Read Dagara, Northern 1 Makabe mɩnɛ 15 Bible Online

1 Makabe mɩnɛ 15 - Dagara, Northern bible

1 Makabe mɩnɛ 15

¹A nãà Demetiriyisi 1 sob bidɛb, Ãtiokisi 7 sob, tɩ be n a Mediterane kʋ̃ɔ-kpɛ̃ɛ-sɔgɔ-ten pʋɔ, ɛ́ tɩr sɛb-tʋɔla kʋ̀ a Sɩmʋ̃, a bàwr-maal-kara, na ɩ a Zifʋ mɩnɛ nɩ-kpɛ̃ɛ a, ʋ́ʋ̀ tɩ kʋ̀ ʋ nɩ a sɛbɛ lãwnɩ a Zifʋ mɩnɛ za.

²À ŋá n'a a sɛbɛ tɩ sɛb: «A nãà Ãtiokisi puore nɩ a Sɩmʋ̃ na ɩ a bàwr-maal-kara nɩ a tẽw nɩ-kpɛ̃ɛ a, lãwnɩ a Zifʋ nɩ-bɛrɛ.

³Nɩ-faar de nɩ a ɩ̃ sãàkʋm-kore naalʋ-tẽw, alɛ so ɩ̃ bɔbr k'ɩ̃ɩ ɩrɛ lɛb tɩ de ʋ, ʋ lɛb ɩ mɛ̃ a dãwdãw a. Ɩ̃ ír'ɩ zɛbr-nɩbɛ yaga yaga, ɛ́ cɔbrɩ zɛbr gbee,

⁴bɔbr k'ɩ̃ɩ cen tɩ siw a tẽw pʋɔ zɛb'ɩ a bɛlɩ dem na sãw ʋ bɛr, ɛ́ sãw a ɩ̃ naalʋ-tẽw tẽ-bɛrɛ yaga bɛr a.

⁵Ƴɛrɛŋa a, a zuru-yar al za a na-mɩnɛ na de m niwn a na tɩ ír bɛr fʋ a, ɩ̃ sàw na k'aa lɛ cãà n'a. Lɛ mɩ̀ n'a a bʋ̃-kʋ̀rɩ al za na cɛ bɛ kʋ̀ b a ƴãw.

⁶Ɩ̃ kʋ̀ b'ɩ sɔ́r kɛ́ fʋ maalɩ a fʋ mɩŋa libir, na na dɩrɛ a fʋ tẽw pʋɔ a.

⁷Nɩr ta so a Zerizalɛm nɩ a Ŋmɩn-yir-kpɛ̃ɛ ɩ. Tɛr a zɛbr bome al za fʋ na bɔ a, nɩ a zɛbr-yir-kpɛn fʋ na mɛ a cãà be a pʋɔ a.

⁸A nãà samɛ fʋ na tɛr a, a ƴɛrɛŋa samɛ nɩ a nɩdaar samɛ a, bɛ lɛb'a bɛr fʋ a za, a ƴɛrɛŋa nɩ kʋralɛ.

⁹Mãa wa lɛb de a ɩ̃ naalʋ-tẽw so ʋ a, ɩ̃ na ɩ na fʋ nyɛ̃ ƴãwfʋ na ɩ ƴãwfʋ a, a fʋ̃ʋ, a fʋ tẽw nɩ a Zerizalɛm Ŋmɩn-yir-kpɛ̃ɛ, a tẽ-daa za nyɛ̃ a nyɩ yúor-vɩɛlʋ-danʋ.»

¹⁰A yome lɩz'a ani nɩ pie nɩ anaar[128] (174) sob, a Ãtiokisi tɩ ta n a ʋ sãàkʋm-kore tẽw. A zɛbr-nɩbɛ za tɩ tu ʋ na, ɛ́ tɩ cɛ blãlɛ a Tɩrɩfɔ̃ zie.

