Read Dagara, Northern Matie 11 Bible Online

Matie 11 - Dagara, Northern bible

Matie 11

¹A Yeezu na tɩ kpaalɩ a ʋ po-tuurbɛ pie nɩ ayi à à ŋá baar'a, ʋ yi n a be cen k'ʋʋ tɩ kanɛ nɩ a nɩbɛ ɛ́ hiere a Yel-nʋ̃ɔ̀ a ʋlɩ vuo nɛ pʋɔ.

²Zɩ̃ kɛ́ a Zã-Bati na be a gaso pʋɔ a, tɩ wõ n a Kɩrɩta tome ʋ na tone a. Lɛ n'a ʋ tɩ tõ a ʋ po-tuurbɛ bɛ mɩnɛ kɛ́ bɛ tɩ sowri a Yeezu:

³«Fʋ̃ʋ n'ɩ a Nɩ-kabra na na wa a, bɩɩ tɩ cãà cɛlɛ nɩ-yũo?»

⁴A Yeezu tɩ sɔw bɛ na: «Nyɩ cen tɩ manɩ a yele nyɩ na nyɛrɛ ɛ́ wone a, kʋ̀ a Zã:

⁵a zɔn nyɛrɛ na, a wʋbr cere dẽdẽ, a kɔn lɛb vɩɛl, ɛ́ a won wone, a kũuni lɛbr yire, ɛ́ a Yel-nʋ̃ɔ̀ hieri ta a nan dem.

⁶Zu-nʋ̃ɔ̀ sob'ɩ a ʋlɩ sob nɛ na kʋ̃ zawrɩ a ɩ̃ sàw-deb bɛr a.»

⁷Bɛ na tɩ lɛb cere a, a Yeezu tɩ tĩ na ƴɛ̀rɛ a Zã ƴɛ̀rʋ a zu-sɛbla zie. Ʋ tɩ sowre bɛ na: «Bʋ̃ʋ n'ʋ nyɩ cen tɩ nyɛ̃ a wɛja-kpalɛ pʋɔ? Bàa-kɛkɛr sɛsɛb na fure damnɛ a n'ʋ bɩɩ?

⁸Bʋ̃ʋ n'ʋ nyɩ cen tɩ nyɛ̃ mɔ̃? Nɩr na su dɛpaal-kparɩ a n'ʋ bɩɩ? Ɛcɛ a dɛpaal-kpar-suurbɛ a, na-mɩnɛ yie pʋɔ n'a bɛ mɩ́ kpɩɛr.

⁹A na ɩ lɛ a, bʋ̃ʋ n'ʋ nyɩ cen tɩ nyɛ̃? Naaŋmɩn-ƴɛ̀r-manɛ n'ʋ bɩɩ? Ʋ̃ʋ, mãa n'ʋ yere kʋ̀rɛ nyɩ, ʋ zuo nɩ naaŋmɩn-ƴɛ̀r-manɛ.

¹⁰A Zã ƴãw n'a a Sɛb-sõw yel a ƴɛ̀r-bie á ŋá: “A ɩ̃ nɩr'ɩ ŋa ɩ̃ tone a fʋ nidaa, ʋ na tɩ cɔbr'ɩ a fʋ sɔ́r bɛr fʋ[28].”

¹¹Yel-mɩŋa sɩza, ɩ̃ yere na kʋ̀rɛ nyɩ, a pɔwbɛ bʋ̃-dɔwrɩ za pʋɔ a, kãw za bɛ be be ɩ kpɛ̃ɛ zuo a Zã-Bati ɛ, ɛcɛ a tẽ-vla Naalʋ pʋɔ nɩ-pʋrɩ pʋrɩ ɩ n kpɛ̃ɛ zuo ʋ.

¹²A Zã-Bati daar za wa tɔ dɩ̃a a, gãdaalʋ n'a bɛ ɩrɛ nɩ a tẽ-vla Naalʋ, ɛ́ gãdaar nɛbɛ mɩ́ faa ʋ.

¹³A naaŋmɩn-ƴɛ̀r-manbɛ za nɩ a Naaŋmɩn wulu ƴɛ̀r'ɩ a Naalʋ ŋa ƴɛ̀rʋ tɩ ta n a Zã daar.

¹⁴Nyɩmɛ wa sàw a, a Zã n'ɩ a Eli na na lɛb wa a.

¹⁵Sob nɛ na tɛr tobe bɛr-wob ƴãw a, ʋ bɛrɛ wone!

¹⁶Ãa n'ʋ ɩ̃ na de a dɩ̃a nɩbɛ bɛ ŋa man nɩ? Bɛ ŋmɛ̃ na mɛ̃ bibiir na zɩ̃ nɩ-yaga tuor-taa zie ɛ́ bʋɔlɛ taa yere nɩ:

¹⁷“Tɩ pɛbl'ɩ weli ƴãw nyɩ, ɛ́ nyɩ bɛ ƴaw ɛ! Tɩ ŋmãa nɩ lãw-mʋɔlɛ, ɛ́ nyɩ bɛ kõ ɩ!”

