Read Dagara, Northern Matie 13 Bible Online

Matie 13 - Dagara, Northern bible

Matie 13

¹A ʋlɩ bibir nɛ, a Yeezu tɩ yi n a yir cen tɩ zɩ̃ a kʋ̃ɔ-kpɛ̃ɛ nʋɔr.

²Nɩ-yaga yaga tɩ wa na wa gbõ taa a ʋ zie, lɛ n'a ʋ tɩ do kpɛ gbor pʋɔ zɩ̃. A zu-sɛbla za tɩ àr'ɩ a kʋ̃ɔ-kpɛ̃ɛ nʋɔr.

³Ʋ tɩ lɔb'ɩ zʋkpaɩ man nɩ yel-yaga kʋ̀ bɛ, ʋ tɩ yere na: «A bʋ̀r-bʋ̀rɛ n'ɩ ŋan yi a bʋrʋ.

⁴Ʋ na tɩ bʋ̀rɛ[36] a, bʋ̃-bie a mɩnɛ tɩ lo n a sɔ́r nʋɔr, lili siw de dɩ.

⁵A mɩnɛ tɩ lo n zi-wɔ̃cɔ pʋɔ, a tanɛ na bɛ saalɩ a. A tɩ bul'ɩ daadaalɛ, a tanɛ na bɛ tɩ tɩbrɛ a ƴãw.

⁶A mʋ̃tɔ̃w na wa do a, ʋ dɩ a na, ɛ́ a na bɛ tɩ tɛ nyɩgɛ siw a, a ko na.

⁷A mɩnɛ tɩ lo n gʋʋr pʋɔ, a gʋʋr ìr fɩɩrɩ pàw a kpi.

⁸A mɩnɛ tɩ lo n tẽsɔw-vla pʋɔ wɔ̃: kãw wɔ̃ kʋba (100), kãw lɩz'a ata, kãw lɩzɛr'ɩ pie.

⁹Sob nɛ na tɛr tobe bɛr-wob ƴãw a, ʋ bɛrɛ wone.»

¹⁰A po-tuurbɛ tɩ taw na ta a Yeezu zie sowr'ʋ: «Bʋ̃ʋ n'ʋ so a fʋ ƴɛ̀rʋ a bɛ zie ɩ zʋkpaɩ fʋ lɔbr?»

¹¹Ʋ tɩ sɔw bɛ na: «A nyɩɩm a, bɛ ɩ na nyɩ bãw a tẽ-vla Naalʋ yel-sɔwlɩ, ɛcɛ a bɛ ɩ a lɛ a bɛl zie ɩ.

¹²Sob nɛ na tɛr a a, bɛ na kʋ̀ ʋ na, ʋ tɛr a yaga yaga, ɛcɛ sob nɛ na bɛ tɛr a a, bɛ na faa nɩ a blã al ʋ na tɛr a.

¹³Alɛ so ɩ̃ lɔbr zʋkpaɩ kʋ̀rɛ bɛ: bɛ na mɩ́ jɩ́rɛ ɛ́ bɛ nyɛ̃ bom a, bɛ na mɩ́ bɛrɛ wone ɛ́ bɛ wõ bom, ɛ́ mɩ̀ bɛ bãw a pɛr a ƴãw.

¹⁴À ŋá n'a a naaŋmɩn-ƴɛ̀r-manɛ ƴɛ̀rʋ ŋa a Ɩzayi na tɩ dãw ƴɛ̀r a tu a bɛ zie: “Nyɩmɛ saa mɩ́ wõ ɛ́ nyɩ kʋ̃ bãw a pɛr ɛ, nyɩmɛ saa mɩ́ jɩ́rɛ, ɛ́ nyɩ kʋ̃ nyɛ̃ bom ɛ.

¹⁵A nɩbɛ bɛ ŋa kpɛ n mimi-kõw, bɛ fur'ɩ a bɛ tobe, bɛ pàw nɩ a bɛ mimie, kɛ́ bɛ taa nyɛrɛ nɩ a bɛ mimie ɩ, kɛ́ bɛ taa wone nɩ a bɛ tobe ɩ, kɛ́ a bɛ yã taa nyɛrɛ ɩ, kɛ́ bɛ taa lɩɛbɛ a bɛ ɩb ɛ alɛ bɛ ɩ lɛ, ɩ̃ nãà sanɩ bɛ na[37].”

¹⁶Ɛcɛ a nyɩɩm a, zu-nʋ̃ɔ̀ dem'ɩ nyɩ, a nyɩ mimie na nyɛrɛ, ɛ́ a nyɩ tobe wone a.

