Read Dagara, Northern Matie 26 Bible Online

Matie 26 - Dagara, Northern bible

Matie 26

¹A Yeezu na tɩ baarɩ a wulu á ŋá za a, ʋ yel'ɩ a ʋ po-tuurbɛ: «Nyɩ bãwnɩ a na, ka nɩ bibie ayi ʋ na ɩ n a Zifʋ mɩnɛ Tɔl-gãw:

²bɛ na nyɔw nɩ a Nɩsaal Bie tɩr kɛ́ bɛ kpa ʋ da-gara zu.»

³Lɛ n'a a bàwr-maal-nɩ-bɛrɛ, nɩ a Zifʋ nɩbɛ nɩ-kore, tɩ ɓã taa a Naaŋmɩn bàwr-maal-kara ʋl na tɩ dɩ kɛ́ Kayifʋ a yir.

⁴Bɛ tɩ wõ n taa kɛ́ bɛ maalɩ yã nyɔw a Yeezu kʋ.

⁵Ɛcɛ bɛ tɩ yere na: «A ta ɩ a cuw daar ɛ, lɛ n'a a kʋ̃ ƴãw damnʋ a nɩbɛ pʋɔ ɩ.»

⁶A Yeezu tɩ be n Betani, Sɩmʋ̃ na ɩ kɔ̃w a yir.

⁷Ʋ na tɩ zɩ̃ dɩrɛ a, pɔw kãw tɩ tɛr'ɩ kãá-nyũu a daarʋ na bɛ gbʋ́r a, paalɩ kʋsɛ-pla duwle. Ʋ tɩ taw na pɩɛlɩ a Yeezu, ɛ́ cir a kãá-nyũu á ŋá ƴãw a Yeezu zũú.

⁸A Yeezu po-tuurbɛ na tɩ nyɛ̃ a lɛ a, a tɩ ɩ na mɛ̃ bɛ ɩ ŋmɩn a. Bɛ tɩ yere na: «Bʋ̃ʋ pãa so a kãá-nyũu á ŋá sãw-bɛrʋ a?

⁹Bɛ nãá tʋ̃ɔ́ na kʋɔrɩ a kãá-nyũu á ŋá, a daarʋ ɩ kpɛ̃ɛ yaga, bɛ kʋ̀ a libie nan dem.»

¹⁰A Yeezu na tɩ bãwnɩ a, ʋ yel bɛ na: «Bʋ̃ʋ n'ʋ so nyɩ sɔbr a pɔw ŋa niwn? Yel-vla n'ʋ ʋ maalɩ a ɩ̃ zie.

¹¹Sɩza n'a, nan dem na be n a nyɩ zie kʋralɛ, ɛcɛ mãa kʋ̃ be a nyɩ zie kʋralɛ ɩ.

¹²A kãá-nyũu á ŋá ʋ na cir ƴãw a ɩ̃ ƴã-ganɩ́ a, ʋ cɔbrɩ mɛ̃ nɩ a ũufʋ ƴãw.

¹³Yel-mɩŋa sɩza, ɩ̃ yere na kʋ̀rɛ nyɩ: a tẽ-daa zu zie nɛ za bɛ nãà wa hiere a Yel-nʋ̃ɔ̀ ŋa a, bɛ mɩ̀ na mɩ́ man nɩ a ʋlɩ bom nɛ a pɔw ŋa na ɩ a, tɛr'ɩ a ʋ tɩɛrʋ.»

¹⁴Lɛ n'a a Pie-nɩ-ayi ƴen sob kãw bɛ na bʋɔlɛ kɛ́ Zuda Ɩsɩkarɩɔtɩ a, tɩ cen tɩ páw a bàwr-maal-nɩ-bɛrɛ

¹⁵yel bɛ: «Mãa wa nyɔw a Yeezu kʋ̀ nyɩ a, bʋ̃ʋ n'ʋ nyɩ na kʋ̀ m?» Bɛ tɩ sɔr'ɩ salm-zɩɛ libie lɩzɛr'ɩ pie kʋ̀ ʋ[60].

