Read Dagara, Northern 2 Makabe mɩnɛ 1 Bible Online

2 Makabe mɩnɛ 1 - Dagara, Northern bible

2 Makabe mɩnɛ 1

¹«A Zerizalɛm nɩ a Zude tẽw za Zifʋ mɩnɛ puore nɩ a bɛ yɛbr Zifʋ bɛl na be a Eziptɩ tẽw a, ɛ́ yere kɛ́ ƴã-ɓaarʋ na ɩ ƴã-ɓaarʋ a be a bɛ zie.»

²«A Naaŋmɩn, ʋ cãà bãwnɩ a wõ-taa ʋ na maalɩ nɩ a Abraham, Ɩzaakɩ nɩ Zakɔb, a ʋ tõ-tõ-biir na bɛ lɛb pùor a, ɛ́ kʋ̀ nyɩ a ʋ maalʋ yaga za!

³Ʋ ƴãw nyɩ za a tɩɛrʋ kɛ́ nyɩ puore ʋ, kɛ́ nyɩ maalɛ a ʋ pʋ-tɩɛrʋ nɩ a nyɩ socir za, lãwnɩ tɩɛrʋ na vɩɛl a.

⁴Ʋ ɩ kɛ̀ nyɩ tʋ̃ɔ́ bãw a ʋ wulu nɩ a ʋ nɛ-ƴãwnɩ, ʋʋ kʋ̀ nyɩ a ƴã-ɓaarʋ!

⁵Ʋ sàw de a nyɩ puoru, ʋ dɩ a nyɩ sãwnɩ suur kʋ̀ nyɩ, ɛ́ ta zawrɩ nyɩ bɛr a kpɩɛrʋ daar ɛ!

⁶A puoru n'ɩ à á ŋá tɩ na puore ʋ kʋ̀rɛ nyɩ a ka, a ƴɛrɛŋa a.

⁷A Demetiriyisi naalʋ-dɩb daar, a yome lɩz'a ani nɩ piwaɩ (169) sob, a tɩɩm Zifʋ mɩnɛ, tɩ tɩ sɛb nyɩ nɩ à ŋá: “A lɛ a Zazɔ̃ nɩ a ʋ nɩbɛ na dɛ zawrɩ a Tẽ-Sõw yele nɩ a Naaŋmɩn, tɩ Nãà, yele bɛr a, tɩ be n kpɩɛrʋ na bɛ dɩ vuo a pʋɔ[1].

⁸Bɛ nyɩw nɩ a Ŋmɩn-yir-kpɛ̃ɛ pan-kpɛ̃ɛ bɛr, ɛ́ kʋ nɩbɛ na bɛ tɛr sãwna a. Ɛcɛ tɩ puor'ɩ a Sore, ʋ sàw a tɩ zɛlʋ. Tɩ maal'ɩ a bagɛ ɛ́ tɩr kukur de-kʋ̀b bome. Tɩ 'le n a Ŋmɩn-yir-kpɛ̃ɛ fɩ̃tɩlɩ, ɛ́ bin a dipɛ̃ bɛ na mɩ́ de kʋ̀ a Naaŋmɩn a.”

⁹Ƴɛrɛŋa a, tɩ sɛbr nyɩ na kɛ́ nyɩ maalɩ a Sɛwr cuw[2], a Kisile cuw pʋɔ.

¹⁰A yome kɔbr ayi vʋ̃ɔ lɩzɛr dɔwlɩ yome ani (188)[3] sob pʋɔ n'a a sɛbɛ sɛb.» «A Zerizalɛm nɩ a Zude tẽw dem, a nɩ-kore lãwnɩ a Zuda, puore nɩ a Arɩsɩtobul, na ɩ a bàwr-maalbɛ bɛ na de kʋ̀ a Sore a bʋʋrɛ, nɩ a nãà Pitoleme yã-wule a. Tɩ mɩ̀ puore nɩ a Eziptɩ tẽw Zifʋ mɩnɛ, ɛ́ yere kɛ́ bɛ tɛr ƴã-ɓaarʋ vla[4].

¹¹A Naaŋmɩn faa tɩ nɩ yel-fa-bɛrɛ pʋɔ, alɛ so tɩ puore ʋ barka yaga za, ʋ na sõw tɩ tɩ zɛb'ɩ a nãà a.

¹²Yel-mɩŋa n'a, a Naaŋmɩn mɩŋa diw nɩ a bɛlɩ dem na tɩ wa wa zɛbr'ɩ a tẽ-kpɛ̃ɛ-sõw a.

¹³Bʋ̃ʋ n'ʋ vɛ̃, a nãà Ãtiokisi na tɩ cen a Pɛrsɩ tẽw a, a ʋ zɛbr-nɩbɛ tɩ sãá na mɛ̃ nɩr kʋ̃ tʋ̃ɔ́ bɛ a. Ɛcɛ bɛ tɩ kʋ n bɛ za a ŋmɩn-pɔw Naneya[5] yir pʋɔ, a yã a ʋ bàwr-maalbɛ na tɩ maalɩ a ƴãw.

