Read Dagara, Northern Matie 23 Bible Online

Matie 23 - Dagara, Northern bible

Matie 23

¹Lɛ n'a a Yeezu tɩ yere kʋ̀rɛ a zu-sɛbla nɩ a ʋ po-tuurbɛ:

²«A Naaŋmɩn wulu sɛ-sɛbrbɛ nɩ a Faarizɩ̃ɛ mɩnɛ nɛbɛ íre a Moyiir wulu pɛ́ɛ.

³Lɛ so, nyɩ sàwr a bɛ nʋɔr ɛ́ tuur a lɛ za bɛ na yere kʋ̀rɛ nyɩ a, ɛcɛ nyɩ ta cɔwrɛ a bɛ ɩ-ɩrɩ ɛ. Bɛ mɩ́ yel'a ɛ́ bɛ tu a lɛ bɛ na yel a ɩ.

⁴Bɛ mɩ́ 'lẽ nɩ tuor na tɩbrɛ bɛ dɩ vuo a, dɔwlɩ a nɩbɛ bawŋmamɛ zu, ɛ́ a bɛl tɛɛ za bɛ mɩ́ sàw na ír nobir tɔ n a kaa ɩ.

⁵A bɛ ɩb za a, bɛ mɩ́ ɩrɛ na k'aa nɩsaalbɛ nyɛ̃ bɛ. Lɛ n'a, a Naaŋmɩn wulu bãwfʋ bɛ na mɩ́ ƴãw a gbẽé nɩ a kpãkpamɛ ƴãw a, bɛ mɩ́ ɩ a yɛlmɛ, ɛ́ ɩ a kparɩ zʋɔrɛ a wõwme.

⁶Bɛ nɔnɛ nɩ a nɩ-bɛrɛ dà-kɔwr a cuwr zie, nɩ a niŋé dà-kɔwr a puoru-diru pʋɔ.

⁷Bɛ nɔnɛ na k'aa nɩbɛ puore bɛ a nɩ-yaga pʋɔ, ɛ́ mɩ́ wõ bɛ bʋɔlɩ bɛ kɛ́: “Wul-wule.”

⁸A nyɩɩm a, nyɩ ta ƴãw bɛ bʋɔlɛ nyɩ “Wul-wule” ɩ, Wul-wule been yõ n'ʋ nyɩ tɛr, ɛ́ nyɩ za ɩ yɛbr.

⁹Nyɩ ta bʋɔlɛ nɩr za a tẽw zu ka kɛ́ nyɩ “Sãà” ɩ, Sãà been yõ n'ʋ nyɩ tɛr, a ʋl na be a tẽ-vla pʋɔ a.

¹⁰Nyɩ mɩ̀ ta ƴãw bɛ bʋɔlɛ nyɩ: “Zu-sob” ɛ, Zu-sob been n'ʋ nyɩ tɛr, a Kɩrɩta n'ʋ.

¹¹Sob nɛ na ɩ kpɛ̃ɛ za a nyɩ pʋɔ a na ɩ n a nyɩ tõ-tone.

¹²Sob nɛ za na zɛwr ʋ tʋɔra a, bɛ na siwr'ʋ na, ɛ́ sob nɛ za na siwre ʋ tʋɔra a, bɛ na zɛw ʋ na.»

¹³«Baw-bio dem'ɩ nyɩ, nyɩɩm Naaŋmɩn wulu sɛ-sɛbrbɛ nɩ nyɩɩm Faarizɩ̃ɛ mɩnɛ, nɩsaal-libelibe e! Nyɩ mɩ́ pàw nɩ a tẽ-vla Naalʋ dɩ̃dɔr a nɩbɛ ƴãw: a nyɩɩm tɛɛ za bɛ mɩ́ kpɛ a ʋ pʋɔ ɩ, ɛ́ a bɛlɩ dem na bɔbr a kpɛb a, nyɩ bɛ mɩ́ sàw bɛ na kpɛ ɩ. [

¹⁴Baw-bio dem'ɩ nyɩ, nyɩɩm Naaŋmɩn wulu sɛ-sɛbrbɛ nɩ nyɩɩm Faarizɩ̃ɛ mɩnɛ, nɩsaal-libelibe e! Nyɩ mɩ́ de nɩ a pɔw-kɔbɛ bome za, ɛ́ mɩ́ puore puor-wowr k'aa nɩbɛ tʋ̃ɔ́ nyɛ̃ nyɩ. Lɛ so bɛ na dɩ n nyɩ a ƴɛ̀rʋ faa faa.]

