Read Dagara, Northern Markɩ 14 Bible Online

Markɩ 14 - Dagara, Northern bible

Markɩ 14

¹A Zifʋ mɩnɛ Tɔl-gãw cuw, nɩ a dipɛ̃ na bɛ ƴãw dãbɩl a cuw tɩ cɛ nɩ bibie ayi. A bàwr-maal-nɩ-bɛrɛ nɩ a Naaŋmɩn wulu sɛ-sɛbrbɛ tɩ bɔbr'ɩ a lɛ bɛ na na maalɩ yã nyɔw a Yeezu kʋ a.

²Bɛ tɩ yere na: «A ta ɩ a cuw daar ɛ, damnʋ taa wa bere a nɩbɛ pʋɔ ɩ!»

³A Yeezu tɩ be n Betani Sɩmʋ̃ na ɩ kɔ̃w a yir. Ʋ na tɩ dɩrɛ a, pɔw kãw tɩ wa na. Ʋ tɩ tɛr'ɩ kʋsɩɛr duwle na paalɩ náàr kãa-nyũu[25] mɩŋa, a daarʋ na bɛ gbʋ́r a. Ʋ tɩ ŋmɛr'ɩ a duwle, ɛ́ cir a kãá ƴãw a Yeezu zũú.

⁴Bɛ mɩnɛ kãw na tɩ be a be a, tɩ nyɛ̃ nɩ suur yere nɩ kʋ̀rɛ taa: «Bʋ̃ʋ pãa so bɛ sãw a kãá á ŋá bɛr à ŋá a?

⁵Bɛ nãá tʋ̃ɔ́ na kʋɔrɩ a, a ɩ bibie kɔbr ata (300) sã-ya libie, bɛ kʋ̀ a nan dem.» Ɛ́ tɩ nyɔw a pɔw yere.

⁶Ɛcɛ a Yeezu tɩ yel bɛ na: «Nyɩ bɛr ʋ, bʋnʋ ƴãw n'a nyɩ bàlɛ ʋ? Yel-vla n'ʋ ʋ maalɩ a ɩ̃ zie.

⁷Bʋ̃ʋ n'ʋ vɛ̃, nyɩ tɛr'ɩ a nan dem kʋralɛ, ɛ́ lɛn daar za nyɩ nãà mɩ́ wa bɔbr a, nyɩ na mɩ́ maalɩ bɛ na. Ɛcɛ mãa a, ɩ̃ kʋ̃ be a nyɩ zie kʋralɛ ɩ.

⁸A pɔw ŋa ɩ n a lɛ ʋ na tʋ̃ɔ́ a, ʋ de nɩ niwn zɛ a ɩ̃ ƴã-gan a kãá a ũufʋ ƴãw.

⁹Yel-mɩŋa sɩza n'a ɩ̃ yere kʋ̀rɛ nyɩ: zie nɛ za bɛ nãà wa hiere a Yel-nʋ̃ɔ̀ a tẽ-daa za zu a, bɛ mɩ̀ na mɩ́ manɩ nɩ à á ŋá a pɔw ŋa na ɩ a, cãà tɩɛrɛ nɩ a ʋ yele.»

¹⁰A Nɩ-toni pie nɩ ayi ƴen sob kãw, a Zuda Ɩsɩkarɩɔtɩ, tɩ cen na tɩ páw a bàwr-maal-nɩ-bɛrɛ k'ʋʋ tʋ̃ɔ́ nyɔw a Yeezu kʋ̀ bɛ.

¹¹Bɛ na tɩ wõ a lɛ a, nʋ̃ɔ̀ kpɛ bɛ na, ɛ̀ bɛ yel kɛ́ bɛ na kʋ̀ ʋ nɩ libie. A Zuda pãa tɩ bɔbr vo-vla ʋ na na nyɔw a Yeezu kʋ̀ bɛ a.

¹²A dipɛ̃ na bɛ ƴãw dãbɩl a cuw bibi-dãw-niwn sob, a ʋlɩ bibir bɛ na mɩ́ kʋ a peli a Tɔl-gãw cuw dɩb ƴãw a, a Yeezu po-tuurbɛ tɩ yel ʋ na: «Nyɩnɛ n'a fʋ bɔbr kɛ́ tɩ cen tɩ cɔbrɩ a Tɔl-gãw cuw bʋ̃-dɩrɩ fʋ dɩ?»