¹¹A Ãtiokisi tɩ diw nɩ a Tɩrɩfɔ̃, ʋ zɔ tɩ ta Door na be a kʋ̃ɔ-kpɛ̃ɛ nʋɔr a.

¹²Ʋ mɩŋa za tɩ nyɛ̃ na k'aa yele dúor ʋ na, nɩ k'aa ʋ zɛbr-nɩbɛ zawr'ʋ na bɛr.

¹³A Ãtiokisi tɩ wa na wa maalɩ a ʋ laɩ tori a Door, ɛ́ tɛr soja-gbɛ́ɛ dem tùr-lɩz'a ayʋɔb (120 000) nɩ wie dem túr-ani (8 000).

¹⁴Ʋ tɩ ŋmãa na jil a tẽ-kpɛ̃ɛ, ɛ́ a gbee piw a kʋ̃ɔ-kpɛ̃ɛ lowr. Ʋ tɩ gù n a tẽ-kpɛ̃ɛ a tẽsɔw lowr nɩ a kʋ̃ɔ-kpɛ̃ɛ lowr, bɛ sàwr nɩr za kpɩɛr bɩɩ yire ɩ.

¹⁵A Nimeniyisɩ[129] nɩ a ʋ taabɛ na tɩ yi a Ʋrɔm lɛb wa a, bɛ tɩ wa n nɩ sɛb-tʋɔlɩ tẽ-yaga na-mɩnɛ ƴãw. A sɛb-tʋɔlɩ ƴɛ̀r-bie n'ɩ á ŋá:

¹⁶«Lisiisɩ, a Ʋrʋmɛ̃ mɩnɛ kɔ̃sil[130], puore nɩ a nãà Pitoleme[131].

¹⁷A nɩbɛ a Zifʋ mɩnɛ na tõ a, wa n a tɩ zie mɛ̃ tɩ bárɩ nɩ tɩ wõ-ta-dem a, kɛ́ bɛ wa lɛb puuli a wõ-taa nɩ a báalʋ lãw tɩ na tɩ dãw maal'ɩ bɛ a. A bàwr-maal-kara Sɩmʋ̃ nɩ a Zifʋ nɩ-bʋʋrɛ nɛbɛ tɩ tõ bɛ.

¹⁸Bɛ wa n nɩ salm-zɩɛ zɛbr-kur-pãgala, a daarʋ na ta salm-pla kilo kɔbr-anũu (500) libie a.

¹⁹Alɛ n'a so tɩ nyɛ̃ a sɛw kɛ́ tɩ sɛb tẽ-yaga na-mɩnɛ, yel bɛ kɛ́ bɛ taa bɔbr a Zifʋ mɩnɛ nɔhaarʋ ɛ, kɛ́ bɛ taa zɛbr'ɩ bɛ ɩ, nɩ a bɛ tẽ-bɛrɛ nɩ a bɛ tẽw ɛ, kɛ́ bɛ taa maalɛ wõ-taa nɩ a nɩbɛ na zɛbr'ɩ a Zifʋ mɩnɛ a ɩ.

²⁰Tɩ mɩ̀ yel'a kɛ́ tɩ na sàw na de a zɛbr-kur-pãgala bɛ na wa n a.

²¹A na ɩ à ŋá a, zi-damnbɛ wa yi a bɛ tẽw zɔ wa kpɩɛr a nyɩ tẽw pʋɔ a, nyɩɩm nyɔw bɛ tɩr kʋ̀ a bàwr-maal-kara Sɩmʋ̃, ʋ ƴãw bɛ dɔwrʋ tu n a bɛ tẽw nʋɔr.»

²²A kɔ̃sil Lisiisɩ tɩ tɩr'ɩ a sɛb-tʋɔla been nɛ kʋ̀ a nãà Demetiriyisi[132], kʋ̀ Atal, Arɩaratɩ, Arzasɩ[133],

²³nɩ ziir á ŋá mɩ̀: Samɩsame, Sɩpartɩ, Delɔsɩ, Mɩndɔsɩ, Sision, Kaari, Samɔsɩ, Pãfili, Lisi, Halikamasɩ, Ʋrɔdɩ, Fazeli, Kɔsɩ, Side, Arvadɩ, Gɔrtɩn, Kinidɩ, Sɩɩpʋr nɩ Sɩɩrɛn[134].