¹⁶Lɛ n'a ʋ tɩ tĩ bɔbr a vo-vla ʋ na na nyɔw a Yeezu kʋ̀ bɛ a.

¹⁷A dipɛ̃ na bɛ ƴãw dãbɩl a cuw bibi-dãw-niwn sob, a Yeezu po-tuurbɛ tɩ wa na wa sowr'ʋ: «Nyɩnɛ n'a fʋ bɔbr kɛ́ tɩ cɔbrɩ a Tɔl-gãw dɩb?»

¹⁸A Yeezu tɩ yel'a: «Nyɩ cen a tẽw pʋɔ, bón zie, tɩ yel ʋ: “A Wul-wul-kara yel a: a ɩ̃ daar pɩɛl'a, a fʋ yir'a mãa nɩ a ɩ̃ po-tuurbɛ maalɛ a Tɔl-gãw cuw.”»

¹⁹A po-tuurbɛ tɩ tu n a lɛ a Yeezu na yel a, ɛ́ cɔbrɩ a Tɔl-gãw cuw.

²⁰A zaanʋɔra na wa ta a, a Yeezu tɩ lãw nɩ nɩ a Pie-nɩ-ayi dɩrɛ.

²¹Bɛ na tɩ dɩrɛ a, ʋ tɩ yel'a: «Yel-mɩŋa sɩza, ɩ̃ yere na kʋ̀rɛ nyɩ, a nyɩ kãw na mɩl mɛ̃ na nyɔw tɩr.»

²²Pʋ-sãwna tɩ nyɔw bɛ nɩ yaga, ɛ̀ ŋa za mɩ́ tɩ sowre ʋ: «Sore e, mãa ya n'ʋ bɩɩ?»

²³A Yeezu tɩ sɔw na: «Sob ŋa nɩ mãa na lãw tõ a nũu a laa pʋɔ a, ʋlɛ n'ʋ na mɩl mɛ̃ nyɔw tɩr.

²⁴A Nɩsaal Bie kule na mɛ̃ a lɛ bɛ na sɛb yel a ʋ ƴãw a, ɛcɛ baw-bio sob'ɩ a sob nɛ na mɩl a Nɩsaal Bie nyɔw tɩr a, a nɩr ŋa bɛ tɩ dɔw a, alɛ sa.»

²⁵A Zuda na tɩ mɩlɛ ʋ a, tɩ de nɩ a ƴɛ̀rʋ sowr'ʋ: «Mãa ya n'ʋ bɩɩ, Wul-wul-kara a?» Ʋ tɩ sɔw ʋ na: «Fʋ̃ʋ n'ʋ yel.»

²⁶Bɛ na tɩ dɩrɛ a, a Yeezu tɩ de nɩ dipɛ̃, maalɩ, ɛ́ ŋma põ kʋ̀ a ʋ po-tuurbɛ ɛ́ yel: «Nyɩ de 'wɔb, à ŋà ɩ n a ɩ̃ ƴã-gan.»

²⁷Al pùorí, ʋ tɩ de nɩ koli-nyúura na ƴãw divɛ̃ a, ʋʋ na wa puori a Naaŋmɩn yãanɩ baar'a, ʋ de na kʋ̀ a ʋ po-tuurbɛ ɛ́ yel: «Nyɩ de a nyũ tɔ taa,

²⁸à á ŋá ɩ n a ɩ̃ zɩ̃ɩ, a Wõ-taa zɩ̃ɩ, na cir yaarɩ a nɩ-yaga ƴãw a yel-bebe suur páwfʋ ƴãw a.

