Read Dagara, Northern Markɩ 15 Bible Online

Markɩ 15 - Dagara, Northern bible

Markɩ 15

¹A biɓaar-pipi, a bàwr-maal-nɩ-bɛrɛ, nɩ a Naaŋmɩn wulu sɛ-sɛbrbɛ, nɩ a Zifʋ mɩnɛ nɩ-kore, nɩ a bɛ ƴɛ̀rʋ-dɩb-lãw nɩbɛ za, tɩ wõ n taa ɛ́ nyɔw a Yeezu 'lẽ cen nɩ tɩ kʋ̀ a Pɩlatɩ.

²A Pɩlatɩ tɩ sowr'ʋ na: «Fʋ̃ʋ n'ɩ a Zifʋ mɩnɛ nãà bɩɩ?» A Yeezu sɔw: «Fʋ̃ʋ n'ʋ yel.»

³A bàwr-maal-nɩ-bɛrɛ tɩ manɛ nɩ sãwna yaga dɔwlɛ a ʋ zu.

⁴A Pɩlatɩ tɩ lɛb'a sowri ʋ: «Fʋ bɛ sɔwr bom za ɩ? Jɩ́r nyɛ̃ a sãwna bɛ na manɛ dɔwlɛ a fʋ zu sɛw a?»

⁵Ɛcɛ a Yeezu bɛ lɛb tɩ sɔw bom za ɩ, a ɩ nɔ-ɓãa-yel a Pɩlatɩ zie.

⁶A Tɔl-gãw cuw za, a Pɩlatɩ mɩ́ tɩ yuo nɩ nɩ-pàwra been bɛr, a ʋlɩ sob a nɩbɛ na mɩ́ zɛlɩ a.

⁷Zɩ̃ kɛ́ dɔɔ kãw, bɛ na bʋɔlɛ kɛ́ Barabasɩ a, tɩ be n a gaso pʋɔ, ʋlɛ nɩ nɩbɛ na tɩ kʋ nɩr damnʋ kãw pʋɔ a.

⁸A zu-sɛbla tɩ do n a Pɩlatɩ zie tɩ zɛlɛ ʋ k'ʋʋ ɩ a lɛ ʋ na mɩ́ tu a kʋralɛ a.

⁹A Pɩlatɩ sɔw yel bɛ: «Nyɩ bɔbr'a k'ɩ̃ɩ lɛb bɛr a Zifʋ mɩnɛ nãà kʋ̀ nyɩ bɩɩ?»

¹⁰Ʋ tɩ bãwnɩ a na nyuur ƴãw na n'a a bàwr-maal-nɩ-bɛrɛ nyɔw a Yeezu wa n a ʋ zie a.

¹¹A bàwr-maal-nɩ-bɛrɛ tɩ dɔ n a nɩbɛ ƴãw kɛ́ bɛ zɛlɩ kɛ́ a Pɩlatɩ nɩ̃ɛ bɛr a Barabasɩ.

¹²A Pɩlatɩ tɩ lɛb'a de a ƴɛ̀rʋ sowri bɛ: «A sob ŋa nyɩ na bʋɔlɛ a Zifʋ mɩnɛ nãà a, ɩ̃ ɩ ʋ ŋmɩn?»

¹³Bɛ tɩ lɛb'a cɩɩrɛ yere nɩ: «Kpa ʋ da-gara zu!»

¹⁴A Pɩlatɩ sowri bɛ: «Bʋ̃ʋ n'ʋ ʋ nɩ̃ɛ sãw?» Bɛ lɛb bãw cɩɩrɛ kpɛ̃w za yere nɩ: «Kpa ʋ da-gara zu!»

¹⁵A Pɩlatɩ na tɩ bɔbr k'ʋʋ ɩ nʋ̃ɔ̀ kpɛ a nɩbɛ a, ʋ tɩ yuo nɩ a Barabasɩ bɛr ɛ́ ƴãw bɛ fɔb a Yeezu, ʋʋ de ʋ kʋ̀ bɛ kɛ́ bɛ tɩ kpa a da-gara zu.

¹⁶A sojarɩ tɩ tɛr'ɩ a Yeezu kpɛ n a nãà yir davʋrá, a pɛr lɛ kɛ́ a piretʋar pʋɔ, ɛ́ tɩ bʋɔlɩ a bɛ taabɛ za.

