Read Dagara, Northern Markɩ 6 Bible Online

Markɩ 6 - Dagara, Northern bible

Markɩ 6

¹A Yeezu tɩ yi n a be cen a ʋ tẽ-dɔwra pʋɔ, ɛ́ a po-tuurbɛ tɩ tuur ʋ.

²A pɩ̃ɛnʋ-bibir na wa vɩɛ a, ʋ tɩ kanɛ nɩ nɩ a nɩbɛ a puoru-dĩó. A nɩ-yaga na tɩ bɛrɛ wone a ʋ ƴɛ̀rʋ a, tɩ nyɔw nɩ nʋɔr yere nɩ: «Nyɩnɛ n'a ʋ páw à á ŋá? Ɛ́ bʋ̃ʋ yã-bãwfʋ n'ɩ à á ŋá bɛ na kʋ̀ ʋ a, nɩ a nɔ-ɓãa-yele á ŋá ʋ na maalɛ a?

³A dà-fɔwrɛ, a Marya bidɛb, bɛ tʋ̃ɔ́ n'ʋ ɛ? A Zakɩ nɩ Zoze nɩ Zid nɩ Sɩmʋ̃ yɛb ɛ? A ʋ yeepuuli bɛ tʋ̃ɔ́ be a tɩ zie ka ɩ?» A tɩ ɩ na bɛ faa lo a bɛ naaŋmɩn-sàw-deb pʋɔ.

⁴Lɛ n'a a Yeezu tɩ yel bɛ: «Naaŋmɩn-ƴɛ̀r-manɛ mɩ́ nyɛrɛ nɩ ƴãwfʋ zie za, ɛ́ tɩ cɛ a ʋ tẽ-dɔwra pʋɔ, a ʋ nɩbɛ nɩ a ʋ yir dem zie.»

⁵Ʋ bɛ tɩ maalɩ nɔ-ɓãa-yel kãw za a be ɩ, a bɛ ɩ bàalbɛ been been zu ʋ na ír nuru dɔwlɩ bɛ sanɩ a ɩ.

⁶A bɛ Naaŋmɩn bɛ-sàw-deb tɩ ɓãá ʋ nɩ nʋɔr. A Yeezu tɩ cɔlɛ nɩ a Nazarɛtɩ tẽ-kpɔwlɩ kanɛ nɩ a nɩbɛ.

⁷Ʋ tɩ bʋɔl'ɩ a Nɩ-toni pie nɩ ayi wa tĩ tone bɛ ayiri-yiri, ɛ́ kʋ̀ bɛ fãw a kɔ̃tɔ̃-faar zu.

⁸Ʋ tɩ ƴãw nɩ nʋɔr kʋ̀ bɛ yel: «Nyɩ ta tɛr bom kɔw nũu lo n a sɔ́r, ʋ bɛ ɩ dabɔl yõ ɩ. Nyɩ ta tɛr bʋ̃-dɩrɩ, nɩ cɛkɔlɔ, nɩ libie a nyɩ bʋ̃-zʋbɛ pʋɔ ɩ.

⁹Nyɩ ƴãw nafawr ɓɛwlɩkɛl cere nɩ, ɛ́ ta su kparɩ ayi dɔwlɩ taa ɩ.»

¹⁰Ʋ tɩ yel a ƴãw pʋɔ: «Nyɩmɛ wa ta zie kãw kpɛ yir pʋɔ a, nyɩ be a ʋlɩ yir nɛ pʋɔ ɛ́ gù a lɛn daar nyɩ nãà wa yi a ʋlɩ zie nɛ a.

¹¹Zie kãw dem bɛ wa sàw de nyɩ a, ɛ́ bɛ bɛrɛ wone a nyɩ ƴɛ̀rʋ a, nyɩɩm yi a be ɛ́ tɛb tɛb a nyɩ gbɛ́ɛ uuru bɛr, a na wul bɛ na kɛ́ bɛ sãw na.»

¹²Bɛ tɩ cen na tɩ hiere kʋ̀rɛ a nɩbɛ k'aa fɛr'a kɛ́ bɛ lɩɛbɩ a bɛ ɩb.

¹³Bɛ tɩ diwr'ɩ kɔ̃tɔmɛ yaga ɛ́ fʋɔrɛ bàalbɛ yaga nɩ kãá, bɛ mɩ́ tɩ lɛb kpɛ̃w.

