Read Dagara, Northern Matie 27 Bible Online

Matie 27 - Dagara, Northern bible

Matie 27

¹A biɓaar-pipi, a bàwr-maal-nɩ-bɛrɛ za nɩ a Zifʋ nɩbɛ nɩ-kore tɩ bʋ n taa a Yeezu ƴãw, kɛ́ bɛ tʋ̃ɔ́ ƴãw bɛ kʋ ʋ.

²Al pùorí, bɛ tɩ nyɔw nɩ a Yeezu 'lẽ cen nɩ tɩ ƴãw a Ʋrɔm tẽw na-kpɛ̃ɛ-lɩɛrɛ Pɩlatɩ nuru pʋɔ.

³A Yeezu mɩlɛ Zuda, na wa nyɛ̃ bɛ na kʋ a Yeezu a, a ʋ socir tɩ zɛbr'ɩ ʋ na. Ʋ tɩ lɛb'a cen nɩ a salm-zɩɛ libie lɩzɛr'ɩ pie al tɩ kʋ̀ a bàwr-maal-nɩ-bɛrɛ nɩ a Zifʋ nɩbɛ nɩ-kore,

⁴ɛ́ yel: «Ɩ̃ maal'ɩ yel-bier, ɩ̃ na nyɔw nɩr na bɛ sãw bom za a, kʋ̀ nyɩ a.» Ɛcɛ bɛ tɩ yel ʋ na: «A bɛ jɩ́rɛ tɩ ɛ! Fʋ yele n'a!»

⁵A Zuda tɩ lɔb'ɩ a libie bɛr a Ŋmɩn-yir-kpɛ̃ɛ pʋɔ ɛ́ cen tɩ kpɛ kɔ̃tɔ̃-suwle.

⁶A bàwr-maal-nɩ-bɛrɛ tɩ wob'ɩ a libie ɛ́ yel: «A bɛ sɛw k'aa libie á ŋá kpɛ a Ŋmɩn-yir-kpɛ̃ɛ libie daga pʋɔ ɩ, nɩr zɩ̃ɩ libie na faa n'a a.»

⁷Bɛ na wa wõ taa baar'a, bɛ de a na da n a yawr-mɩɛrɛ púo a nɩ-sãanbɛ ũufʋ ƴãw.

⁸Alɛ n'a so, wa tɩ tɔ a dɩ̃a, bɛ cãà bʋɔlɛ a púo ŋa kɛ́: «Zɩ̃ɩ púo.»

⁹A lɛ n'a, a ƴɛ̀r-bie á ŋá a naaŋmɩn-ƴɛ̀r-manɛ Zeremi na tɩ ƴɛ̀r a tu: «Bɛ de nɩ a salm-zɩɛ libie lɩzɛr'ɩ pie al, a nɩr ʋl dàarʋ libie nʋɔr a, a nɩr ʋl dàarʋ a Ɩsɩrayɛl biir na tɩ sɔ́r a ɩ a.

¹⁰Bɛ de a na dà n a yawr-mɩɛrɛ púo, mɛ̃ a lɛ a Sore na tɩ yel kʋ̀ m a[64].»

¹¹A Yeezu tɩ àr'ɩ a Ʋrɔm tẽw na-kpɛ̃ɛ-lɩɛrɛ niŋé a ƴɛ̀rʋ-dɩb ƴãw, ʋ sowr'ʋ: «Fʋ̃ʋ n'ɩ a Zifʋ mɩnɛ nãà bɩɩ?» A Yeezu tɩ sɔw na: «Fʋ̃ʋ n'ʋ yere a lɛ!»

¹²A bàwr-maal-nɩ-bɛrɛ nɩ a Zifʋ nɩbɛ nɩ-kore na tɩ manɛ a Yeezu sãwna a, ʋ bɛ tɩ háa nʋɔr sɔw towtow ɛ.

¹³Lɛ n'a a Pɩlatɩ tɩ sowr'ʋ: «Fʋ bɛ wone a sãwna á ŋá bɛ na manɛ dɔwlɛ a fʋ zu sɛw a ɩ?»

¹⁴Ɛcɛ a Yeezu bɛ tɩ sɔw a ƴɛ̀rʋ been kãw za ɩ, kɛ̀ nʋɔr tɩ ɓãá a Ʋrɔm tẽw na-kpɛ̃ɛ-lɩɛrɛ yaga za.

¹⁵A Tɔl-gãw cuw za daar, a Ʋrɔm tẽw na-kpɛ̃ɛ-lɩɛrɛ mɩ́ tɩ yuo nɩ nɩ-pàwra kãw bɛr, a sob nɛ a zu-sɛbla na mɩ́ zɛlɩ k'ʋʋ yuo bɛr a.

