ʋ bɛ tɩ sàw a sõwfʋ a Zonatã na sõw ʋ a ɩ, ɛ́ ɩrɛ a kpɩɛr ʋ yaga za.

⁵⁴A yele á ŋá pùorí a, a Tɩrɩfɔ̃ tɩ lɛb'a wa n a Ãtiokisi[102]. Ʋ na saa tɩ cãà ɩ pɔlbil-vɛlvɛl a, ʋ lɩɛb'ɩ a nãà, vɔblɩ a nãà-kpawʋɔ.

⁵⁵A zɛbr-nɩbɛ bɛl za, a Demetiriyisi na tɩ lɛb bɛr a, tɩ ɓã n taa a Ãtiokisi zie, ɛ́ zɛb'ɩ a Demetiriyisi tʋ̃ɔ́ ʋ, ʋ zɔ.

⁵⁶A Tɩrɩfɔ̃ tɩ de nɩ a wɔ́br kpɛ so nɩ a Ãtɩɔsɩ tẽ-kpɛ̃ɛ.

⁵⁷A Ãtiokisi 6 sob na tɩ ɩ pɔlbile a tɩ sɛb'ɩ a Zonatã à ŋá: «Ɩ̃ cãà na bɛr fʋ a fʋ bàwr-maal-kara tõ-nʋɔr. Ɩ̃ ƴãwnɛ fʋ na kɛ́ fʋ ɩ a tẽ-ŋma-kʋ̀rɩ anaar[103] nɩ-kpɛ̃ɛ, ɛ́ sɔrɛ fʋ ƴãwn a “Nãà bárɩ” pʋɔ.»

⁵⁸Ʋ mɩ̀ tɩ tɩr'ɩ salm-zɩɛ labɛ nɩ tasarɩ kʋ̀ ʋ, ɛ́ kʋ̀ ʋ sɔ́r k'ʋʋ nyúur'ɩ salm-zɩɛ koli-nyúuri, ɛ́ mɩ̀ suur a kpar-kpɛ̃ɛ-zɩɛ, ƴãwnɛ nɩ a salm-zɩɛ pɛ̃gɩl[104].

⁵⁹Ʋ tɩ ƴãw na a Zonatã yɛb, Sɩmʋ̃, ɩ a soja-na-kpɛ̃ɛ-lɩɛrɛ a zie ʋl na yi a tẽw bɛ na bʋɔlɛ a Tɩ́ɩ̀r Dɛ́r[105] a, ɛ́ tɩ tɔ a Eziptɩ tẽw tʋr-bɔwrɩ a.

⁶⁰A Zonatã tɩ yi na cɔlɩ a Siiri-Kpɛ̃ɛ, mɩ́ yi tẽ-kpɛ̃ɛ ŋa tɩ sãá tẽ-kpɛ̃ɛ ŋa. A Siiri tẽw zɛbr-nɩbɛ za tɩ wa na wa páw ʋ, kɛ́ bɛ lãw nɩ ʋ a zɛbr ƴãw. Ʋ na wa ta a Asɩkalon tẽ-kpɛ̃ɛ a, a tẽw dem tuor'a nyɔw ʋ nɩ ƴãwfʋ yaga.

⁶¹Ʋ tɩ yi n a be cen Gaza, ɛcɛ a tẽw dem tɩ pàw nɩ a tẽ-kpɛ̃ɛ dɩ̃dɛɛ a ʋ niŋé. Ʋ tɩ zɛb'ɩ nɩ a tẽ-kpɛ̃ɛ, nyɩw a ʋ zi-kpɔwlɩ bɛr ɛ́ de a ʋ bome.

⁶²Lɛ n'a a Gaza tẽw dem tɩ zɛlɩ a Zonatã yãayãa, ʋ bɛr bɛ a ƴã-ɓaarʋ. Ɛcɛ ʋ tɩ nyɔw nɩ a bɛ nɩ-bɛrɛ bidɛbr bɛ ɩ nɩ-tɛwrɩ[106], ʋʋ ƴãw bɛ cen a Zerizalɛm. Al pùorí, ʋ tɩ cɔlɩ nɩ a tẽw tɩ ta Damasɩ.

⁶³A Zonatã tɩ wõ na k'aa Demetiriyisi zɛbr-nɩbɛ nɩ-bɛrɛ bɛrɛ ta n Kadɛsɩ, na be a Galile tẽw a, nɩ zɛbr-nɩbɛ yaga yaga, bɔbr kɛ́ bɛ ír ʋ a ʋ tõ-nʋɔr pʋɔ.

⁶⁴Ʋ tɩ yi na k'ʋʋ tɩ tuori bɛ, ɛ́ tɩ bɛr a ʋ yɛb Sɩmʋ̃ a Zude tẽw.

⁶⁵A Sɩmʋ̃ tɩ maal'ɩ a ʋ laɩ tori Bɛtɩ-Suur. Ʋ tɩ jil ʋ na, ɛ́ zɛb'ɩ ʋ cɛlɩ.

⁶⁶A tẽw dem wa tɩ zɛlɩ ʋ nɩ a ƴã-ɓaarʋ, ʋ sàw. Ɛcɛ ʋ tɩ ƴãw na bɛ yi kɛ́ bɛr a tẽw, ʋ kpɛ so ʋ, ɛ́ ƴãw sojarɩ bɛ gùre ʋ.

⁶⁷A Zonatã nɩ a ʋ zɛbr-nɩbɛ mɩ̀ tɩ maal'ɩ a bɛ laɩ pɩɛlɩ Zenezarɛtɩ gbãtar. A bio daarɩ́ biɓaar-pipi, bɛ tɩ cen nɩ Hasɔɔr zi-tɩ̃tal lowr.

⁶⁸A dɔ̃ dem zɛbr-nɩbɛ tɩ tuore bɛ nɩ a zi-tɩ̃tal nɛ pʋɔ, ɛ́ tɩ bɛr sojarɩ bɛ sɔwlɩ gù a Zonatã a tan pʋɔ. A dɔ̃ dem zɛbr-nɩbɛ bɛ́rʋ zie na tɩ tuore ʋ a,

⁶⁹a bɛl na tɩ sɔwlɩ a tɩ yi n a bɛ sɔwlʋ ziir nyɔw a zɛbr.

⁷⁰A Zonatã sojarɩ za tɩ zɔ na, been bɛ tɩ cɛ a bɛ ɩ a ʋ zɛbr-nɩbɛ nɩ-bɛrɛ ayi ɛ: Abɩsalɔm bidɛb Matatɩasɩ, nɩ Salfɩ bidɛb Zuda.

⁷¹Lɛ n'a a Zonatã tɩ taw a ʋ kparɩ cɩɛrɩ, 'wɔ̃w tanɛ ƴãw a zũú ɛ́ puori.

⁷²Al pùorí, ʋ lɛb nyɔw a zɛbr, zɛb tʋ̃ɔ́ bɛ, bɛ zɔ.

⁷³A sojarɩ na zɔ a na tɩ nyɛ̃ a lɛ a, bɛ lɛb'a wa a ʋ zie, bɛ wa lãw diw a bɛ dɔ̃ dem tɩ ta n a bɛ laɩ pʋɔ, a Kadɛsɩ. Be n'a a bɛl tɛɛ za tɩ maalɩ a bɛ laɩ.

⁷⁴A dɔ̃ dem nɩbɛ tɩ kpi na ta túr-ata (3 000) a ʋlɩ bibir nɛ. Al pùorí, a Zonatã tɩ lɛb'a kul a Zerizalɛm.