Read Dagara, Northern Luka 11 Bible Online

Luka 11 - Dagara, Northern bible

Luka 11

¹Bibir kãw, a Yeezu tɩ be n zie kãw puore. Ʋ na wa puori baar'a, a ʋ po-tuurbɛ ƴen sob tɩ zɛlɩ ʋ na yel: «Sore e, zànɩ nɩ tɩ a puoru mɛ̃ a lɛ a Zã-Bati na zànɩ nɩ a ʋ po-tuurbɛ a.»

²A Yeezu tɩ sɔw bɛ na yel: «Nyɩmɛ mɩ́ wa puore a, nyɩɩm yel: “Tɩ Sãà a, a nɩbɛ za, bɛ bãw kɛ́ fʋ̃ʋ n'ɩ a Naaŋmɩn na ɩ sõw[26] a, a fʋ naalʋ, ʋ wa.

³Kʋ̀ tɩ a bibi-vɩɛrɩ za dɩb tɩ na bɔbr a.

⁴Dɩ a tɩ yel-bebe suur kʋ̀ tɩ. Bʋ̃ʋ n'ʋ vɛ̃, a tɩɩm tɛɛ za mɩ̀ mɩ́ dɩ n suur kʋ̀ a bɛlɩ dem za na sãw tɩ a. Ta sàw a bɛ̀lʋ ta tɩ ɛ.”»

⁵A Yeezu tɩ cãà na yel kʋ̀ bɛ: «A nyɩ ƴen sob kãw wa ɩ mɛ̃ ʋ tɛr'ɩ bá, ɛ́ ìr tɩ páw ʋ tɩ̃ɩsɔw-bɩ̃ɩn zɛlɛ ʋ: “Ɩ̃ bá a, pɛ̃w mɛ̃ dipɛ̃ ata ka,

⁶a ɩ̃ bá kãw yi n sɔ́r pʋɔ wa ta, ɩ̃ɩ bɛ tɛr bom na kʋ̀ ʋ ɛ.”

⁷À ŋà sob wa be a dĩó ɛ́ yel ʋ: “Ta bàlɛ mɛ̃ ɩ! A pan pàw na baarɩ, mãa nɩ a ɩ̃ bibiir gã na, ɩ̃ kʋ̃ tʋ̃ɔ́ ìr kʋ̀ b dipɛ̃ ɩ.”

⁸Mãa n'ʋ yere kʋ̀rɛ nyɩ: ʋlɛ saa bɛ wa ìr kʋ̀ ʋ a báalʋ zũú a, ʋ na ìr'a, a niwn a ʋ bá na sɔbr ʋ a ƴãw, ʋʋ na kʋ̀ ʋ nɩ a alɩ bome nɛ za ʋ na bɔbr a.

⁹Lɛ so, mãa n'ʋ yere kʋ̀rɛ nyɩ: nyɩ zɛlɛ, bɛ na kʋ̀ nyɩ na, nyɩ bɔbr, nyɩ na páw na, nyɩ kpàwrɛ a pan, bɛ na yuo nyɩ na.

¹⁰Bʋ̃ʋ n'ʋ vɛ̃, sob nɛ za na zɛlɛ a, ʋ mɩ́ páw na, sob nɛ za na bɔbr a, ʋ mɩ́ nyɛ̃ na, sob nɛ za na kpàwrɛ a pan a, bɛ mɩ́ yuo ʋ na.

¹¹A nyɩ pʋɔ a, sãà buor'ʋ a bie na zɛlɛ zʋ́m, ʋ nyɔw waab kʋ̀ ʋ?

¹²Bɩɩ ʋ na zɛlɛ nɔ̃-jɛl, ʋ kʋ̀ ʋ nãw?

¹³A lɛ pʋɔ, nyɩɩm na ɩ nɩ-faar a, nyɩmɛ wa bãw bʋ̃-vɩɛlɩ mɩ́ kʋ̀ a nyɩ bibiir a, ŋmɩŋmɩn za n'a a nyɩ Sãà na be a tẽ-vla pʋɔ a, kʋ̃ kʋ̀ a Vʋʋrʋ Sõw a bɛlɩ dem na zɛlɛ ʋ a?»