¹⁶Nɩr na ta ʋl a, tɩ be n a gaso pʋɔ bɛ bʋɔlɛ Yeezu Barabasɩ.

¹⁷A Pɩlatɩ tɩ sowr'ɩ a zu-sɛbla na tɩ ɓã taa a: «Ãa n'ʋ nyɩ bɔbr k'ɩ̃ɩ yuo bɛr: a Yeezu Barabasɩ n'ʋ bɩɩ a Yeezu bɛ na bʋɔlɛ a Nɩ-kabra a?»

¹⁸Ʋ tɩ bãwnɩ a na nyuur ƴãw na n'a bɛ nyɔw a Yeezu wa n a ʋ zie a.

¹⁹A Pɩlatɩ na tɩ zɩ̃ a ƴɛ̀rʋ-dɩb zie a, a ʋ pɔw tɩ tõ na bɛ tɩ yel ʋ: «Taa tone nũu a nɩ-mɩŋa ŋa yele pʋɔ ɩ. Ɩ̃ wõ n tuo yaga zánʋ pʋɔ a dɩ̃a a ʋ ƴãw.»

²⁰A bàwr-maal-nɩ-bɛrɛ nɩ a Zifʋ nɩbɛ nɩ-kore tɩ dɔ n a zu-sɛbla ƴãw kɛ́ bɛ zɛlɩ bɛ yuo a Barabasɩ bɛr ɛ́ kʋ a Yeezu.

²¹A na-kpɛ̃ɛ-lɩɛrɛ tɩ lɛb'a de a ƴɛ̀rʋ sowri bɛ: «A bɛ ayi pʋɔ a, buor sob'ʋ nyɩ bɔbr k'ɩ̃ɩ lɛb bɛr?» Bɛ tɩ sɔw na: «Barabasɩ!»

²²A Pɩlatɩ tɩ lɛb'a sowri bɛ: «Ɛ́ a Yeezu bɛ na bʋɔlɛ Nɩ-kabra a, ɩ̃ na ɩ ʋ nɩ ŋmɩn?» Bɛ za tɩ sɔw na yel: «Kpa ʋ da-gara zu!»

²³Ʋ lɛb sowri bɛ: «Bʋ̃ʋ n'ʋ ʋ sãw?» Bɛ lɛb bãw cɩɩrɛ kpɛ̃w za yere nɩ: «Kpa ʋ da-gara zu!»

²⁴A Pɩlatɩ na tɩ nyɛ̃ ʋ bàlɛ ʋ tʋɔra zawlalɛ, ɛcɛ a damnʋ nɩ̃ɛ lɛb tɩ bãw zuore a, ʋ tɩ de nɩ kʋ̃ɔ pɛ́w a ʋ nuru a nɩbɛ za niŋé ɛ́ yel: «Ɩ̃ za n'ɩ ŋa, ɩ̃ bɛ pʋɔ a nɩ-mɩŋa ŋa kũu yele pʋɔ ɩ. Nyɩ yele n'a.»

²⁵A zu-sɛbla za tɩ sɔw na yel: «A yele a ʋ kũu na na wa n a, a lɛb lo a tɩɩm nɩ a tɩ bibiir zu!»

²⁶A lɛ n'a ʋ tɩ yuo a Barabasɩ kʋ̀ bɛ ɛ́ ƴãw bɛ fɔb a Yeezu, ʋʋ pãa de ʋ kʋ̀ bɛ kɛ́ bɛ tɩ kpa a da-gara zu.

²⁷A Pɩlatɩ sojarɩ tɩ tɛr'ɩ a Yeezu kpɛ n a Pɩlatɩ yir, tɩ bʋɔlɩ a bɛ taabɛ za bɛ wa ŋmãa viiri koli a Yeezu.

²⁸Bɛ tɩ yaar'ɩ a ʋ bʋ̃-suuri bɛr ɛ́ de kpar-kpɛ̃ɛ zɩ̃ɛ su ʋ,

²⁹ɛ́ wob gʋʋr kpawʋɔ vɔblɩ ʋ, ɛ́ ƴãw ʋ bàa-kɛkɛr[65]a dʋrʋ nũú, ɛ́ mɩ́ gbĩ dume a ʋ niŋé ɩrɛ ʋ laar yere nɩ: «Zifʋ mɩnɛ nãà a, fʋ yãanɩ!»

³⁰Bɛ tɩ pʋʋrɛ nɩ mʋtaar waarɛ ʋ, ɛ́ mɩ́ de a bàa-kɛkɛr va n a ʋ zũú.

