Read Dagara, Northern Matie 17 Bible Online

Matie 17 - Dagara, Northern bible

Matie 17

¹Bibie ayʋɔb pùorí, a Yeezu tɩ tɛr'ɩ Pɩɛr, Zakɩ nɩ a ʋ yɛb Zã, do n tã-kpɛ̃ɛ kãw zu, bɛ tɛwr zie.

²Ʋ tɩ lɩɛb'ɩ nɩ-yũo a bɛ niŋé: a ʋ niwn tɩ nyɩwrɛ na mɛ̃ mʋ̃tɔ̃w a, ɛ́ a ʋ bʋ̃-suuri pɛlɩ mɛ̃ cãà a.

³Bɛ wa bere na bɛ nyɛ̃ Moyiir nɩ Eli bɛ ƴɛ̀rɛ nɩ a Yeezu.

⁴Pɩɛr tɩ yel'ɩ a Yeezu: «Sore e, a tɩ ka beba vɩɛl'a, fʋ̃ʋ wa sàw a, ɩ̃ na maal'ɩ pɛnɛ-sɛwr ata a ka, fʋ so been, Moyiir so been, Eli mɩ̀ so been.»

⁵Ʋ na tɩ cãà ƴɛ̀rɛ a, zũzuwr na nyɩwrɛ a, tɩ pili na pàw bɛ, ɛ́ kɔkɔr tɩ ƴɛ̀rɛ a zũzuwr pʋɔ yere: «A ɩ̃ Bi-nɔna n'ɩ à ŋà, ɩ̃ na pɛlɩ pʋɔ kaa ír a, nyɩ bɛrɛ wone a ʋ ƴɛ̀rʋ.»

⁶A po-tuurbɛ na tɩ wõ a kɔkɔr ŋa a, dɛ̃bɩ̃ɛ nyɔw bɛ nɩ yaga bɛ lo vɔblɩ muru.

⁷A Yeezu tɩ taw na ta tɔ tɔ bɛ ɛ́ yel: «Nyɩ lɛb ìr, nyɩ ta zɔrɛ dɛ̃bɩ̃ɛ ɩ!»

⁸Bɛ tɩ zɛw nɩ a zu bɛ lɛb nyɛ̃ nɩr za, ʋ bɛ ɩ a Yeezu yõ ɩ.

⁹Bɛ na tɩ yi a tãw zu lɛb siwr a, a Yeezu kpãa nɩ a ʋ po-tuurbɛ à ŋá: «A yel ŋa nyɩ na nyɛ̃ a, nyɩ taa pore a yúor kʋ̀rɛ nɩr ɛ, ɛ́ gù a Nɩsaal Bie tɩ lɛb yi a kũuni pʋɔ.»

¹⁰Al pùorí, a ʋ po-tuurbɛ tɩ sowr'ʋ na: «Bʋ̃ʋ ƴãw n'a a Naaŋmɩn wulu sɛ-sɛbrbɛ yere k'aa fɛr'a kɛ́ a Eli wa baarɩ?»

¹¹Ʋ tɩ sɔw bɛ na: «Sɩza n'a, a fɛr'a k'aa Eli wa, wa cɔbrɩ bom za ƴãw zi-ƴen.

¹²Ɛcɛ, mãa n'ʋ yere kʋ̀rɛ nyɩ, a Eli wa na bɛ bɛ bãw kɛ́ ʋlɛ n'ʋ ɛ, ɛ́ ɩ ʋ lɛ za bɛ na bɔbr a, lɛ n'a bɛ mɩ̀ na dɔwrɩ a Nɩsaal Bie.»

¹³Lɛ n'a a ʋ po-tuurbɛ tɩ bãw kɛ́ Zã-Bati ƴɛ̀rʋ n'a ʋ tɩ ƴɛ̀rɛ a bɛ zie.

¹⁴Bɛ na tɩ tarɛ a zu-sɛbla zie a, nɩr kãw tɩ taw na ta a Yeezu zie, lo gbĩ dume,

¹⁵ɛ́ yel: «Sore e, zɔ a ɩ̃ bie nɩbaalʋ. Ʋ lore nɩ kũkun ɛ́ a wone ʋ yaga za. Ʋ lore nɩ vũumí nɩ kʋ̃ɔmɩ́ kʋralɛ.

