Read Dagara, Northern 2 Makabe mɩnɛ 3 Bible Online

2 Makabe mɩnɛ 3 - Dagara, Northern bible

2 Makabe mɩnɛ 3

¹A bàwr-maal-kara Onɩasɩ[12] daar, a tẽ-sõw-kpɛ̃ɛ Zerizalɛm nɩbɛ tɩ tɛr'ɩ ƴã-ɓaarʋ a yele za pʋɔ. Bɛ tɩ sàwr'ɩ a nɛ́ɛ vla vla, bʋ̃ʋ n'ʋ vɛ̃, a Onɩasɩ tɩ nɔnɛ nɩ a Naaŋmɩn ɛ́ hɩ̃ɛn a yel-faa.

²A na-mɩnɛ tɛɛ za tɩ ƴãwnɛ nɩ a Ŋmɩn-yir-kpɛ̃ɛ, mɩ́ tɩ tɩr bʋ̃-kʋ̀rɩ na ɩ bʋ̃-sɩzarɩ a, a ʋ ƴãw.

³À ŋá n'a a Azi tẽw nãà, Selekisɩ, mɩ́ tɩ ya a samɛ za bɛ na mɩ́ tɩ kpɛ a bagɛ ƴãw a, nɩ a ʋl mɩŋa libie.

⁴Sɩmʋ̃ nɛ kãw na ɩ bàwr-maalɛ pʋɔ a Bilga pàl bàwr-maalbɛ pʋɔ a, tɩ so nɩ a Ŋmɩn-yir-kpɛ̃ɛ kaafʋ ton. Ʋlɛ nɩ a bàwr-maal-kara Onɩasɩ bɛ tɩ wõ taa a tẽ-kpɛ̃ɛ dàrʋ piwru ƴãw ɛ.

⁵A ʋ dem na bɛ tɩ de a Onɩasɩ zie a, ʋ tɩ cen na tɩ páw Tɩraseyasɩ bidɛb, Apoloniyisɩ, na tɩ ɩ a Siiri-Kpɛ̃ɛ[13] nɩ a Fenisi ten na-kpɛ̃ɛ-lɩɛrɛ a lɛn daar a.

⁶Ʋ tɩ manɩ ʋ na, k'aa Zerizalɛm Ŋmɩn-yir-kpɛ̃ɛ na-bome dĩo paal'ɩ na-bome na bɛ tɛr manʋ a, k'aa libie yãwmɛ na bɛ tɛr sɔ́rʋ ɛ, ɛ́ zuo a lɛ a na fɛr k'aa be be a bagɛ maalʋ ƴãw a. Ʋ tɩ cãà na yel kɛ́ bɛ na tʋ̃ɔ́ na ɩ a kpɛ a nãà nuru pʋɔ.

⁷A Apoloniyisɩ nɩ a nãà na wa tɛr nyɛ̃-taa a, ʋ yel'ɩ a na-bome á ŋá yele a Sɩmʋ̃ na tɩ yel k'aa be n be a kʋ̀ ʋ. Lɛ n'a a nãà tɩ tõ a ʋ tõ-tõ-bi-bɛrɛ za niw-diere, Eliodɔɔr, a Zerizalɛm, ɛ́ yel ʋ k'ʋʋ tɩ wa n a na-bome á ŋá wa kʋ̀ ʋ.

⁸A Eliodɔɔr tɩ ìr'a lo a sɔ́r daadaalɛ, yel k'aa Siiri-Kpɛ̃ɛ nɩ a Fenisi tẽ-bɛrɛ jɩ́r-kaafʋ ƴãw n'a, ɛ́ a ɩ a nãà pʋ-tɩɛrʋ maalʋ ƴãw n'a.

⁹Ʋ na tɩ ta a Zerizalɛm a, a bàwr-maal-kara nɩ a tẽw dem de ʋ nɩ vla vla. Ʋ tɩ yel'ɩ a ʋ be beba pɛr kʋ̀ bɛ, manɩ a lɛ bɛ na yel càar'ɩ a Ŋmɩn-yir-kpɛ̃ɛ na-bome a. Ɛcɛ ʋ tɩ sowr'a k'aa lɛ bɛ na yel a ɩ n sɩza bɩɩ.

