Read Dagara, Northern Luka 13 Bible Online

Luka 13 - Dagara, Northern bible

Luka 13

¹A lɛn daar, nɩbɛ kãw tɩ wa na wa páw a Yeezu, manɩ a Galile tẽw nɩbɛ bɛl yele kʋ̀ ʋ, a bɛl a Pɩlatɩ na tɩ ƴãw bɛ kʋ bàwr-maalʋ zu a.

²A Yeezu tɩ sɔw bɛ na yel: «Nyɩ tɩɛrɛ kɛ́ a Galile nɩbɛ bɛ ŋa ɩ n yel-bi-bɛrɛ dem zuo a Galile tẽw dem bɛl na cɛ a, so a dɔwrʋ ta bɛ bɩɩ?

³Mãa yel nyɩ kɛ́ lɛ bɛ n'a ɩ. Ɛcɛ nyɩmɛ bɛ wa lɩɛbɩ a nyɩ ɩb a, nyɩ na kpi n nyɩ za mɛ̃ a bɛl a.

⁴Ɛ́ a nɩbɛ pie nɩ ani bɛl a Silowe yir-cõcowla na lo dĩ kʋ a, nyɩ tɩɛrɛ kɛ́ a bɛ sãwna zuo nɩ a Zerizalɛm tẽw dem za sãwna bɩɩ?

⁵Mãa yel nyɩ kɛ́ lɛ bɛ n'a ɩ. Ɛcɛ nyɩmɛ bɛ wa lɩɛbɩ a nyɩ ɩb a, nyɩ na kpi n nyɩ za mɛ̃ a bɛl a.»

⁶Al pùorí, a Yeezu tɩ lɔb'ɩ zʋkpar ŋa kʋ̀ bɛ: «Nɩr kãw tɩ sɛl'ɩ kãkã-tɩɛ a ʋ divɛ̃ tɩɩr púo pʋɔ. Ʋ tɩ wa na k'ʋʋ wa pɔr a kãkamɛ, bɛ wa nyɛ̃ a ɩ.

⁷Lɛ n'a ʋ tɩ yel a divɛ̃ tɩɩr po-kʋ́ɔrɛ: “Nyɛ̃! yome ata n'ɩ yũona, ɩ̃ na mɩ́ wa k'ɩ̃ɩ wa pɔr kãkamɛ a tɩɛ ŋa zu, ɛ́ bɛ mɩ́ wa nyɛ̃ a a. Cɛ ʋ bɛr, bʋ̃ʋ ƴãw n'a ʋ sãwnɛ a tẽsɔw bɛrɛ?”

⁸Ɛcɛ a po-kʋ́ɔrɛ tɩ sɔw na: “Zu-sob i, cãà bɛr ʋ a yũon ŋa, ɩ̃ yɔw yɔw a tanɛ a sɩɛ ƴãw ɛ́ ƴãw pʋɔrʋ.

⁹A mɩnɛ kãw ʋ nãà wɔ̃ na, alɛ bɛ ɩ lɛ a, fʋ pãa na ƴãw na bɛ cɛ ʋ bɛr.”»

¹⁰A Zifʋ mɩnɛ pɩ̃ɛnʋ-bibir kãw, a Yeezu tɩ kpɛ n a puoru-dĩó kanɛ nɩ a nɩbɛ.

¹¹Pɔw kãw tɩ be n a be ɩ nɩ-kɔw: yome pie nɩ ani tɩ n'ɩ à ŋá, kɔ̃tɔ̃-faa na tɩ nyɔw ʋ ka gùr, ʋ kʋ̃ lɛb tʋ̃ɔ́ dɔl towtow a.

¹²A Yeezu na wa nyɛ̃ ʋ a, ʋ bʋɔl'ʋ na ɛ́ yel ʋ: «Pɔw i, a fʋ bàalʋ baar'a.»

