Read Dagara, Northern Matie 24 Bible Online

Matie 24 - Dagara, Northern bible

Matie 24

¹A Yeezu na tɩ yi a Ŋmɩn-yir-kpɛ̃ɛ pʋɔ cere a, a ʋ po-tuurbɛ tɩ taw na ta a ʋ zie, kɛ́ bɛ wul ʋ a Ŋmɩn-yir-kpɛ̃ɛ mɩɛrʋ na vɩɛl a.

²Ʋ tɩ de nɩ a ƴɛ̀rʋ yel bɛ: «Mɛ̃ nyɩ taa nyɛ̃ à á ŋá za? Yel-mɩŋa sɩza, ɩ̃ yere na kʋ̀rɛ nyɩ, kʋsɩɛr kʋ̃ cãà dɔwlɩ kʋsɩɛr zu a ka ɩ: bɛ na ŋmɛr'ɩ a za bɛr.»

³A Yeezu na tɩ zɩ̃ a Olivʋ tɩɩr tãw zu a, a ʋ po-tuurbɛ tɩ taw na pɩɛl ʋ bɛ tɛwr zie ɛ́ sowr'ʋ: «Yel kʋ̀ tɩ a lɛn daar a yele á ŋá na na ta a, nɩ a ʋlɩ bom nɛ na na ɩ a fʋ lɛb-waa nɩ a tẽw baarʋ bãwfʋ a.»

⁴A Yeezu tɩ sɔw na yel bɛ: «Nyɩ gù nyɩ tʋɔra vla nɩr za taa wa tule nyɩ ɛ.

⁵Nɩ-yaga na sɩrɩ na wa yel kɛ́ a mãa yúor ƴãw n'a, wa yere: “Mãa n'ɩ a Nɩ-kabra”, ɛ́ bɛ na tuli nɩ nɩ-yaga.

⁶Nyɩ na wone nɩ zɛbr na zɛbr pɩɛlɩ a gɔmɛ, ɛ́ wone bɛ ƴɛ̀rɛ zɛbr na zãá a ƴɛ̀rʋ. Nyɩ ta sàw pʋ̀lá vʋ̃ɔnɛ nyɩ ɛ. A fɛr'a k'aa ta, ɛcɛ a cãà kʋ̃ ɩ a tẽw baarʋ n'a ɩ.

⁷Tẽw ŋa na mɩ́ ŋmãa nɩ nɩ tẽw ŋa zɛbr, nãà ŋa na mɩ́ ír'a taw tuori nãà ŋa. Kɔ̃ nɩ tẽsɔw kɔbr damnʋ na be n ziir a mɩnɛ.

⁸A yele á ŋá za na ɩ na mɛ̃ 'wɔbrʋ na mɩ́ tĩ 'wɔbr pɔw a dɔwfʋ daar a.

⁹A lɛn daar, bɛ na nyɔw nyɩ na tɩr kɛ́ bɛ dɔwrɩ nyɩ, bɛ na kʋ nyɩ na. A nɩ-bʋʋr-yoru na hɩ̃ɛn nyɩ nɩ a ɩ̃ yúor ƴãw.

¹⁰A lɛn daar, nɩ-yaga na faa na lo a bɛ naaŋmɩn-sàw-deb pʋɔ. Bɛ na nyɔwr'ɩ taa tɩrɛ, bɛ na hɩ̃ɛn nɩ taa.

¹¹Naaŋmɩn-ƴɛ̀r-man-bɛlɛbɛlɛ mɩnɛ na yi na bɛ tɛr vuo ɩ, ɛ́ tuli nɩ-yaga.

¹²Nɩ-yaga nɔ̃wfʋ na ɓãá na, a faalʋ na na kɛrɛ dɔwlɛ cere a ƴãw.

¹³Ɛcɛ sob nɛ na na ƴãw fãw tɩ ta a baarʋ daar a, na nyɛ̃ nɩ a faafʋ.

¹⁴A Naaŋmɩn Naalʋ Yel-nʋ̃ɔ̀ ŋa na hier'a tɔ a tẽ-daa za, k'aa ʋ dãsɩɛ tʋ̃ɔ́ dɩ a nɩ-bʋʋr-yoru za zie. Lɛn daar'a a baarʋ daar pãa na ta.»

¹⁵«Lɛ so, a Faalʋ-na-bɛ-maal'ɩ-wob'a ƴɛ̀rʋ a naaŋmɩn-ƴɛ̀r-manɛ Danɩɛl[58] na tɩ dãw ƴɛ̀r a, nyɩmɛ wa nyɛ̃ ʋ, ʋ be a zi-sõw pʋɔ a, a kã-kanɛ, ʋ bãw a pɛr.

¹⁶A lɛn daar a, bɛlɩ dem na na be a Zude tẽw pʋɔ a, bɛ zɔrɛ kpɩɛr a tan pʋɔ.