¹⁰A bàwr-maal-kara tɩ man na wul ʋ k'aa nɩsaal-faa, Sɩmʋ̃, ƴɛ̀rʋ ɩ n ziri: libie tɩ sɩrɩ na be a Ŋmɩn-yir-kpɛ̃ɛ na-bome binu dĩó, ɛcɛ a ŋmãa tɩ ɩ n a pɔw-kɔbɛ nɩ a bi-kpebe ƴãw, ɛ́ Tobi bidɛb Ɩrɩkã[14], nɩr na tɛr tõ-nɔ-kpɛ̃ɛ a, so a ŋmãa. A za tɩ ɩ n salm-pla kilo[15] tùr-pie nɩ been (11 000) nɩ salm-zɩɛ kilo túr-anũu dɔwlɩ kɔbr-anũu (5 500).

¹¹

¹²Lɛb waar, sɔ́r bɛ tɩ ka be kɛ́ bɛ tɔ a towtow ɛ: a na ɩ n màlʋ bɛ màl a bɛlɩ dem na ƴãw a bɛ tɩɛrʋ a zi-sõw ŋa ƴãw a, a yir-kpɛ̃ɛ ŋa bom na bɛ tʋ̀ɔr a ƴãw, ɛ́ a nɩbɛ ƴãwnɛ a tẽ-daa za zu a.

¹³Ɛcɛ a nãà nʋɔr zũú, a Eliodɔɔr tɩ cãà na yere k'aa fɛr'a kɛ́ bɛ de a na-bome á ŋá tɩ ƴãw a nãà na-bome dĩó.

¹⁴Ʋ tɩ cen nɩ a Ŋmɩn-yir-kpɛ̃ɛ pʋɔ, a bibir ʋl ʋ na ƴãw a, k'ʋʋ tɩ sɔ́r a na-bome been been na be be a. A tɩ dam'ɩ a nɩbɛ yaga za a tẽ-kpɛ̃ɛ za pʋɔ.

¹⁵A bàwr-maalbɛ na su a bɛ kpar-son a mɩ́ tɩ gbĩ n dume a bàwr-maal-kuur niŋé. Bɛ mɩ́ tɩ zɛlɛ nɩ a Naaŋmɩn yãayãa, ʋl na n'ʋ ƴãw a nʋɔr càar'ɩ[16] a libi-bini a, k'ʋʋ maal tɛr a na-bome á ŋá ɓerete a bɛlɩ dem na bin a a ƴãw.

¹⁶A bɛlɩ dem na mɩ́ tɩ nyɛ̃ a bàwr-maal-kara a, a bɛ pʋɔ za mɩ́ tɩ sãw na: a ʋ niwn bɛ tɩ cãà ŋmɛ̃ ʋ ŋmɛ̃a ɩ, ɛ́ a sãá pʋl-vʋ̃ɔ na tɛr ʋ a.

¹⁷A dɛ̃bɩ̃ɛ na tɩ ɩrɛ ʋ yaga za, ɛ́ a ʋ ƴã-gan màwr a tɩ ɩ na a nɩbɛ za nyɛ̃ a na wone ʋ yaga za a.

¹⁸A nɩbɛ tɩ ƴawr'a yire a yie pʋɔ, gbilegbile, kɛ́ bɛ lãw puori, kɛ́ bɛ piw a Ŋmɩn-yir-kpɛ̃ɛ tɛr a ɩ-lab na tɩ jɩɛrɛ ʋ a ƴãw.

¹⁹Pɔwbɛ na bɛ dɩ vuo a tɩ yi na pàw a sɛ́ɛ, sɛ vʋɔrɩ gàn, ɛ́ tɛr nyã-zawlɛ. A pɔwsɩrali bɛ na tɩ pàw bɛr a yir a, mɩ́ tɩ zɔ na cen a dɩ̃dɔr ƴãw, bɩɩ zɔ do a garʋ́, bɛ mɩnɛ vuole a tokori vɛɛ ƴãw.

²⁰Bɛ za tɩ zɛw nɩ a nuru cɔw a salom ɛ́ zɛlɛ a Naaŋmɩn yãayãa.