²⁹Ɩ̃ yere na kʋ̀rɛ nyɩ, dɩ̃a na ta a, ɩ̃ kʋ̃ lɛb nyũ a divɛ̃ á ŋá ɩ, ɛ́ gùre a ʋlɩ bibir nɛ ɩ̃ nãà lɛb wa lãwnɩ nyɩ nyũ divɛ̃-paala a ɩ̃ Sãà naalʋ pʋɔ a.»

³⁰Bɛ na wa yieli a Sɛb-sõw yielu[61] baar'a, bɛ yi na cere a Olivʋ tɩɩr tãw zu.

³¹Lɛ n'a a Yeezu tɩ yel a ʋ po-tuurbɛ: «A tɩ̃ɩsɔw ŋa tɔr za, nyɩ za na zɔ na ɛ́ bɛr mɛ̃. Bɛ sɛb'a: “Ɩ̃ na ŋmɛ n a pi-cɩ̃ɩnɛ kʋ ɛ́ a píir zɔ yaarɩ[62].”

³²Ɛcɛ mãa wa lɛb yi a kũu pʋɔ a, ɩ̃ na de nyɩ nɩ niwn a Galile tẽw.»

³³Pɩɛr tɩ de nɩ a ƴɛ̀rʋ yel ʋ: «Bɛ za saa na zɔ kɛ́ bɛr fʋ a, mãa bɛ be za na zɔ kɛ́ bɛr fʋ ɛ.»

³⁴A Yeezu tɩ yel ʋ na: «Yel-mɩŋa sɩza, ɩ̃ yere na kʋ̀rɛ fʋ, a dɩ̃a tɩ̃ɩsɔw tɔr za, nʋra kʋ̃ kõ sɛr ɛ, ɛ́ fʋ ciiri gb'a ata kɛ́ fʋ bɛ bãw mɛ̃ ɩ.»

³⁵A Pɩɛr tɩ yel ʋ na: «Ɩ̃ bɛ be za na ciiri k'ɩ̃ɩ bɛ bãw fʋ ɛ, alɛ saa na fɛr kɛ́ mãa nɩ fʋ̃ʋ za lãw kpi a.» A po-tuurbɛ za mɩ̀ tɩ yere nɩ a lɛn tɔr za.

³⁶Lɛ n'a a Yeezu nɩ a ʋ po-tuurbɛ tɩ ta zie kãw bɛ na bʋɔlɛ Zesemani a, ʋ yel bɛ: «Nyɩ zɩ̃ a ka, ɩ̃ɩ cen ka tɩ puori.»

³⁷Ʋ tɩ tɛr'ɩ Pɩɛr nɩ Zebede bidɛbr bɛ za ayi cen nɩ. Pʋ-sãwna nɩ pʋl-vʋ̃ɔ tɩ tĩ na nyɔw ʋ.

³⁸Lɛ n'a ʋ tɩ yel bɛ: «Pʋ-sãwna faar'a na kʋ m, nyɩ be a ka, ɛ́ lãw nɩ mɛ̃ puore ɛ́ bɛr gʋ̃ɔ.»

³⁹Ʋ tɩ taw na tɔl blã ɛ́ lo vɔblɩ muru ɛ́ puore yere nɩ: «Ɩ̃ Sãà a, alɛ na na tʋ̃ɔ́ a, fʋ̃ʋ ɩ a tuo koli-nyúura ŋa zãá nɩ mɛ̃! Ɛcɛ a ta ɩ a lɛ mãa na bɔbr a ɩ, a ɩ a lɛ fʋ̃ʋ na bɔbr a.»

⁴⁰Ʋ tɩ ìr'a wa a ʋ po-tuurbɛ ata bɛl zie wa nyɛ̃ bɛ gúre. Ʋ tɩ yel'ɩ a Pɩɛr: «A ɩ lɛ nyɩ bɛ tʋ̃ɔ́ bɛr gʋ̃ɔ ɛ́ lãw nɩ mɛ̃ tɛm been yõ ƴãw ʋ?

