Read Dagara, Northern Matie 10 Bible Online

Matie 10 - Dagara, Northern bible

Matie 10

¹A Yeezu tɩ bʋɔl'ɩ a ʋ po-tuurbɛ pie nɩ ayi wa kʋ̀ bɛ fãw, kɛ́ bɛ diwr'ɩ a kɔ̃tɔ̃-faar ɛ́ sanɛ a bàalʋ za nɩ a nɩ-kɔwlʋ za.

²Nyɩ nyɛ̃ a nɩ-toni pie nɩ ayi bɛl yée: a dãw-niwn sob'ɩ Sɩmʋ̃, bɛ na bʋɔlɛ Pɩɛr a, nɩ a ʋ yɛb Ãdere, Zebede bidɛbr Zakɩ nɩ a ʋ yɛb Zã,

³Filib nɩ Batelemi, Toma nɩ a zuru-yar-diere Matie, Alfe bidɛb Zakɩ nɩ Tade,

⁴Sɩmʋ̃ na pʋɔ a Zelɔtɩ mɩnɛ lãw[27] pʋɔ a, nɩ Zuda Ɩsɩkarɩɔtɩ, a ʋl na wa mɩl a Yeezu a.

⁵A Pie-nɩ-ayi bɛ ŋa a, a Yeezu tɩ tõ bɛ na, ɛ́ kpaalɩ bɛ à ŋá: «Nyɩ taa tuur yire a bʋʋrɛ bɛl na bɛ ɩ Zifʋ mɩnɛ a zie ɩ, ɛ́ taa kpɩɛr Samaari tẽw kãw za pʋɔ ɩ.

⁶Ɛcɛ nyɩ nɩ̃ɛ cen a Ɩsɩrayɛl bʋʋrɛ nɩbɛ na ɩ mɛ̃ píir na bɔr a zie.

⁷Nyɩ hiere a sɔ́r zu k'aa tẽ-vla Naalʋ taw na pɩɛlɩ.

⁸Nyɩ sanɛ a bàalbɛ, nyɩ sɩ̃wnɛ a kũuni, nyɩ ɩrɛ a kɔn bɛ lɛb vɩɛl, nyɩ diwr a kɔ̃tɔmɛ. Nyɩ páw nɩ mɔlɛ, nyɩ mɩ̀ tɩrɛ mɔlɛ.

⁹Nyɩ ta tɛr salm-zɩɛ bɩɩ libi-pʋrmɛ a nyɩ bʋ̃-zʋbr pʋɔ ɩ.

¹⁰Nyɩ ta tɛr kɔr lo n a sɔ́r ɛ, ta tɛr kparɩ ayi ɛ, ta tɛr nafawr ɛ, ta tɛr dabɔl ɛ. A tõ-tõ-bie sɛwnɩ nɩ a ʋ nʋɔr-dɩb.

¹¹Tẽ-kpɛ̃ɛ bɩɩ tẽle za pʋɔ nyɩ nãà wa ta a, nyɩ sowri bãw a sob nɛ na sɛwnɩ na de nyɩ a sãanʋ a, ɛ́ be a ʋ zie tɩ ta a nyɩ lɛb-cenu daar.

¹²Nyɩmɛ wa kpɩɛr yir pʋɔ a, nyɩɩm puori a yir dem.

¹³A yir nɛ dem wa sɛwnɩ a nyɩ puoru a, a nyɩ puoru na wa n nɩ ƴã-ɓaarʋ a bɛ zie, ɛ́ bɛlɛ bɛ wa sɛwnɩ a nyɩ puoru a, a nyɩ puoru ƴã-ɓaarʋ, ʋ lɛb wa a nyɩ zie.

¹⁴Nɩr bɛ wa sàw de nyɩ a sãanʋ a, bɩɩ bɛ wa bɛrɛ wone a nyɩ ƴɛ̀rʋ a, nyɩ yi zaa a yir nɛ pʋɔ bɩɩ a tẽw nɛ pʋɔ, ɛ́ tɛb tɛb a nyɩ gbɛ́ɛ uuru bɛr.

¹⁵Yel-mɩŋa sɩza, ɩ̃ yere na kʋ̀rɛ nyɩ, a ƴɛ̀rʋ-dɩb bibir a, bɛ kʋ̃ dɔwrɩ a Sodɔm nɩ a Gomɔɔr ten dem man a tẽw nɛ dem ɛ.»