³¹Bɛ na wa ɩ ʋ la baar'a, bɛ yaa nɩ a kpar-kpɛ̃ɛ ʋl bɛr ʋ, ɛ́ lɛb su ʋ a ʋ bʋ̃-suuri. Al pùorí, bɛ tɩ tɛr ʋ na cen nɩ kɛ́ bɛ tɩ kpa ʋ a da-gara zu.

³²Bɛ na tɩ yire a tẽw pʋɔ a, bɛ nyɛ̃ nɩ Sɩɩrɛn tẽw dɛb kãw bɛ na bʋɔlɛ kɛ́ Sɩmʋ̃ a. Bɛ tɩ fɛr ʋ na ƴãw ʋ tuo a Yeezu da-gara.

³³Bɛ na wa ta a zie nɛ bɛ na bʋɔlɛ kɛ́ Gɔlgɔta a, a pɛr lɛ kɛ́ Zuŋman zie a,

³⁴bɛ de nɩ kalɩ̃kaar ƴãw dãa pʋɔ kʋ̀ a Yeezu k'ʋʋ nyũ. Ʋ tɩ lɛm'a kaa ɛ́ zawrɩ a nyub.

³⁵Bɛ na wa kpa ʋ a da-gara zu baar'a, bɛ ŋmɛ n gbãw põ a ʋ bʋ̃-suuri.

³⁶Al pùorí, bɛ tɩ zɩ̃ n a be gù ʋ.

³⁷Bɛ tɩ sɛb'ɩ a ʋ kũu pɛr mɛr a ʋ zu-sɔw yel: «A sob ŋa n'ɩ a Yeezu, a Zifʋ mɩnɛ nãà.»

³⁸Bɛ tɩ kpa ʋ nɩ a da-gara zu lãwnɩ nyãnyu-nɩ-kʋrbɛ ayi, kãw a ʋ dʋrʋ lowr, ɛ́ kãw a ʋ gʋba lowr.

³⁹A sɔr-tɔlbɛ tɩ tʋʋr ʋ na gɔwrɛ nɩ zu,

⁴⁰yere nɩ: «Fʋ̃ʋ na n'ʋ ŋmɛrɛ a Ŋmɩn-yir-kpɛ̃ɛ ɛ́ lɛb mɩɛr ʋ bibie ata a, faa fʋ tʋɔra fʋ̃ʋ wa sɩrɩ ɩ a Naaŋmɩn Bie a, siw a da-gara zu!»

⁴¹A Naaŋmɩn wulu sɛ-sɛbrbɛ nɩ a Zifʋ nɩbɛ nɩ-kore nɩ a bàwr-maal-nɩ-bɛrɛ mɩ̀ tɩ ɩrɛ ʋ na laar yere nɩ:

⁴²«Ʋ faa nɩ bɛ mɩnɛ ɛ́ kʋ̃ tʋ̃ɔ́ faa ʋ tʋɔra ɩ! Ʋ ɩ n a Ɩsɩrayɛl nãà, ʋ siw a da-gara zu ƴɛrɛŋa, ɛ́ tɩ na sàw na de a ʋ yele!

⁴³Ʋ ƴãw nɩ a ʋ tɩɛrʋ a Naaŋmɩn ƴãw, a Naaŋmɩn ʋ faa ʋ a ƴɛrɛŋa, ʋlɛ wa nɔnɛ ʋ a. Ʋ yel'a: “Ɩ̃ ɩ n Naaŋmɩn Bie!”»

⁴⁴A nyãnyu-nɩ-kʋrbɛ bɛl, bɛ na tɩ kpa a da-gara zu a, mɩ̀ tɩ tʋʋr ʋ nɩ a lɛ.

⁴⁵A mʋ̃tɔ̃w na wa do põ-zɛ̃-taa a, lige pàw nɩ a tẽ-daa za tɩ ta n a mʋ̃tɔ̃w gɔ̃wfʋ daar.

⁴⁶A mʋ̃tɔ̃w gɔ̃wfʋ daar, a Yeezu tɩ kõ na cɩɩrɩ yel: «Eli, Eli, lama sabaktani», a pɛr lɛ kɛ́: «Ɩ̃ Naaŋmɩn i, ɩ̃ Naaŋmɩn i, bʋ̃ʋ n'ʋ so fʋ zawrɩ mɛ̃ bɛr?[66]»

⁴⁷A nɩbɛ na tɩ àr a be a, bɛ mɩnɛ tɩ wõ a na ɛ́ yel: «Ʋlɛ n'ɩ ŋan bʋɔlɛ Eli.»

⁴⁸Daadaalɛ, a bɛ kãw tɩ zɔ na cen tɩ 'lɔr sapɔ dã-miiru pʋɔ, cɔ̀r ƴãw bàa-kɛkɛr ƴãw tur ʋ k'ʋʋ nyũ.