¹⁷Nɩr wa be gàrʋ́ a, ʋ taa siwr dĩó k'ʋʋ tɩ de ʋ bome ɩ.

¹⁸Ɛ́ nɩr na na be pu-pʋɔ a, ʋ taa lɛbr kule yir k'ʋʋ tɩ de ʋ kpar-kpɛ̃ɛ ɩ.

¹⁹Baw-bio dem'ɩ a bɛlɩ pɔwbɛ nɛ na na tɛr pʋɔ bɩɩ ƴɛnɛ bibiir a alɩ bibie nɛ pʋɔ a!

²⁰Nyɩ puore zɛlɛ k'aa nyɩ zɔba taa wa ɩrɛ sa-kʋ̃ɔ zi-faa daar ɛ, bɩɩ pɩ̃ɛnʋ-bibir ɛ.

²¹A ʋlɩ daar nɛ a, kpɩɛrʋ kpɛ̃ɛ bɛ na bɛ dãw nyɛ̃ a tẽw íru daar wa tɔ a ƴɛrɛŋa a, na be n be, ɛ́ a pùorí bɛ kʋ̃ lɛb nyɛ̃ a kpɩɛrʋ ŋa tɔ ɩ.

²²A Naaŋmɩn bɛ tɩ ŋmãa a bibie a mɩnɛ bɛr a, nɩr kʋ̃ʋ tɩ cɛ ɩ. Ɛcɛ ʋ ŋmãa nɩ a bibie a mɩnɛ bɛr a ʋ nɩ-kaa-íri zũú.

²³Lɛ so, nɩr wa yel kʋ̀ nyɩ: “Nyɩ nyɛ̃ a Nɩ-kabra ka”, bɩɩ: “Ʋ be n ka lowr a”, nyɩ taa sàwr kɛ́ sɩza n'a ɩ.

²⁴Naaŋmɩn nɩ-kabr-bɛlɛbɛlɛ mɩnɛ nɩ naaŋmɩn-ƴɛ̀r-man-bɛlɛbɛlɛ mɩnɛ na yi na maalɛ nɔ-ɓãa-yel-bɛrɛ nɩ yel-bãw-guuri, alɛ tɩ tʋ̃ɔ́ a, bɛ̃ɛ tuli a Naaŋmɩn nɩ-kaa-íri tɛɛ za.

²⁵Nyɩ nyɛ̃, ɩ̃ de nɩ niwn yel kʋ̀ nyɩ.

²⁶Lɛ so, bɛlɛ wa yere kʋ̀rɛ nyɩ: “Nyɩ nyɛ̃, ʋ be n wɛja-kpalɛ pʋɔ”, nyɩ taa cere ɩ, bɩɩ: “Ʋlɛ n'ɩ ŋan sɔwlɩ ka”, nyɩ taa sàwr ɛ.

²⁷Mɛ̃ a lɛ a saa-nyɩwrʋ na mɩ́ yi a mʋ̃tɔ̃w puru zie tɩ ta a mʋ̃tɔ̃w kpɛb zie a, lɛ n'a a Nɩsaal Bie waa mɩ̀ na ŋmɛ̃.

²⁸Be a bʋ̃-kũu na be a, be n'a a sidume na ɓã taa.»

²⁹«Daadaalɛ, a kpɩɛrʋ á ŋá pùorí, a mʋ̃tɔ̃w na liw na, a cuw kʋ̃ lɛb pɛlɩ ɛ, a ŋmar-bie na yi n a salom zu pɔrɛ lore, ɛ́ a saa-zu kpɛnʋ bʋʋrɛ za na dam'a.

³⁰Lɛ n'a a Nɩsaal Bie bãwfʋ na sãá a salom zu. Lɛ n'a a tẽw zu nɩ-bʋʋrɛ za na kone. Bɛ na nyɛ̃ nɩ a Nɩsaal Bie ʋ be a zũzuge pʋɔ waar nɩ fãw na bɛ tɛr vuo a, nɩ yúor-vɩɛlʋ-danʋ.

³¹Ʋ na tõ n a ʋ malkɩ mɩnɛ nɩ a wɩ-kpɛ̃ɛ a tẽ-daa lõbowe anaar za, bɛ tɩ bʋɔlɩ a ʋ nɩ-kaa-íri a tẽ-daa zu ziir za ɓã taa.»

³²«Zʋkpar'ʋ a kãkã-tɩɛ mɩ́ lɔb kʋ̀ nyɩ: a ʋ wuli wa vore ʋʋ tɔmnɛ va-palɛ a, nyɩ mɩ́ bãw k'aa nyĩi daar tarɛ na.

³³Lɛ n'a, a nyɩɩm mɩ̀ a, nyɩmɛ wa nyɛrɛ a yele á ŋá za a, nyɩɩm bãw k'aa Nɩsaal Bie pɩɛl'a, k'ʋʋ be n a nyɩ dɩ̃dɔr nʋɔr.