¹⁷Yel-mɩŋa sɩza, ɩ̃ yere na kʋ̀rɛ nyɩ, naaŋmɩn-ƴɛ̀r-manbɛ yaga nɩ nɩ-mɩn yaga tɩ bɔbr'a kɛ́ bɛ nyɛ̃ a yele á ŋá nyɩ na nyɛrɛ a, ɛ́ bɛ nyɛ̃ a ɩ, kɛ́ bɛ wõ a yele á ŋá nyɩ na wone a, ɛ́ bɛ wõ a ɩ.»

¹⁸«A nyɩɩm a, nyɩ wone a bʋ̀r-bʋ̀rɛ zʋkpar pɛr.

¹⁹A sɔ́r nʋɔr a bʋ̃-bie na lo a, ɩ n a bɛlɩ dem na mɩ́ wõ a tẽ-vla Naalʋ ƴɛ̀rʋ ɛ́ bɛ bãw a pɛr a. A Faalʋ sob mɩ́ wa na wa ír a al bɛ na bʋ̀r a bɛ socir pʋɔ a.

²⁰A zi-wɔ̃cɔ pʋɔ a bʋ̃-bie na lo a, ɩ n a bɛlɩ dem na mɩ́ wõ a Naaŋmɩn ƴɛ̀rʋ ɛ́ sàw de daadaalɛ nɩ nʋ̃ɔ̀ a.

²¹Ɛcɛ bɛ bɛ mɩ́ bɛr a ƴɛ̀rʋ ʋ tɛ nyɩgɛ a bɛ pʋɔ ɩ, a bɛ tɩɛrʋ bɛ mɩ́ yaa kɛ́ lɩɛbɩ ɛ. Lɛ n'a a kpɩɛrʋ bɩɩ dɔwrʋ wa ta bɛ a Naaŋmɩn ƴɛ̀rʋ ƴãw a, bɛ mɩ́ faa na lo.

²²A gʋʋr pʋɔ a bʋ̃-bie na lo a, ɩ n a bɛlɩ dem na mɩ́ wõ a Naaŋmɩn ƴɛ̀rʋ, ɛ́ a tẽw zu ka yele tɩɛrʋ nɩ a naalʋ bɛlʋ fɩɩrɩ a ƴɛ̀rʋ kʋ, ʋ bɛ wɔ̃ bom za a.

²³A tẽsɔw-vla pʋɔ a bʋ̃-bie na lo a, ɩ n a bɛlɩ dem na mɩ́ wõ a Naaŋmɩn ƴɛ̀rʋ ɛ́ bãw a pɛr a. Bɛ mɩ́ wɔ̃ n wɔmɛ: bɛ mɩnɛ kʋba (100), bɛ mɩnɛ lɩz'a ata, bɛ mɩnɛ lɩzɛr'ɩ pie.»

²⁴A Yeezu tɩ lɛb'a lɔb zʋkpar kãw kʋ̀ bɛ yel: «A tẽ-vla Naalʋ ŋmɛ̃ na taa nɩ nɩr kãw na bʋ̀r ka-bʋʋr-vla a ʋ púo pʋɔ a.

²⁵Tɩ̃ɩsɔw kãw a nɩbɛ za na tɩ gúre a, a ʋ dɔ̃ sob tɩ wa na wa bʋ̀r narsɩ jɛr'ɩ a ble, ɛ́ tɔl cen.

²⁶A ble na wa bul kɛrɩ tɩ dɔw a, a narsɩ mɩ̀ tɩ sãá na.

²⁷A púo sob tõ-tõ-biir tɩ wa na wa sowr'ʋ: “Zu-sob i, bʋ̃-bʋʋr-vla bɛ n'a fʋ bʋ̀r a fʋ pu-pʋɔ ɩ, ɛ́ nyɩnɛ n'a narsɩ mɩ̀ lɛb wa yi?”

²⁸Ʋ tɩ sɔw bɛ na: “Dɔ̃ sob kãw n'ʋ ɩ a lɛ.” A tõ-tõ-biir sowr'ʋ: “A na ŋmɛ̃ à ŋá a, fʋ bɔbr'a kɛ́ tɩ cen tɩ tuur'a bɛr bɩɩ?”

²⁹Ʋ sɔw yel bɛ: “Ʋ̃ʋ'hʋ̃, nyɩ nãà mab'a tuure a narsɩ wa lãw vɔ̃ n a ble”.