¹³A Yeezu tɩ tõ n a ʋ po-tuurbɛ ayi ɛ́ yel bɛ: «Nyɩ cen a tẽw pʋɔ, nyɩ na tɩ tuor'ɩ nɩr na tuo kʋ̃ɔ nɩ yuor a, nyɩ tuur ʋ,

¹⁴ɛ́ be za ʋ nãà wa kpɩɛr a, nyɩ yel a yir sob: “A Wul-wul-kara sowre na: nyɩnɛ n'a a ɩ̃ dĩo be, mãa nɩ a ɩ̃ po-tuurbɛ na na zɩ̃ dɩ a Tɔl-gãw cuw a?”

¹⁵Ʋ na wul nyɩ nɩ a gàrʋ́, bɔwpɩɛ na yɛlmɛ a, bom za be n be, be n'a nyɩ na cɔbrɩ a dɩb bɛr tɩ.»

¹⁶A po-tuurbɛ tɩ cen nɩ a tẽw pʋɔ tɩ nyɛ̃ a za tu mɛ̃ a lɛ a Yeezu na tɩ yel a, bɛ cɔbrɩ a Tɔl-gãw cuw.

¹⁷A zaanʋɔra na wa ta a, ʋlɛ nɩ a Pie-nɩ-ayi tɩ ta n a be.

¹⁸Bɛ na tɩ zɩ̃ dɩrɛ a, a Yeezu tɩ yel'a: «Yel-mɩŋa sɩza, ɩ̃ yere na kʋ̀rɛ nyɩ, a nyɩ kãw na lãw dɩrɛ nɩ mɛ̃ a, na mɩl mɛ̃ na nyɔw tɩr.»

¹⁹Nʋ̃ɔ̀ bɛ tɩ kpɩɛr a ʋ po-tuurbɛ ɩ, lɛ n'a bɛ tɩ sowre ʋ lɩɛrɛ taa: «Mãa ya n'ʋ bɩɩ?»

²⁰Ʋ sɔw yel bɛ: «A Pie-nɩ-ayi ƴen sob kãw n'ʋ, mãa nɩ a ʋl na lãw tone a nũu a laa pʋɔ a.

²¹A Nɩsaal Bie kule na mɛ̃ a lɛ bɛ na sɛb a ʋ ƴãw a, ɛcɛ baw-bio sob n'ɩ a sob nɛ na nyɔwr a Nɩsaal Bie tɩrɛ a, a nɩr ŋa nɩ̃ɛ bɛ tɩ dɔw a, alɛ tɩ sa.»

²²Bɛ na tɩ dɩrɛ a, a Yeezu tɩ de nɩ dipɛ̃, maalɩ, ɛ́ ŋma põ bɛ ɛ́ yel: «Nyɩ de, à ŋà ɩ n a ɩ̃ ƴã-gan.»

²³Al pùorí, ʋ de nɩ koli-nyúura, puori a Naaŋmɩn barka, ɛ́ kʋ̀ bɛ, bɛ nyũ bɛ za.

²⁴Ɛ́ ʋ yel bɛ: «À á ŋá ɩ n a ɩ̃ zɩ̃ɩ, a Wõ-taa zɩ̃ɩ na cir a nɩ-yaga ƴãw a.

²⁵Yel-mɩŋa sɩza, ɩ̃ yere na kʋ̀rɛ nyɩ, ɩ̃ kʋ̃ lɛb nyũ a divɛ̃ towtow ɛ, ɛ́ gùre a ʋlɩ bibir nɛ ɩ̃ na na lɛb nyũ a, a ɩ dã-paala a Naaŋmɩn Naalʋ pʋɔ a.»

²⁶Bɛ na wa yieli a Sɛb-sõw yielu[26] baarɩ a, bɛ yi na cere a Olivʋ tɩɩr tãw zu.

²⁷A Yeezu tɩ yel'ɩ a ʋ po-tuurbɛ: «Nyɩ za na zawrɩ mɛ̃ na bɛr. Bɛ sɛb'a: “Ɩ̃ na ŋmɛ n a pi-cɩ̃ɩnɛ kʋ, ɛ́ a píir zɔ yaarɩ[27].”

²⁸Ɛcɛ mãa wa lɛb yi a kũu pʋɔ a, ɩ̃ na de nyɩ nɩ niwn a Galile.»