¹⁸Bʋ̃ʋ n'ʋ vɛ̃, Zã wa na, bɛ dɩrɛ ɩ, bɛ nyúur ɛ, ɛ́ bɛ yel kɛ́: “Kɔ̃tɔ̃-ìre n'ʋ!”

¹⁹A Nɩsaal Bie wa dɩrɛ ɛ́ nyúur, ɛ̀ bɛ yel kɛ́: “Bʋ̃-dɩ-nɔ̃wnɛ nɩ dã-kuole n'ʋ! Zuru-yar-dierbɛ nɩ yel-bier-maalbɛ bá-pɛr'ʋ!” Ɛcɛ a Naaŋmɩn yã-bãwfʋ wul'ɩ a ʋ yel-mɩnʋ a sãá a ʋ ɩ-ɩrɩ pʋɔ.»

²⁰Lɛ n'a a Yeezu tɩ nyɔw a tẽ-bɛrɛ al pʋɔ ʋ na maalɩ a ʋ nɔ-ɓãa-yele yaga zie a yere, a ten á ŋá nɩbɛ na bɛ tɩ sàw lɩɛbɩ a bɛ ɩb a ƴãw. Ʋ tɩ yere na:

²¹«We ãɩ, Korazin i! We ãɩ, Bɛtɩsayida a! A nɔ-ɓãa-yele na sɩrɩ maalɩ a nyɩ zie a, alɛ tɩ maalɩ Tɩ́ɩ̀r nɩ Sɩdɔ̃ a, koro za n'a a bɛ nɩbɛ nãá lɩɛbɩ a bɛ ɩb, su vʋɔrɩ kparɩ[29] ŋmɛ n tãpɛlʋ.

²²Alɛ so ɩ̃ yere kʋ̀rɛ nyɩ, a ƴɛ̀rʋ-dɩb bibir a, a Tɩ́ɩ̀r nɩ a Sɩdɔ̃ ten dɔwrʋ kʋ̃ ta a nyɩ dem ɛ.

²³Ɛ́ fʋ̃ʋ, Kafarnawɔm i, fʋ tɩɛrɛ kɛ́ fʋ na do na tɩ tɔ a salom bɩɩ? Fʋ na siwri na tɩ ta a kpɩmɛ tẽw. Bʋ̃ʋ n'ʋ vɛ̃, a nɔ-ɓãa-yele na maalɩ a fʋ zie a, a Sodɔm tẽw tɩ n'a a, ʋ nãá cãà nɩ be nɩ dɩ̃a.

²⁴Lɛ so, ɩ̃ yere kʋ̀rɛ nyɩ, a ƴɛ̀rʋ-dɩb bibir a, a Sodɔm dɔwrʋ kʋ̃ ta a fʋ dem ɛ.»

²⁵A lɛn daar, a Yeezu tɩ de nɩ a ƴɛ̀rʋ yel: «Ɩ̃ danɛ fʋ na, ɩ̃ Sãà a, salom nɩ tẽw za Sore e, fʋ na sɔwlɩ a yele á ŋá a yã-bãwnbɛ nɩ a bãw-bãwnbɛ zie, ɛ́ wul a a bibi-cãpili a.

²⁶Ɩ̃ Sãà a, à ŋá n'a fʋ nɔnɛ k'aa ɩ.»

²⁷A ɩ̃ Sãà de nɩ bom za kʋ̀ m. Nɩr za bɛ bãw a Bie a bɛ ɩ a Sãà n'ʋ ɛ, ɛ́ nɩr za bɛ bãw a Sãà a bɛ ɩ a Bie n'ʋ ɛ, nɩ ʋlɩ sob a Bie na bɔbr wul ʋ bãw a.

²⁸Nyɩ wa a ɩ̃ zie, nyɩɩm za na tuo to-tɩbrʋ bàl a, ɩ̃ɩ na kʋ̀ nyɩ nɩ a pɩ̃ɛnʋ.

²⁹Nyɩ sàw de a ɩ̃ nɩ-kpɛ̃ɛnʋ a nyɩ zu, ɛ́ bɛr ɩ̃ wule nyɩ, ɩ̃ ɩ n soci-baalʋ sob nɩ su-siwra sob, ɛ́ nyɩ na nyɛ̃ nɩ a pɩ̃ɛnʋ.

³⁰Sɩza, a ɩ̃ nɩ-kpɛ̃ɛnʋ dɩb a nyɩ zu sɩrɩ bɛ 'wɔbr ɛ, ɛ́ a ɩ̃ tuor[30] ɩ zelfel.