¹⁷Bɛ tɩ de nɩ kpar-kpɛ̃ɛ zɩɛ su ʋ, ɛ́ wob gʋʋr kpawʋɔ vɔblɩ ʋ.

¹⁸Ɛ́ pãa mɩ́ puor'ʋ yere nɩ: «Yãanɩ, Zifʋ mɩnɛ nãà a!»

¹⁹Bɛ mɩ́ tɩ de nɩ bàa-kɛkɛr vàrɛ nɩ ʋ a zũú, ɛ́ pʋʋrɛ mʋtaar ƴãwnɛ ʋ, ɛ́ mɩ́ gbĩ dume a ʋ niŋé gũu tɩ tɔ a tẽw.

²⁰Bɛ na wa ɩ ʋ la baar'a, bɛ yaa nɩ a kpar-zɩɛ bɛr ʋ, ɛ́ lɛb de a ʋ bʋ̃-suuri su ʋ. Al pùorí, bɛ tɛr ʋ na yi n, ɛ́ bɛ tɩ kpa ʋ a da-gara zu.

²¹A sojarɩ tɩ fɛr'ɩ dɛb kãw na tɩ yi pu-pʋɔ waar a, ƴãw k'ʋ tuo a Yeezu da-gara. A dɛb ʋl tɩ yi n Sɩɩrɛn tẽw, ɛ́ a yúor dɩ kɛ́ Sɩmʋ̃, Alɛsãdɩr nɩ Irifisɩ sãà.

²²Bɛ tɩ tɛr'ɩ a Yeezu cen nɩ zie kãw bɛ na bʋɔlɛ kɛ́ Gɔlgɔta a, a pɛr lɛ kɛ́ zuŋman zie.

²³Bɛ tɩ bɔbr'a kɛ́ bɛ kʋ̀ ʋ divɛ̃ na jɛr mɩ́ɩ̀r kãa-nyũu a, ɛcɛ, ʋ bɛ tɩ sàw nyũ a ɩ.

²⁴Al pùorí, bɛ tɩ kpa ʋ nɩ a da-gara zu, ɛ́ ŋmɛ gbãw põ a ʋ bʋ̃-suuri. Bɛ ŋmɛ n a gbãw kɛ́ bɛ bãw ʋlɩ bom nɛ ŋa za na na mɩ́ páw a.

²⁵A biɓaara gbele piwaɩ daar'a bɛ tɩ kpa ʋ a da-gara zu.

²⁶Bɛ tɩ sɛb'ɩ a ʋ kũu pɛr à ŋá: «Zifʋ mɩnɛ nãà.»

²⁷Bɛ mɩ̀ tɩ kpa n nyãnyu-nɩ-kʋrbɛ ayi da-garɩ zu lãwnɩ ʋ, kãw a ʋ dʋrʋ lowr, ɛ́ kãw a ʋ gʋba lowr. [

²⁸Lɛ n'a a Sɛb-sõw ƴɛ̀r-bir ŋa tɩ tu: «Bɛ sɔ́r ʋ na ƴãw nɩ-faar pʋɔ.»]

²⁹A sɔr-tɔlbɛ tɩ tʋʋr ʋ na gɔwrɛ nɩ zu yere: «Alɛ! Fʋ̃ʋ na darɛ a Ŋmɩn-yir-kpɛ̃ɛ lɔbr ɛ́ lɛb mɩɛr ʋ bibie ata ƴãw a,

³⁰siw a da-gara zu faa fʋ tʋɔra!»

³¹A bàwr-maal-nɩ-bɛrɛ, nɩ a Naaŋmɩn wulu sɛ-sɛbrbɛ, mɩ̀ tɩ ɩrɛ ʋ na laar a bɛ cara pʋɔ yere nɩ: «Ʋ faa nɩ bɛ mɩnɛ ɛ́ kʋ̃ tʋ̃ɔ́ faa ʋ tʋɔra ɩ!

³²A Nɩ-kabra, a Ɩsɩrayɛl nãà, ʋ siw a da-gara zu a ƴɛrɛŋa tɩ nyɛ̃ ɛ́ sàw de a ʋ yele.» A bɛl bɛ na tɩ kpa a da-garɩ zu lãwnɩ ʋ a, mɩ̀ tɩ tʋʋr ʋ na.

³³A mʋ̃tɔ̃w na wa do põ-zɛ̃-taa a, lige tɩ pàw nɩ a tẽ-daa za tɩ ta a zaanʋɔra gbele ata daar.

