Read Dagara, Northern 1 Makabe mɩnɛ 16 Bible Online

1 Makabe mɩnɛ 16 - Dagara, Northern bible

1 Makabe mɩnɛ 16

¹A Zã tɩ yi n a Gazara cen tɩ yel a lɛ a Kendebe na ɩrɛ a kʋ̀ a ʋ sãà Sɩmʋ̃.

²Lɛ n'a a Sɩmʋ̃ tɩ bʋɔlɩ a ʋ bidɛb-bɛrɛ ayi, Zuda nɩ Zã, wa yel bɛ: «Mãa nɩ a ɩ̃ yɛbr, nɩ a ɩ̃ sãà yir za, tɩ zɛb'ɩ nɩ a Ɩsɩrayɛl nɩbɛ dɔ̃ dem a tɩ pɔ̀lʋ daarɩ́ za wa tɔ a dɩ̃a. Gb'a a ŋmɩn za, tɩ tʋ̃ɔ́ na faa a Ɩsɩrayɛl nɩbɛ.

³Mãa n'ɩ ŋan kor ƴɛrɛŋa, ɛcɛ Naaŋmɩn maalʋ zũú a, nyɩ ta n nɩbɛ. A na ɩ à ŋá a, nyɩ lɩɛrɩ mãa nɩ a ɩ̃ yɛb. Nyɩ cen tɩ zɛb a tɩ nɩ-bʋʋrɛ ƴãw, ɛ́ a Sore sõwfʋ be a nyɩ zie!»

⁴A Zã tɩ ír'ɩ soja-gbɛ́ɛ dem tùr-lɩzɛr (20 000) nɩ soja-wi-zɔmnbɛ a tẽw pʋɔ, bɛ cen a Kendebe ƴãw. Bɛ tɩ gã nɩ Modin ìr.

⁵A bio daarɩ́ biɓaar-pipi, bɛ tɩ ìr'a cen a zi-tɩ̃tal pʋɔ. A be n'a soja-gbɛ́ɛ dem nɩ soja-wi-zɔmnbɛ, na yãwmɛ yaga a, tɩ tuore bɛ. Bàa tɩ be n a zɛbr-nɩbɛ ziir ayi á ŋá cara pʋɔ.

⁶A Zã nɩ a ʋ nɩbɛ tɩ cɔbr'a àr tori a dɔ̃ dem. Ʋ na tɩ nyɛ̃ a ʋ sojarɩ zɔrɛ dɛ̃bɩ̃ɛ a bàa gãwfʋ ƴãw a, ʋ de nɩ niwn gãw. Bɛ na tɩ nyɛ̃ a lɛ a, bɛ tu ʋ na gãw.

⁷A Zã tɩ põ nɩ a ʋ zɛbr-nɩbɛ, ƴãw a wi-zɔmnbɛ a gbɛ́ɛ dem sɔgɔ, bʋ̃ʋ n'ʋ vɛ̃, a dɔ̃ dem wi-zɔmnbɛ tɩ yãwmɛ nɩ yaga za.

⁸Ʋ tɩ ƴãw na bɛ pɛblɩ a wɩɩr a zɛbr ìr, ɛ́ bɛ zɛb tʋ̃ɔ́ a Kendebe nɩ a ʋ zɛbr-nɩbɛ. Dɔ̃ dem nɩbɛ yaga tɩ kpi n a zɛbr zie, ɛ́ a bɛl na cãà be a, zɔ tɩ kpɛ a Kediron zɛbr-yir-kpɛ̃w pʋɔ.

⁹Bɛ tɩ ƴãw nɩ a Zuda bàalʋ a zɛbr pʋɔ, ɛcɛ a ʋ yɛb Zã tɩ diw nɩ a nɩbɛ na zɔrɛ a tɩ ta n a Kediron, a tẽ-kpɛ̃ɛ a Kendebe na tɩ lɛb mɛ a.

¹⁰Bɛ mɩnɛ tɩ zɔ na tɩ kpɛ a yir-cõcowli na pɩɛlɩ Asɩdɔdɩ a, a kura pʋɔ. A Zã tɩ nyɩw nɩ a yir-cõcowli, a dɔ̃ dem nɩbɛ túr-ayi (2 000) kpi. Al pùorí, ʋ tɩ lɛb'a cen a Zerizalɛm nɩ ƴã-ɓaarʋ.

¹¹Abubɔsɩ bidɛb, Pitoleme, tɩ lɩɛb'ɩ a Zeriko tẽw zi-tɩ̃tal na-kpɛ̃ɛ-lɩɛrɛ. Ʋ tɩ tɛr'ɩ salm-zɩɛ nɩ salm-pla yaga,

¹²bʋ̃ʋ n'ʋ vɛ̃, ʋ tɩ ɩ n a bàwr-maal-kara Sɩmʋ̃ dɛcɩɛ.