⁴¹Nyɩ bɛr gʋ̃ɔ ɛ́ puore taa wa lore a bɛlʋ pʋɔ ɩ. A nɩsaal mɩ́ bɔbr'ɩ sɩza, ɛ́ bɛ tɛr fãw ɛ.»

⁴²Ʋ tɩ lɛb'a cen a gb'a ayi sob ƴãw tɩ puore yere nɩ: «Ɩ̃ Sãà a, alɛ wa ɩ fɛrʋ k'ɩ̃ɩ nyũ a tuo koli-nyúura ŋa a, a fʋ pʋ-tɩɛrʋ ʋ maalɩ.»

⁴³Ʋ tɩ lɛb'a wa wa nyɛ̃ bɛ gúre, a gʋ̃ɔ na faa tɩ paalɩ a bɛ mimie a ƴãw.

⁴⁴Ʋ tɩ bɛr bɛ na ɛ́ lɛb cen tɩ puori a gb'a ata sob nɩ a alɩ ƴɛ̀r-bi-been nɛ.

⁴⁵Al pùorí, ʋ tɩ lɛb'a wa a ʋ po-tuurbɛ zie wa yel bɛ: «Nyɩ cãà na gúre, ɛ́ ɓãá ƴãw pɩ̃ɛnɛ ɛ? A tɛm ʋl bɛ na na nyɔw a Nɩsaal Bie ƴãw a yel-bebe dem nuru pʋɔ a ta na.

⁴⁶Nyɩ ìr! Nyɩ ɩ tɩ cen! A ɩ̃ mɩlɛ n'ɩ ŋan ta.»

⁴⁷A Yeezu tɩ cãà na ƴɛ̀rɛ, ɛ́ a Zuda na ɩ a Pie-nɩ-ayi ƴen sob a, wa ta ʋlɛ nɩ nɩ-yaga yaga na tɛr zɛbr-sɔ-bɛrɛ nɩ dabɔlɛ a. A bàwr-maal-nɩ-bɛrɛ nɩ a Zifʋ nɩbɛ nɩ-kore nɛbɛ tɩ tõ bɛ.

⁴⁸A ʋ mɩlɛ Zuda tɩ kʋ̀ bɛ nɩ bãwfʋ ŋa: «A sob nɛ ɩ̃ na na nyɔw weri a, ʋlɛ n'ʋ, nyɩ nyɔw ʋ.»

⁴⁹Daadaalɛ, ʋ tɩ taw na ta a Yeezu zie yel ʋ: «Wul-wul-kara a, fʋ yãanɩ!» Ɛ́ nyɔw ʋ weri.

⁵⁰A Yeezu tɩ yel ʋ na: «Ɩ̃ bá a, a ʋlɩ bom nɛ ƴãw fʋ na wa a, ɩ ʋ fɔ̃w.» Lɛ n'a a nɩbɛ tɩ taw ta nyɔw a Yeezu.

⁵¹A nɩbɛ bɛl na tɩ be a Yeezu zie a, a bɛ kãw tɩ nyɔw nɩ a ʋ zɛbr-sɔ-kpɛ̃ɛ vʋ̃ɔ cɛ n a bàwr-maal-kara tõ-tõ-bie kãw, cɛ a tobr ɓɛl.

⁵²A lɛ n'a a Yeezu tɩ yel ʋ: «Lɛb su a fʋ zɛbr-sɔ-kpɛ̃ɛ a ʋ kpar pʋɔ, bɛlɩ dem za na dier a zɛbr-sɔ-kpɛ̃ɛ a bɛ taabɛ ƴãw a, a zɛbr-sɔ-kpɛ̃ɛ kũu n'a bɛ mɩ̀ na kpi.

⁵³Fʋ tɩɛr k'ɩ̃ɩ kʋ̃ʋ tʋ̃ɔ́ zɛlɩ a ɩ̃ Sãà ʋ kʋ̀ m malkɩ yaga yaga daadaalɛ bɩɩ?