¹⁴A nãà Erɔdɩ tɩ wõ na bɛ manɛ a Yeezu yele, a ʋ yúor na tɩ yi a ziir za a ƴãw. Nɩbɛ bɛ mɩnɛ tɩ yere na: «Zã-Bati n'ʋ lɛb yi a kũuni pʋɔ, alɛ so a nɔ-ɓãa-yele maalʋ fãw ʋ na tɛr a.»

¹⁵Ɛcɛ bɛ mɩnɛ tɩ yere na: «Eli n'ʋ!» Ɛ́ bɛ mɩnɛ yere: «naaŋmɩn-ƴɛ̀r-manɛ na ŋmɛ̃ taa nɩ a koro za dem naaŋmɩn-ƴɛ̀r-manɛ kãw a n'ʋ!»

¹⁶A Erɔdɩ na wa wõ à à ŋá a nɩbɛ na ƴɛ̀rɛ a, ʋ yel a: «A Zã nɛ ɩ̃ na ƴãw bɛ cɛ a zu ŋmãa a, ʋlɛ n'ʋ lɛb yi a kũu pʋɔ!»

¹⁷A Erɔdɩ sɩrɩ n'ʋ tɩ ƴãw bɛ nyɔw a Zã 'lẽ lɔb ƴãw a gaso pʋɔ, a ʋ yɛb Filib pɔw Erodɩadɩ ʋ na tɩ kul a ƴãw n'a ʋ tɩ ɩ a lɛ.

¹⁸Bʋ̃ʋ n'ʋ vɛ̃, a Zã tɩ yere na kʋ̀rɛ a Erɔdɩ: «A bɛ tɛr sɔ́r kɛ́ fʋ de a fʋ yɛb pɔw ɛ!»

¹⁹A lɛ n'a a Erodɩadɩ tɩ hɩ̃ɛn a Zã ɛ́ bɔbr a ʋ kʋb, ɛ́ bɛ tɩ tʋɔr ɛ.

²⁰Bʋ̃ʋ n'ʋ vɛ̃, a Erɔdɩ tɩ zɔrɛ nɩ a Zã, ʋ tɩ bãwnɩ a na ʋ na ɩ nɩ-mɩŋa nɩ nɩ-sõw a, ɛ́ ʋ bɛ tɩ sàwr ʋ ƴãw ɛ. Ʋlɛ wa tɩ bɛrɛ wone a Zã ƴɛ̀rʋ a, ʋ bɛ mɩ́ bãw lɛ za ʋ na na yel a ɩ, ɛ́ mɩ́ tɩ cãà nɔnɛ a ʋ ƴɛ̀rʋ bɛr-wob.

²¹Ɛcɛ a bibi-vla wa vɩɛ na. A nãà Erɔdɩ dɔwfʋ bibir cuw na wa ta a, ʋ bʋɔl'ɩ a ʋ tõ-tõ-nɩ-bɛrɛ nɩ a sojarɩ nɩ-bɛrɛ, nɩ a Galile tẽw nɩ-bɛrɛ a cuw dɩb ƴãw.

²²A Erodɩadɩ nɛ pɔwyaa tɩ kpɛ n a cuw dɩb dĩó tɩ ƴaw bɩnɛ vla, kɛ̀ nʋ̃ɔ̀ kpɛ a Erɔdɩ nɩ a ʋ cuw dem. A nãà tɩ yel'ɩ a powle: «Zɛlɩ bom nɛ za fʋ na bɔbr a, ɩ̃ɩ na kʋ̀ fʋ na!»

²³Ɛ́ tɩ pɔ yel a powle: «Ʋlɩ bom nɛ za fʋ na na zɛlɩ a, ɩ̃ na kʋ̀ fʋ na, a tẽw ŋa ɩ̃ na so a, põ-zɛ̃-taa saa n'ʋ a!»

²⁴A powle tɩ yi na tɩ sowri a ʋ mã: «Bʋ̃ʋ n'ʋ ɩ̃ na zɛlɩ?» A mã sɔw: «Zɛlɩ a Zã-Bati zu!»

²⁵A powle tɩ lɛb'a paw fɔ̃w kpɛ a nãà zie tɩ yel: «Ɩ̃ bɔbr'a k'aa ƴɛrɛŋa, fʋ ƴãw a Zã-Bati zu laa pʋɔ kʋ̀ m.»

²⁶A tɩ ɩ n pʋ-sãwna yaga a nãà zie, ɛcɛ ʋ na faa tɩ pɔ a ʋ cuw dem niŋé a, ʋ bɛ tɩ sàw zawrɩ ɛ.