¹³A tɩ ɩ na ʋ ɩrɛ pɔ̀l-ɩb, ɛ́ bɔbr k'ʋʋ so a tẽw. Lɛ n'a ʋ tɩ tɩɛrɩ k'ʋʋ maalɩ yã kʋ a Sɩmʋ̃ nɩ a ʋ bidɛbr.

¹⁴A Sɩmʋ̃ tɩ cɔlɛ nɩ a tẽw tẽ-bɛrɛ a lɛn daar, bɔbr k'ʋʋ bãw a yel-fɛrɩ. Ʋ tɩ siw nɩ Zeriko, ʋlɛ nɩ a ʋ bidɛbr Matatɩasɩ nɩ Zuda, a yome lɩz'a ani nɩ pie nɩ ayopõi[138] (177) sob daar, a cuwr pie nɩ been sob na ɩ Sebatɩ cuw a.

¹⁵A Abubɔsɩ bidɛb tɩ de bɛ nɩ a sãanʋ, zɛbr-yir-kpɛ̃w cãpile kãw ʋ na tɩ mɛ bɛ bʋɔlɛ Dokɩ a pʋɔ. Ʋ tɩ sɔwl'ɩ a ʋ tɩɛrʋ, ɛ́ cɔbrɩ cuw-kpɛ̃ɛ dɩb kʋ̀ bɛ. Ɛcɛ ʋ tɩ sɔwl'ɩ nɩbɛ a zɛbr-yir-kpɛ̃w pʋɔ.

¹⁶A Sɩmʋ̃ nɩ a ʋ bidɛbr na wa kuoli a, a Pitoleme nɩ a ʋ nɩbɛ ìr'a de a bɛ zɛbr bome, ŋmʋr kpɛ nyɔw nɩ a Sɩmʋ̃ a dɩb dĩó, kʋ ʋ, lãwnɩ a ʋ bidɛbr ayi nɩ a ʋ tõ-tõ-biir bɛ mɩnɛ.

¹⁷Mɩlʋ ɩ-faa n'ɩ à ŋá a Pitoleme na tɩ ɩ a, maalɩ faa yáa a vla san.

¹⁸Al pùorí, a Pitoleme tɩ sɛb'a manɩ a lɛ ʋ na ɩ a kʋ̀ a nãà Ãtiokisi, ɛ́ zɛlɛ k'ʋʋ bɛr a zɛbr-nɩbɛ bɛ wa sõw ʋ, ʋ zɛb de a tẽ-bɛrɛ nɩ a tẽw kʋ̀ ʋ.

¹⁹Ʋ tɩ tõ n nɩbɛ bɛ mɩnɛ a Gazara, kɛ́ bɛ tɩ kʋ a Zã. Ʋ tɩ sɛb'ɩ sɛb-tʋɔla kʋ̀ a zɛbr-nɩbɛ nɩ-bɛrɛ, yel kɛ́ bɛ wa a ʋ zie ʋ wa kʋ̀ bɛ salm-pla, salm-zɩɛ nɩ bʋ̃-kʋ̀rɩ.

²⁰A Pitoleme lɛb tɩ tõ n nɩbɛ bɛ mɩnɛ, kɛ́ bɛ tɩ de a Zerizalɛm tẽ-kpɛ̃ɛ nɩ a Ŋmɩn-yir-kpɛ̃ɛ tãw.

²¹Ɛcɛ nɩr kãw tɩ de nɩ niwn zɔ cen k'ʋʋ tɩ yel a Zã kɛ́ bɛ kʋ n a ʋ sãà nɩ a ʋ yɛbr. Ʋ tɩ yel'a ƴãw pʋɔ: «A Pitoleme tõ n nɩbɛ kɛ́ bɛ wa kʋ a fʋ̃ʋ mɩ̀.»

²²A yel ŋa tɩ dam'ɩ a Zã yaga za. Ʋ na tɩ wõ kɛ́ bɛ bɔbr'ɩ a ʋ kʋb a, ʋ ƴãw na bɛ nyɔw a nɩbɛ na tɩ wa a al ƴãw a kʋ.

²³A Zã yele al na cɛ a, a ʋ zɛbr, a ʋ gãda-tome, a dacĩ-bɛrɛ ʋ na mɛ a, nɩ a ʋ ɩ-ɩrɩ al na cɛ a,

²⁴a za sɛb'a ƴãw a sɛbɛ ʋl pʋɔ, ʋ na dɛ wa lɩɛrɩ a ʋ sãà ɩ a bàwr-maal-kara ɛ́ tõ a.