²⁴Bɛ mɩ̀ tɩ lɛb'a sɛb a sɛb-tʋɔla ŋa ƴɛ̀r-bie tɩr kʋ̀ a bàwr-maal-kara Sɩmʋ̃.

²⁵A nãà Ãtiokisi tɩ cãà na zɛbr'ɩ a Door tẽ-kpɛ̃ɛ. Ʋ mɩ́ tɩ ƴãw na a ʋ sojarɩ cen kʋralɛ tɩ zɛb'ɩ ʋ, ɛ́ mɩ́ tɩ ƴãw bɛ maalɩ zɛbr bome a mɩnɛ kãw[135]. Ʋ tɩ piw nɩ a Tɩrɩfɔ̃ a ziir za, kɛ̀ nɩr bɛ mɩ́ tɩ tʋ̃ɔ́ kpɛ bɩɩ yi a tẽ-kpɛ̃ɛ pʋɔ ɩ.

²⁶A Sɩmʋ̃ tɩ tõ n a ʋ soja-vɩɛlɩ zie nɩbɛ túr-ayi (2 000), kɛ́ bɛ cen tɩ lãwnɩ a nãà zɛb. Ʋ mɩ̀ tɩ tɩr'ɩ salm-pla, salm-zɩɛ nɩ bome yaga kɛ́ bɛ tɩ kʋ̀ ʋ.

²⁷Ɛcɛ a Ãtiokisi tɩ zawr'ɩ a sõwfʋ á ŋá bɛr, ɛ́ sãw a wõ-taa ʋ na dãw maal'ɩ a Sɩmʋ̃ a bɛr, ɛ́ bɛ cãà ɩrɛ a ʋ zie mɛ̃ a dãwdãw a ɩ.

²⁸Ʋ tɩ tõ n a «Nãà bá[136]» kãw, Atenobiyisɩ, k'ʋʋ tɩ yel a Sɩmʋ̃ à ŋá: «Nyɩ kpɛ na so a Zafa, a Gazara nɩ a Zerizalɛm zɛbr-yir-kpɛ̃w na ɩ a ɩ̃ naalʋ-tẽw tẽ-bɛrɛ a.

²⁹Nyɩ ɩ n a tẽ-bɛrɛ á ŋá ziir a lɩɛbɩ wɛja-kpalɩ, nyɩ sãw nɩ a tẽw za bɛr, ɛ́ so a ɩ̃ naalʋ-tẽw zi-yaga.

³⁰Ƴɛrɛŋa a, nyɩ lɛb kʋ̀ m a tẽ-bɛrɛ nyɩ na de a, nɩ a ziir al na bɛ pʋɔ a Zude tẽw pʋɔ ɛ́ nyɩ kpɛ so a, zuru-yar.

³¹Nyɩmɛ bɛ wa sàwr a lɛ a, nyɩɩm tɩr salm-pla kilo tùr-pie nɩ ata (13 000) lɩɛr'ɩ a tẽ-bɛrɛ á ŋá, ɛ́ lɛb tɩr a lɛ nʋɔr, a yel-sãwnɩ nyɩ na sãw a ƴãw, nɩ a tẽ-bɛrɛ á ŋá zuru-yar ƴãw. Alɛ bɛ ɩ lɛ, tɩ na wa na, ɛ́ a na wa ɩ n a zɛbr.»

³²A «Nãà bá» Atenobiyisɩ na tɩ ta a Zerizalɛm a, ʋ nyɛ̃ nɩ a Sɩmʋ̃ na-bome nʋɔr ɓãá ʋ: a salm-zɩɛ nɩ a salm-pla labɛ a tabalɛ zu, nɩ a dĩo bʋ̃-bini na vɩɛl vɩɛl a. Ʋ tɩ yel'ɩ a lɛ a nãà na yel a kʋ̀ a Sɩmʋ̃.