³⁰Nyɩ bɛr a a lãw ìre tɩ ta a ble ŋmab daar, ɛ́ a ble ŋmab daar a, ɩ̃ na yel'ɩ a ble-ŋmarbɛ: “Nyɩ de niwn cɛ a narsɩ 'lẽ ɓã taa nyɩw bɛr, al pùorí nyɩ de a ble su a ɩ̃ bowrí.”»

³¹A Yeezu tɩ lɛb'a lɔb zʋkpar kãw kʋ̀ bɛ: «A tẽ-vla Naalʋ ŋmɛ̃ na mɛ̃ seneve bir[38] nɩr kãw na bʋ̀r a ʋ púo pʋɔ a.

³²Ʋlɛ n'ɩ a pʋrɩ za a bʋ̃-bʋʋrɛ za pʋɔ. Ɛ́ ʋlɛ wa bul a, ʋ mɩ́ kɛrɩ na zuo a zaadɛ̃ pʋɔ zɛ-vaɩ za, ʋ mɩ́ lɩɛb'ɩ tɩɛ, a lili wa wóbr a cowr a ʋ wuli zu.»

³³A Yeezu tɩ lɛb'a lɔb zʋkpar kãw kʋ̀ bɛ à ŋá: «A tẽ-vla Naalʋ ŋmɛ̃ na mɛ̃ dãbɩl pɔw na de ƴãw peli nɛ́ɛ ata zɔ̃ pʋɔ, ɛ́ gù a zɔ̃ za ʋ na bu a tɩ ìr a.»

³⁴Zʋkpaɩ n'a a Yeezu tɩ lɔb yel'ɩ à á ŋá za kʋ̀ a zu-sɛbla, ʋʋ bɛ tɩ ƴɛ̀rɛ a bɛ zie a bɛ ɩ zʋkpaɩ n'a ʋ lɔbr ɛ,

³⁵k'aa naaŋmɩn-ƴɛ̀r-manɛ ƴɛ̀rʋ ŋa tʋ̃ɔ́ tu: «Zʋkpaɩ n'a ɩ̃ na lɔbr, ɩ̃ na hier'ɩ yele na sɔwlɩ gã a tẽ-daa íru daar za a[39].»

³⁶Lɛ n'a a Yeezu tɩ bɛr a zu-sɛbla ɛ́ kul a yir. A ʋ po-tuurbɛ tɩ taw na ta a ʋ zie yel ʋ: «Ír a narsɩ zʋkpar pɛr kʋ̀ tɩ.»

³⁷Ʋ tɩ sɔw bɛ na: «A sob nɛ na bʋ̀rɛ a ka-bʋʋr-vla a, ʋlɛ n'ɩ a Nɩsaal Bie,

³⁸a púo n'ɩ a tẽ-daa, a ka-bʋʋr-vla n'ɩ a tẽ-vla Naalʋ nɩbɛ, a narsɩ n'ɩ a Faalʋ sob nɩbɛ,

³⁹a dɔ̃ sob na bʋ̀r a narsɩ a n'ɩ a Gɛgɛra, a bʋ̃-dieri deb n'ɩ a tẽw baarʋ daar, ɛ́ a bʋ̃-dieri dierbɛ n'ɩ a malkɩ mɩnɛ.

⁴⁰Mɛ̃ a lɛ bɛ na mɩ́ wob a narsɩ ɓã taa ƴãw vũumí a dɩ a, lɛ n'a a na ŋmɛ̃ a tẽw baarʋ daar:

⁴¹a Nɩsaal Bie na tõ n a ʋ malkɩ mɩnɛ a ʋ Naalʋ tẽw pʋɔ, bɛ wa tuur'ɩ a bɛlɩ dem za na ɩrɛ a bɛ taabɛ bɛ farɛ lore a, nɩ a bɛlɩ dem za na ɩrɛ ɩ-faar a,

⁴²lɔb ƴãw a vũu-kpɛ̃ɛ pʋɔ, be n'a nɩ-yaga na kone 'wɔbr'ɩ nyɩmɛ.

⁴³Lɛ n'a a nɩ-mɩn na nyɩwrɛ mɛ̃ mʋ̃tɔ̃w a, a bɛ Sãà Naaŋmɩn Naalʋ pʋɔ. Sob nɛ na tɛr tobe a, ʋ bɛrɛ wone.»