²⁹A Pɩɛr tɩ yel ʋ na: «Bɛ za saa na zawrɩ fʋ bɛr a, mãa kʋ̃ zawrɩ fʋ bɛr ɛ.»

³⁰A Yeezu sɔw yel ʋ: «Yel-mɩŋa sɩza, ɩ̃ yere na kʋrɛ fʋ, a fʋ̃ʋ tɔr za a, a dɩ̃a tɩ̃ɩsɔw, nʋra kʋ̃ kõ gb'a ayi sɛr ɛ, ɛ́ fʋ ciiri gb'a ata ɛ́ fʋ bɛ bãw mɛ̃ ɩ.»

³¹Ɛcɛ a Pɩɛr tɩ lɛb'a bãw yel kpɛ̃w za: «Alɛ saa na fɛr k'ɩ̃ɩ lãwnɩ fʋ kpi a, ɩ̃ kʋ̃ sàw yel k'ɩ̃ɩ bɛ bãw fʋ ɛ.» Ɛ́ a po-tuurbɛ za mɩ̀ tɩ yere a lɛ.

³²Bɛ tɩ ta n zie kãw bɛ na bʋɔlɛ Zesemani a. A Yeezu tɩ yel'ɩ a ʋ po-tuurbɛ: «Nyɩ zɩ̃ a ka, ɩ̃ cen tɩ puori.»

³³Ʋ tɩ tɛr'ɩ Pɩɛr, Zakɩ nɩ Zã cen nɩ. Dɛ̃bɩ̃ɛ nɩ pʋl-vʋ̃ɔ tɩ tĩ na nyɔw ʋ.

³⁴Ʋ tɩ yel bɛ na: «Pʋ-sãwna tɛr mɛ̃ na faar na kʋ. Nyɩ be a ka ɛ́ bɛr gʋ̃ɔ.»

³⁵Ʋ tɩ taw na tɔl blã, ɛ́ lo tẽw puore kɛ́ alɛ wa tʋ̃ɔ́ a, a tuo á ŋá tɔl zãá nɩ ʋ.

³⁶Ʋ tɩ yere na: «Aba, ɩ̃ Sãà a, fʋ tʋ̃ɔ́ nɩ bom za. Ɩ a tuo koli-nyúura ŋa taw zãá nɩ mɛ̃. Ɛcɛ a ta ɩ lɛ a mãa na bɔbr a ɩ, a ɩ lɛ fʋ̃ʋ na bɔbr a.»

³⁷Ʋ tɩ lɛb'a wa wa nyɛ̃ bɛ gúre. Ʋ tɩ yel'ɩ a Pɩɛr: «Sɩmʋ̃ ʋ, fʋ gúre na a? A tɛm been yõ ƴãw fʋ bɛ tʋ̃ɔ́ bɛr a gʋ̃ɔ ɩ?

³⁸Nyɩ bɛr gʋ̃ɔ ɛ́ puore, taa wa lore a bɛlʋ pʋɔ ɩ, a nɩsaal mɩ́ bɔbr'ɩ a vla ɛ́ bɛ tɛr a fãw ɛ.»

³⁹Ʋ tɩ lɛb'a taw yi tɩ puore nɩ a ƴɛ̀r-bie al tɛɛ za.

⁴⁰Al pùorí, ʋ tɩ lɛb'a wa wa nyɛ̃ bɛ gúre, a gʋ̃ɔ bɛ tɩ bɛrɛ bɛ ɩ, ɛ́ bɛ bɛ tɩ bãw lɛ bɛ na na yel kʋ̀ ʋ a ɩ.

⁴¹Ʋ tɩ lɛb'a wa a gb'a ata sob ƴãw wa yel bɛ: «Nyɩ cãà gúre ɛ́ pɩ̃ɛnɛ. A baar'a, a tɛm ta na: bɛ na nyɔw nɩ a Nɩsaal Bie ƴãw a yel-bebe dem nuru pʋɔ.

⁴²Nyɩ ìr, nyɩ ɩ tɩ cen, a ʋlɩ sob nɛ na nyɔwr mɛ̃ tɩrɛ a n'ɩ ŋan.»

⁴³A Yeezu na tɩ cãà ƴɛ̀rɛ a, a Zuda na ɩ a ʋ Nɩ-toni pie nɩ ayi ƴen sob a, tɩ ta na, ʋlɛ nɩ nɩ-yaga na tɛr zɛbr-sɔ-bɛrɛ nɩ dabɔlɛ a. A bàwr-maal-nɩ-bɛrɛ nɩ a Naaŋmɩn wulu sɛ-sɛbrbɛ nɩ a Zifʋ mɩnɛ nɩ-kore nɛbɛ tɩ tõ bɛ.