⁵⁴Ɛcɛ ŋmɩŋmɩn n'a a Sɛb-sõw ƴɛ̀r-bie nãá tɩ tu? A yel'a k'aa ŋa n'a a fɛr k'aa yele tu.»

⁵⁵A ʋlɩ tɛm nɛ pʋɔ, a Yeezu tɩ yel'ɩ a nɩbɛ: «Nyɩ wa n nɩ zɛbr-sɔ-bɛrɛ nɩ dabɔlɛ kɛ́ nyɩ wa nyɔw nɩ mɛ̃, mɛ̃ nyãnyu-nɩ-kʋrɛ a, ɛ́ bibir za ɩ̃ mɩ́ tɩ be a Ŋmɩn-yir-kpɛ̃ɛ pʋɔ zɩ̃ kanɛ nɩ a nɩbɛ ɛ́ nyɩ bɛ nyɔw mɛ̃ ɩ.

⁵⁶Ɛcɛ à á ŋá za ɩ na, k'aa naaŋmɩn-ƴɛ̀r-manbɛ ƴɛ̀r-bie na be a Sɛb-sõw pʋɔ a, tʋ̃ɔ́ tu.» Lɛ n'a a ʋ po-tuurbɛ za tɩ zawr'ʋ bɛr ɛ́ zɔ.

⁵⁷A bɛl na tɩ nyɔw a Yeezu a tɩ tɛr ʋ na cen nɩ a bàwr-maal-kara Kayifʋ yir. Be n'a a Naaŋmɩn wulu sɛ-sɛbrbɛ nɩ a Zifʋ nɩbɛ nɩ-kore tɩ ɓã taa.

⁵⁸A Pɩɛr ʋl tɩ zãá na ɛ́ tuur a Yeezu, tɩ kpɛ a bàwr-maal-kara yir. Ʋ tɩ lãwnɩ nɩ a tõ-tõ-biir zɩ̃ jɩ́rɛ a lɛ a yele na na baar'a.

⁵⁹Zɩ̃ kɛ́ a bàwr-maal-nɩ-bɛrɛ nɩ a Zifʋ mɩnɛ ƴɛ̀rʋ-dɩb-lãw nɩbɛ za tɩ bɔbr'ɩ dãsɩ-ziri a Yeezu ƴãw, na na ɩ bɛ ƴãw ʋ kũu dɔwrʋ a.

⁶⁰Bɛ bɛ tɩ nyɛ̃ ʋ ɛ, dãsɩ-ziri dem yaga na saa tɩ ìr ƴɛ̀r a. Nɩbɛ ayi kãw wa bɩɛr'a ìr

⁶¹yel: «A nɩr ŋa tɩ yel'a: “Ɩ̃ na tʋ̃ɔ́ na ŋmɛr a Ŋmɩn-yir-kpɛ̃ɛ bɛr ɛ́ lɛb mɛ ʋ bibie ata.”»

⁶²A bàwr-maal-kara tɩ ìr'a àr ɛ́ sowri a Yeezu: «Fʋ bɛ tɛr sɔwfʋ za a yele á ŋá bɛ na manɛ dɔwlɛ a fʋ zu a ƴãw bɩɩ?»

⁶³Ɛcɛ a Yeezu tɩ ɩ n gbili. A bàwr-maal-kara tɩ yel ʋ na: «Ɩ̃ zɛlɛ fʋ na, a Naaŋmɩn na vʋʋrɛ a yúor ƴãw, kɛ́ fʋ pɔ yel kʋ̀ tɩ: fʋ̃ʋ n'ɩ a Nɩ-kabra a, a Naaŋmɩn Bie e?»