¹⁶«A mãa a, ɩ̃ tone nyɩ na mɛ̃ píir wɛ-baar sɔgɔ a. A na ɩ lɛ a, nyɩ cɩ mɛ̃ wɩɩr a, ɛ́ ɩ pɔwlbɛ mɛ̃ naŋmamɛ a.

¹⁷Nyɩ gùre nyɩ tʋɔra a nɩsaalbɛ ƴãw: bɛ na nyɔw nyɩ na cen nɩ ƴɛ̀rʋ-dɩb ziir, ɛ́ fɔb nyɩ a bɛ puoru-diru pʋɔ.

¹⁸Bɛ na tɛr nyɩ na cen nɩ Ʋrɔm tẽw na-kpɛ̃ɛ-lɩɛrbɛ nɩ na-mɩnɛ niŋé a mãa ƴãw, kɛ́ nyɩ tɩ dɩ a nyɩ dãsɩɛ a bɛl nɩ a nɩ-bʋʋr-yoru niŋé.

¹⁹Bɛlɛ wa nyɔw nyɩ cere nɩ a ƴɛ̀rʋ-dɩb zie a, nyɩ ta dɩ tuo bɔbr a ƴɛ̀r-bie al nyɩ na na yel bɩɩ a lɛ nyɩ na na ƴɛ̀r a ɩ. A ƴɛ̀rʋ daar wa ta a, a ƴɛ̀r-bie al na wa n a nyɩ nʋɔrɩ́.

²⁰Nyɩmɛ bɛ nɛbɛ na ƴɛ̀rɛ ɩ, a nyɩ Sãà Naaŋmɩn Vʋʋrʋ n'ʋ na ƴɛ̀rɛ nɩ a nyɩ nʋɔr.

²¹Yɛb na mɩ́ nyɔw nɩ a ʋ yɛb tɩr bɛ kʋ, sãà na mɩ́ nyɔw nɩ a ʋ bie tɩr, bibiir na mɩ́ ír'a àr a bɛ sãà mɩnɛ zu, ɛ́ ƴãw bɛ kʋ bɛ.

²²Nɩbɛ za na hɩ̃ɛn nyɩ na a ɩ̃ ƴãw. Ɛcɛ sob nɛ wa ƴãw fãw tɩ ta a baarʋ daar a, ʋ na nyɛ̃ nɩ a faafʋ.

²³Bɛlɛ wa diwr nyɩ tẽw kãw a, nyɩɩm zɔ cen tẽ-yũo pʋɔ, yel-mɩŋa sɩza, ɩ̃ yere kʋ̀rɛ nyɩ, nyɩ kʋ̃ zɔ cɔlɩ a Ɩsɩrayɛl ten baarɩ ɛ, ɛcɛ a Nɩsaal Bie wa.

²⁴Po-tuure bɛ dãw zuo a ʋ zu-sob ɛ, ɛ́ tõ-tõ-bie mɩ̀ bɛ dãw zuo a ʋ tõ-tõ-nɩ-kpɛ̃ɛ ɩ.

²⁵A po-tuure wa ŋmɛ̃ mɛ̃ a ʋ zu-sob a, a sɛw ʋ na, a tõ-tõ-bie wa ŋmɛ̃ mɛ̃ a ʋ tõ-tõ-nɩ-kpɛ̃ɛ a, a sɛw ʋ na. Bɛ nɩ̃ɛ na bʋɔlɩ a yir sob Bɛlɩzebul, ɛ́ bɛ nãà yere a yir biir i!»

²⁶«A na ɩ lɛ a, nyɩ ta zɔrɛ nɩr kãw za ɩ. Bom za bɛ be be sɔwlɩ kʋ̃ʋ wa sãá ɩ, ɛ́ yel-sɔwla za bɛ be be bɛ kʋ̃ʋ wa bãw ɛ.

²⁷Bom nɛ ɩ̃ na mɩ́ yel kʋ̀ nyɩ lige pʋɔ a, nyɩ mɩ́ yel ʋ cãàmɩ́, ɛ́ bom nɛ bɛ na mɩ́ waalɩ ƴãw a nyɩ tobe pʋɔ a, nyɩ mɩ́ do gàrʋ́ hier'ʋ.