³⁴A gbele ata na wa ta a, a Yeezu ŋmɛ n cɛl kpɛ̃w za yel: «Eli, Eli, lama sabaktani!» A pɛr lɛ kɛ́: «Ɩ̃ Naaŋmɩn i, ɩ̃ Naaŋmɩn i, bʋ̃ʋ n'ʋ so fʋ zawrɩ mɛ̃ bɛr?[30]»

³⁵A nɩbɛ na tɩ be a be a, bɛ mɩnɛ tɩ wõ a na ɛ́ yere: «Nyɛ̃ ʋ bʋɔlɛ Eli wɛ!»

³⁶A bɛ kãw tɩ zɔ na cen tɩ de sapɔ tõ dã-miiru pʋɔ, 'lẽ ƴãw bàa-kɛkɛr ƴãw tur ʋ k'ʋʋ nyũ, ɛ́ yere: «Nyɩ vɛ̃ tɩ nyɛ̃ a lɛ a Eli na na wa nyɔw ʋ ʋ siw a da-gara zu a!»

³⁷Ɛcɛ a Yeezu tɩ lɔb'ɩ cɛl kpɛ̃w za ɛ́ ŋmãa a vʋʋrʋ.

³⁸A Ŋmɩn-yir-kpɛ̃ɛ pʋɔ pɛn-yawla[31] tɩ tĩ nɩ a saa-zu ɛ́ ɓar siw tɩ tɔ a pile.

³⁹A sojarɩ kʋba nɩ-kpɛ̃ɛ ʋl na tɩ àr a ʋ niŋé a, ɛ́ nyɛ̃ a lɛ ʋ na ŋmãa a vʋʋrʋ a, ʋ yel'a: «Sɩza, a nɩr ŋa tɩ ɩ n Naaŋmɩn Bie!»

⁴⁰Pɔwbɛ bɛ mɩnɛ kãw mɩ̀ tɩ be n be, àr zãá ɛ́ jɩ́rɛ: Madala tẽw Marya, nɩ Zakɩ pʋrɩ nɩ Zoze mã Marya, nɩ Salume tɩ pʋɔ nɩ a bɛ pʋɔ.

⁴¹Bɛ tɩ tu n a Yeezu ɛ́ kaa ʋ zie, a lɛn daar ʋ na tɩ be a Galile a, lãwnɩ pɔw-yaga na tɩ páw ʋ do a Zerizalɛm a.

⁴²A zaanʋɔra tɩ ta na baarɩ, ɛ́ a na tɩ ɩ a cɔbrʋ bibir a, a pɛr lɛ kɛ́ a pɩ̃ɛnʋ-bibir zãa daarɩ́ a,

⁴³Zuzɛb na yi Arimate tẽw, ɛ́ ɩ a ƴɛ̀rʋ-dɩb-lãw nɩ-yúor kãw a, tɩ ta na. Ʋ mɩ̀ tɩ gùre nɩ a Naaŋmɩn Naalʋ. Ʋ tɩ nyɔw nɩ socir ɛ́ kpɛ a Pɩlatɩ zie tɩ zɛlɩ a Yeezu ƴã-gan.

⁴⁴A tɩ ùr'ɩ a Pɩlatɩ, ʋ na tɩ wõ kɛ́ a Yeezu kpi n fɔ̃wlɛ a. Ʋ tɩ ƴãw na bɛ bʋɔlɩ a sojarɩ kʋba nɩ-kpɛ̃ɛ wa sowri ʋ kɛ́ koro za n'a ʋ kpi bɩɩ.

⁴⁵A sojarɩ kʋba nɩ-kpɛ̃ɛ na wa sɔw kʋ̀ ʋ a, ʋ sàw na kɛ́ a Zuzɛb de a Yeezu ƴã-gan.

⁴⁶A Zuzɛb tɩ dà n pɛn-paala, yaw a Yeezu ƴã-gan a da-gara zu pili nɩ, ɛ́ de ʋ ũù bɔw bɛ na tuw pìir pʋɔ a, ɛ́ bili kʋsɛ-kpɛ̃ɛ pàw a bɔw nʋɔr.

⁴⁷Madala tẽw Marya nɩ a Zoze mã Marya tɩ jɩ́rɛ nɩ a be bɛ na ũù a Yeezu a.