Read Dagara, Northern 2 Makabe mɩnɛ 6 Bible Online

2 Makabe mɩnɛ 6 - Dagara, Northern bible

2 Makabe mɩnɛ 6

¹A bɛ tɩ cɛlɩ ɛ, ɛ́ a nãà tõ Atɛn tẽw Zerɔ̃tɩ a Zerizalɛm, k'ʋʋ tɩ fɛr a Zifʋ mɩnɛ ƴãw bɛ bɛr a bɛ sãàkʋm-kore nɛ́ɛ, ɛ́ a bɛ nyɔ-vʋʋrʋ ta cãà tuur a lɛ a Naaŋmɩn wulu na yel a ɩ.

²Lɛb waar, a tɩ fɛr'a k'ʋʋ ɩ a Zerizalɛm Ŋmɩn-yir-kpɛ̃ɛ tɛr dɛwr, ʋʋ de ʋ kʋ̀ a Olɛ̃pɩ tẽw ŋmɩn Zesɩ. A ŋmɩn-yir ʋl na be a Garizim tãw zu a ƴãw a, a tɩ fɛr'a k'ʋʋ de ʋ kʋ̀ a Zesɩ na ɩ a sãanʋ-deb ŋmɩn a, mɛ̃ a lɛ a vuo ʋl nɩbɛ na tɩ zɛlɛ a[35].

³A yel-kpɩɛrɩ á ŋá na dɛ tɩ tĩ a, a tɩ kpɛmɛ na a nɩbɛ za zie ɛ́ bɛ tɛr deb ɛ.

⁴Bʋ̃ʋ n'ʋ vɛ̃, a nɩ-bʋʋr-yoru tɩ paal'ɩ a Ŋmɩn-yir-kpɛ̃ɛ nɩ a bɛ nɩ-fa-ɩb nɩ a ɩb bɛ na bʋ̀nɛ ɩrɛ a. Bɛ mɩ́ tɩ dɩ̃ɛnɛ nɩ nɩ pɔw-yɛmɛ a be, ɛ́ ganɛ nɩ bɛ a davʋr-son pʋɔ. Lɛb waar, bɛ mɩ́ tɩ wa n nɩ bome na ciir a, a Ŋmɩn-yir-kpɛ̃ɛ pʋɔ.

⁵À ŋá n'a a bàwr-maal-kuur tɩ paalɩ dʋ̃-dɛgɛ a Naaŋmɩn wulu na yel k'aa ciir'a a.

⁶Sɔ́r bɛ tɩ ka be a pɩ̃ɛnʋ-bibir tub ƴãw ɛ, nɩ a sãàkʋm-kore cuwr maalʋ ƴãw, nɩ mɔ̃ mɩ̀ kɛ́ fʋ yel kɛ́ fʋ ɩ n Zifʋ ɛ.

⁷Cuw za, a nãà dɔwfʋ cuw bibir, a mɩ́ tɩ fɛr'a fʋ pʋɔ bàwr-maal-dɩb kãw nɛ pʋɔ, ɛ́ a mɩ́ tɩ ɩ kpɩɛrʋ yaga. A Dionɩzɔsɩ[36] cuw wa ta a, a mɩ́ fɛr'a fʋ 'lẽ 'wɔr-váar kpawʋɔ, pʋɔ nɩ a nɩbɛ na cɔrɩ cere a pʋɔ, a ŋmɩn ŋa ƴãwfʋ ƴãw.

⁸Pitolemayisɩ[37] tẽw dem tɩ ɩ na ƴãw bɛ sɛb yel à ŋá: a fɛr'a k'aa Gɩrɛkɩ mɩnɛ tẽ-bɛrɛ al na pɩɛlɩ a Zude tẽw a, tɛr ɩ-ɩrɩ a ɩ been a Zifʋ mɩnɛ na kpɩɛr a pʋɔ a zie, ɛ́ a ɩ fɛrʋ kɛ́ bɛ mɩ́ pʋɔ a bàwr-maal-dɩb pʋɔ.

⁹Nʋɔr tɩ tɩr'a, kɛ́ bɛ mɩ́ kʋ sob nɛ za na bɛ sàw tuur a Gɩrɛkɩ mɩnɛ ɩ-ɩrɩ a. A na tɩ ɩ à ŋá a, fʋ mɩ́ tɩ dãw na bãw a kpɩɛrʋ na na wa a mɔlɛ lɛ.

¹⁰À ŋá n'a a tɩ fɛr pɔwbɛ ayi kãw cen ƴɛ̀rʋ-dɩb zie, bɛ na tɩ ƴãw bɛ ŋma a bɛ bibiir yɛɛ a ƴãw. Bɛ tɩ tɛr bɛ na cɔlɩ nɩ a tẽ-kpɛ̃ɛ pʋɔ, nɩ a bɛ bibiir a nyarʋ zu. Al pùorí bɛ da bɛ bɛr, bɛ yi a tẽ-kpɛ̃ɛ dacine zu tɩ lo a tẽw.

