Read Dagara, Northern Matie 9 Bible Online

Matie 9 - Dagara, Northern bible

Matie 9

¹A Yeezu tɩ kpɛ n a gbor lɛb gãw a kʋ̃ɔ-kpɛ̃ɛ cen a ʋ tẽw.

²Nɩbɛ bɛ mɩnɛ tɩ tuo nɩ gbɛr bʋ̃-gana zu wa n a ʋ zie. A Yeezu na tɩ nyɛ̃ bɛ sàw de a Naaŋmɩn a, ʋ yel'ɩ a gbɛr: «Ɩ̃ bie e, ɓãá ƴãw, a fʋ yel-bebe suur dɩ na.»

³Zɩ̃ kɛ́ Naaŋmɩn wulu sɛ-sɛbrbɛ bɛ mɩnɛ kãw tɩ tɩɛrɛ nɩ bɛ pʋɔ: «A nɩr ŋa tʋʋr'ɩ Naaŋmɩn zʋmɛ!»

⁴A Yeezu na tɩ bãw a bɛ tɩɛrʋ a, ʋ sowri bɛ na: «Bʋ̃ʋ n'ʋ so a tɩɛr-faar á ŋá be a nyɩ zie?

⁵Abobe sob'a ɩ mɔlɛ zuo, ɩ̃ na na yel: “A fʋ yel-bebe suur dɩ na”, bɩɩ ɩ̃ na na yel: “Ìr cere a?”

⁶Ɩ̃ bɔbr'a kɛ́ nyɩ bãwnɩ a, a Nɩsaal Bie tɛr'ɩ a yel-bebe suur-dɩ-kʋ̀b fãw a tẽw zu ka.» Lɛ n'a ʋ tɩ yel a gbɛr: «Ìr ɓáw a fʋ bʋ̃-gana kule nɩ a fʋ yir.»

⁷A nɩr nɛ tɩ ìr'a kul a ʋ yir.

⁸A zu-sɛbla na tɩ nyɛ̃ à ŋá a, dɛ̃bɩ̃ɛ tɩ nyɔw bɛ na, ɛ̀ bɛ tɩ íre a Naaŋmɩn yúor-vɩɛlʋ-danʋ, ʋl na kʋ̀ a fãw ŋa tɔ a nɩsaalbɛ a.

⁹A Yeezu na tɩ yi a be cere tɔlɛ a, ʋ tɩ nyɛ̃ nɩ dɛb kãw, a yúor na dɩ kɛ́ Matie a, ʋ zɩ̃ a ʋ tome zie, a zuru-yar deb zie. Ʋ tɩ yel ʋ na: «Tuur mɛ̃!» A Matie tɩ ìr'a tu ʋ.

¹⁰Zɩ̃ kɛ́ a Yeezu na tɩ be a Matie yir dɩrɛ a, zuru-yar-dierbɛ nɩ yel-bier-maalbɛ tɩ wa na wa lãw nɩ ʋlɛ nɩ a ʋ po-tuurbɛ dɩrɛ.

¹¹A Faarizɩ̃ɛ mɩnɛ na tɩ nyɛ̃ a lɛ a, bɛ tɩ yel'ɩ a ʋ po-tuurbɛ: «Bʋ̃ʋ n'ʋ so a nyɩ Wul-wul-kara lãw nɩ a zuru-yar-dierbɛ nɩ a yel-bebe dem dɩrɛ?»

¹²A Yeezu na tɩ wõ a a, ʋ yel'a: «Nɩ-kpɛn bɛ tɛr dɔwta yel-ɩra ɩ, bàalbɛ nɛbɛ mɩ́ tɛr a ʋ yel-ɩra.