¹⁴A Ãtiokisi tɩ cen nɩ a zi-sõw ŋa pʋɔ, ʋlɛ nɩ a ʋ bárɩ, ɛ́ yel kɛ́ ʋlɛ nɩ a ŋmɩn-pɔw kul-taa ƴãw n'a. Ɛcɛ alɛ ɩrɛ mɛ̃ bom'ʋ a, a ŋmɩn-yir na-bʋ̃-yaga yaga na na ɩ a kul-taa bom a n'a ʋ tɩ bɔbr.

¹⁵A Naneya bàwr-maalbɛ tɩ de a na yi n bin, ɛ́ a Ãtiokisi nɩ a ʋ pùor dem bɛ mɩnɛ kpɛ a zi-sõw pʋɔ. Ɛcɛ a nãà na dɛ tɩ kpɩɛr wa báarɛ a, a bàwr-maalbɛ nyɔw nɩ a yir pamɛ pàw.

¹⁶Bɛ tɩ yuo nɩ vʋɔr na sɔwlɩ a gàrʋ́ a, ɛ́ àr a be, ɛ́ lɔb lɔb a Ãtiokisi nɩ a ʋ nɩbɛ nɩ kʋsɛbɛ kʋ. Al pùorí bɛ ŋma a bɛ gbɛ́ɛ nɩ a nuru nɩ a zuru, ɛ́ lɔb a zuru kʋ̀ a bɛlɩ dem na tɩ be a yẽw a.

¹⁷A tɩ Naaŋmɩn so danʋ a yele za pʋɔ, ʋl na bɛr a bɛlɩ dem na ɩrɛ ʋ laar a kʋ̀ a kũu a.»

¹⁸«A Kisile cuw bibie lɩzɛr'ɩ anũu sob, tɩ na maal'ɩ a Ŋmɩn-yir-kpɛ̃ɛ dɛwr ír-bɛrʋ cuw. Tɩ jiel'a nyɛ̃ a ɩ fɛrʋ kɛ́ tɩ ɩ nyɩ bãwnɩ a, mɩ̀ tʋ̃ɔ́ maalɩ a cuw mɛ̃ a lɛ a Sɛwr cuw na mɩ́ maalɩ a. A lɛ pʋɔ a, nyɩ na lɛb'a bãwnɩ a vũu na tɩ sãá a lɛn daar a Neemi na tɩ lɛb mɛ a Ŋmɩn-yir-kpɛ̃ɛ nɩ a bàwr-maal-kuur baarɩ, ɛ́ maalɩ bagɛ a.

¹⁹Bʋ̃ʋ n'ʋ vɛ̃, a lɛ bɛ na tɩ diw[6] a tɩ sãàkʋm-kore cen nɩ a Pɛrsɩ tẽw a, a ʋlɩ daar nɛ bàwr-maalbɛ bɛl na bɛ lɛb pùor a, tɩ sɔwl'a mʋ̃ɔ a bàwr-maal-kuur zu vũu tɩ sɔwlɩ bul-kõw pʋɔ. Bɛ tɩ sɔwl'ʋ nɩ vla za, nɩr za bɛ tʋ̃ɔ́ nyɛ̃ ʋ ɛ.

²⁰A na wa pɛlɩ a Naaŋmɩn pʋɔ yome yaga pùorí a, a Pɛrsɩ tẽw nãà tɩ tõ n Neemi a Zerizalɛm. A Neemi tɩ ƴãw na a bàwr-maalbɛ bɛl na tɩ sɔwlɩ a vũu a bʋʋrɛ bɔ a vũu.

²¹Bɛ na tɩ yel kɛ́ bɛ bɛ nyɛ̃ vũu, ɛ́ nyɛ̃ bʋ̃-kʋ̃ɔ mawtaga kãw a, a Neemi tɩ yel a kɛ́ bɛ 'wɔ̃w a wa n. Bɛ na tɩ cɔbrɩ bom za baarɩ a bàwr ƴãw a, a Neemi tɩ yel'ɩ a bàwr-maalbɛ kɛ́ bɛ cir a bʋ̃-kʋ̃ɔ á ŋá ƴãw a dàar zu, nɩ a bàwr-maal-bome na dɔwlɩ a zu a.

²²Bɛ tɩ ɩ n a lɛ. Blã na wa pʋɔ a, a mʋ̃tɔ̃w zũzuge na tɩ pàw a tɩ yi na, ɛ́ vũu-kpɛ̃ɛ nyɔw a bàwr-maal-kuur za dɩrɛ, a ɩ nɔ-ɓãan a nɩbɛ za zie.