¹³Ʋ tɩ ír'ɩ nuru dɔwlɩ a pɔw zu, a daadaalɛ a pɔw dɔl ìr, nyɔw a Naaŋmɩn danʋ.

¹⁴Ɛcɛ a puoru-dĩo nɩ-kpɛ̃ɛ tɩ nyɛ̃ nɩ suur, a Yeezu na tɩ sanɩ nɩr a pɩ̃ɛnʋ-bibir a ƴãw. A nɩ-kpɛ̃ɛ ŋa tɩ yel'ɩ a zu-sɛbla: «Bibie ayʋɔb'a be be a tome ƴãw, nyɩ mɩ́ wa a bibie á ŋá pʋɔ wa ƴãw bɛ sanɩ a nyɩ bàalʋ. Nyɩ ta mɩ́ wa a pɩ̃ɛnʋ-bibir ɛ.»

¹⁵A Sore tɩ sɔw ʋ na: «Nɩsaal-libelibe bɛ ŋa! A nyɩ buor sob'ʋ bɛ mɩ́ cɛ̀r a ʋ náab bɩɩ a ʋ bõw cen nɩ tɩ ƴãw a kʋ̃ɔ a pɩ̃ɛnʋ-bibir?

¹⁶Ɛcɛ a pɔw ŋa na ɩ a Abraham bʋʋrɛ pɔwyaa, a Sɩtaana 'lẽ yome pie nɩ ani n'ɩ à ŋá a, a bɛ tɩ sɛw k'ɩ̃ɩ cɛ̀r ʋ bɛr a pɩ̃ɛnʋ-bibir ɛ?»

¹⁷Ʋ na tɩ ƴɛ̀r à à ŋá a, vĩ tɩ nyɔw nɩ a ʋ dɔ̃ dem, ɛ́ nʋ̃ɔ̀ ɩrɛ a zu-sɛbla za, a tõ-vɩɛlɩ za ʋ na tɩ tone a ƴãw.

¹⁸A lɛ n'a a Yeezu tɩ yel: «Bʋ̃ʋ n'ʋ a Naaŋmɩn Naalʋ ŋmɛ̃ taa nɩ? Bʋ̃ʋ n'ʋ ɩ̃ na de ʋ man cɔwr'ɩ?

¹⁹Ʋ ŋmɛ̃ na taa nɩ seneve bir[29] nɩr na bʋ̀r zaadɛ̃ pʋɔ a. Ʋ bul'a, ɩ tɩɛ, lili wóbr a cowr a ʋ wuli zu.»

²⁰A Yeezu tɩ yel'a ƴãw pʋɔ: «Bʋ̃ʋ n'ʋ ɩ̃ na de a Naaŋmɩn Naalʋ man cɔwr'ɩ?

²¹Ʋ ŋmɛ̃ na mɛ̃ dãbɩl pɔw na ƴãw peli nɛ́ɛ ata zɔ̃ pʋɔ, ɛ́ gù a zɔ̃ za ʋ na bu a tɩ ìr a.»

²²A Yeezu na tɩ lo a sɔ́r cere a Zerizalɛm a, ʋ tɩ tuur'a yire a tẽ-bɛrɛ nɩ a tẽli pʋɔ kanɛ nɩ a nɩbɛ.

²³Lɛ n'a nɩr kãw tɩ sowr'ʋ: «Sore e, nɩbɛ blãlɛ tɛwr nɛbɛ na nyɛ̃ a faafʋ bɩɩ?» A Yeezu tɩ yel bɛ na:

²⁴«Nyɩ ƴãw fãw tu a dɩ̃dɔ-fɩɩra ƴãw kpɛ, alɛ bɛ ɩ lɛ, mãa n'ʋ yere kʋ̀rɛ nyɩ: nɩ-yaga na bɔbr'a kɛ́ bɛ kpɛ, ɛ́ kʋ̃ tʋ̃ɔ́ ɩ.»

