Read Dagara, Northern Markɩ 3 Bible Online

Markɩ 3 - Dagara, Northern bible

Markɩ 3

¹A Yeezu tɩ lɛb'a kpɛ a puoru-dĩó. Nũ-kũu sob kãw tɩ be n a be.

²A Faarizɩ̃ɛ mɩnɛ tɩ piwre nɩ a Yeezu, kɛ́ ʋlɛ wa sanɩ a nɩr ŋa a pɩ̃ɛnʋ-bibir a, bɛ̃ɛ tɛr'ɩ ʋ ƴɛ̀rʋ.

³A Yeezu tɩ yel'ɩ a nũ-kũu sob: «Ìr wa a sɔwlɩsɔw ka.»

⁴Al pùorí ʋ yel bɛ: «Sɔ́r be n be kɛ́ bɛ maalɩ yel-vla bɩɩ bɛ maalɩ yel-faa a pɩ̃ɛnʋ-bibir ɩ? Bɛ́ faa nɩr bɩɩ bɛ kʋ ʋ?» Ɛcɛ bɛ tɩ zɩ̃ n gbili.

⁵A bɛ mimi-kõw tɩ ɩ ʋ nɩ kpɩɛrʋ yaga, ʋ nyɛ̃ suur jɩɛlɩ bɛ kʋlʋlʋ, ɛ́ yel a nũ-kũu sob nɛ: «Dɔl a nũu.» Ʋ tɩ dɔl'a, ɛ́ a nũu sanɩ.

⁶Bɛ na tɩ yi a puoru-dĩó a, a Faarizɩ̃ɛ mɩnɛ nɩ a Erɔdɩ nɩbɛ tɩ wõ n taa daadaalɛ, a lɛ bɛ na na ɩ kʋ a Yeezu a.

⁷A Yeezu nɩ a ʋ po-tuurbɛ tɩ yi n a be ɛ́ cen a Galile kʋ̃ɔ-kpɛ̃ɛ nʋɔr, ɛ́ nɩ-yaga yaga tɩ tu ʋ. Bɛ tɩ yi n a Galile nɩ Zude,

⁸nɩ Zerizalɛm nɩ Idume lowr, nɩ Zurdɛ̃ man gãwn tẽw, nɩ a Tɩ́ɩ̀r nɩ Sɩdɔ̃ ten, ɛ́ wa a ʋ zie, bɛ na tɩ wõ a yele al za ʋ na maalɛ a ƴãw.

⁹A Yeezu tɩ yel'ɩ a ʋ po-tuurbɛ kɛ́ bɛ cɔbrɩ gborle ʋ pɩɛlɩ, a zu-sɛbla nãá wa nɛbr ʋ a ƴãw.

¹⁰Ʋ tɩ sanɩ nɩ bàalbɛ yaga, lɛ so ŋa za na mɩ́ tɩ tɛr wʋlʋ a, mɩ́ tɩ zɔrɛ waar k'ʋʋ wa tɔ ʋ.

¹¹A kɔ̃tɔ̃-faar na mɩ́ tɩ nyɛ̃ ʋ a, a mɩ́ lo na gbĩ dume a ʋ pile ɛ́ cɩɩrɛ yere nɩ: «Fʋ̃ʋ n'ɩ a Naaŋmɩn Bie.»

¹²Ɛcɛ ʋ mɩ́ tɩ tanɩ a na yere nɩ k'aa ta ɩ a nɩbɛ bãw kɛ́ ʋlɛ n'ʋ ɛ.

¹³A al pùorí, a Yeezu tɩ do n tãw zu ɛ́ bʋɔlɩ a bɛlɩ dem ʋ na bɔbr a, bɛ wa a ʋ zie.

¹⁴Lɛ n'a ʋ tɩ zɩɩlɩ a nɩbɛ pie nɩ ayi lãw, ʋ na por a yúor kɛ́ Nɩ-toni a. Ʋ tɩ ɩ n à ŋá kɛ́ bɛ tʋ̃ɔ́ be a ʋ zie, ʋʋ tõ bɛ bɛ tɩ hiere a Yel-nʋ̃ɔ̀,

¹⁵tɛr'ɩ a kɔ̃tɔmɛ diw-bɛrʋ fãw.