²¹A nɩbɛ na tɩ bʋnɩ gã gã a tẽw, kɛ́ bɛ puori a, nɩ a bàwr-maal-kara pʋl-vʋ̃ɔ na bɛ dɩ vuo na tɩ damnɛ a, a nyɛ́b tɩ ɩrɛ nɩ nɩbaalʋ.

²²A nɩbɛ na tɩ zɛlɛ a Sore kpɛnʋ-za-sob k'ʋʋ gù a na-bome á ŋá ɛ́ tɛr a ɓerete, a bɛlɩ dem na bin a a be a ƴãw a,

²³a Eliodɔɔr ʋl tɩ tĩ na ɩrɛ a lɛ bɛ na yel k'ʋʋ ɩ a.

²⁴Ʋlɛ nɩ a nɩbɛ na gùre ʋ a, tɩ ta n a Ŋmɩn-yir-kpɛ̃ɛ na-bome binu dĩo pɛr baarɩ, a lɛ a salom zu bʋ̃-vʋʋrɩ nɩ kpɛnʋ za Zu-sob na tɩ ɩ yel-bɛ-dãw-nyɛra kãw ʋ sãá a. Lɛ n'a a Naaŋmɩn fãw tɩ ƴãw pʋl-vʋ̃ɔ a bɛlɩ dem za na tɩ kpɛ pʋra kpɛ a be a. A bɛ fãw nɩ a bɛ kanyir tɩ baar'a.

²⁵Bʋ̃ʋ n'ʋ vɛ̃, bɛ tɩ nyɛ̃ nɩ wur na ƴãw bʋ̃-ƴãwnɩ na vɩɛl vɩɛl, ɛ́ nɩr na ɩrɛ dɛ̃bɩ̃ɛ yaga a zɔm ʋ. A nɩr nɛ tɩ ɩ na mɛ̃ ʋ su n zɛbr kparʋ na ɩ salm-zɩɛ a. A wur tɩ ƴaw na nɩ fãw, tur a niŋé gbɛnafɩlɛ cɔw a Eliodɔɔr.

²⁶Pɔlbili ayi tɩ lãw na sãá kpɛmɛ bɛ dɩ vuo ɩ, ɛ́ pɔl yaga za, ɛ́ su kparɩ na dɩ dɛpaalʋ a. Bɛ tɩ àr'a kɔw a Eliodɔɔr, kãw a dʋrʋ lowr ɛ́ kãw a gʋba lowr, ɛ́ ŋmɩɛr ʋ bɛ tɛr bɛ́rʋ daar ɛ, ŋmɩɛr ʋ suwle taa.

²⁷A Eliodɔɔr tɩ lo n tẽw daadaalɛ, lige pili pàw ʋ. Bɛ tɩ ɓáw ʋ na gaalɩ bʋ̃-gana bɛ na mɩ́ tuo a zu.

²⁸A nɩr ŋa na tɩ kpɛ ƴɛrɛlɛ a na-bome dĩó, nɩ pùor dem yaga nɩ a ʋ gùrbɛ a, nɩbɛ tɩ ɓáw ʋ na cen nɩ, ʋ kʋ̃ lɛb tʋ̃ɔ́ sõw ʋ tʋɔra ƴɛrɛŋa ɩ. A nɩbɛ bɛ ŋa na sàw nɩ cãàmɩlɛ k'aa Naaŋmɩn tɛr'ɩ kpɛnʋ.

²⁹A Naaŋmɩn kpɛnʋ zũú, a Eliodɔɔr tɩ gã nɩ a lɛ bɛ tɛr nʋɔr ɛ, ɛ́ bɛ tɩɛrɛ towtow k'ʋʋ na bàa na ɩ.

³⁰A tẽ-kpɛ̃ɛ nɩbɛ bɛl a, bɛ tɩ danɛ nɩ a Naaŋmɩn na tɩ gù a ʋ zi-sõw gub na ɩ nɔ-ɓãan a. A bɛ cɛlɩ ɛ, a dɛ̃bɩ̃ɛ nɩ pʋl-vʋ̃ɔ na tɩ tɛr a nɩbɛ za a Ŋmɩn-yir-kpɛ̃ɛ pʋɔ a, ƴɛrɛŋa a, nʋ̃ɔ̀ nɩ cɩlʋ tɩ paalɩ bɛ na, a Sore na tɩ wul a ʋ kpɛnʋ na ɩ kpɛ̃ɛ a ƴãw.

