Read Dagara, Northern Matie 7 Bible Online

Matie 7 - Dagara, Northern bible

Matie 7

¹«Nyɩ taa bãwnɛ nɩr kãw za yele ɩ, ɛ́ a Naaŋmɩn mɩ̀ kʋ̃ bãw a nyɩ dem ɛ.

²A lɛ nyɩ na sɩrɩ bãwnɛ a nyɩ taabɛ yele a, lɛ n'a a Naaŋmɩn mɩ̀ na bãw a nyɩ dem kʋ̀ nyɩ. A bʋ̃-mána ʋl nyɩ na tɛr manɛ nɩ a, ʋlɛ n'ʋ ʋ mɩ̀ na man nɩ kʋ̀ nyɩ.

³Bʋ̃ʋ n'ʋ so fʋ jɩ́rɛ a sawle na be a fʋ yɛb mimirí a, ɛ́ nɩ̃ɛ bɛ nyɛ̃ a wɛw na be a fʋ dem pʋɔ a?

⁴Ŋmɩŋmɩn n'a fʋ na tʋ̃ɔ́ yel a fʋ yɛb: “Ɩ ɩ̃ ír sawle bɛr a fʋ mimirí”, ɛ́ wɛw nɩ̃ɛ be a fʋ dem pʋɔ?

⁵Nɩsaal-libelibe ŋa, ír a wɛw bɛr a fʋ mimirí baarɩ, lɛ n'a fʋ na nyɛrɛ ír a sàwr bɛr a fʋ yɛb mimirí.»

⁶«Nyɩ ta mɩ́ de a bʋ̃-sõw ƴãw baar ɛ, nyɩ mɩ̀ ta mɩ́ lɔb a nyɩ lɛgɛ ƴãw dobaar ɛ, a nãá mab'a nɛb a, ɛ́ lɩɛbɩ a nyɩ ƴãw.»

⁷«Nyɩ mɩ́ zɛlɩ, bɛ na kʋ̀ nyɩ na. Nyɩ mɩ́ bɔbr, nyɩ na páw na. Nyɩ mɩ́ kpàwrɩ a pan, bɛ na yuo nyɩ na.

⁸Sob nɛ za na zɛlɛ a, bɛ mɩ́ kʋ̀ ʋ na, sob nɛ za na mɩ́ bɔbr a, ʋ mɩ́ páw na. Sob nɛ za na kpàwrɛ a pan a, bɛ mɩ́ yuo ʋ na.

⁹A nyɩ buor sob'ʋ, a bie na zɛlɛ dipɛ̃ ʋ de kʋsɩɛr kʋ̀ ʋ?

¹⁰Bɩɩ ʋ na zɛlɛ zʋ́m, ʋ nyɔw waab kʋ̀ ʋ?

¹¹A nyɩɩm na ɩ nɩ-faar a, nyɩmɛ wa bãw bʋ̃-vɩɛlɩ mɩ́ kʋ̀ a nyɩ bibiir a, ŋmɩŋmɩn za n'a a nyɩ Sãà na be a tẽ-vla pʋɔ a, kʋ̃ kʋ̀ bʋ̃-vɩɛlɩ zuo lɛ, a bɛlɩ dem na zɛlɛ ʋ a?

¹²A na ɩ lɛ a, bom nɛ za nyɩ na bɔbr k'aa nɩbɛ ɩrɛ a nyɩ zie a, nyɩ mɩ̀ ɩrɛ a bɛ zie: a Wulu na be a Moyiir wulu sɛbɛ pʋɔ nɩ a naaŋmɩn-ƴɛ̀r-manbɛ sɛbr pʋɔ a n'ɩ à ŋà.»

¹³«Nyɩ tu a dɩ̃dɔ-fɩɩra ƴãw kpɛ. Bʋ̃ʋ n'ʋ vɛ̃, a bɔrʋ dɩ̃dɔr yɛlmɛ na, ɛ́ a ʋ sɔ́r ɩ mɔlɛ, ɛ́ nɩ-yaga nɛbɛ tuur ʋ.

¹⁴Ɛcɛ a nyɔ-vʋʋrʋ dɩ̃dɔr ɩ n fɩɩra, ɛ́ a ʋ sɔ́r kpɛmɛ, ɛ́ nɩbɛ blãlɛ n'a mɩ́ nyɛ̃ ʋ.»

¹⁵«Nyɩ gùre nyɩ tʋɔra a naaŋmɩn-ƴɛ̀r-man-bɛlɛbɛlɛ mɩnɛ ƴãw. Bɛ mɩ́ sɔwl'ɩ bɛ tʋɔra ɩ mɛ̃ pi-nyan a, waar a nyɩ zie, ɛcɛ a bɛ pʋ̃ɔmɩ bɛ ɩ wɛ-bà-karɩ.