¹⁴Bibir kãw, a Yeezu tɩ diwr'ɩ kɔ̃tɔn nɩr kãw zie. A kɔ̃tɔn tɩ ɩ n a nɩr ʋl ʋ ɩ wõw-gbil, kʋ̃ tʋ̃ɔ́ ƴɛ̀r ɛ. A kɔ̃tɔn na wa yi baar'a, a sob nɛ tɩ ƴɛ̀rɛ na, a tɩ ɩ nɔ-ɓãa-yel a zu-sɛbla zie.

¹⁵Ɛcɛ a nɩbɛ pʋɔ a, bɛ mɩnɛ tɩ yere na: «A kɔ̃tɔmɛ nãà, bɛ na bʋɔlɛ Bɛlɩzebul a, fãw n'a ʋ diwr'ɩ a kɔ̃tɔmɛ!»

¹⁶Bɛ mɩnɛ na tɩ bɔbr kɛ́ bɛ ɩ ʋ kaa a, tɩ yel ʋ na k'ʋʋ maalɩ yel na ɩ bãwfʋ sãá a, wul kɛ́ Naaŋmɩn zie n'a ʋ yi wa.

¹⁷A Yeezu na tɩ bãw a bɛ tɩɛrʋ á ŋá a, ʋ yel bɛ na: «Tẽw kãw nãà nɩbɛ wa bʋ́r zɛbr taa a, a ʋlɩ tẽw nɛ wɩɛr'ɩ sãwfʋ, ɛ́ a yie lore dɔwlɛ taa.

¹⁸A Sɩtaana mɩ̀ wa bʋ́r lɛb ŋmɛlɩ zɛbr'ɩ ʋ tʋɔra a, ŋmɩŋmɩn n'a a ʋ naalʋ-tẽw na àr, nyɩ na yel kɛ́ Bɛlɩzebul fãw n'a ɩ̃ diwr'ɩ a kɔ̃tɔmɛ a.

¹⁹Ɛ́ alɛ wa ɩ Bɛlɩzebul n'ʋ kʋ̀ m a fãw ɩ̃ diwr'ɩ a kɔ̃tɔmɛ a, a nyɩ po-tuurbɛ, ãa n'ʋ kʋ̀ bɛ a fãw bɛ mɩ̀ diwr'ɩ a kɔ̃tɔmɛ? Lɛ so, bɛl tɛɛ za nɛbɛ na dɩ n nyɩ a ƴɛ̀rʋ yel a nyɩ sãwna.

²⁰Alɛ ɩrɛ mɛ̃ bom'ʋ a, Naaŋmɩn fãw n'a ɩ̃ diwr'ɩ a kɔ̃tɔmɛ, a wul kɛ́ a Naaŋmɩn Naalʋ ta nyɩ na.

²¹Nɩr na kpɛmɛ tɛr zɛbr bome gù n a ʋ yir a, bom bɛ ɩrɛ a ʋ bʋ̃-tɛrɩ ɛ.

²²Ɛcɛ nɩr na kpɛmɛ zuo ʋ a, wa zɛb tʋ̃ɔ́ ʋ a, ʋ mɩ́ faa nɩ a ʋ zɛbr bome na mɩ́ tɩ ɩ ʋ bɛr yã a, ɛ́ põ a ʋ bʋ̃-tɛrɩ za.

²³Sob nɛ na bɛ lãwnɩ mɛ̃ a, ʋ ɩ n ɩ̃ dɔ̃ sob, ɛ́ sob nɛ na bɛ lãw nɩ mɛ̃ kʋɔlɛ ɓanɛ taa a, ʋ ŋmɩɛr'a yaarɛ.»

