Read Dagara, Northern Markɩ 16 Bible Online

Markɩ 16 - Dagara, Northern bible

Markɩ 16

¹A pɩ̃ɛnʋ-bibir na wa tɔl a, a Madala tẽw Marya, nɩ a Zakɩ mã Marya, nɩ a Salume, tɩ da n kãa-nyuure cen nɩ kɛ́ bɛ tɩ zɛ a Yeezu ƴã-gan.

²A kɔsɩɛra bibir biɓaar-pipi, a mʋ̃tɔ̃w na tɩ pure a, bɛ tɩ cen nɩ a yaa pɛr.

³Bɛ tɩ yere na kʋ̀rɛ taa: «Ãa n'ʋ na tɩ bili a bɔw nʋɔr kʋsɩɛr bɛr tɩ?»

⁴Bɛ tɩ zɛw nɩ zu nyɛ̃ a kʋsɩɛr, na bɛ dɩ vuo a, ʋ bili gã ʋ tʋɔra zie.

⁵Bɛ na tɩ kpɛ a, bɛ nyɛ̃ nɩ pɔlbile kãw ʋ su kpar-pla zɩ̃ nɩ a dʋrʋ lowr, ɛ̀ dɛ̃bɩ̃ɛ tɩ nyɔw bɛ yaga.

⁶Ɛcɛ ʋ tɩ yel bɛ na: «Nyɩ ta zɔrɛ dɛ̃bɩ̃ɛ ɩ, a Nazarɛtɩ tẽw Yeezu bɛ na kpa a da-gara zu a n'ʋ nyɩ bɔbr, ʋ lɛb'a yi a kũu pʋɔ, ʋ bɛ be ka ɩ. Nyɩ nyɛ̃ a be bɛ na tɩ ƴãw ʋ a.

⁷Ɛcɛ nyɩ cen tɩ yel à ŋá kʋ̀ a ʋ po-tuurbɛ nɩ a Pɩɛr: ʋ dier nyɩ nɩ niwn a Galile, be n'a nyɩ na tɩ nyɛ̃ ʋ mɛ̃ a lɛ ʋ na yel kʋ̀ nyɩ a.»

⁸Bɛ tɩ yi n a yaa pɛr be zɔ tɩ zãá, dɛ̃bɩ̃ɛ na tɩ tɛr bɛ bɛ màwr bɛ za a ƴãw. Ɛ́ bɛ bɛ tɩ por a yúor kʋ̀ nɩr za ɩ, a dɛ̃bɩ̃ɛ na tɩ ɩrɛ bɛ a ƴãw. [

⁹A Yeezu na tɩ lɛb yi a kũu pʋɔ a kɔsɩɛra bibir biɓaara a, ʋ tɩ de nɩ niwn wul ʋ tʋɔra a Madala tẽw Marya, a ʋl zie ʋ na tɩ diw a kɔ̃tɔmɛ ayopõi bɛr a.

¹⁰A Madala tẽw Marya tɩ cen na tɩ manɩ kʋ̀ a ʋ po-tuurbɛ na tɩ tɛr pʋ-sãwna kone nɩ a.

¹¹Ɛcɛ bɛ na tɩ wõ kɛ́ a Yeezu vʋʋrɛ na a, nɩ kɛ́ a Madala tẽw Marya nyɛ̃ ʋ na a, bɛ bɛ tɩ sàw de a ʋ ƴɛ̀rʋ ɛ.

¹²Al pùorí, a Yeezu tɩ lɛb'a wul ʋ tʋɔra nɩ ŋmɛ̃a kãw, a ʋ po-tuurbɛ ayi kãw na tɩ lo sɔ́r cere kura pʋɔ a.

¹³Bɛ tɩ lɛb'a wa wa manɩ kʋ̀ a bɛ ŋmãa, ɛcɛ bɛ mɩ̀ bɛ tɩ sàw de a bɛ ƴɛ̀rʋ ɛ.

¹⁴A pɛ-baara a, a Yeezu tɩ wul'ɩ ʋ tʋɔra a Nɩ-toni pie nɩ been na tɩ lãw zɩ̃ dɩrɛ a. Ʋ tɩ yere bɛ na, bɛ na bɛ tɩ sàw de a, ɛ́ a bɛ zuru kpɛmɛ zuo bɛ bɛ sàw de a bɛlɩ dem na tɩ nyɛ̃ ʋ ʋ lɛb yi a kũu pʋɔ a ƴɛ̀rʋ a.

¹⁵Al pùorí, ʋ tɩ yel bɛ na: «Nyɩ cen a tẽ-daa za zu tɩ hiere a Yel-nʋ̃ɔ̀ kʋ̀rɛ a bʋ̃-íri za.

¹⁶Ʋlɩ sob nɛ wa sàw de a, ɛ́ de a suob a, ʋ na nyɛ̃ nɩ a faafʋ, ʋlɩ sob nɛ bɛ wa sàw de a, ʋ na nyɛ̃ nɩ dɔwrʋ.

¹⁷Ɛ́ bãwfʋ á ŋá n'a na tuur a bɛlɩ dem na sàw de a: a ɩ̃ yúor ƴãw, bɛ na diwr'ɩ kɔ̃tɔmɛ, bɛ na ƴɛ̀rɛ nɩ ƴɛ̀r-paalɛ.

¹⁸Bɛlɛ saa nyɔw wɩɩr nɩ nuru bɩɩ bɛlɛ saa nyũ tɩ̃ɩ-faa kãw a, a kʋ̃ ɩ bɛ bom za ɩ. Bɛ na mɩ́ ír'ɩ nuru dɔwlɩ a bàalbɛ zu, ɛ̀ bɛ lɛb kpɛ̃w.»

¹⁹A Sore Yeezu na wa ƴɛ̀r a bɛ zie à à ŋá baar'a, bɛ ír ʋ na do n a tẽ-vla pʋɔ, ʋ tɩ zɩ̃ a Naaŋmɩn dʋrʋ lowr.

²⁰A ʋ Nɩ-toni tɩ cen na tɩ hiere a Yel-nʋ̃ɔ̀ a ziir za. A Sore tɩ lãwnɩ bɛ na tone, ɛ́ mɩ́ wul kɛ́ a Yel-nʋ̃ɔ̀ ƴɛ̀rʋ ɩ n sɩza, a nɔ-ɓãa-yele na tɩ maalɛ pʋɔ a ƴãw.]