³¹Daadaalɛ, a Eliodɔɔr taabɛ bɛ mɩnɛ tɩ zɛlɩ nɩ a Onɩasɩ, k'ʋʋ puori a Naaŋmɩn-na-do-saa-bɛ-pɩɛl-a, ʋ kʋ̀ a nyɔ-vʋʋrʋ a nɩr ŋa na tɩ gã a be ŋmaar a vʋʋrʋ a.

³²A bàwr-maal-kara na tɩ zɔrɛ dɛ̃bɩ̃ɛ, a nãà nãà wa tɩɛrɛ k'aa Zifʋ mɩnɛ nɛbɛ bɔ a nɩr ʋ na tõ a kʋb a, ʋ maal'ɩ bàwr kʋ̀ a Naaŋmɩn k'aa Eliodɔɔr sanɩ.

³³A bàwr-maal-kara na tɩ maalɛ a bàwr k'aa Naaŋmɩn dɩ a suur a, a pɔlbili bɛl tɛɛ za tɩ lɛb'a sãá a Eliodɔɔr nyɛ̃ bɛ, bɛ su a bʋ̃-suur-been nɛ. Bɛ tɩ àr a kɔw ʋ, ɛ́ yel ʋ: «Puori a bàwr-maal-kara Onɩasɩ barka yaga za. Bʋ̃ʋ n'ʋ vɛ̃, ʋl zũú n'a a Sore cãà bɛrɛ fʋ a nyɔ-vʋʋrʋ.

³⁴Fʋ̃ʋ a, a Naaŋmɩn ŋmɛ b'a. Ƴɛrɛŋa a, cen tɩ yel a Naaŋmɩn kpɛnʋ na ɩ kpɛ̃ɛ a kʋ̀ a nɩbɛ za.» Bɛ na tɩ ƴɛ̀r à à ŋá baar'a, bɛ bɔr'a.

³⁵Lɛ n'a a Eliodɔɔr tɩ maalɩ bàwr kʋ̀ a Sore, ɛ́ puori ʋ puor-wowr, ʋ na tɩ bɛr ʋ a nyɔ-vʋʋrʋ a. Al pùorí, ʋ bɛr a Onɩasɩ ɛ́ lɛb cen a nãà zie, ʋlɛ nɩ a ʋ zɛbr-nɩbɛ.

³⁶A tome a Naaŋmɩn na ɩ kpɛ̃ɛ yaga za a na tõ ʋ nyɛ̃ nɩ mimir a, ʋ tɩ dɩrɛ nɩ a dãsɩɛ a nɩbɛ za zie.

³⁷A nãà na tɩ sowr'ʋ kɛ́ nɩ-buor'ʋ bɛ na tʋ̃ɔ́ lɛb tõ a Zerizalɛm a, a Eliodɔɔr tɩ sɔw na:

³⁸«Fʋ̃ʋ wa tɛr dɔ̃ sob bɩɩ nɩr na bɔbr k'ʋʋ lɔb a fʋ naalʋ a, fʋ̃ʋ tõ ʋ a be, bɛ na tɩ pɔb ʋ nɩ vla vla ʋ lɛb wa páw fʋ, ʋlɛ wa tʋ̃ɔ́ cɩ̃ɛ a. Bʋ̃ʋ n'ʋ vɛ̃, a sãá na kɛ́ Naaŋmɩn fãw be n a ʋlɩ zie nɛ.

³⁹A Naaŋmɩn na kpɩɛr a salom zu a jɩ́rɛ nɩ a Ŋmɩn-yir-kpɛ̃ɛ ŋa ɛ́ gùre ʋ. A bɛlɩ dem na mɩ́ tɛr tɩɛr-faar bɔbr'ɩ kɛ́ bɛ kpɛ n a ʋ pʋɔ a, ʋ mɩ́ pɔb bɛ na kʋ.»

⁴⁰À à ŋá n'a a yele tɩ ɩ a Eliodɔɔr zie, ɛ́ bɛ bɛ tʋ̃ɔ́ de a Ŋmɩn-yir-kpɛ̃ɛ na-bome ɩ.