Read Dagara, Northern Matie 20 Bible Online

Matie 20 - Dagara, Northern bible

Matie 20

¹«A tẽ-vla Naalʋ sɩrɩ na ŋmɛ̃ mɛ̃ yir sob kãw na tɩ yi biɓaar-sɛ̃́w, k'ʋʋ tɩ de tõ-tõ-biir ƴãw bɛ cen a ʋ divɛ̃ tɩɩr púo pʋɔ a.

²Ʋlɛ nɩ a tõ-tõ-biir na tɩ wõ taa a yar ɩ bibi-been sã-ya libir a, ʋ ƴãw na bɛ cen a ʋ divɛ̃ tɩɩr púo pʋɔ.

³Ʋ tɩ lɛb'a yi a biɓaara, a mʋ̃tɔ̃w na zɛw blã a, tɩ nyɛ̃ bɛ mɩnɛ bɛ zɩ̃ zawlalɛ a nɩbɛ tuor-taa zie.

⁴Ʋ yel bɛ: “Nyɩ mɩ̀ cen a ɩ̃ divɛ̃ tɩɩr púo pʋɔ, ɩ̃ɩ na ya nyɩ nɩ a lɛ a na sɛw a.”

⁵Ɛ̀ bɛ tɩ cen. A yir sob tɩ lɛb'a yi a mʋ̃tɔ̃-tuo nɩ a mʋ̃tɔ̃w gɔ̃wfʋ daar cãà lɛb tɩ ɩ a lɛ.

⁶A na wa man a zaanʋɔra a, ʋ tɩ lɛb'a yi tɩ nyɛ̃ bɛ mɩnɛ bɛ be a be, ʋ yel bɛ: “Bʋnʋ ƴãw n'a nyɩ zɩ̃ a ka a bibi-ɓil za bɛ ɩrɛ bom za?”

⁷Bɛ tɩ sɔw ʋ na: “Nɩr za bɛ de tɩ a tome ɩ so lɛ.” Ʋ yel bɛ: “Nyɩ mɩ̀ cen a ɩ̃ divɛ̃ tɩɩr púo pʋɔ.”

⁸A zaanɔ-ɓaar na wa ta a, a divɛ̃ tɩɩr púo sob tɩ yel'ɩ a ʋ bʋ̃-kaarɛ: “Bʋɔlɩ a tõ-tõ-biir wa kʋ̀ ŋa za a ʋ sã-ya. Tĩ a bɩɛr-waarbɛ zie tɩ baar'ɩ a dãw-waarbɛ.”

⁹Lɛ n'a a zaanʋɔra tõ-tõ-biir tɩ wa, ŋa za mɩ́ wa páw a bibi-been tome sã-ya libir.

¹⁰A biɓaar-sɛ̃́w tõ-tõ-biir dem daar na wa ta a, bɛ tɩ tɩɛrɛ na kɛ́ bɛ na páw na dɔwlɩ, ɛcɛ ŋa za mɩ̀ tɩ páw nɩ bibi-been tome sã-ya libir.

¹¹Bɛ tɩ de na zɛbr'ɩ a yir sob.

¹²Bɛ tɩ yere na: “A bɩɛr-waarbɛ bɛ ŋa tõ n tɛm gbɛl-been yõ, ɛ́ fʋ ya bɛ mɛ̃ a tɩɩm na nyɛ̃ a bibi-ɓil bàlʋ ɛ́ dɩ a mʋ̃tɔ̃w a!”

¹³Ɛcɛ a yir sob tɩ yel'ɩ a kãw: “Ɩ̃ bá a, ɩ̃ bɛ nɛbr fʋ ɛ, a bibi-been tome sã-ya libir ƴãw bɛ n'a mãa nɩ fʋ̃ʋ wõ taa ɩ?

¹⁴De a fʋ sã-ya cere nɩ. Ɩ̃ bɔbr'a k'ɩ̃ɩ kʋ̀ a bɩɛr-waarɛ ŋa mɛ̃ a fʋ̃ʋ a.

¹⁵Ɩ̃ bɛ tɛr sɔ́r na ɩrɛ lɛ za ɩ̃ na bɔbr a nɩ a ɩ̃ bʋ̃-tɛrɩ ɛ? Bɩɩ nyuur ɩrɛ fʋ na ɩ̃ na ɩ nɩ-vla a?”»

¹⁶A Yeezu tɩ yel a ƴãw pʋɔ: «À ŋá n'a a po-pàwrbɛ na ɩ niw-dierbɛ, ɛ́ a niw-dierbɛ ɩ po-pàwrbɛ.»

