Read Dagara, Northern Matie 4 Bible Online

Matie 4 - Dagara, Northern bible

Matie 4

¹Al pùorí, a Naaŋmɩn Vʋʋrʋ tɩ tɛr'ɩ a Yeezu cen nɩ a wɛja-kpalɛ pʋɔ, k'aa Gɛgɛra tɩ bɛlɩ ʋ.

²Ʋ na tɩ tɛr a mʋta-tuo bibie lɩz'a ayi nɩ tɩ̃ɩsɔwr lɩz'a ayi a, kɔ̃ wa tɩ kpɛ ʋ na.

³Lɛ n'a a bɛlbɛlɛ tɩ taw ta yel ʋ: «Fʋ̃ʋ wa ɩ a Naaŋmɩn Bie a, fʋ̃ʋ ƴãw a kʋsɛbɛ á ŋá lɩɛbɩ bʋ̃-dɩrɩ[6].»

⁴Ɛcɛ a Yeezu tɩ sɔw na: «Bɛ sɛb'ɩ à ŋá: “Bʋ̃-dɩrɩ tɛwr bɛ n'a guole a nɩsaal ɛ, ƴɛ̀rʋ za na yire a Naaŋmɩn nʋɔrɩ́ a, mɩ̀ guole ʋ na[7].”»

⁵Lɛ n'a a Gɛgɛra tɩ tɛr ʋ cen nɩ a Zerizalɛm na ɩ a tẽ-sõw a pʋɔ, tɩ tɛr ʋ do n a Ŋmɩn-yir-kpɛ̃ɛ nyʋɔrɩ́ za,

⁶ɛ́ yel ʋ: «Fʋ̃ʋ wa ɩ a Naaŋmɩn Bie a, fʋ̃ʋ ƴaw tɩ lo a tẽsɔw. Bɛ sɛb a: “A Naaŋmɩn na ƴãw na malkɩ mɩnɛ ɓaabɩ fʋ a bɛ nuru pʋɔ, a fʋ gbɛ́r taa wa ŋmɩɛr kʋsɩɛr ɛ[8].”»

⁷A Yeezu tɩ sɔw na: «Bɛ mɩ̀ cãà na sɛb: “Fʋ kʋ̃ ɩ a Sore fʋ Naaŋmɩn kaa ɩ[9].”»

⁸A Gɛgɛra tɩ lɛb'a tɛr ʋ do n tã-kpɛ̃ɛ kpɛ̃ɛ kãw zu, tɩ wul ʋ a tẽ-daa na-mɩnɛ ten za nɩ a vɩɛlʋ

⁹ɛ́ yel ʋ: «Fʋ̃ʋ wa lo gbĩ dume puori mɛ̃ nɩ fʋ tʋɔra-siwru a, ɩ̃ na kʋ̀ b'ɩ à á ŋá za.»

¹⁰Lɛ n'a a Yeezu yel ʋ: «Cen taw zaa, Sɩtaana a! Bɛ sɛb'a: “A Sore fʋ Naaŋmɩn yõ n'ʋ fʋ na mɩ́ lo gbĩ dume puori nɩ fʋ tʋɔra-siwru, ʋl yõ n'ʋ fʋ na maalɛ[10].”»

¹¹Lɛ n'a a Gɛgɛra tɩ bɛr ʋ, ɛ́ malkɩ mɩnɛ taw ta kaarɛ a ʋ zie nɩ bʋ̃-dɩrɩ.

¹²A Yeezu na tɩ wõ kɛ́ bɛ nyɔw nɩ a Zã pàw a, ʋ tɩ cen nɩ a Galile tẽw.

¹³Ʋ tɩ yi n a Nazarɛtɩ, ɛ́ cen tɩ kpɩɛr Kafarnawɔm, a Galile kʋ̃ɔ-kpɛ̃ɛ nʋɔr, a Zabulɔ̃ nɩ a Nɛfɩtali ten vuo pʋɔ,

¹⁴k'aa yele tʋ̃ɔ́ tu mɛ̃ à à ŋá a naaŋmɩn-ƴɛ̀r-manɛ Ɩzayi na tɩ yel a:

¹⁵«Zabulɔ̃ tẽw nɩ Nɛfɩtali tẽw na be a kʋ̃ɔ-kpɛ̃ɛ lowr a, a Zurdɛ̃ man gãwn a, nɩ-bʋʋr-yoru tẽw Galile e!

¹⁶A nɩ-bʋʋrɛ bɛl na tɩ be lige pʋɔ a, nyɛ̃ nɩ cãà kpɛ̃ɛ. Cãà caal'ɩ a bɛl na tɩ be a kũu tẽ-lige pʋɔ a[11].»

¹⁷Lɛ n'a a Yeezu tɩ tĩ hiere yere: «Nyɩ lɩɛbɩ a nyɩ ɩb, a tẽ-vla Naalʋ pɩɛl'a.»

¹⁸A Yeezu na tɩ cere lanɛ a Galile kʋ̃ɔ-kpɛ̃ɛ a, ʋ nyɛ̃ nɩ yɛbr ayi, Sɩmʋ̃ bɛ na bʋɔlɛ Pɩɛr a, nɩ a ʋ yɛb Ãdere bɛ lɔbr mɩ̃ɛ a kʋ̃ɔ-kpɛ̃ɛ pʋɔ, zʋm-nyɔwrbɛ tɩ nɛbɛ.

¹⁹Ʋ tɩ yel bɛ na: «Nyɩ wa tuur mɛ̃, ɩ̃ɩ na ɩ na nyɩ lɩɛbɩ nɩ-nyɔwrbɛ[12].»

²⁰Daadaalɛ, bɛ tɩ bɛr'ɩ a bɛ mɩ̃ɛnɩ ɛ́ tu ʋ.

²¹Ʋ tɩ cen na tɔl blã, lɛb nyɛ̃ yɛbr ayi bɛ mɩnɛ, Zebede bidɛbr, Zakɩ nɩ Zã, bɛlɛ nɩ a bɛ sãà Zebede bɛ be a gbor pʋɔ maalɛ a bɛ mɩ̃ɛnɩ ƴãwn. Ʋ tɩ bʋɔlɩ bɛ na.

²²Daadaalɛ, bɛ tɩ bɛr'ɩ a bɛ gbor nɩ a bɛ sãà ɛ́ tu ʋ.

²³A Yeezu tɩ cɔlɛ nɩ a Galile tẽw za kanɛ nɩ a nɩbɛ a puoru-dirú, hiere nɩ a tẽ-vla Naalʋ Yel-nʋ̃ɔ̀, ɛ́ sanɛ bàal-pɛ-bʋʋrɛ za nɩ nɩ-kɔwlʋ bʋʋrɛ za a nɩbɛ zie.

²⁴A ʋ yúor tɩ yi n a Siiri tẽw za, ɛ́ bɛ tɩ tɛr nɩbɛ, bàal-pɛ-bʋʋrɛ za nɩ wʋlɛ bʋʋrɛ za na tɩ fɛrɛ a, wa n a ʋ zie: kɔ̃tɔ̃-ìrbɛ, kũkũ-lorbɛ nɩ gbɛɛ. A Yeezu tɩ sanɩ bɛ na.

²⁵Nɩ-yaga yaga na bɛ dɩ vuo a, tɩ tuur ʋ na. Bɛ tɩ yi n a Galile tẽw, a Dekapol tẽw, a Zerizalɛm tẽw, a Zude tẽw nɩ a Zurdɛ̃ man gãwn tẽw wa.