²⁴«A kɔ̃tɔ̃-faa wa yi kɛ́ bɛr nɩr a, a kɔ̃tɔn ʋl mɩ́ zɔrɛ na viire gʋɔr a wɛja-kpalɛ pʋɔ bɔbr pɩ̃ɛnʋ zie. Ʋ na mɩ́ wa bɔ gu a, ʋ mɩ́ yel'ɩ ʋ tʋɔra: “Ɩ̃ na lɛb'a cen a ɩ̃ yir pʋɔ, a be ɩ̃ na tɩ be wa yi a.”

²⁵Ʋ mɩ́ lɛb'a cen tɩ nyɛ̃ a nɩr, ʋ ɩ mɛ̃ dĩo bɛ na pɩɩrɩ ɛ́ cɔbrɩ vla bɛr a.

²⁶A lɛ n'a ʋ mɩ́ cen tɩ tɛr kɔ̃tɔ̃-faar ayopõi, na kpɛ faa zuo ʋ a, bɛ wa kpɛ a be so a zie. Lɛ n'a a nɩr ŋa yele mɩ́ lɛb bãw kpɛ faa zuo a dãwdãw.»

²⁷A Yeezu na tɩ ƴɛ̀rɛ à à ŋá a, pɔw kãw tɩ zɛw nɩ kɔkɔr a nɩbɛ sɔgɔ yel ʋ: «Zu-nʋ̃ɔ̀ sob'ɩ a pɔw ŋa púorí fʋ na gã wa yi, ɛ́ ƴɛnɩ a bɩr a!»

²⁸Ɛcɛ a Yeezu ʋl tɩ sɔw ʋ na: «Zu-nʋ̃ɔ̀ dem nɩ̃ɛ n'ɩ a bɛlɩ dem na mɩ́ wõ a Naaŋmɩn ƴɛ̀rʋ, ɛ́ de tɛr a!»

²⁹A zu-sɛbla na tɩ gbone taa a Yeezu zie a, ʋ yel'a kʋ̀ bɛ: «Nɩ-faar'ɩ a dɩ̃a nɩbɛ bɛ ŋa! Bɛ bɔbr'a kɛ́ bɛ nyɛ̃ bãwfʋ na wul a Naaŋmɩn tome a, ɛcɛ bɛ bɛ be za na nyɛ̃ bãwfʋ, a bɛ ɩ a Zonasɩ bãwfʋ ɛ.

³⁰Bʋ̃ʋ n'ʋ vɛ̃, mɛ̃ a lɛ a Zonasɩ[27] na tɩ ɩ a Naaŋmɩn bãwfʋ a Nɩnɩɩvʋ tẽw nɩbɛ zie a, lɛ n'a a Nɩsaal Bie mɩ̀ na ɩ a Naaŋmɩn bãwfʋ a dɩ̃a nɩbɛ bɛ ŋa zie.

³¹A ƴɛ̀rʋ-maalʋ bibir a, a Saa-pɛrɩ́-dʋrʋ-lowr pɔw-nãà na ìr a àr tori a dɩ̃a nɩbɛ bɛ ŋa, ɛ́ yel a bɛ sãwna. Bʋ̃ʋ n'ʋ vɛ̃, ʋ yi n zi-zãána ɛ́ wa bɛr wõ a Salomɔ̃ yã-bãwfʋ ƴɛ̀rʋ. Ɛcɛ nɩr be n a ka zuo a Salomɔ̃.

³²A ƴɛ̀rʋ-maalʋ bibir a, a Nɩnɩɩvʋ tẽw dem na ìr a àr tori a dɩ̃a nɩbɛ bɛ ŋa, ɛ́ yel a bɛ sãwna. Bʋ̃ʋ n'ʋ vɛ̃, a Nɩnɩɩvʋ tẽw dem na tɩ wõ a Zonasɩ kanʋ a, bɛ lɩɛb'ɩ a bɛ ɩb. Ɛcɛ nɩr be n a ka zuo a Zonasɩ.»

³³«Bɛ bɛ dãw tɔ̃w fɩ̃tɩlɛ sɔwlɩ bɩɩ de gara vɔblɩ pàw ɛ. Bɛ mɩ́ dɔwlɩ ʋ nɩ a ʋ bʋ̃-dɔwla zu, ʋ caalɛ a bɛlɩ dem na kpɩɛr a.

