Read Dagara, Northern Luka 18 Bible Online

Luka 18 - Dagara, Northern bible

Luka 18

¹A Yeezu tɩ lɔb'ɩ zʋkpar ŋa, k'ʋʋ wul a ʋ po-tuurbɛ a na fɛr kɛ́ bɛ puore kʋralɛ ɛ́ taa bɛrɛ towtow a.

²Ʋ tɩ yel bɛ na: «Ƴɛ̀r-maalɛ kãw tɩ be n tẽw kãw pʋɔ. Ʋ bɛ tɩ zɔrɛ Naaŋmɩn ɛ, ʋʋ tobr bɛ tɩ ka nɩr za ƴãw ɛ.

³A ʋlɩ tẽw nɛ pʋɔ, pɔw-kʋɔr kãw mɩ̀ tɩ be n be, mɩ́ tɩ wa zɛlɛ ʋ yere nɩ: “Maalɩ a ƴɛ̀rʋ wul a ɩ̃ yel-mɩŋa, mãa nɩ a ɩ̃ dɔ̃ sob cara pʋɔ.”

⁴A ƴɛ̀r-maalɛ tɩ zawr'a, a tɩ cɛlɩ. Al pùorí, ʋ wa yel ʋ tʋɔra: “Mãa saa bɛ zɔrɛ Naaŋmɩn, ɩ̃ɩ tobr bɛ ka nɩr za ƴãw a,

⁵ɛcɛ a pɔw-kʋɔr ŋa na bàlɛ mɛ̃ a, ɩ̃ na maal'ɩ a ƴɛ̀rʋ wul a ʋ yel-mɩŋa, ʋ ta waar kʋralɛ wa sɔbr mɛ̃ niwn ɛ!”»

⁶A Sore tɩ yel a ƴãw pʋɔ: «Nyɩ maal wõ vla a lɛ a ƴɛ̀r-maal-faa sob ŋa na yel a.

⁷Ɛ́ a Naaŋmɩn ʋl kʋ̃ wul a ʋ nɩ-kaa-íri yel-mɩŋa ɩ, bɛl na kone cɔwr ʋ mʋ̃tɔ̃w nɩ tɩ̃ɩsɔw za a? Ʋ na cɛlɩ nɩ a bɛ sõwfʋ ƴãw bɩɩ?

⁸Mãa n'ʋ yere kʋ̀rɛ nyɩ: ʋ na wul'ɩ a bɛ yel-mɩŋa fɔ̃wlɛ. Ɛcɛ a Nɩsaal Bie wa wa a, ʋ na nɩ̃ɛ na nyɛ̃ a naaŋmɩn-sàw-deb a tẽw zu u?»

⁹A Yeezu tɩ lɛb'a lɔb zʋkpar ŋa càar'ɩ nɩbɛ bɛ mɩnɛ kãw na tɩ tɩɛrɛ kɛ́ bɛ ɩ n nɩ-mɩn, ɛ́ bʋɔlɛ a bɛ taabɛ nɩ-faar a:

¹⁰«Nɩbɛ ayi tɩ do n a Zerizalɛm Ŋmɩn-yir-kpɛ̃ɛ pʋɔ kɛ́ bɛ tɩ puori: a kãw tɩ ɩ n Faarizɩ̃ɛ, ɛ́ a kãw ɩ zuru-yar-diere.

¹¹A Faarizɩ̃ɛ tɩ àr'ɩ saaƴẽwn, ɛ́ puore à ŋá a ʋ socir pʋɔ: “Naaŋmɩn i, ɩ̃ puore fʋ nɩ yãanɩ, ɩ̃ na bɛ ŋmɛ̃ mɛ̃ a nɩbɛ za a ƴãw, na ɩ nyãnyuwr, yel-fa-maalbɛ, nɩ pɩ̃ɔ-yel-bier-maalbɛ a. Ɩ̃ mɩ̀ cãà na puore fʋ yãanɩ, ɩ̃ na bɛ ŋmɛ̃ mɛ̃ a zuru-yar-diere ŋa a.