⁴⁴A ʋ mɩlɛ Zuda tɩ kʋ̀ bɛ nɩ bãwfʋ ŋa: «A nɩr ʋl ɩ̃ nãà nyɔw weri a, ʋlɛ n'ʋ, nyɩ nyɔw ʋ maal tɛr vla cen nɩ.»

⁴⁵A Zuda na wa tarɛ wa báarɛ a, ʋ taw na pɩɛl a Yeezu ɛ́ yel: «Arabi i!» Ɛ́ nyɔw ʋ weri.

⁴⁶Lɛ n'a a ʋ pùor dem tɩ nyɔw a Yeezu.

⁴⁷A nɩbɛ na tɩ be a be a, a bɛ kãw tɩ vʋ̃ɔ nɩ a ʋ zɛbr-sɔ-kpɛ̃ɛ cɛ n a bàwr-maal-kara tõ-tõ-bie tobr ɓɛl.

⁴⁸A Yeezu tɩ de nɩ a ƴɛ̀rʋ yel bɛ: «Nyãnyu-nɩ-kʋrɛ nɛ m bɩɩ, ɛ̀ nyɩ pãa yi tɔ̃w nɩ zɛbr sɔ-bɛrɛ nɩ dabɔlɛ waar'ɩ a ɩ̃ nyɔwfʋ?

⁴⁹Bibie za, ɩ̃ mɩ́ tɩ be n a nyɩ zie, a Ŋmɩn-yir-kpɛ̃ɛ pʋɔ, kanɛ nɩ a nɩbɛ, ɛ́ nyɩ bɛ nyɔw mɛ̃ ɩ. Ɛcɛ a ɩ n à à ŋá, kɛ́ a Sɛb-sõw ƴɛ̀r-bie tʋ̃ɔ́ tu.»

⁵⁰Lɛ n'a a ʋ po-tuurbɛ za tɩ zɔ yaarɩ ɛ́ bɛr ʋ.

⁵¹Pɔlbile kãw tɩ váar'ɩ gãw tɛwr tuur'ɩ a Yeezu. Bɛ na tɩ nyɔwr ʋ a,

⁵²ʋ cɛ n a gãw fuori bɛr, ɛ́ zɔ n ƴã-gã-zawla.

⁵³Bɛ tɩ tɛr'ɩ a Yeezu cen nɩ a bàwr-maal-kara zie. A bàwr-maal-nɩ-bɛrɛ za, nɩ a Zifʋ mɩnɛ nɩ-kore nɩ a Naaŋmɩn wulu sɛ-sɛbrbɛ tɩ ɓã n taa a be.

⁵⁴Pɩɛr tɩ zãá na, ɛ́ tuur a Yeezu tɩ kpɛ a bàwr-maal-kara yir davʋrá, ʋlɛ nɩ a tõ-tõ-biir zɩ̃ ʋʋrɛ vũu.

⁵⁵A bàwr-maal-nɩ-bɛrɛ, nɩ a ƴɛ̀rʋ-dɩb-lãw nɩbɛ za tɩ bɔbr'ɩ nɩbɛ na na dɩ dãsɩɛ yel a Yeezu sãwna bɛ nyɔw ʋ kʋ a, ɛcɛ bɛ bɛ tɩ nyɛrɛ bɛ ɩ.

⁵⁶Nɩ-yaga tɩ wa na wa dɩ dãsɩ-ziri, ɛcɛ a bɛ dãsɩɛ bɛ tɩ de taa ɩ.

⁵⁷Bɛ mɩnɛ kãw tɩ ìr'a dɩ a dãsɩ-ziri ŋa:

⁵⁸«Tɩ tɩ wõ na ʋ yel: “Ɩ̃ na ŋmɛ n a nɩsaal nuru Ŋmɩn-yir-kpɛ̃ɛ ŋa ŋmɛr, ɛ́ bibie ata pùorí, ɩ̃ na lɛb'a ŋmãa kãw na kʋ̃ ɩ a nɩsaal nuru dem a.”»

⁵⁹Ɛcɛ a ka mɩ̀ a, a bɛ dãsɩɛ cãà bɛ tɩ de taa ɩ.