⁴⁹A ŋmaarɛ bɛl tɩ yere na: «Nyɩ vɛ̃ a Eli wa faa ʋ tɩ nyɛ̃!»

⁵⁰Ɛcɛ a Yeezu tɩ lɛb'a cɩɩrɩ kpɛ̃w za, ɛ́ ŋmãa vʋʋrʋ.

⁵¹A Ŋmɩn-yir-kpɛ̃ɛ pʋɔ pɛn-yawla[67] tɩ tĩ nɩ a saa-zu ɛ́ ɓar ziir ayi siw tɩ tɔ a pɛrɩ́. A tẽsɔw kɔbr tɩ dam'a, a pìe pure yaarɛ,

⁵²a yarʋ yuori, ɛ́ nɩ-mɩn yaga na tɩ kpi a, ƴã-gamɛ lɛb yi a kũu pʋɔ.

⁵³Bɛ tɩ yi n a yarʋ pʋɔ, a Yeezu kũu-pʋɔ-lɛb-yibu pùorí, kpɛ a tẽ-sõw Zerizalɛm pʋɔ tɩ wul bɛ tʋɔra nɩ-yaga.

⁵⁴A sojarɩ kʋba nɩ-kpɛ̃ɛ nɩ a sojarɩ bɛl na tɩ gù a Yeezu a na wa nyɛ̃ a tẽsɔw kɔbr damnʋ nɩ a yele á ŋá a, dɛ̃bɩ̃ɛ tɛr bɛ nɩ yaga ɛ̀ bɛ yere: «Sɩza n'a, a sob ŋa tɩ ɩ n Naaŋmɩn Bie.»

⁵⁵Pɔwbɛ yaga tɩ àr'a zãá ɛ́ jɩ́rɛ: Galile tẽw n'a bɛ tɩ tĩ tuur a Yeezu ɛ́ kaarɛ a ʋ zie.

⁵⁶Madala tẽw Marya, nɩ Zakɩ nɩ Zuzɛb mã Marya, nɩ Zebede bibiir mã tɩ pʋɔ nɩ a pɔwbɛ bɛ ŋa pʋɔ.

⁵⁷Zaanʋɔra na wa ta a, nũ-kpɛ̃w sob kãw, na yi Arimate tẽw bɛ bʋɔlɛ Zuzɛb a, tɩ wa na. Ʋ mɩ̀ tɩ ɩ n a Yeezu po-tuure kãw.

⁵⁸Ʋ tɩ cen na tɩ páw a Pɩlatɩ zɛlɩ a Yeezu ƴã-gan. A Pɩlatɩ tɩ ƴãw na bɛ kʋ̀ ʋ.

⁵⁹A Zuzɛb tɩ de nɩ a Yeezu ƴã-gan, de pɛn vla pili nɩ,

⁶⁰ɛ́ cen nɩ tɩ ƴãw bɔw paala pʋɔ ʋ na tɩ ƴãw bɛ tuw pìir pʋɔ a ʋl mɩŋa ƴãw a, ɛ́ bili kʋsɛ-kpɛ̃ɛ pàw a bɔw nʋɔr ɛ́ kul.

⁶¹A Madala tẽw Marya nɩ a Marya ŋa sob tɩ be n be, zɩ̃ tori a bɔw.

⁶²A bio daarɩ́ na ɩ a Zifʋ mɩnɛ pɩ̃ɛnʋ-bibir cɔbrʋ a, a bàwr-maal-nɩ-bɛrɛ nɩ a Faarizɩ̃ɛ mɩnɛ tɩ cen na tɩ páw a Pɩlatɩ

⁶³yel ʋ: «Sore e, tɩ lɛb'a bãwnɩ kɛ́ a zir-ŋmarɛ ŋa na tɩ cãà vʋʋrɛ a, tɩ yel'a: “A bibie ata pùorí, ɩ̃ na lɛb'a yi a kũu pʋɔ.”

⁶⁴Ƴãw bɛ cen tɩ gù a yaa tɩ ta n a bibie ata, a ʋ po-tuurbɛ taa wa mab zu a ʋ ƴã-gan ɛ́ yel kʋ̀ a nɩbɛ: “Ʋ lɛb'a yi a kũu pʋɔ.” A zir-pɛ-baara ŋa pãa na ɩ n faa zuo a dãw-niwn sob.»

⁶⁵A Pɩlatɩ tɩ sɔw na yel bɛ: «Nyɩ nyɛ̃ sojarɩ a yaa gub ƴãw, nyɩ cen tɩ gù n a yaa mɛ̃ a lɛ nyɩ na bɔbr a.»

⁶⁶Bɛ tɩ cen na tɩ cɔbrɩ a yaa gub, kpàr a yaa nʋɔr kʋsɩɛr ɛ́ ƴãw nɩbɛ gù.