¹⁵Baw-bio dem'ɩ nyɩ, nyɩɩm Naaŋmɩn wulu sɛ-sɛbrbɛ nɩ nyɩɩm Faarizɩ̃ɛ mɩnɛ, nɩsaal-libelibe e! Nyɩ mɩ́ zɔ na gʋɔrɩ ten nɩ mamɛ, kɛ́ nyɩ tʋ̃ɔ́ páw nɩ-been yõ ƴãw a nyɩ puoru sɔ́r pʋɔ, ɛ́ nyɩmɛ wa páw ʋ baar'a, nyɩɩm ɩ k'ʋ sɛwnɩ a tẽ-faa zuo nyɩ gb'a ayi.

¹⁶Baw-bio dem'ɩ nyɩ, nyɩɩm na ɩ zɔn ɛ́ wule nɩbɛ sɔ́r a! Nyɩ mɩ́ yel'a: “Nɩr wa pɔ n a Ŋmɩn-yir-kpɛ̃ɛ a, a bɛ pʋɔ ɩ, ɛcɛ ʋlɛ wa pɔ n a Ŋmɩn-yir-kpɛ̃ɛ salm-zɩɛ a, a fɛr'a k'ʋʋ ír a ʋ pɔb.”

¹⁷Dãbole nɩ zɔn bɛ ŋa! Buor'ʋ ɩ kpɛ̃ɛ zuo: a salm-zɩɛ n'a bɩɩ a Ŋmɩn-yir-kpɛ̃ɛ na ɩ a salm-zɩɛ a lɩɛbɩ bʋ̃-son a n'ʋ?

¹⁸Nyɩ cãà na mɩ́ lɛb yel: “Nɩr wa pɔ n a bàwr-maal-kuur a, a bɛ pʋɔ ɩ, ɛcɛ nɩr wa pɔ n a bàwr-maal-bom na bin a bàwr-maal-kuur zu a, a fɛr'a k'ʋʋ ír a ʋ pɔb.”

¹⁹Zɔn bɛ ŋa! Buor'ʋ ɩ kpɛ̃ɛ zuo: a bàwr-maal-bom'ʋ bɩɩ a bàwr-maal-kuur na mɩ́ ɩ a bàwr-maal-bom ʋ ɩ sõw a n'ʋ?

²⁰A na ɩ lɛ a, nɩr na pɔ n a bàwr-maal-kuur a, a bàwr-maal-kuur nɩ bom za na be a ʋ zu a n'a ʋ pɔ n.

²¹Nɩr na pɔ n a Ŋmɩn-yir-kpɛ̃ɛ a, ʋ pɔ n nɩ a Ŋmɩn-yir-kpɛ̃ɛ nɩ a Naaŋmɩn na kpɩɛr a ʋ pʋɔ a.

²²Nɩr na pɔ n a salom a, ʋ pɔ n nɩ a Naaŋmɩn Naalʋ dà-kɔw nɩ a Naaŋmɩn na zɩ̃ a ʋ zu a.

²³Baw-bio dem'ɩ nyɩ, nyɩɩm Naaŋmɩn wulu sɛ-sɛbrbɛ nɩ nyɩɩm Faarizɩ̃ɛ mɩnɛ, nɩsaal-libelibe e! Nyɩ mɩ́ kʋ̀ n a Naaŋmɩn a nyɩ bʋ̃-tɛrɩ ziir pie sob, a zɛ-va-bʋʋrɛ a mɩnɛ ƴãw, mɛ̃ a mãtɩ, a fenil nɩ a kimɛ̃ a, ɛ́ nɩ̃ɛ mɩ́ ƴãw dere a Naaŋmɩn wulu yel-bɛrɛ á ŋá ƴãw: a mɩnʋ, a su-ɓaarʋ nɩ a naaŋmɩn-sàw-deb. Ɛcɛ à á ŋá n'a a tɩ fɛrɛ kɛ́ nyɩ tuur, ɛ́ ta bɛr a al na cɛ a ɩ.

²⁴Nyɩɩm zɔn bɛ ŋa na wule sɔ́r a! Nyɩ mɩ́ cɔw nɩ a kʋ̃ɔ ír pupurme bɛr, ɛ́ nɩ̃ɛ vɔl nyɔ̃wmɛ.

²⁵Baw-bio dem'ɩ nyɩ, nyɩɩm Naaŋmɩn wulu sɛ-sɛbrbɛ nɩ nyɩɩm Faarizɩ̃ɛ mɩnɛ, nɩsaal-libelibe e! Nyɩ mɩ́ pɛ́w nɩ a koli-nyúura nɩ a laa zikur, ɛ́ a pʋɔ mɩ́ paalɩ a nyɩ nyãnyu-bome nɩ a nyɩ tɩɛr-faar.

²⁶Faarizɩ̃ɛ zɔ̃w i! De niwn pɛ́w a koli-nyúura pʋɔ, lɛ n'a a zikur mɩ̀ na vɩɛl.