⁴⁴«A tẽ-vla Naalʋ ŋmɛ̃ na mɛ̃ na-bom bɛ na sɔwlɩ púo pʋɔ a. Nɩr kãw nyɛ̃ ʋ na de lɛb bãw sɔwlɩ, ɛ́ nʋ̃ɔ̀ za ɩrɛ ʋ, ʋ kul tɩ de a ʋ bʋ̃-tɛrɩ za kʋɔrɩ dà n a púo ʋl.

⁴⁵A tẽ-vla Naalʋ cãà na lɛb ŋmɛ̃ taa nɩ yɛ-yɛrɛ na bɔbr lɛw-vɩɛlɩ a.

⁴⁶Ʋ na wa nyɛ̃ a lɛgɛ kãw a dàarʋ na bɛ gbʋ́r a, ʋ cen na tɩ kʋɔrɩ a ʋ bʋ̃-tɛrɩ za dà n a lɛgɛ ʋl.»

⁴⁷«A tẽ-vla Naalʋ cãà na lɛb ŋmɛ̃ mɛ̃ mɩ̃ɛ bɛ na lɔb kʋ̃ɔ-kpɛ̃ɛ pʋɔ ʋ tɩ nyɔw zʋm-pɛ-bʋʋrɛ za a.

⁴⁸Ʋlɛ wa paalɩ a, a zʋm-nyɔwrbɛ mɩ́ taw na yi n a kʋ̃ɔ-kpɛ̃ɛ nʋɔr, ɛ́ zɩ̃ tuuri a zʋm-vɩɛlɩ ƴãw peli pʋɔ, ɛ́ lɔb a zʋm-faar bɛr.

⁴⁹À ŋá n'a a mɩ̀ na ŋmɛ̃ a tẽw baarʋ daar: a malkɩ mɩnɛ na wa na wa bʋ́r a nɩ-vɩɛlɩ nɩ a nɩ-faar,

⁵⁰bɛ na lɔb'ɩ a nɩ-faar ƴãw a vũu-kpɛ̃ɛ pʋɔ, be n'a bɛ na kone 'wɔbr'ɩ nyɩmɛ.»

⁵¹A Yeezu tɩ sowri bɛ na: «Nyɩ bãw nɩ à á ŋá za pɛr bɩɩ?» Bɛ tɩ sɔw na: «Ʋ̃ʋ!»

⁵²Ʋ lɛb yel bɛ: «A na ŋmɛ̃ à ŋá a, Naaŋmɩn wulu sɛ-sɛbrɛ za na bãw a tẽ-vla Naalʋ yele a, ŋmɛ̃ na taa nɩ yir sob na mɩ́ ír bʋ̃-paalɛ nɩ bʋ̃-kore a ʋ na-bome pʋɔ a.»

⁵³A Yeezu na tɩ lɔb a zʋkpaɩ á ŋá baar'a, ʋ tɩ bɛr'ɩ a be,

⁵⁴ɛ́ cen a tẽw ʋl pʋɔ ʋ na tɩ bàa a, tɩ kanɛ nɩ a nɩbɛ a bɛ puoru-dĩo pʋɔ, kanɩ kanʋ a ɓãá bɛ nʋɔr, bɛ yere: «Nyɩnɛ n'a ʋ páw a yã-bãwfʋ ŋa? Ŋmɩŋmɩn n'a ʋ mɩ́ tʋ̃ɔ́ maalɩ a nɔ-ɓãa-yele á ŋá?

⁵⁵A dà-fɔwrɛ bie bɛ tʋ̃ɔ́ n'ʋ ɛ? A ʋ mã bɛ n'ɩ a Marya ɩ? Ɛ́ a ʋ yɛbr bɛ n'ɩ Zakɩ, Zuzɛb, Sɩmʋ̃ nɩ Zid ɛ?

⁵⁶A ʋ yeepuuli za bɛ tʋ̃ɔ́ be a tɩ zie ka ɩ? Ɛ́ nyɩnɛ n'a ʋ páw a fãw ŋa za?»

⁵⁷A tɩ ɩ na bɛ bɛ sàw de a ʋ yele ɩ. Lɛ n'a a Yeezu tɩ yel bɛ: «A ʋ tẽ-dɔwra nɩ a ʋ yir tɛwr pʋɔ n'a naaŋmɩn-ƴɛ̀r-manɛ bɛ nyɛrɛ ƴãwfʋ ɛ.»

⁵⁸A Yeezu bɛ tɩ maalɩ nɔ-ɓãa-yele yaga a be ɩ, bɛ na bɛ tɩ sàw de a ƴãw.