²⁷Daadaalɛ, ʋ tõ n a ʋ soja kãw na mɩ́ gùre ʋ a, k'ʋʋ cen tɩ wa n a Zã zu. A soja tɩ cen na tɩ cɛ a Zã zu ŋmãa a gaso pʋɔ,

²⁸ɓáw ƴãw laa pʋɔ wa kʋ̀ a powle, ʋ de tɩ kʋ̀ a ʋ mã.

²⁹A Zã po-tuurbɛ na wa wõ a a, bɛ wa na wa ɓáw a ʋ ƴã-gan tɩ ũù.

³⁰A Yeezu Nɩ-toni tɩ lɛb'a wa ɓã taa a ʋ zie, ɛ́ manɩ a yele al za bɛ na ɩ a kʋ̀ ʋ, nɩ a kanʋ al za bɛ na kanɩ nɩ a nɩbɛ a.

³¹A Yeezu tɩ yel bɛ na: «Nyɩ wa tɩ taw yi tɩ tɛwr zie wɛja pʋɔ nyɩ tɩ pɩ̃ɛnɩ blã.» A nɩbɛ na tɩ waar a, nɩ a bɛl na tɩ lɛb kule a, tɩ yãwmɛ na zuo, a Yeezu nɩ a ʋ Nɩ-toni bɛ tɩ nyɛ̃ vuo na zɩ̃ dɩ mɩ̀ ɛ.

³²Lɛ n'a bɛ tɩ kpɛ a gbor pʋɔ cere a wɛja pʋɔ a bɛ tɛwr zie.

³³A nɩbɛ tɩ nyɛ̃ bɛ na bɛ na cere ŋmaarɛ vuo a, ɛ́ yaga bãw kɛ́ bɛlɛ nɛbɛ. Lɛ n'a bɛ tɩ yi a ten za, zɔrɛ 'lawr bɛ nɩ gbɛ́ɛ, tɩ de niwn ta a be a bɛ ƴãw.

³⁴A Yeezu na wa ta yire a gbor pʋɔ a, ʋ nyɛ̃ nɩ zu-sɛbla na bɛ tɛr vuo a. Nɩbaalʋ tɩ kpɛ ʋ nɩ a bɛ ƴãw, bɛ tɩ ɩ na mɛ̃ píir na bɛ tɛr cɩ̃ɩnɛ a. Ʋ tɩ nyɔw nɩ bɛ nɩ a kanʋ, kanɩ nɩ bɛ yel-yaga.

³⁵A zaanʋɔra na tɩ tarɛ a, a ʋ po-tuurbɛ tɩ taw na ta yel ʋ: «Wɛja pʋɔ n'ɩ a ka, ɛ́ zaanʋɔra tarɛ.

³⁶Bɛr a nɩbɛ bɛ cen a tẽ-kpɔwlɩ pʋɔ nɩ a gue pʋɔ tɩ da bʋ̃-dɩrɩ dɩ.»

³⁷Ɛcɛ a Yeezu tɩ sɔw bɛ na: «A nyɩɩm tɛɛ za, nyɩ kʋ̀ bɛ a bʋ̃-dɩrɩ bɛ dɩ.» Bɛ tɩ sowr'ʋ na: «Tɩ na cen na tɩ da dipɛ̃ nɩ bibie kɔbr ayi (200) sã-ya libie wa kʋ̀ bɛ bɛ 'wɔb bɩɩ?»

³⁸A Yeezu tɩ sowri bɛ na: «Dipɛ̃ a ŋmɩn n'a nyɩ tɛr? Nyɩ cen tɩ bɛl nyɛ̃.» Bɛ tɩ cen na tɩ sowri bãw, ɛ́ wa yel ʋ: «Dipɛ̃ anũu nɩ zʋ́mɛ́ ayi n'a.»

³⁹Ʋ tɩ yel bɛ na kɛ́ bɛ ƴãw a nɩbɛ ŋma gbile-gbile zɩ̃ a mɔ̃-ɓaar zu.

⁴⁰A nɩbɛ tɩ bʋ́r'ɩ kɔbr bɩɩ lɩz'a ayiri nɩ piir zɩ̃.

⁴¹A Yeezu tɩ de nɩ a dipɛ̃ anũu nɩ a zʋ́mɛ́ ayi al, úori kaa a salom, maalɩ, ɛ́ ŋma a dipɛ̃ kʋ̀ a ʋ po-tuurbɛ kɛ́ bɛ de kʋ̀ a nɩbɛ. Ʋ mɩ̀ tɩ lɛb'a de a zʋ́mɛ ayi al ŋma põ a nɩbɛ za.