²⁷Baw-bio dem'ɩ nyɩ, nyɩɩm Naaŋmɩn wulu sɛ-sɛbrbɛ nɩ nyɩɩm Faarizɩ̃ɛ mɩnɛ, nɩsaal-libelibe e! Nyɩ ŋmɛ̃ na taa nɩ yarʋ bɛ na bʋl a pɛlɩ a: a mɩ́ sãá na vɩɛl, ɛ́ a pʋ̃ɔmɩ paalɩ kũuni kɔbɛ nɩ dɛwr-pɛ-bʋʋrɛ za.

²⁸Lɛ n'a nyɩ mɩ̀ ŋmɛ̃: nyɩ mɩ́ sãá nɩ nɩ-mɩn a nɩbɛ niŋé, ɛcɛ a nyɩ pʋʋr ɩ yã-faa nɩ faalʋ tɛwr.

²⁹Baw-bio dem'ɩ nyɩ, nyɩɩm Naaŋmɩn wulu sɛ-sɛbrbɛ nɩ nyɩɩm Faarizɩ̃ɛ mɩnɛ, nɩsaal-libelibe e! Nyɩɩm na mɩ́ mɛ a naaŋmɩn-ƴɛ̀r-manbɛ yarʋ, ɛ́ maalɩ a nɩ-mɩn yarʋ a vɩɛl a,

³⁰ɛ́ mɩ́ yel: “Tɩmɛ tɩ vʋʋrɛ a tɩ sãàkʋm-kore daar a, tɩ kʋ̃ʋ tɩ pʋɔ a bɛ pʋɔ kʋ a naaŋmɩn-ƴɛ̀r-manbɛ ɩ.”

³¹À ŋá n'a nyɩ mɩ́ ƴɛ̀r nyɔw nyɩ tʋɔra: a bɛlɩ dem na kʋ a naaŋmɩn-ƴɛ̀r-manbɛ a, bʋ̃-dɔwrɩ n'ɩ nyɩ.

³²A vɩɛl a! Nyɩ cãà cere nɩ a lɛ, a ʋlɩ bom nɛ a nyɩ sãàkʋm-kore na tĩ a, nyɩ baa kʋ a ʋ nʋɔr!

³³Wɩɩr nɩ dɔpan bʋʋrɛ bɛ ŋa! Ŋmɩŋmɩn n'a nyɩ na tʋ̃ɔ́ nɩɩrɩ a tẽ-faa dɔwrʋ bɛr?

³⁴Lɛ so, nyɩ nyɛ̃, ɩ̃ tone nɩ naaŋmɩn-ƴɛ̀r-manbɛ, nɩ yã-bãwnbɛ, nɩ Naaŋmɩn wulu sɛ-sɛbrbɛ a nyɩ zie. Nyɩ na kʋ n bɛ mɩnɛ, ɛ́ kpa bɛ mɩnɛ da-gara zu, nyɩ na fɔb'ɩ bɛ mɩnɛ a nyɩ puoru-diru pʋɔ, ɛ́ diw bɛ tẽw ŋa tɩ sãá nɩ tẽw ŋa,

³⁵k'aa nɩ-mɩn za zɩ̃ɩ na cir a tẽw zu a, tʋ̃ɔ́ lɛb lo a nyɩ zu, a na tĩ a nɩ-mɩŋa Abɛl nyɩ na kʋ a, tɩ ta n a Barakɩ bidɛb Zakari nyɩ na kʋ a zi-sõw nɩ a bàwr-maal-kuur cara pʋɔ a.

³⁶Yel-mɩŋa sɩza, ɩ̃ yere na kʋ̀rɛ nyɩ, à á ŋá za na lɛb'a lo a dɩ̃a nɩbɛ bɛ ŋa zu.»

³⁷«Zerizalɛm i! Zerizalɛm i! Fʋ̃ʋ na kʋrɛ a naaŋmɩn-ƴɛ̀r-manbɛ, ɛ́ lɔbr a bɛlɩ dem a Naaŋmɩn na tone a fʋ zie a nɩ kʋsɛbɛ kʋrɛ a, gb'a a ŋmɩn za n'a ɩ̃ tɩ bɔbr k'ɩ̃ɩ kaalɩ a fʋ bibiir ɓã taa, mɛ̃ nɔ-mã na mɩ́ kaalɩ a ʋ lili-pɩɩlɛ ɓã taa a ʋ pɩgɛ pile a, ɛ́ nyɩ bɛ sàw ɛ!

³⁸A na ɩ à ŋá a, a nyɩ yir na gã nɩ zawla.

³⁹Mãa n'ʋ yere kʋ̀rɛ nyɩ, a na dɛ tɔ dɩ̃a a, nyɩ kʋ̃ lɛb nyɛ̃ m ɛ, ɛ́ gù a lɛn daar nyɩ nãà wa yere: “A Naaŋmɩn, ʋ maalɩ a sob nɛ na waar a Sore yúor ƴãw a!”»