¹³Nyɩ cen tɩ zànɩ a Sɛb-sõw ƴɛ̀r-bie á ŋá pɛr: “Nɩbaal-zɔba n'a ɩ̃ bɔbr, bàwr bɛ n'a ɩ[25].” Ɩ̃ sɩrɩ bɛ wa k'ɩ̃ɩ wa bʋɔlɩ nɩbɛ na tɩɛrɛ kɛ́ bɛ ɩ n nɩ-mɩn a ɩ, nɩbɛ na bãw kɛ́ bɛ ɩ n yel-bebe dem a bʋɔlʋ n'a ɩ̃ wa.»

¹⁴A Zã-Bati po-tuurbɛ tɩ taw na ta a Yeezu zie sowr'ʋ: «Bʋ̃ʋ n'ʋ so tɩɩm nɩ a Faarizɩ̃ɛ mɩnɛ mɩ́ tɛr a mʋta-tuo, ɛ́ a fʋ po-tuurbɛ bɛl, bɛ mɩ́ tɛr?»

¹⁵A Yeezu tɩ sɔw bɛ na: «Kul-taa cuw dem na tʋ̃ɔ́ na tɛr pʋ-sãwna lɛn daar za a dɛb-sãan na be a bɛ sɔgɔ a bɩɩ? Ɛcɛ bibie waar'a na vɩɛ, bɛ na ír a dɛb-sãan a bɛ sɔgɔ, lɛn daar'a bɛ na mɩ́ tɛr a mʋta-tuo.

¹⁶Bɛ bɛ dãw de pɛn-paala ɓe n kpar-kʋra ɩ, a pɛn-paala ŋa mɩ́ tawr'ɩ a kpar-kʋra pɛn, a vʋɔr mɩ́ lɛb bãw yɛ̀lɩ.

¹⁷Bɛ mɩ̀ bɛ dãw de divɛ̃-paala ƴãw wɔ-gbã-kore pʋɔ ɩ, alɛ bɛ ɩ lɛ, a wɔ-gban mɩ́ pur'a, a divɛ̃ cir, ɛ́ a wɔ-gban sãw. Bɛ nɩ̃ɛ na mɩ́ ƴãw divɛ̃-paala wɔ-gbã-paalɛ pʋɔ, lɛ n'a a za ayi mɩ́ gã.»

¹⁸A Yeezu na tɩ cãà ƴɛ̀rɛ à à ŋá a bɛ zie a, Zifʋ mɩnɛ nɩ-kpɛ̃ɛ kãw tɩ taw na ta lo gbĩ dume a ʋ niŋé ɛ́ yel: «A ɩ̃ pɔwyale ŋmãa nɩ vʋʋrʋ a ƴɛrɛŋa, ɛcɛ wa ír a fʋ nũu dɔwlɩ a ʋ zu[26], ʋʋ na lɛb'a vʋʋrɛ.»

¹⁹A Yeezu tɩ ìr'a tuur ʋ, ʋlɛ nɩ a ʋ po-tuurbɛ.

²⁰Zɩ̃ kɛ́ pɔw kãw a sɩɛ na tɩ cire maalɩ yome pie nɩ ayi a, tɩ yi n a pùorí wa tɔ a Yeezu kparʋ zʋɔrɛ.

²¹Ʋ tɩ yere nɩ ʋ tʋɔra: «Mãa tʋ̃ɔ́ ɩ mɛ̃ ɩ̃ páw nɩ a ʋ kparʋ tɛwr tɔ a, ɩ̃ na sanɩ na.»

²²Ɛcɛ a Yeezu na tɩ lɩɛbɩ nyɛ̃ ʋ a, ʋ yel ʋ na: «Ɩ̃ pɔwyaa a, ta zɔrɛ dɛ̃bɩ̃ɛ ɩ, a fʋ naaŋmɩn-sàwfʋ faa fʋ na.» Ɛ́ a pɛr nɛ pʋɔ a, a pɔw bàalʋ tɩ sanɩ na.