¹⁶Ɩ̃ tɛr ʋ na wa n a fʋ po-tuurbɛ zie, ɛcɛ bɛ bɛ tʋ̃ɔ́ ʋ sanɩ ɛ.»

¹⁷A Yeezu tɩ de nɩ a ƴɛ̀rʋ yel: «Nɩsaal-faar bɛ ŋa, nɩ nɩbɛ na bɛ sàw de Naaŋmɩn a! Debor'a ɩ̃ na be a nyɩ zie tɩ ta? Debor'a ɩ̃ na wõ n nyɩ a tuo tɩ ta? Nyɩ tɛr a bie wa kʋ̀ m.»

¹⁸A Yeezu tɩ tanɩ nɩ a kɔ̃tɔn, ʋ yi zaa a bie zie, ʋʋ tɩ sanɩ a pɛr nɛ pʋɔ.

¹⁹A po-tuurbɛ tɩ taw na ta a Yeezu sowr'ʋ a bɛ tɛwr zie: «Bʋ̃ʋ n'ʋ so a tɩɩm tɩ bɛ tʋ̃ɔ́ ʋ diw?»

²⁰Ʋ tɩ sɔw bɛ na: «A nyɩ naaŋmɩn-sàw-deb na dɩ nã́w a n'a so. Yel-mɩŋa sɩza ɩ̃ yere na kʋ̀rɛ nyɩ, a nyɩ naaŋmɩn-sàw-deb tɩ bɛrmɛ mɛ̃ seneve bir a, nyɩ nãá mɩ́ yel'ɩ a tãw ŋa: “Ìr a ka ɛ́ cen ka”, ʋʋ nãá mɩ́ cen na, ɛ́ nyɩ kʋ̃ʋ mɩ́ ɩ bom za gu ɛ. [

²¹A kɔ̃tɔn ŋa bʋʋrɛ a, puoru nɩ mʋta-tuo tɛrʋ tɛwr'a na tʋ̃ɔ́ ír ʋ.»]

²²Bibir kãw a po-tuurbɛ na tɩ ɓã taa bɛ za a Galile tẽw a, a Yeezu tɩ yel bɛ na: «Bɛ na nyɔw nɩ a Nɩsaal Bie ƴãw a nɩsaalbɛ nuru pʋɔ,

²³bɛ na kʋ ʋ na, ɛ́ a bibie ata sob a, ʋ na lɛb'a yi a kũu pʋɔ.» A tɩ ɩ n pʋ-sãwna yaga a ʋ po-tuurbɛ zie.

²⁴Bɛ na tɩ ta a Kafarnawɔm a, a bɛlɩ dem na mɩ́ dier a Ŋmɩn-yir-kpɛ̃ɛ cɩɛrʋ a, tɩ taw na ta a Pɩɛr zie sowr'ʋ: «A nyɩ Wul-wul-kara bɛ mɩ́ ya a Ŋmɩn-yir-kpɛ̃ɛ cɩɛrʋ bɩɩ?»

²⁵A Pɩɛr tɩ sɔw na: «Bʋnʋ ɩ? Ʋ mɩ́ ya na.» A Pɩɛr na tɩ ta a yir a, a Yeezu tɩ dãw ʋ na de a ƴɛ̀rʋ sowr'ʋ: «Fʋ tɩɛr'ɩ ŋmɩn, Sɩmʋ̃ ʋ? A tẽw zu ka na-mɩnɛ a, tẽbowle zie n'a bɛ mɩ́ de a cɩɛrʋ nɩ a zuru-yar? A bɛ tẽ-biir zie n'a bɩɩ a sãanbɛ zie n'a?»

²⁶A Pɩɛr na tɩ sɔw k'aa sãanbɛ zie n'a a, a Yeezu tɩ lɛb'a yel ʋ: «A na ɩ lɛ a, a bɛ fɛrɛ a tẽ-biir ɛ.

²⁷Ɛcɛ ɩ̃ bɛ bɔbr kɛ́ tɩ sãw a nɩbɛ bɛ ŋa tɩɛrʋ ɛ, lɛ so, siw a manɩ́ tɩ ƴãw a zʋm-pĩi. A zʋm-dãw-niwn sob ʋl a zʋm-pĩi nãà wa nyɔw a, taw ʋ yi n, yuo a ʋ nʋɔr, fʋ na nyɛ̃ nɩ nɩbɛ ayi cɩɛrʋ libir, ír cen nɩ tɩ ya mãa nɩ a fʋ̃ʋ dem.»