⁶⁰A bàwr-maal-kara tɩ ìr'ɩ a nɩbɛ sɔgɔ sowri a Yeezu: «À á ŋá za bɛ na yere cáarɛ nɩ fʋ a, fʋ bɛ sɔwr bom za ɩ?»

⁶¹Ɛcɛ a Yeezu tɩ ɩ n gbili, ʋ bɛ tɩ sɔw bom za ɩ. A bàwr-maal-kara tɩ lɛb'a sowri ʋ: «Fʋ̃ʋ n'ɩ a Nɩ-kabra a, a Naaŋmɩn na tɛr danʋ a Bie e?»

⁶²A Yeezu sɔw: «Mãa n'ʋ, ɛ́ nyɩ na nyɛ̃ nɩ a Nɩsaal Bie ʋ zɩ̃ a Naaŋmɩn kpɛnʋ-za-sob dʋrʋ lowr, ɛ́ be a zũzuwe pʋɔ waar.»

⁶³A lɛ n'a a bàwr-maal-kara tɩ taw a ʋ kparɩ cɩɛrɩ[28] ɛ́ yel: «Bʋnʋ ƴãw n'a tɩ cãà bɔbr dãsɩɛ dem?

⁶⁴Nyɩ wõ n a zʋm ʋ na tʋ a Naaŋmɩn a. Nyɩ tɩɛr'ɩ ŋmɩn?» Bɛ za sɔw k'ʋʋ sãw na ɛ́ sɛwnɩ a kũu.

⁶⁵Bɛ mɩnɛ kãw tɩ tĩ na pʋʋrɛ mʋtaar ƴãwn ʋ, ɛ́ pàwr ʋ a niwn, ɛ́ ŋmɩɛr ʋ yere nɩ: «Bãw, ãa n'ʋ ŋmɛ b.» Bɛ tɩ bɛr'ɩ a Yeezu kʋ̀ a tõ-tõ-biir bɛ ɓa ɓa ʋ.

⁶⁶A Pɩɛr na tɩ be a davʋra pʋɔ a, a bàwr-maal-kara tõ-tõ-bi-pɔwle kãw tɩ ta na.

⁶⁷Ʋ na tɩ nyɛ̃ a Pɩɛr na ʋʋrɛ a vũu a, ʋ jɩ́r ʋ nɩ vla ɛ́ yel ʋ: «A fʋ̃ʋ mɩ̀, fʋ mɩ̀ tɩ tuur'ɩ a Yeezu, a Nazarɛtɩ tẽw nɩr ŋa.»

⁶⁸Ɛcɛ a Pɩɛr tɩ ciire na yere nɩ: «Ɩ̃ bɛ bãw a lɛ fʋ na bɔbr kɛ́ fʋ yel a ɩ, ɩ̃ bɛ bãw a fʋ ƴɛ̀rʋ ŋa pɛr ɛ.» Ɛ́ yi a davʋra pʋɔ kpɛ a zawle pʋɔ[29].

⁶⁹A tõ-tõ-bi-pɔwle tɩ nyɛ̃ ʋ na, ɛ́ lɛb maal yere kʋ̀rɛ a bɛlɩ dem na tɩ be a be a: «A bɛ kãw n'ɩ à ŋà!»

⁷⁰A Pɩɛr tɩ lɛb'a ciiri. Blã blã, a bɛl na tɩ be a be a, mɩ̀ tɩ yel'ɩ a Pɩɛr: «Bʋnʋ bɛ ka be ɩ, fʋ ɩ n a bɛ kãw: Galile tẽw nɩr nɛ b!»

⁷¹Lɛ n'a a Pɩɛr tɩ ŋmɩɛr Naaŋmɩn ƴãwn ʋ tʋɔra yere nɩ: «Ɩ̃ bɛ bãw a nɩr ŋa nyɩ na yere a ɩ.»

⁷²Ɛ́ daadaalɛ nʋra kõ a gb'a ayi sob. A lɛ n'a a Pɩɛr pãa lɛb bãwnɩ a ƴɛ̀r-bir ŋa a Yeezu na tɩ yel a: «Nʋra kʋ̃ kõ gb'a ayi sɛr ɛ, ɛ́ fʋ ciiri gb'a ata kɛ́ fʋ bɛ bãw mɛ̃ ɩ.» Ɛ́ tɩ paw tɔl yi tɩ nyɔw kon.