³⁴A fʋ mimie n'a ɩ a fʋ ƴã-gan fɩ̃tɩlɛ: a fʋ mimie wa ɩ mimi-kpɛn a, a fʋ ƴã-gan za mɩ́ be n cãà pʋɔ. Ɛcɛ a fʋ mimie wa ɩ mimi-sãwnɩ a, a fʋ ƴã-gan za mɩ́ be n lige pʋɔ.

³⁵A na ɩ à ŋá a, maal bɛl vla, a cãà na be a fʋ pʋɔ a taa wa ɩ lige ɩ.

³⁶Lɛ so a fʋ ƴã-gan za wa be a cãà pʋɔ a, ɛ́ a ʋ zie kãw za bɛ be lige pʋɔ a, ʋ za na be n a cãà pʋɔ mɛ̃ a lɛ a fɩ̃tɩlɛ cãà na mɩ́ caalɩ fʋ nɩ a ʋ cãà na nyɩwrɛ a.»

³⁷A Yeezu na tɩ ƴɛ̀r baar'a, Faarizɩ̃ɛ kãw tɩ bʋɔl'ʋ nɩ a ʋ yir, dɩb ƴãw. Ʋ tɩ kpɛ n a Faarizɩ̃ɛ ʋl yir zɩ̃ a dɩb ƴãw.

³⁸A Yeezu na bɛ tɩ pɛ́w a nuru mɛ̃ a lɛ a Zifʋ mɩnɛ na mɩ́ ɩ a, a tɩ ɩ n nɔ-ɓãan a Faarizɩ̃ɛ nɛ zie.

³⁹Lɛ n'a a Sore tɩ yel ʋ: «A nyɩɩm Faarizɩ̃ɛ mɩnɛ a, à ŋá n'a nyɩ ŋmɛ̃: nyɩ mɩ́ pɛ́w nɩ a koli-nyúura nɩ a laa zikur a vɩɛl, ɛcɛ a nyɩ pʋɔ nɩ̃ɛ paalɩ nyãnyu-tɩɛrʋ nɩ po-to-ɩb.

⁴⁰Dãbole bɛ ŋa! A sob nɛ na ír a bome na mɩ́ sãá bɛ nyɛ̃ a, ʋlɛ bɛ n'ʋ mɩ̀ ír a nɩsaal pʋɔ ɩ?

⁴¹Nyɩ nɩ̃ɛ de a nyɩ koli-nyúura pʋɔ bome nɩ a nyɩ laar pʋɔ bome sõw nɩ nɩ-kɔmɛ, ɛ́ bom za na ɩ n bʋ̃-vla a nyɩ zie.

⁴²Baw-bio dem n'ɩ nyɩ Faarizɩ̃ɛ mɩnɛ ɛ! A zɛ-va-foli al na mɩ́ bul a tʋɔra, bɛ bʋɔlɛ mãtɩ nɩ uru a, lãwnɩ zɛ-va-nyuure nɩ zɛ-va-bʋʋrɛ za nyɩ na mɩ́ kɔ a, nyɩ mɩ́ põ a nɩ ziir pie ír a zi-been sob kʋ̀ a Naaŋmɩn, ɛ́ nɩ̃ɛ bɛ mɩ́ cɛlɛ a yel-mɩnʋ nɩ a Naaŋmɩn nɔ̃wfʋ zie ɩ. Ɛcɛ al pùor'a a mɩ́ fɛr kɛ́ nyɩ tu, ɛ́ ta bɛr a ŋmãa á ŋá ɩ.

⁴³Baw-bio dem n'ɩ nyɩ Faarizɩ̃ɛ mɩnɛ ɛ! Nyɩ nɔnɛ nɩ a nɩ-bɛrɛ dà-kɔwr zu zɩma a puoru-dirú, ɛ́ nɔnɛ kɛ́ a nɩbɛ puore nyɩ a nɩ-yaga tuor-taa ziir.