¹⁶A bɛ ɩ-ɩrɩ zie n'a nyɩ na bãw bɛ. Ãa dãw pɔr divɛ̃ tɩɩr wɔmɛ gɔ-tɩɛ zu, bɩɩ pɔr kãkamɛ sãsã tɩɛ zu?

¹⁷Tɩ-vla za mɩ́ wɔ̃ n wɔ̃-vɩɛlɩ, ɛ́ tɩ-sãwna wɔ̃ wɔ̃-faar.

¹⁸Tɩ-vla kʋ̃ tʋ̃ɔ́ wɔ̃ wɔ̃-faar ɛ, ɛ́ tɩ-sãwna mɩ̀ kʋ̃ tʋ̃ɔ́ wɔ̃ wɔ̃-vɩɛlɩ ɛ.

¹⁹Tɩɛ nɛ za na bɛ wɔnɛ wɔ̃-vɩɛlɩ a, bɛ mɩ́ cɛ ʋ na lɔb ƴãw vũumí.

²⁰A na ŋmɛ̃ à ŋá a, a bɛ ɩ-ɩrɩ zie n'a nyɩ na bãw a naaŋmɩn-ƴɛ̀r-man-bɛlɛbɛlɛ mɩnɛ.»

²¹«A bɛlɩ dem na mɩ́ yere a ɩ̃ zie: “Sore e, Sore e”, bɛlɛ bɛ nɛbɛ na kpɛ a tẽ-vla Naalʋ pʋɔ ɩ. A bɛl na maalɛ a ɩ̃ Sãà na be a tẽ-vla pʋɔ a pʋ-tɩɛrʋ a, bɛlɛ nɛbɛ na kpɛ a tẽ-vla Naalʋ pʋɔ.

²²A ƴɛ̀rʋ-maalʋ bibir a, nɩ-yaga na yere nɩ a ɩ̃ zie: “Sore e, a fʋ yúor ƴãw bɛ tʋ̃ɔ́ n'a tɩ tɩ ƴɛ̀r naaŋmɩn-ƴɛ̀r-manbɛ ƴɛ̀rʋ ɛ? A fʋ yúor ƴãw bɛ tʋ̃ɔ́ n'a tɩ tɩ diw kɔ̃tɔmɛ ɩ? A fʋ yúor ƴãw bɛ tʋ̃ɔ́ n'a tɩ tɩ maalɩ nɔ-ɓãa-yele yaga ɩ?”

²³Lɛ n'a ɩ̃ na yel kʋ̀ bɛ: “Ɩ̃ bɛ dãw bãw nyɩ towtow ɛ, nyɩ cen taw zaa a ɩ̃ zie, nyɩɩm na ɩrɛ ɩ-faar a!”»

²⁴«A na ɩ à ŋá a, nɩr za na bɛrɛ wone a ƴɛ̀r-bie á ŋá ɩ̃ na ƴɛ̀r a ƴɛrɛŋa ɛ́ tuur a a, ʋ ŋmɛ̃ na taa nɩ yã-bãwnɛ na ŋmãa a ʋ yir kʋsɛ-pan zu a.

²⁵A saa mĩ na, a kʋ̃ɔnɩ da taa siw, sɛsɛb-bɛrɛ fu na ŋmɛ a yir ŋa, ʋʋ bɛ lo ɩ: bɛ sʋ̃ɔ́ nɩ a ʋ pɛr kʋsɩɛr zu.

²⁶Ɛ́ nɩr za na bɛrɛ wone a ƴɛ̀r-bie á ŋá ɩ̃ na ƴɛ̀r a ƴɛrɛŋa ɛ́ bɛ tuur a, ʋ ŋmɛ̃ na taa nɩ dãbol na ŋmãa a ʋ yir biire zu a.

²⁷A saa mĩ na, a kʋ̃ɔnɩ da taa siw, sɛsɛb-bɛrɛ fu na ŋmɛ a yir ŋa ʋ lo, lo sãw ʋ za.»

²⁸A Yeezu na tɩ ƴɛ̀r a ƴɛ̀rʋ á ŋá za baarɩ a, nʋɔr tɩ ɓãá nɩ a zu-sɛbla a ʋ wulu ƴãw.

²⁹Ʋ bɛ tɩ wule bɛ mɛ̃ a bɛ Naaŋmɩn wulu sɛ-sɛbrbɛ a ɩ, ʋ tɩ wule bɛ na mɛ̃ nɩr na tɛr a wulu fãw a.