¹⁶A Pie-nɩ-ayi bɛl ʋ na zɩɩlɩ a n'ɩ bɛ ŋa: Sɩmʋ̃, ʋ na por a yúor kɛ́ Pɩɛr a,

¹⁷Zebede bidɛbr Zakɩ nɩ a ʋ yɛb Zã, ʋ na por kɛ́ «Boanɛgɛsɩ» a, a pɛr lɛ kɛ́ saa bibiir,

¹⁸Ãdere, Filib, Batelemi, Matie, Toma, Alfe bidɛb Zakɩ, Tade, Sɩmʋ̃ Zelɔtɩ[5], pãa de nɩ

¹⁹a Zuda Ɩsɩkarɩɔtɩ, a ʋl na wa mɩl a Yeezu nyɔw tɩr a.

²⁰A Yeezu tɩ lɛb'a wa a yir. A nɩbɛ tɩ lɛb'a maal gbõ taa yaga tɩ zuo, a bɛ tɩ tɛr bɛ bʋ̃-dɩrɩ dɩb mɩ̀ ɛ.

²¹A ʋ yir dem na wa wõ a a, bɛ cen na kɛ́ bɛ tɩ tɛr ʋ, bɛ tɩ yere na: «A ʋ zu dam'a!»

²²A Naaŋmɩn wulu sɛ-sɛbrbɛ bɛl na tɩ yi a Zerizalɛm wa a, tɩ yere na: «A kɔ̃tɔ̃-nãà Bɛlɩzebul n'ʋ ìre ʋ!» Nɩ kɛ́: «A kɔ̃tɔmɛ nãà fãw n'a ʋ diwr'ɩ a kɔ̃tɔmɛ.»

²³A Yeezu tɩ bʋɔlɩ bɛ na wa lɔbr zʋkpaɩ kʋ̀rɛ bɛ yere nɩ: «Ŋmɩŋmɩn n'a Sɩtaana na tʋ̃ɔ́ lɛb ŋmɛlɩ diwr Sɩtaana?

²⁴Tẽw kãw nãà nɩbɛ wa bʋ́r lɛb ŋmɛlɩ zɛbr taa a, a tẽw nɛ naalʋ na lo na.

²⁵Ɛ́ yir-been nɩbɛ wa lɛb ŋmɛlɩ zɛbr taa a, a yir nɛ na lo na.

²⁶Sɩtaana wa lɛb ŋmɛlɩ zɛbr'ɩ ʋ tʋɔra a, ʋlɛ wa bʋ́r ʋ tʋɔra ziir ayi a, ʋ na lo na, a ʋ yele baar'a.

²⁷Nɩr kʋ̃ tʋ̃ɔ́ kpɛ gãdaa yir wob a ʋ bome, ʋlɛ bɛ wa dãw nyɔw ʋ 'lẽ baarɩ a ɩ. Ʋlɛ wa ɩ a lɛ baar'a n'a, ʋ pãa na tʋ̃ɔ́ wob a ʋ yir bome za.

²⁸Sɩza n'a ɩ̃ yere kʋ̀rɛ nyɩ, bɛ na dɩ n a nɩsaalbɛ yel-bebe za suur kʋ̀ bɛ, lãwnɩ a zʋmɛ al za bɛ nãà wa tʋ a Naaŋmɩn a.

²⁹Ɛcɛ, ʋlɩ sob nãà wa tʋ a Vʋʋrʋ Sõw zʋmɛ a, ʋ kʋ̃ páw a ʋ yel-bebe suur-dɩ-kʋ̀b towtow ɛ, a ʋ yel-bier bɛ tɛr baarʋ daar ɛ.»

³⁰Bɛ na tɩ yel kɛ́ kɔ̃tɔ̃-faa kãw n'ʋ ìre ʋ a n'a so ʋ ƴɛ̀r à à ŋá.

³¹A Yeezu mã nɩ a ʋ yɛbr tɩ ta na àr yẽw, ɛ́ tõ kɛ́ bɛ bʋɔl'ʋ.

³²Nɩ-yaga tɩ zɩ̃ na viiri koli ʋ, ɛ́ bɛ wa yel ʋ: «Alɛ! A fʋ mã nɩ a fʋ yɛbr nɩ a fʋ yeepuuli nɛbɛ be yẽw sowre fʋ.»

³³Ʋ tɩ sɔw bɛ na: «Ãa n'ɩ a ɩ̃ mã, ɛ́ tẽbowle n'ɩ a ɩ̃ yɛbr?»

³⁴Al pùorí, ʋ tɩ jɩ́r'ɩ a nɩbɛ za na zɩ̃ viiri koli ʋ a, ɛ́ yel: «Nyɛ̃ a ɩ̃ mã nɩ a ɩ̃ yɛbr.

³⁵Sob nɛ za na maalɛ a Naaŋmɩn pʋ-tɩɛrʋ a, ʋlɛ n'ɩ a ɩ̃ yɛb, ɩ̃ yeepuule nɩ ɩ̃ mã.»