⁴⁴Baw-bio dem n'ɩ nyɩ! Nyɩ ŋmɛ̃ na mɛ̃ yarʋ na bɛ mɩ́ sãá, fʋ bɛ bãwnɩ a ɛ́ do nɛb tɔl a!»

⁴⁵A lɛ n'a Naaŋmɩn wulu bãw-bãw-kara kãw tɩ yel a Yeezu: «Wul-wul-kara a, fʋ̃ʋ wa ƴɛ̀rɛ à ŋá a, tɩɩm n'a fʋ mɩ̀ tʋʋr ƴãw pʋɔ!»

⁴⁶A Yeezu tɩ sɔw na: «A nyɩɩm Naaŋmɩn wulu bãw-bãw-karɩ, baw-bio dem n'ɩ nyɩ: nyɩ mɩ́ 'lẽ nɩ tuor bɛ dɩ vuo ɩ, tuo a nɩbɛ bɛ ìre nɩ guur, ɛ́ nyɩ kʋ̃ sàw ír nobir tɔ n a kaa ɩ.

⁴⁷Baw-bio dem n'ɩ nyɩ! Nyɩ mɩ́ mɛ n a naaŋmɩn-ƴɛ̀r-manbɛ yarʋ a vɩɛl, zɩ̃ kɛ́ a nyɩ sãàkʋm-kore nɛbɛ kʋ bɛ.

⁴⁸À ŋá n'a nyɩ mɩ́ wul kɛ́ nyɩ sàw na de a nyɩ sãàkʋm-kore ɩ-ɩrɩ. Bɛl kʋ n a naaŋmɩn-ƴɛ̀r-manbɛ, ɛ́ nyɩɩm pãa maalɛ a naaŋmɩn-ƴɛ̀r-manbɛ yarʋ.

⁴⁹Alɛ n'a so, a Naaŋmɩn na bãw bom za a, tɩ yel a nyɩ ƴãw: “Ɩ̃ na tõ n a ɩ̃ ƴɛ̀r-manbɛ nɩ a ɩ̃ nɩ-toni a bɛ zie. Bɛ na kʋ n bɛ mɩnɛ, ɛ́ dɔwrɩ bɛ mɩnɛ.”

⁵⁰À ŋá n'a a tu, kɛ́ Naaŋmɩn tʋ̃ɔ́ kʋ̀ dɔwrʋ a dɩ̃a nɩbɛ bɛ ŋa, a naaŋmɩn-ƴɛ̀r-manbɛ bɛl za a bɛ sãàkʋm-kore na kʋ a tẽw pɛr-tib daar wa tɔ a dɩ̃a a ƴãw,

⁵¹a na tĩ a Abɛl tɩ ta n a Zakari bɛ na kʋ a bàwr-maal-kuur nɩ a zi-sõw cará a. Yel-mɩŋa sɩza, ɩ̃ yere na kʋ̀rɛ nyɩ, a dɩ̃a nɩbɛ bɛ ŋa na nyɛ̃ nɩ dɔwrʋ a yele á ŋá ƴãw.

⁵²Baw-bio dem n'ɩ nyɩ, Naaŋmɩn wulu bãw-bãw-karɩ ɩ! Nyɩ sɔwl'ɩ a Naaŋmɩn yele bãwfʋ dɩ̃dɔr pĩi. A nyɩɩm tɛɛ za bɛ kpɩɛr ɛ, ɛ́ mɩ̀ bɛ lɛb sàwr a bɛlɩ dem na bɔbr a kpɛb a, ɛ́ bɛ kpɛ ɩ.»

⁵³Ʋ na wa yi a be a, a Naaŋmɩn wulu bãw-bãw-karɩ nɩ a Faarizɩ̃ɛ mɩnɛ tɩ àr'ɩ ʋ nɩ ʋ gbɛ́ɛ, ɛ́ sowre ʋ sowru yel-pɛ-bʋʋrɛ za ƴãw.

⁵⁴Bɛ tɩ jɩnɛ ʋ na bɔbr k'ʋʋ ɩrɛ wa ƴɛ̀r tuli bɛ nyɔw ʋ.