¹¹Zifʋ bɛ mɩnɛ tɩ lãw na cen tãw bɔwrɩ na pɩɛlɩ a Zerizalɛm a pʋɔ, kɛ́ bɛ tɩ sɔwlɩ tu a pɩ̃ɛnʋ-bibir tub. Bɛ tɩ mɩl bɛ nɩ a Filib zie, bɛ lãw nyɩw bɛ. Bʋ̃ʋ n'ʋ vɛ̃, bɛ bɛ tɩ sàw zɛb faa bɛ tʋɔra ɩ, a pɩ̃ɛnʋ-bibir na ɩ sõw a zũú.

¹²Ɩ̃ zɛlɛ nɩ a bɛlɩ dem nãà wa kanɛ a sɛbɛ ŋa a, kɛ́ bɛ taa wa sàw a bɛ kanyir báarɛ a kpɩɛrʋ á ŋá ƴãw ɛ. Bɛ nɩ̃ɛ tɩɛrɛ k'aa bɛ nɩ-bʋʋrɛ wulu ƴãw n'a, a bɛ ɩ a bɛ baarʋ ƴãw n'a ɩ.

¹³Bʋ̃ʋ n'ʋ vɛ̃, a Naaŋmɩn na mɩ́ dɔwrɩ a nɩ-gaarɩ fɔ̃wlɛ ɛ́ bɛ bɛr bɛ bɛ ɩ a faa cɛlɩ a, nɔ̃wfʋ kpɛ̃ɛ bãwfʋ n'ʋ ʋ mɩ́ wul bɛ.

¹⁴A nɩ-bʋʋr-yoru dɔwrʋ ƴãw a, a bome za Zu-sob mɩ́ nyɔw nɩ ʋ tʋɔra, ɛ́ gù bɛ ɩ a ɩ-faar a tɩ ta a tab zie. Ɛcɛ à ŋá bɛ n'a ʋ tɩ nyɛ̃ a sɛw k'ʋʋ ɩ a tɩ zie ɩ.

¹⁵Ʋ bɛ bɛr tɩ kɛ́ tɩ maalɩ a tɩ yel-bebe a tɩ tɔ a tɔb zie, ʋʋ wa dɔwrɩ tɩ a baarʋ daar tɛwr ɛ.

¹⁶À ŋá n'a ʋ bɛ sɩbr tɩ a ʋ su-ɓaarʋ towtow ɛ. Ʋlɛ wa wule a ʋ nɩ-bʋʋrɛ nɩ a kpɩɛrʋ a, a bɛ ɩ zawrʋ ʋ zawrɛ bɛ bɛrɛ ɩ.

¹⁷Yelu tɛwr'a ɩ̃ tɩ bɔbr k'ɩ̃ɩ lɛb yel a yel-mɩŋa ŋa. Tɩ na yel a ƴɛ̀r-bie á ŋá blã baar'a, tɩ lɛb nyɔw a tɩ manʋ.

¹⁸Eleazaar nɛ kãw tɩ pʋɔ nɩ a Naaŋmɩn wulu bãw-bãw-karɩ dãw-niwn dem pʋɔ. Ʋ tɩ kor'ɩ yaga ɛ́ cãà pɔl. Bɛ tɩ háa ʋ nɩ a nʋɔr nɩ fãw, kɛ́ bɛ fɛr ʋ ʋ 'wɔb dobaa nɛn[38].

¹⁹Ɛcɛ a Eleazaar tɩ nyɛ̃ nɩ a kũu ʋ na na kpi n yúor a, a sa a vʋʋrʋ ʋ na na vʋʋrɛ nɩ a vĩ a. A lɛ n'a ʋ tɩ aw a nɛn bɛr, ɛ́ ŋmɛ nyãa cere a kũu zie. À ŋá n'a ʋ tɩ wul a lɛ a na fɛr kɛ́ bɛ mɩ́ kpɛ socir zawrɩ a bʋ̃-dɩ-ciira bɛr, bɛlɛ saa na kpi a.

²¹A bɛlɩ dem na tɩ so a bàwr-dɩb ŋa a Naaŋmɩn wulu na bɛ bɔbr a kaafʋ yele a, bɛ tɩ bãw nɩ a Eleazaar koro koro kãw za. Bɛ tɩ tɛr ʋ na yi n pùor tɩ wul ʋ yã, k'ʋʋ ƴãw bɛ wa n nɛn na bɛ ciir a, ʋl mɩŋa na dʋw a. Ʋ na wa 'wɔb ʋ na, ɛ́ mɩ́ bãw kɛ́ ɩ mɛ̃ a bàwr nɛn a nãà na yel a n'ʋ ʋ 'wɔbr a.

²²Ʋlɛ wa ɩ à à ŋá a, ʋ bɛ kpiir ɛ, ɛ́ bɛ na tɛr'ɩ nɩsaalʋ a ʋ zie, bɛ na ɩ bá-kore kore a zũú.

