Read Dagara, Northern Matie 28 Bible Online

Matie 28 - Dagara, Northern bible

Matie 28

¹A pɩ̃ɛnʋ-bibir na wa tɔl baar'a, a kɔsɩɛra bibir biɓaar-sɛ̃w, a Madala tẽw Marya nɩ a Marya ŋa sob tɩ wa na kɛ́ bɛ wa nyɛ̃ a yaa.

²Bɛ wa bere na a tẽsɔw kɔbr dam yaga za. Sore malkɩ tɩ yi n salom zu siw bili a kʋsɩɛr bɛr ɛ́ do zɩ̃ a ʋ zu.

³Ʋ tɩ ŋmɛ̃ na mɛ̃ saa-nyɩwrʋ a, ɛ́ a bʋ̃-suuri pɛlɩ mɛ̃ cuw a.

⁴Dɛ̃bɩ̃ɛ tɩ nyɔw nɩ a yaa gùrbɛ bɛ màwr, ɛ́ wa ɩ mɛ̃ bɛ kpi na a.

⁵A malkɩ tɩ de nɩ a ƴɛ̀rʋ yel a pɔwbɛ: «A nyɩɩm, nyɩ ta zɔrɛ dɛ̃bɩ̃ɛ ɩ. Ɩ̃ bãwnɩ a na, a Yeezu bɛ na kpa a da-gara zu a n'ʋ nyɩ bɔbr.

⁶Ʋ bɛ be ka ɩ, ʋ lɛb'a yi a kũu pʋɔ mɛ̃ a lɛ ʋ na tɩ yel a, nyɩ wa nyɛ̃ a be ʋ na tɩ gã a,

⁷ɛ́ cen fɔ̃w tɩ yel a ʋ po-tuurbɛ: “Ʋ lɛb'a yi a kũu pʋɔ, ɛ́ cɛlɛ nyɩ a Galile tẽw, be n'a nyɩ na nyɛ̃ ʋ.” Ɩ̃ yel'a kʋ̀ nyɩ baarɩ.»

⁸Bɛ tɩ yi n a yaa pɛr fɔ̃w fɔ̃wlɛ, ɛ́ dɛ̃bɩ̃ɛ lãwnɩ nʋ̃ɔ̀ za ɩrɛ bɛ yaga za, bɛ zɔ cen tɩ yel kʋ̀ a ʋ po-tuurbɛ.

⁹Bɛ wa bere na a Yeezu tuori bɛ yel bɛ: «Nyɩ yãanɩ!» Bɛ tɩ taw na ta lo gbĩ dume nyɔw a ʋ gbɛ́ɛ, ɛ́ puor'ʋ nɩ bɛ tʋɔra-siwru.

¹⁰Lɛ n'a a Yeezu tɩ yel bɛ: «Nyɩ ta zɔrɛ dɛ̃bɩ̃ɛ ɩ, nyɩ cen tɩ yel a ɩ̃ yɛbr kɛ́ bɛ cen a Galile tẽw: be n'a bɛ na tɩ nyɛ̃ m.»

¹¹A pɔwbɛ na tɩ cãà be a sɔ́r zu a, sojarɩ bɛ mɩnɛ na tɩ pʋɔ a yaa gùrbɛ pʋɔ a, tɩ wa n a tẽw pʋɔ wa manɩ a yele za na ɩ a, kʋ̀ a bàwr-maal-nɩ-bɛrɛ.

¹²A bàwr-maal-nɩ-bɛrɛ nɩ a Zifʋ nɩbɛ nɩ-kore tɩ ɓã n taa ɛ́ wõ taa, ɛ́ kʋ̀ libi-bɛrʋ a sojarɩ,

¹³ɛ́ kpãa bɛ à ŋá: «Nyɩ mɩ́ yel à ŋá kʋ̀ a nɩbɛ: “A ʋ po-tuurbɛ wa n tɩ̃ɩsɔw tɩ na gúre a, wa zu ɓáw a ʋ ƴã-gan.”

¹⁴Ɛ́ alɛ wa lo a na-kpɛ̃ɛ-lɩɛrɛ tobrí a, tɩ na bãw nɩ lɛ tɩ na na ɩ a ʋ suur ɓãá, ʋ taa wa fɛrɛ nyɩ a.»

¹⁵A sojarɩ tɩ de nɩ a libie ɛ́ tu a lɛ bɛ na yel kʋ̀ bɛ a. À ŋá n'a a yel ŋa ŋmɛ yaarɩ a Zifʋ mɩnɛ sɔgɔ wa tɩ tɔ n dɩ̃a.

¹⁶A po-tuurbɛ pie nɩ been tɩ cen nɩ a Galile tẽw, a tãw ʋl zu a Yeezu na tɩ ƴãw nʋɔr kʋ̀ bɛ kɛ́ bɛ cen a.

¹⁷Bɛ na wa nyɛ̃ ʋ a, bɛ lo na gbĩ dume puor'ʋ nɩ bɛ tʋɔra-siwru, ɛcɛ bɛ mɩnɛ tɩ cãà na bʋ́nɛ.

¹⁸A Yeezu tɩ taw na pɩɛlɩ bɛ ɛ́ ƴɛ̀r a bɛ zie à ŋá: «Naaŋmɩn kʋ̀ m'ɩ fãw za a salom zu nɩ a tẽw zu.

¹⁹A na ɩ lɛ a, nyɩ cen tɩ ɩ a nɩ-bʋʋrɛ za bɛ lɩɛbɩ a ɩ̃ po-tuurbɛ, nyɩ kʋ̀rɛ bɛ a suob a Sãà nɩ a Bie nɩ a Vʋʋrʋ Sõw yúor ƴãw,

²⁰ɛ́ zànɩ nɩ bɛ bɛ tuur a al za ɩ̃ na ƴãw nʋɔr kʋ̀ nyɩ a. Ɛ́ mãa a, ɩ̃ be n a nyɩ zie bibie za na tɩ ta n a tẽw baarʋ daar.»