²⁸Nyɩ ta zɔrɛ a bɛlɩ dem na mɩ́ tʋ̃ɔ́ kʋ a ƴã-gan yõ ɛ́ kʋ̃ tʋ̃ɔ́ a sɩ́ɛ kʋ a ɩ, ɛcɛ nyɩ nɩ̃ɛ zɔrɛ a Naaŋmɩn na na tʋ̃ɔ́ kʋ a ƴã-gan nɩ a sɩ́ɛ za a tẽ-faa pʋɔ a.

²⁹Bɛ bɛ tʋ̃ɔ́ mɩ́ kʋɔrɩ davɩmɛ ayi wɛ-bi-been ɛ? Ɛcɛ a been kãw za bɛ lore tẽw ɛ́ a nyɩ Sãà Naaŋmɩn bɛ bãwnɩ a ɩ.

³⁰Ɛ́ a nyɩɩm a, bɛ sɔr'ɩ a nyɩ zukɔbɛ tɛɛ za bãw a nʋɔr.

³¹A na ɩ à ŋá a, nyɩ ta zɔrɛ dɛ̃bɩ̃ɛ ɩ, nyɩ zuo nɩ a davɩmɛ za.»

³²«Sob nɛ za na sàw yel a nɩbɛ niŋé k'ʋʋ ɩ n a ɩ̃ po-tuure a, ɩ̃ mɩ̀ na sàw nɩ a ɩ̃ Sãà na be a tẽ-vla pʋɔ a niŋé k'ʋʋ ɩ n a ɩ̃ nɩr.

³³Ɛcɛ sob nɛ za na yel a nɩbɛ niŋé k'ʋʋ bɛ bãw mɛ̃ a, ɩ̃ mɩ̀ na yel'ɩ a ɩ̃ Sãà na be a tẽ-vla pʋɔ a niŋé k'ɩ̃ɩ bɛ bãw ʋ ɛ.»

³⁴«Nyɩ ta tɩɛrɛ kɛ́ ƴã-ɓaarʋ n'a ɩ̃ wa ƴãw a tẽw zu ɛ: ƴã-ɓaarʋ bɛ n'a ɩ̃ wa n ɛ, zɛbr'a.

³⁵Ɩ̃ wa na wa bʋ́r nɩr nɩ ʋ sãà, pɔwyaa nɩ ʋ mã, bie-pɔw nɩ ʋ sɩr-mã.

³⁶A nɩsaal dɔ̃ dem na mɩ́ ɩ n a ʋ yir dem tɛɛ za.

³⁷Nɩr na nɔnɛ a ʋ sãà bɩɩ a ʋ mã zuo mɛ̃ a bɛ sɛwnɩ mɛ̃ ɩ. Nɩr na nɔnɛ a ʋ bidɛb bɩɩ a ʋ pɔwyaa zuo mɛ̃ a bɛ sɛwnɩ mɛ̃ ɩ.

³⁸Nɩr na bɛ de a ʋ da-gara tuo tuur'ɩ mɛ̃ a bɛ sɛwnɩ mɛ̃ ɩ.

³⁹Nɩr na bɔbr k'ʋʋ tɛr a ʋ nyɔ-vʋʋrʋ a, ʋ na bɔr ʋ na bɛr, ɛ́ nɩr na sàw bɔr a ʋ nyɔ-vʋʋrʋ bɛr a ɩ̃ ƴãw a, ʋ na lɛb'a pàw ʋ.»

⁴⁰«Sob nɛ za na sàw de nyɩ a, sàw na de m, ɛ́ sob nɛ za na sàw de m a, sàw na de a ʋlɩ sob nɛ na tõ m a.

⁴¹Nɩr na sàw de naaŋmɩn-ƴɛ̀r-manɛ, ʋ na ɩ naaŋmɩn-ƴɛ̀r-manɛ a ƴãw a, ʋ na páw nɩ naaŋmɩn-ƴɛ̀r-manɛ maalʋ, ɛ́ nɩr na sàw de nɩ-mɩŋa, ʋ na ɩ nɩ-mɩŋa a ƴãw a, ʋ na páw nɩ nɩ-mɩŋa maalʋ.

⁴²Yel-mɩŋa sɩza, ɩ̃ yere na kʋ̀rɛ nyɩ, nɩr na ƴãw a bibi-cãpili bɛ ŋa kãw ʋ nyũ, ŋmale pʋɔ kʋ̃ɔ ɓaarʋ saa n'a a, ʋ na ɩ a ɩ̃ po-tuure a ƴãw a, ʋ kʋ̃ guu a ʋ maalʋ ɛ.»