²³Ɛcɛ a Eleazaar tɩ bɔbr'a k'ʋʋ tu tub na tɛr ƴãwfʋ a. Nɩr na kor a tɩ n'ʋ, nɩr bɛ na ƴãwnɛ a ʋ koru nɩ a tome ʋ na tõ tɩ pɛlɩ a zu a zũú. A ʋ bibile daarɩ́ za n'a ʋ tɩ vʋʋrɩ nyɔ-vʋʋrʋ na bɛ tɛr sãwna bɛ yere a. Alɛ n'a ʋ tɩ tu tub na sɛw taa nɩ à à ŋá za a, ɛ́ baa zuo a za, tub na sɛw taa nɩ a wulu sõw a Naaŋmɩn mɩŋa na ƴãw a. Lɛ so ʋ tɩ yel kɛ́ bɛ ɩ ʋ cen a kpɩmɛ tẽw fɔ̃wlɛ.

²⁴Ʋ tɩ yel'a ƴãw pʋɔ: «Nɩr na kor mɛ̃ a mãa a bɛ sɛw taa nɩ a bãw-kɛ́-ɩb ɛ. Alɛ bɛ ɩ lɛ, pɔlbili yaga na tɩɛrɛ na k'aa mãa na tɛr yome lɩz'a anaar nɩ pie a, ɩ̃ tu n a nɩ-bʋʋr-yoru ɩ-ɩrɩ.

²⁵A ɩ̃ bãw-kɛ́-ɩb ŋa zũú, mãa n'ʋ na so a pɔlbili bɛr bɛ mɩ̀ bɛlɩ nyɔw bɛ. Mãa a, ɩ̃ na vʋʋrɩ nɩ bibie blãlɛ dɔwlɩ, ɛcɛ a na ɩ n vĩ na na nyɔw mɛ̃ a ɩ̃ koru pʋɔ a.

²⁶Ɛ́ mãa mɩ̀ saa na nɩɩrɩ a nɩsaalbɛ dɔwrʋ bɛr a ƴɛrɛŋa a, ɩ̃ bɛ nɩɩrɛ a Kpɛnʋ-za-sob ƴɛ̀rʋ-dɩb bɛrɛ ɩ, ɩ̃ kpi na bɩɩ ɩ̃ cãà na vʋʋrɛ a.

²⁷Alɛ so, mãa wa kpɛ socir kpi n a ƴɛrɛŋa a, ɩ̃ na wul'a k'ɩ̃ɩ sɛw na taa nɩ a ɩ̃ koru.

²⁸À ŋá n'a ɩ̃ na wul wul-vla a pɔlbili, a lɛ fʋ na na mɩ́ nɔnɛ de a fʋ nyɔ-vʋʋrʋ tɩr nɩ a fʋ pʋɔ za, a wulu a Naaŋmɩn na kʋ̀ tɩ, ɛ́ a sɛwnɩ ƴãwfʋ a ƴãw a.» Ʋ na tɩ ƴɛ̀r à à ŋá baar'a, ʋ cere nɩ a kũu zie daadaa.

²⁹A bɛlɩ dem na tɩ tɛr ʋ cere nɩ a tɩ lɩɛb'ɩ a bɛ ɩb a ʋ zie: bɛl na tɩ bɔbr a ʋ vla ƴɛrɛlɛ a tɩ bɔbr'ɩ a ʋ faa. Bʋ̃ʋ n'ʋ vɛ̃, bɛ tɩ nyɛ̃ nɩ a ƴɛ̀rʋ ʋ na ƴɛ̀r a, a ɩ yãya-ƴɛ̀rʋ.

³⁰Bɛ na tɩ ŋmɩɛr ʋ, ʋʋ waar na kpi a, ʋ vʋʋr'ɩ fãa, ɛ́ yel: «A Sore bãw nɩ bom za vla vla. Ʋ bãwnɩ a na ɩ̃ nãá tʋ̃ɔ́ nɩɩrɩ a kũu bɛr a. Ɛcɛ ƴɛrɛŋa a, a ŋmɩɛrʋ zũú a, ɩ̃ wone nɩ 'wɔbrʋ na bɛ dɩ vuo a, a ɩ̃ ƴã-ganɩ́. Ɛcɛ a ɩ̃ sɩ́ɛ pʋɔ a, ɩ̃ sàw na de a nɩ nʋ̃ɔ̀, ɩ̃ na zɔrɛ a Naaŋmɩn a ƴãw.»

³¹À à ŋá n'a a nɩr ŋa tɩ kpi. A kũu ŋa tɩ ɩ n wulu ʋ wul a pɔlbili lãwnɩ a ʋ nɩ-bʋʋrɛ bɛ́rʋ zie. Ʋ bɛr'ɩ nɩr na kpɛ socir na bɛ tɛr manʋ a wulu nɩ ɩ-vla na sɛw kɛ́ bɛ cãà bãwnɩ a.