²⁵«A yir sob wa ìr pàw a pan baar'a, nyɩmɛ wa be a yẽw ɛ́ kpàwrɛ a pan yere nɩ: “Sore e, yuo tɩ”, ʋ na sɔw nyɩ na: “Ɩ̃ bɛ bãw nyɩ yib zie ɩ.”

²⁶A lɛn daar, nyɩ na yere na: “Tɩ dɩ na ɛ́ nyũ a fʋ niŋé, ɛ́ fʋ kanɩ nɩ tɩ a tɩ tuor-taa ziir.”

²⁷Ʋ na sɔw nyɩ na: “Ɩ̃ bɛ bãw nyɩ yib zie ɩ, nyɩ taw zaa a ɩ̃ zie, nyɩɩm na maalɛ yel-faar a.”

²⁸Nyɩ na kone na 'wɔbr'ɩ nyɩmɛ, a lɛn daar nyɩ nãà wa nyɛ̃ a Abraham nɩ a Ɩzaakɩ nɩ a Zakɔb nɩ a naaŋmɩn-ƴɛ̀r-manbɛ za bɛ be a Naaŋmɩn Naalʋ pʋɔ, ɛ́ bɛ diw a nyɩɩm bɛr yẽw a.

²⁹Nɩbɛ na yi n a tẽw zu ziir za wa pʋɔ a Naaŋmɩn Naalʋ dɩb pʋɔ.

³⁰Lɛn daar'a bɛ na nyɛ̃ po-pàwrbɛ bɛ lɩɛbɩ niw-dierbɛ ɛ́ niw-dierbɛ lɩɛbɩ po-pàwrbɛ.»

³¹A pɛr nɛ pʋɔ, Faarizɩ̃ɛ bɛ mɩnɛ tɩ taw na pɩɛl a Yeezu ɛ́ yel ʋ: «Bɛr a ka, ɛ́ tɔl cen zi-yũo, Erɔdɩ bɔbr'ɩ a fʋ kʋb.»

³²A Yeezu tɩ sɔw bɛ na: «Nyɩ cen tɩ yel a cɩbɛ sob ŋa: “Ɩ̃ diwr'ɩ kɔ̃tɔmɛ ɛ́ sanɛ bàalbɛ dɩ̃a nɩ bio, ɛ́ a bibie ata sob a, a na baar'a.”

³³Ɛcɛ a fɛr'a k'ɩ̃ɩ cãà lo a ɩ̃ sɔ́r cere dɩ̃a nɩ bio nɩ deyere, bʋ̃ʋ n'ʋ vɛ̃, a bɛ sɛw kɛ́ naaŋmɩn-ƴɛ̀r-manɛ kpi zi-yũo a bɛ ɩ a Zerizalɛm ɛ.

³⁴Zerizalɛm i! Zerizalɛm i! Fʋ̃ʋ na kʋrɛ a naaŋmɩn-ƴɛ̀r-manbɛ, ɛ́ lɔbr'ɩ kʋsɛbɛ kʋrɛ a bɛlɩ dem a Naaŋmɩn na tone a fʋ zie a! Gb'aa a ŋmɩn za n'a ɩ̃ tɩ bɔbr k'ɩ̃ɩ ɓã a fʋ biir taa, mɛ̃ nɔ-mã na mɩ́ kʋɔlɩ a ʋ lili-pɩɩlɛ ɓã taa a ʋ bɩgɛ pile a, ɛ́ nyɩ bɛ sàw!

³⁵Alɛ so, Naaŋmɩn na zawr'ɩ a nyɩ yir bɛr kʋ̀ nyɩ. Ɩ̃ɩ yere na kʋ̀rɛ nyɩ, nyɩ kʋ̃ lɛb nyɛ̃ m ɛ́ tɩ ta a lɛn daar nyɩ nãà wa yel: “A Naaŋmɩn, ʋ maalɩ a sob nɛ na waar a Sore yúor ƴãw a!”»