⁴²A nɩbɛ za tɩ dɩ na tɩw.

⁴³Ɛ́ bɛ wob a dipɛ̃ nɩ a zʋ́mɛ́ ŋmaarɛ na cɛ a, paalɩ peli pie nɩ ayi kul'ɩ.

⁴⁴A nɩbɛ na tɩ 'wɔb a dipɛ̃ a, tɩ ɩ n dɛbr túr-anũu (5 000).

⁴⁵Ɛ́ daadaalɛ, a Yeezu tɩ fɛr'ɩ a ʋ po-tuurbɛ ƴãw bɛ kpɛ a gbor de niwn gãwnɛ a gãwn, a Bɛtɩsayida tẽw lowr, ɛ́ a ʋ tɔr za tɩ cãà ƴãwnɛ a nɩbɛ a sɔ́rɩ́.

⁴⁶Ʋ na wa ƴãw a nɩbɛ a sɔ́rɩ́ baar'a, ʋ do n tãw zu k'ʋʋ tɩ puori.

⁴⁷A zaanʋɔra na wa ta a, a gbor tɩ be n a kʋ̃ɔ-kpɛ̃ɛ sɔwlɩsɔw, ɛ́ a ʋ yõ tɩ cãà be a tẽsɔw.

⁴⁸Ʋ tɩ nyɛ̃ nɩ a ʋ po-tuurbɛ bɛ mɔnɛ a gbor hanɛ nɩ, a sɛsɛb na tɩ fure tuore bɛ a ƴãw. A zie na wa bɔbr vɩɛfʋ a, ʋ tɩ cere nɩ a kʋ̃ɔ zu waar a bɛ zie, ɛ́ tɩ zuore bɛ bɛrɛ.

⁴⁹Bɛ na tɩ nyɛ̃ ʋ ʋ cere a kʋ̃ɔ zu a, bɛ tɩɛrɛ kɛ́ nyãakpɩ̃ɩn n'ʋ ɛ́ ŋmɩɛr cɛlsɩ.

⁵⁰Bɛ za tɩ sɩrɩ na nyɛ̃ ʋ, ɛ́ dɛ̃bɩ̃ɛ tɩ nyɔw bɛ yaga za. A daadaalɛ, ʋ tɩ ƴɛ̀r'a sɔw bɛ yel: «Nyɩ nyɔw nyɩ mɩŋa! Mãa n'ʋ, nyɩ ta zɔrɛ dɛ̃bɩ̃ɛ ɩ!»

⁵¹Ʋ tɩ do na kpɛ a bɛ zie a gbor pʋɔ, ɛ́ a sɛsɛb tɩ ŋmãa. Nʋɔr tɩ ɓãá bɛ na bɛ dɩ vuo ɩ.

⁵²Bɛ bɛ tɩ bãw a dipɛ̃ nɔ-ɓãa-yel pɛr ɛ, a bɛ tɩɛrʋ bɛ tɩ yuo a yel ŋa bãwfʋ ƴãw ɛ.

⁵³Bɛ tɩ baa na gãw a kʋ̃ɔ-kpɛ̃ɛ tɔ a tẽw, a Zenezarɛtɩ vuo pʋɔ.

⁵⁴Bɛ na tɩ siwr a gbor pʋɔ wa báarɛ a, a nɩbɛ nyɛ̃ nɩ a Yeezu bãw ʋ daadaalɛ.

⁵⁵Bɛ tɩ zɔ na gʋɔrɩ a lõbowr-nũu ʋl za, tuo a bàalbɛ a bɛ bʋ̃-ganɩ zu cen nɩ a be bɛ na mɩ́ tɩ wõ k'ʋʋ be na a.

⁵⁶A ziir za ʋ na mɩ́ tɩ ta a, a tẽli, a tẽ-bɛrɛ bɩɩ a gue pʋɔ a, bɛ mɩ́ tɩ waar'ɩ nɩ a bàalbɛ wa gaalɛ a nɩ-yaga tuor-taa ziir ɛ́ zɛlɛ yãayãa, ʋʋ nɩ̃ɛ bɛr bɛ tɔ a ʋ kparʋ zʋɔrɛ. A bɛlɩ dem za na mɩ́ tɩ tɔ ʋ a, mɩ́ tɩ lɛb'a kpɛ̃w.