Read Dagara, Northern Markɩ 2 Bible Online

Markɩ 2 - Dagara, Northern bible

Markɩ 2

¹Bibie à ŋá lɛ pùorí, a Yeezu tɩ lɛb'a wa a Kafarnawɔm, ɛ́ a nɩbɛ tɩ wõ k'ʋʋ be n a yir.

²Zu-sɛbla tɩ gbõ n taa bɛ tɩ tɛr vuo ɩ, kɛ̀ àrʋ zie bɛ tɩ cãà be ɩ, tɩ lãwnɩ a dɩ̃dɔr nʋɔr za, ʋʋ tɩ manɛ a Naaŋmɩn ƴɛ̀rʋ kʋ̀rɛ bɛ.

³Nɩbɛ kãw tɩ wa tɛr'ɩ gbɛr wa n a ʋ zie, ƴãw nɩbɛ anaar tuo.

⁴A nɩbɛ na tɩ yãwmɛ zuo bɛ kʋ̃ tʋ̃ɔ́ ta a ʋ niŋé a, bɛ do n a gàrʋ́ tɩ puo sule a be a Yeezu na be a, ɛ́ tur a gbɛr bɛr ʋ siw nɩ a ʋ bʋ̃-gana.

⁵A Yeezu na tɩ nyɛ̃ a bɛ naaŋmɩn-sàw-deb a, ʋ yel'ɩ a gbɛr: «Ɩ̃ bie e, a fʋ yel-bebe suur dɩ na.»

⁶Naaŋmɩn wulu sɛ-sɛbrbɛ bɛ mɩnɛ na tɩ zɩ̃ a be a, tɩ tɩɛrɛ nɩ bɛ pʋɔ:

⁷«Bʋnʋ ƴãw n'a a nɩr ŋa ƴɛ̀rɛ à ŋá? Ʋ tʋʋr'ɩ Naaŋmɩn zʋmɛ. Ãa n'ʋ na tʋ̃ɔ́ dɩ a yel-bebe suur, a bɛ ɩ Naaŋmɩn yõ?»

⁸Daadaalɛ, a Yeezu na tɩ tɩɛrɩ bãw a bɛ pʋ-tɩɛrʋ a, ʋ sowri bɛ na: «Bʋ̃ʋ n'ʋ so nyɩ tɛr a tɩɛrʋ á ŋá taabɛ?

⁹Abobe sob'a ɩ mɔlɛ zuo: ɩ̃ na na yel a gbɛr: “A fʋ yel-bebe suur dɩ na a”, bɩɩ ɩ̃ na na yel ʋ: “Ìr ɓáw a fʋ bʋ̃-gana cere nɩ a”?

¹⁰A na ɩ à ŋá a, nyɩ na bãw na kɛ́ a Nɩsaal Bie tɛr'ɩ a yel-bebe suur-dɩ-kʋ̀b fãw a tẽw zu ka.» Ɛ́ lɩɛb yel a gbɛr:

¹¹«Ɩ̃ yere na kʋ̀rɛ fʋ, ìr ɓáw a fʋ bʋ̃-gana kule nɩ a fʋ yir.»

¹²Ʋ tɩ ìr'a ɓáw a ʋ bʋ̃-gana daadaalɛ yi n a nɩbɛ za niŋé. A tɩ ɩ n nɔ-ɓãa-yel a bɛ zie, bɛ danɛ a Naaŋmɩn yere nɩ: «Tɩ bɛ dãw nyɛ̃ à á ŋá taabɛ ɩ.»

¹³A Yeezu tɩ lɛb'a yi cen a Galile kʋ̃ɔ-kpɛ̃ɛ nʋɔr, ɛ́ nɩbɛ za tɩ zɔrɛ waar a ʋ zie ʋ wa nyɔw nɩ bɛ a wulu.

¹⁴Ʋ na tɩ tɔlɛ a, ʋ nyɛ̃ nɩ Alfe bidɛb Levi, ʋ zɩ̃ a zuru-yar-deb zie. Ʋ tɩ yel ʋ na: «Tuur mɛ̃.» Ʋ tɩ ìr'a tu ʋ.

¹⁵Al pùorí, a Yeezu tɩ kpɛ n a Levi yir tɩ dɩ. Zuru-yar-dierbɛ nɩ yel-bebe dem yaga tɩ lãw nɩ nɩ a Yeezu nɩ a ʋ po-tuurbɛ dɩrɛ. A nɩbɛ bɛ ŋa taabɛ na tɩ tuur ʋ a tɩ sɩrɩ bɛ dɩ vuo ɩ.

¹⁶A Naaŋmɩn wulu sɛ-sɛbrbɛ bɛl na ɩ Faarizɩ̃ɛ mɩnɛ a, na tɩ nyɛ̃ a Yeezu ʋ lãw nɩ a yel-bebe dem nɩ a zuru-yar-dierbɛ dɩrɛ a, bɛ tɩ yel'ɩ a ʋ po-tuurbɛ: «Bʋ̃ʋ n'ʋ so ʋ lãw nɩ a zuru-yar-dierbɛ nɩ a yel-bebe dem dɩrɛ?»