¹⁷A Yeezu tɩ dúor'ɩ a Zerizalɛm. Ʋ tɩ tɛr'ɩ a po-tuurbɛ pie nɩ ayi, ʋlɛ nɩ a bɛl tɛwr, tɩ yel kʋ̀ bɛ a sɔ́r zu bɛ na tɩ cere a:

¹⁸«Nyɩ nyɛ̃, tɩ dúor'ɩ a Zerizalɛm, bɛ na tɩ nyɔw nɩ a Nɩsaal Bie ƴãw a bàwr-maal-nɩ-bɛrɛ nɩ a Naaŋmɩn wulu sɛ-sɛbrbɛ nuru pʋɔ, bɛ na ƴãw ʋ nɩ kũu dɔwrʋ,

¹⁹ɛ́ de ʋ kʋ̀ nɩ-bʋʋr-yoru bɛ ɩ ʋ la, ɛ́ fɔb ʋ, ɛ́ kpa ʋ da-gara zu, ɛ́ a bibie ata sob a, ʋ na lɛb'a yi a kũu pʋɔ.»

²⁰Lɛ n'a a Zebede bidɛbr mã, tɩ taw ta a Yeezu zie nɩ a ʋ bibiir ayi. Ʋ tɩ lo na gbĩ dume a ʋ pile k'ʋʋ zɛlɩ bʋ̃-kãw.

²¹A Yeezu tɩ sowr'ʋ na: «Bʋ̃ʋ n'ʋ fʋ bɔbr?» Ʋ sɔw: «Nyɛ̃ a ɩ̃ bidɛbr ayi bɛ ŋa, ƴãw kãw zɩ̃ a fʋ dʋrʋ lowr ɛ́ kãw zɩ̃ a fʋ gʋba lowr a fʋ naalʋ pʋɔ.»

²²A Yeezu tɩ sɔw na: «Nyɩ bɛ bãw a ʋlɩ bom nɛ nyɩ na zɛlɛ a ɩ. Nyɩ na tʋ̃ɔ́ na nyũ a tuo koli-nyúura ʋl ɩ̃ na na nyũ a?» Bɛ tɩ sɔw na: «Tɩ na tʋ̃ɔ́ na.»

²³Ʋ yel bɛ: «A ɩ̃ tuo koli-nyúura a, nyɩ na nyũ ʋ na. Ɛcɛ a ɩ̃ dʋrʋ nɩ a ɩ̃ gʋba lowr zɩma bɛ yi mãa zie ɩ, a bɛlɩ dem ƴãw a ɩ̃ Sãà na cɔbrɩ a ziir á ŋá a, bɛlɛ so a.»

²⁴A po-tuurbɛ pie na cɛ a, na tɩ wõ a a, tɩ nyɛ̃ nɩ nɩ a yɛbr ayi bɛ ŋa suur.

²⁵Lɛ n'a a Yeezu tɩ bʋɔlɩ bɛ wa yel: «Nyɩ bãwnɩ a na, a nɩ-bʋʋrɛ na-mɩnɛ mɩ́ dɩrɛ nɩ naalʋ a bɛ zu, ɛ́ a nɩ-bɛrɛ ɩrɛ a nɩbɛ bãwnɩ a bɛ na so bɛ a.

²⁶A ta ɩ a lɛ a nyɩ zie ɩ. Sob nɛ nɩ̃ɛ wa bɔbr k'ʋʋ ɩ kpɛ̃ɛ a nyɩ pʋɔ a, ʋ ɩ a nyɩ tõ-tõ-bie,

²⁷ɛ́ nɩr wa bɔbr k'ʋʋ ɩ a niw-diere a nyɩ pʋɔ a, ʋ ɩ a nyɩ gbãgbaa.

²⁸À ŋá n'a, a Nɩsaal Bie bɛ wa kɛ́ bɛ wa tone kʋ̀rɛ ʋ ɛ, ʋ wa na k'ʋʋ wa tone kʋ̀rɛ a nɩbɛ, ɛ́ de a ʋ nyɔ-vʋʋrʋ tɩr ya de nɩ nɩ-yaga yaga.»

²⁹Bɛ na tɩ yire a Zeriko tẽw pʋɔ a, zu-sɛbla na bɛ dɩ vuo a tɩ tuur'ɩ a Yeezu.

³⁰Zɔn ayi kãw tɩ zɩ̃ n a sɔ́r nʋɔr. Bɛ na wa wõ k'aa Yeezu n'ʋ tɔlɛ a, bɛ cɩɩrɛ na yere nɩ: «Sore e, Daviir bidɛb i, zɔ tɩ nɩbaalʋ!»

³¹A zu-sɛbla tɩ tanɛ bɛ na kɛ́ bɛ bɛr gɔmɛ. Ɛcɛ a zɔn nɩ̃ɛ na lɛb tɩ bãw cɩɩrɛ kpɛ̃w za: «Sore e, Daviir bidɛb i, zɔ tɩ nɩbaalʋ!»

³²A Yeezu tɩ tɛw na àr ɛ́ bʋɔlɩ bɛ wa sowri: «Bʋ̃ʋ n'ʋ nyɩ bɔbr k'ɩ̃ɩ ɩ kʋ̀ nyɩ?»

³³Bɛ tɩ sɔw na: «Sore e, ɩ a tɩ mimie nyɛrɛ.»

³⁴Nɩbaalʋ tɩ kpɛ n a Yeezu, ʋ tɔ a bɛ mimie, ɛ́ daadaalɛ bɛ lɛb nyɛrɛ, ɛ́ tuur ʋ.