³³A Sɩmʋ̃ tɩ sɔw ʋ nɩ à ŋá: «A tẽsɔwr a tɩ sãàkʋm-kore na bɛr kʋ̀ tɩ, ɛ́ vuo kãw pʋɔ a tɩ dɔ̃ dem faa ɛ́ a bɛ tu sɔ́r a, alɛ n'a tɩ lɛb zɛb de, tɩ bɛ zɛb de tẽ-sãan kãw bɩɩ nɩ-yũo bom ɛ.

³⁴Vo-vla n'ʋ tɩ wa nyɛ̃ lɛb de a gbã-dɩ-bom a tɩ sãàkʋm-kore na bɛr kʋ̀ tɩ a.

³⁵A Zafa nɩ a Gazara ƴãw fʋ na yel kɛ́ fʋ̃ʋ so a, a ten á ŋá nɩbɛ ɩ na a kpɛ a tɩ nɩbɛ nɩ a tɩ tẽw bʋ̃-zaalɛ. Ɛcɛ tɩ na kʋ̀ fʋ nɩ salm-pla kilo[137] túr-ayi dɔwlɩ kɔbr ayopõi (2 700) lɩɛr'ɩ a tẽ-bɛrɛ á ŋá.» A Atenobiyisɩ bɛ tɩ ƴɛ̀r ƴɛ̀rʋ ɛ.

³⁶Ʋ tɩ lɛb'a nyɛ̃ suur ʋ za cen nɩ a nãà zie, tɩ yel a lɛ a Sɩmʋ̃ na sɔw a kʋ̀ ʋ, ɛ́ manɩ a Sɩmʋ̃ na-bome za ʋ na nyɛ̃ a yele kʋ̀ ʋ. A nãà tɩ nyɛ̃ nɩ suur mab!

³⁷A Tɩrɩfɔ̃ tɩ kpɛ n gbor zɔ cen Ɔrtosɩa.

³⁸A nãà Ãtiokisi tɩ ƴãw nɩ Kendebe ʋ ɩ a sojarɩ nɩ-kpɛ̃ɛ kpɛ̃ɛ a kʋ̃ɔ-kpɛ̃ɛ nʋɔr vuo pʋɔ. Ʋ tɩ kʋ̀ ʋ nɩ soja-gbɛ́ɛ dem nɩ soja-wi-zɔmnbɛ,

³⁹ɛ́ yel ʋ k'ʋʋ maalɩ a ʋ laɩ a Zude tẽw tʋr-bɔw ƴãw. Ʋ mɩ̀ tɩ yel ʋ na k'ʋʋ lɛb mɛ a Kediron tẽ-kpɛ̃ɛ, ɛ́ ɩ a pamɛ a kpɛmɛ dɔwlɩ, ʋʋ mɩ́ yi a be cen tɩ zɛb'ɩ a Zifʋ nɩbɛ. A nãà ʋl a, ʋ tɩ ta na tu a Tɩrɩfɔ̃.

⁴⁰A lɛ n'a a Kendebe tɩ cen Zamɩnɩa tɩ tĩ bɛ bɛrɛ a Zifʋ mɩnɛ ɩ: ʋ mɩ́ tɩ kpɛ n a Zude tẽw pʋɔ, nyɔw gaso nɩbɛ lɛb wa n, bɩɩ kʋ kʋ nɩbɛ.

⁴¹Ʋ tɩ lɛb'a mɛ a Kediron, ɛ́ ƴãw soja-wi-zɔmnbɛ nɩ soja-gbɛ́ɛ dem a be, na na mɩ́ yire tɩ zɛbr a Zude tẽw sɛ́ɛ zu, mɛ̃ a lɛ a nãà na tɩ yel a.