²³A Yeezu na tɩ ta a nɩ-kpɛ̃ɛ yir a, ʋ nyɛ̃ nɩ nɩbɛ na pɛblɛ weli a, nɩ zu-sɛbla na damnɛ a. Ʋ tɩ yel'a:

²⁴«Nyɩ taw zaa, a powle bɛ kpi ɛ, gʋ̃ɔ n'a ʋ gúre.» Ɛcɛ bɛ tɩ ɩrɛ ʋ na laar.

²⁵Bɛ na wa diw a nɩbɛ za bɛ yi a, a Yeezu tɩ kpɛ na nyɔw a powle nũu, ʋʋ ìr.

²⁶A yel ŋa tɩ yi na pàw a zie ʋl za.

²⁷A Yeezu na tɩ yi a be cere tɔlɛ a, zɔn ayi kãw tɩ tuur ʋ na ŋmɩɛr cɛlsɩ yere nɩ: «Daviir bidɛb i, zɔ tɩ nɩbaalʋ!»

²⁸A Yeezu na wa ta a yir a, a zɔn taw na ta a ʋ zie, ʋ sowri bɛ: «Nyɩ sàw na k'ɩ̃ɩ na tʋ̃ɔ́ na ɩ a lɛ ɛ?» Bɛ sɔw: «Ʋ̃ʋ, Sore e, tɩ sàw na!»

²⁹Lɛ n'a a Yeezu tɩ tɔ a bɛ mimie ɛ́ yel: «A tu a nyɩ zie mɛ̃ a lɛ nyɩ na sàw de a.»

³⁰Ɛ́ a bɛ mimie tɩ nyɛrɛ. Al pùorí, a Yeezu tɩ yel bɛ na lãwnɩ tanʋ za: «Nyɩ gù vla taa ɩrɛ nɩr za wa bãwnɩ a ɩ!»

³¹Ɛcɛ bɛ tɩ yire na wa báarɛ ɛ́ manɩ a ʋ yele pàw a zie ʋl za.

³²Bɛ na tɩ yire a, nɩbɛ kãw tɩ tɛr'ɩ wõw-takpal na íre kɔ̃tɔmɛ a, wa n a Yeezu zie.

³³A Yeezu na wa diw a kɔ̃tɔn baar'a, a wõw-takpal tɩ ƴɛ̀rɛ na. A tɩ ɩ n nɔ-ɓãa-yel a zu-sɛbla za zie bɛ yere: «Nɩr bɛ dãw nyɛ̃ à á ŋá taabɛ a Ɩsɩrayɛl tẽw pʋɔ ɩ!»

³⁴Ɛcɛ a Faarizɩ̃ɛ mɩnɛ tɩ yere na: «A kɔ̃tɔmɛ za nãà fãw zũú n'a ʋ diwr a kɔ̃tɔmɛ.»

³⁵A Yeezu tɩ cɔlɛ nɩ a tẽ-bɛrɛ nɩ a teli, kanɛ nɩ a nɩbɛ a bɛ puoru-diru pʋɔ, ɛ́ hiere a tẽ-vla Naalʋ Yel-nʋ̃ɔ̀, ɛ́ sanɛ a bàalʋ za nɩ a nɩ-kɔwlʋ za.

³⁶Ʋ na tɩ nyɛ̃ a zu-sɛbla a, nɩbaalʋ tɩ kpɛ ʋ nɩ a bɛ ƴãw. Bɛ tɩ bàl bàl'a gã mɛ̃ píir na bɛ tɛr cɩ̃ɩnɛ a.

³⁷A lɛ n'a ʋ tɩ yel a ʋ po-tuurbɛ: «A bʋ̃-dieri na sɛw deb a gã na bɛ dɩ vuo ɩ, ɛ́ a tõ-tõ-biir bɛ zɛ̃ bom ɛ,

³⁸nyɩ zɛlɩ a púo sob k'ʋʋ ƴãw tõ-tõ-biir cen tɩ de a bome.»