⁶⁴A Yeezu tɩ sɔw na yel ʋ: «Fʋ̃ʋ n'ʋ yel a lɛ. Ɛcɛ ɩ̃ yere na kʋ̀rɛ nyɩ, dɩ̃a na ta a, nyɩ na nyɛ̃ nɩ a Nɩsaal Bie ʋ zɩ̃ a Kpɛnʋ-za-sob dʋrʋ lowr, ɛ́ be a zũzuge zu waar.»

⁶⁵Lɛ n'a a bàwr-maal-kara tɩ taw a ʋ bʋ̃-suuri cɩɛrɩ[63], ɛ́ yel: «Ʋ tʋ n Naaŋmɩn! Bʋnʋ ƴãw n'a tɩ cãà bɔbr dãsɩɛ dem? Nyɩ za nyɩ wõ n a zʋ́m ʋ na tʋ a Naaŋmɩn a ƴɛrɛŋa a.

⁶⁶Nyɩ tɩɛr'ɩ ŋmɩn?» Bɛ sɔw: «Ʋ sɛwnɩ nɩ kũu.»

⁶⁷Lɛ n'a bɛ tɩ pʋʋrɩ mʋtaar waar'ʋ a niwn ɛ́ pɔb pɔb ʋ, bɛ mɩnɛ mɩ́ tɩ ɓa ʋ na

⁶⁸ɛ́ yel: «Bãw naaŋmɩn-ƴɛ̀r-manɛ bãwfʋ kʋ̀ tɩ, Nɩ-kabra a, ãa n'ʋ ŋmɛ b?»

⁶⁹A Pɩɛr tɩ zɩ̃ n a yẽw a davʋra pʋɔ. Tõ-tõ-bi-pɔw kãw tɩ taw na pɩɛl'ʋ yel ʋ: «A fʋ̃ʋ mɩ̀, fʋ mɩ̀ tɩ tuur'ɩ a Galile tẽw Yeezu.»

⁷⁰Ɛcɛ a Pɩɛr tɩ ciir'ɩ a nɩbɛ za niŋé, ɛ́ yel: «Ɩ̃ bɛ bãw ʋlɩ bom nɛ fʋ na bɔbr kɛ́ fʋ yel a ɩ.»

⁷¹Ʋ na tɩ cere a davʋra dɩ̃dɔr nʋɔr a, tõ-tõ-bi-pɔw ƴen sob tɩ nyɛ̃ ʋ na, ɛ́ yel kʋ̀ a bɛlɩ dem na tɩ be a be a: «A sob ŋa tɩ tuur'ɩ a Nazarɛtɩ tẽw Yeezu.»

⁷²A Pɩɛr tɩ lɛb maal ciiri, ɛ́ pɔ yel: «Ɩ̃ bɛ bãw a nɩr ŋa ɩ!»

⁷³Blã na wa pʋɔ a, a bɛlɩ dem na tɩ be a be a tɩ taw na ta a Pɩɛr zie yel ʋ: «Bʋnʋ bɛ ka be ɩ, fʋ mɩ̀ ɩ n a bɛ ƴen sob, a sãá nɩ a fʋ ƴɛ̀rʋ pʋɔ.»

⁷⁴Lɛ n'a a Pɩɛr tɩ tĩ ŋmɩɛr ƴãwn ʋ tʋɔra, pɔrɛ nɩ Naaŋmɩn yere nɩ: «Ɩ̃ bɛ bãw a nɩr ŋa ɩ!» Daadaalɛ nʋra tɩ kõ na.

⁷⁵A Pɩɛr tɩ lɛb'a tɩɛrɩ bãwnɩ a ƴɛ̀rʋ ŋa a Yeezu na tɩ ƴɛ̀r kʋ̀ ʋ a: «Nʋra kʋ̃ kõ sɛr ɛ, ɛ́ fʋ ciiri gb'a ata kɛ́ fʋ bɛ bãw mɛ̃ ɩ.» Ʋ tɩ yi na tɩ kõ cir mʋta-zɩ̃ɩ.