²³A bàwr-maal-bome na tɩ dɩrɛ a, a bàwr-maalbɛ nɩ a bɛlɩ dem za na tɩ be be a tɩ puore na. A Zonatã mɩ́ tɩ tĩ na, ɛ́ a bɛl na cɛ a sɔwr, lãwnɩ a Neemi.

²⁴A puoru ʋl tɩ n'ɩ ŋa: “Sore e, Sore Naaŋmɩn i, fʋ̃ʋ n'ʋ ír a bome za. Fʋ bɛ tɛr dɩ̃ɛnʋ ɛ, fʋ tɛr'ɩ kpɛnʋ, fʋ ɩ n nɩ-mɩŋa ɛ́ ɩ nɔ̃wfʋ tɛwr. Fʋ̃ʋ yõ n'ʋ ɩ nãà, fʋ̃ʋ yõ n'ʋ ɩ nɩ-vla,

²⁵fʋ tɩrɛ na bɛ zʋmnɛ nɩ ɛ, ɛ́ ɩ nɩ-mɩŋa, kpɛnʋ-za-sob, ɛ́ be kʋralɛ. Fʋ kaa na ír a tɩ sãàkʋm-kore, fʋ maalɩ bɛ na bɛ be a fʋ tome tob ƴãw, ɛ́ fʋ faarɛ a Ɩsɩrayɛl yel-faa za ƴãw.

²⁶Pãa sàw de a bàwr ŋa a fʋ nɩ-bʋʋrɛ za ƴãw, a Ɩsɩrayɛl. Gùre bɛ, fʋ̃ʋ na so bɛ a, ɛ́ ɩ kɛ̀ bɛ sɛwnɩ a fʋ tome tob.

²⁷A tɩ nɩbɛ na ɩ a gbãgbaar be a ziir a nɩ-bʋʋr-yoru sɔgɔ a, ír bɛ a gbãgbaalʋ pʋɔ bɛ lɛb so bɛ tʋɔra. Lɛb bʋɔlɩ bɛ a ten za pʋɔ wa ɓã taa. Jɩ́r a bɛlɩ dem bɛ na bɛ nɔnɛ ɛ́ ɩrɛ laar a kaa, a nɩ-bʋʋr-yoru bãw kɛ́ fʋ ɩ n a tɩ Naaŋmɩn.

²⁸Dɔwrɩ a bɛlɩ dem na ɩrɛ tɩ a kpɩɛr, ɛ́ ɩrɛ pɔ̀l-ɩb tʋʋr'ɩ tɩ a.

²⁹Lɛb ƴãw a fʋ nɩ-bʋʋrɛ a fʋ tẽw fʋ na so a pʋɔ, mɛ̃ a lɛ a Moyiir na yel a.”

³⁰Al pùorí, a bàwr-maalbɛ tɩ nyɔw nɩ danʋ yielu.

³¹A bàwr-maal-bome na tɩ dɩ a vũu baar'a, a Neemi tɩ yel'a kɛ́ bɛ cir a bʋ̃-kʋ̃ɔ al na cɛ a ƴãw kʋsɛ-bɛrɛ kãw zu.

³²Bɛ na dɛ tɩ ɩ a lɛ wa baarɩ a, vũu 'le na, ɛcɛ a vũu na tɩ dɩrɛ a bàwr-maal-kuur zu a cãà tɩ vɔl'ɩ a ʋ cãà.

³³A yel ŋa tɩ yi na. À ŋá n'a bɛ tɩ cen tɩ manɩ kʋ̀ a Pɛrsɩ mɩnɛ nãà, kɛ́ bɛ nyɛ̃ nɩ bʋ̃-kʋ̃ɔ kãw a be a bàwr-maalbɛ na tɩ sɔwlɩ a vũu, ɛ́ bɛ bãw diw bɛ cen nɩ a Babɩlɔn a, nɩ k'aa bʋ̃-kʋ̃ɔ á ŋá n'a a Neemi nɩ a ʋ taabɛ nyɩw nɩ a bàwr-maal-bome.

³⁴A nãà na tɩ bɩɛrɩ a yele nyɛ̃ a ɩ sɩza a, ʋ ƴãw na bɛ maalɩ dàbáw viiri koli a zie ʋl, ɛ́ yel kɛ́ zi-sõw n'ʋ.

³⁵Ʋ tɩ páwr'ɩ libie yaga a ʋ pʋɔ, íre kʋ̀rɛ a ʋ nɩ-nɔnɩ.

³⁶A Neemi nɩ a ʋ taabɛ tɩ bʋɔl'ɩ a bʋ̃-kʋ̃ɔ á ŋá kɛ́ “nɛfɩtaar”, a pɛr lɛ kɛ́ “dɛwr ír-bɛrʋ”, ɛcɛ a nɩbɛ yaga zie tɩ bʋɔlɛ a nɩ “Nafite[7].”»