¹⁷A Yeezu na tɩ wõ a a, ʋ yel bɛ na: «Nɩ-kpɛn bɛ tɛr dɔwta yel-ɩra ɩ, bàalbɛ nɛbɛ tɛr ʋ yel-ɩra. Ɩ̃ sɩrɩ bɛ wa k'ɩ̃ɩ wa bʋɔlɩ nɩbɛ na tɩɛrɛ kɛ́ bɛ ɩ n nɩ-mɩn a ɩ, nɩbɛ na bãw kɛ́ bɛ ɩ n yel-bebe dem a bʋɔlʋ n'a ɩ̃ wa.»

¹⁸Bibir kãw, a Zã po-tuurbɛ nɩ a Faarizɩ̃ɛ mɩnɛ tɩ ìr'a tɛr a mʋta-tuo. Lɛ n'a nɩbɛ bɛ mɩnɛ kãw tɩ wa sowri a Yeezu: «Bʋ̃ʋ n'ʋ so a Zã po-tuurbɛ nɩ a Faarizɩ̃ɛ mɩnɛ po-tuurbɛ tɛr a mʋta-tuo, ɛ́ a fʋ̃ʋ po-tuurbɛ bɛl bɛ tɛr a mʋta-tuo?»

¹⁹A Yeezu tɩ sɔw na yel bɛ à ŋá: «Nyɩ tɩɛrɛ kɛ́ a dɛb-sãan na tʋ̃ɔ́ na cãà be a kul-taa cuw dem sɔgɔ, ɛ́ bɛ tɛr a mʋta-tuo bɩɩ? Lɛn daar za a dɛb-sãan na be a bɛ sɔgɔ a, bɛ kʋ̃ tʋ̃ɔ́ tɛr a mʋta-tuo ɩ.

²⁰Ɛcɛ bio kãw na vɩɛ na bɛ wa ír a dɛb-sãan a bɛ zie, a lɛn daar a, bɛ mɩ̀ na tɛr'ɩ a mʋta-tuo.

²¹Bɛ bɛ dãw de pɛn-paala ɓe n kpar-kʋra ɩ, alɛ bɛ ɩ lɛ, a pɛn-paala mɩ́ tawr'ɩ a kpar-kʋra pɛn, a vʋɔr nɩ̃ɛ mɩ́ lɛb bãw yɛ̀lɩ.

²²Bɛ mɩ̀ bɛ dãw de divɛ̃-paala ƴãw wɔ-gbã-kore pʋɔ ɩ, alɛ bɛ ɩ lɛ a, a divɛ̃ mɩ́ pur'ɩ a wɔ-gban bɛr, a divɛ̃ nɩ a wɔ-gban za wɛ. Divɛ̃-paala za nɩ ʋ wɔ-gbã-paalɛ.»

²³Pɩ̃ɛnʋ-bibir kãw, a Yeezu tɩ tɔlɛ nɩ póru pʋɔ ka-bɩrmɛ̃ daar. A ʋ po-tuurbɛ tɩ ŋmarɛ nɩ a ci-zuru cere nɩ.

²⁴Lɛ n'a a Faarizɩ̃ɛ mɩnɛ tɩ yel a Yeezu: «Nyɛ̃, bʋ̃ʋ n'ʋ so a fʋ po-tuurbɛ ɩrɛ bom nɛ na bɛ sɛw kɛ́ bɛ ɩrɛ a pɩ̃ɛnʋ-bibir a?»

²⁵Ʋ tɩ sɔw bɛ na: «Nyɩ bɛ dãw kanɩ a lɛ a Daviir na tɩ ɩ a ɩ[4]? A lɛn daar a na tɩ fɛrɛ ʋ, ɛ́ kɔ̃ kpɩɛr ʋlɛ nɩ a ʋ taabɛ a ɩ?

²⁶A lɛ ʋ na tɩ kpɛ a Ŋmɩn-yir pʋɔ, a lɛn daar a Abɩataar na tɩ ɩ a bàwr-maal-kara a, de a dipɛ̃ al bɛ na mɩ́ bin a Sore niŋé a 'wɔb, ɛ́ mɩ̀ kʋ̀ a ʋ taabɛ bɛ 'wɔb a ɩ? Ɛcɛ a dipɛ̃ á ŋá a, bàwr-maalbɛ tɛwr nɛbɛ tɩ tɛr sɔ́r kɛ́ bɛ mɩ́ 'wɔb a.»

²⁷A Yeezu tɩ cãà na lɛb yel bɛ: «A pɩ̃ɛnʋ-bibir be n a nɩsaal maalʋ ƴãw, a nɩsaal bɛ n'ʋ be a pɩ̃ɛnʋ-bibir ƴãw ɛ.

²⁸Lɛ so a Nɩsaal Bie ɩ a pɩ̃ɛnʋ-bibir sob.»