³⁴Yel-mɩŋa sɩza, ɩ̃ yere na kʋ̀rɛ nyɩ, a dɩ̃a nɩbɛ kʋ̃ kpi baarɩ ɛ, ɛ́ a yele á ŋá za ta.

³⁵A salom nɩ a tẽw na tɔl'a, ɛcɛ a ɩ̃ ƴɛ̀rʋ bɛ be za na tɔl ɛ.»

³⁶«Ɛcɛ nɩr za bɛ bãw a ʋlɩ bibir nɩ a ʋlɩ tɛm nɛ a yele á ŋá za na na ta a ɩ: a salom zu malkɩ mɩnɛ tɛɛ za bɛ bãw ɛ, a Naaŋmɩn Bie tɔr za bɛ bãw ɛ, nɩsaal za bɛ bãw ɛ, ʋ bɛ ɩ a Naaŋmɩn Sãà yõ ɩ.

³⁷A lɛ a yele na tɩ ŋmɛ̃ a Nowe[59] daar a, lɛ n'a a mɩ̀ na ŋmɛ̃ a Nɩsaal Bie waa daar.

³⁸A kʋ̃ɔ-paalʋ-kpɛ̃ɛ na bɛ tɩ ta sɛr a, a nɩbɛ tɩ dɩrɛ na, ɛ́ nyúur, ɛ́ kule pɔwbɛ, ɛ́ tɩrɛ a bɛ pɔwyaar bɛ kule, tɩ ta n a ʋlɩ bibir a Nowe na kpɛ a gbor-kpɛ̃ɛ pʋɔ a.

³⁹Bɛ bɛ tɩ bãwnɩ yel ɛ, ɛ́ tɩ ta a lɛn daar a kʋ̃ɔ-paalʋ-kpɛ̃ɛ na wa tuo bɛ za a. À ŋá n'a a mɩ̀ na ŋmɛ̃ a Nɩsaal Bie waa daar.

⁴⁰Dɛbr ayi na be n pu-pʋɔ, bɛ wa tɛr been ɛ́ bɛr been.

⁴¹Pɔwbɛ ayi na ƴɛ́rɛ nɩ zɔ̃ nɩɛr zu, bɛ wa tɛr been ɛ́ bɛr been.

⁴²A na ɩ lɛ a, nyɩ bɛr gʋ̃ɔ, nyɩ na bɛ bãw a ʋlɩ bibir a nyɩ Sore na na wa a ƴãw.

⁴³Nyɩ bãwnɩ a na, a yir sob mɩ́ tɩ bãw tɛm nɛ a nyãnyuge na na wa a, ʋ nãá mɩ́ bɛr'ɩ gʋ̃ɔ, ɛ́ kʋ̃ʋ mɩ́ sàw ʋ kpɛ a ʋ yir pʋɔ ɩ.

⁴⁴Alɛ so, a nyɩɩm mɩ̀ a, nyɩ cɔbrɩ gùre, a tɛm ʋl nyɩ na bɛ bãw a n'ʋ a Nɩsaal Bie na wa.»

⁴⁵«A tõ-tõ-bi-vla nɩ yã-bãwnɛ pãa n'ɩ buor a? A kãw n'ɩ ŋan a ʋ zu-sob na de a ʋ yir nɩbɛ kʋ̀, k'ʋʋ mɩ́ kʋ̀ bɛ a bʋ̃-dɩrɩ a daar wa ta a.

⁴⁶Zu-nʋ̃ɔ̀ sob'ɩ a tõ-tõ-bie ŋa, a ʋ zu-sob nãá wa ta nyɛ̃ ʋ tone a ton ŋa a.

⁴⁷Yel-mɩŋa sɩza, ɩ̃ yere na kʋ̀rɛ nyɩ, a zu-sob na ƴãw na ʋ kaarɛ a ʋ bʋ̃-tɛrɩ za zie.

⁴⁸Ɛcɛ ʋlɛ wa ɩ tõ-tõ-bi-faa a, ʋ na tɩɛr'ɩ ʋ pʋɔ: “A ɩ̃ zu-sob bɛ lɛbr waar fɔ̃w ɛ”,

⁴⁹ɛ́ tĩ pɔbr a ʋ tõ-tõ-bi-taabɛ, ɛ́ ʋlɛ nɩ a dã-kuolbɛ lãw dɩrɛ ɛ́ nyúur.

⁵⁰A tõ-tõ-bie ŋa zu-sob na wa n bibir nɛ ʋ na bɛ cɛlɛ ʋ a, nɩ tɛm ʋl ʋ na bɛ bãw a.

⁵¹Ʋ na diw ʋ na bɛr, ɛ́ ƴãw ʋ nɩsaal-libelibe pʋɔ, be n'a kon na kone 'wɔbr'ɩ nyɩmɛ.»