¹²Ɩ̃ mɩ́ tɛr'ɩ mʋta-tuo gb'a ayi a kɔsɩɛr-been pʋɔ, ɩ̃ mɩ́ põ nɩ a ɩ̃ bome ziir pie ír zi-been kʋ̀ b.”

¹³Ɛcɛ a zuru-yar-diere ʋl tɩ àr'a zãá, ɛ́ bɛ tɩ sàw na dʋɔ zu ɛ, ɛ́ tɩ lɔbr nɩbaal-nuru yere nɩ: “Naaŋmɩn i, zɔ ɩ̃ nɩbaalʋ, mãa na ɩ yel-bebe sob a.”

¹⁴Mãa n'ʋ yere kʋ̀rɛ nyɩ, a zuru-yar-diere ŋa tɩ páw nɩ a vɩɛlʋ lɛb siw kul'ɩ a ʋ yir, ɛ́ bɛr a Faarizɩ̃ɛ. Sob nɛ za na zɛwr ʋ tʋɔra a, bɛ na siwr'ʋ na, ɛ́ sob nɛ za na siwre ʋ tʋɔra a, bɛ na zɛw ʋ na.»

¹⁵Nɩbɛ tɩ tɛr'ɩ bi-pɩɩlɛ tɛɛ za wa n k'aa Yeezu wa tɔ bɛ. A po-tuurbɛ na tɩ nyɛ̃ a lɛ a, bɛ tɩ tanɛ bɛ na.

¹⁶Ɛcɛ a Yeezu tɩ ƴãw na bɛ tɛr a bi-pɩɩlɛ wa n a ʋ zie, ʋʋ yel: «Nyɩ bɛr a bibiir bɛ wa a ɩ̃ zie, nyɩ ta diwr bɛ bɛrɛ ɩ: a bɛlɩ dem na ŋmɛ̃ taa nɩ bɛ a, bɛlɛ so a Naaŋmɩn Naalʋ.

¹⁷Yel-mɩŋa sɩza, ɩ̃ yere na kʋ̀rɛ nyɩ: nɩr bɛ wa sàw de a Naaŋmɩn Naalʋ mɛ̃ bibile a, ʋ kʋ̃ kpɛ a ʋ pʋɔ ɩ.»

¹⁸Zifʋ mɩnɛ nɩ-kpɛ̃ɛ kãw tɩ sowr'ɩ a Yeezu: «Wul-wul-kara a, fʋ̃ʋ na ɩ nɩ-vla a, bʋ̃ʋ n'ʋ a fɛr k'ɩ̃ɩ ɩrɛ tʋ̃ɔ́ páw a nyɔ-vʋʋrʋ na be kʋralɛ a?»

¹⁹A Yeezu tɩ yel ʋ na: «Bʋ̃ʋ n'ʋ so fʋ bʋɔlɛ mɛ̃ nɩ-vla? Nɩr za bɛ vɩɛl ʋ bɛ ɩ Naaŋmɩn yõ ɩ.

²⁰Fʋ bãw nɩ a Naaŋmɩn nɛ-ƴãwnɩ: “Ta maalɩ pɔw-gaa-yel-bier ɛ, ta kʋ nɩr ɛ, ta zu ɛ, ta dɩ dãsɩ-ziri ɛ, ƴãwnɛ fʋ sãà nɩ fʋ mã[34].”»

²¹A nɩ-kpɛ̃ɛ nɛ tɩ sɔw na: «Ɩ̃ tu n a Naaŋmɩn nɛ́ɛ á ŋá za a ɩ̃ pɔ̀lʋ daar za.»

²²A Yeezu na tɩ wõ à à ŋá a, ʋ yel ʋ na: «Bʋ̃-been yõ n'ʋ cãà cɛ b: kʋɔrɩ a fʋ bʋ̃-tɛrɩ za, de a libie põ nan dem, ɛ́ fʋ na tɛr'ɩ na-bome a tẽ-vla pʋɔ, al pùorí, wa tuur mɛ̃.»

²³A nɩr nɛ na tɩ wõ a ƴɛ̀r-bie á ŋá a, pʋ-sãwna tɩ nyɔw ʋ na bɛ dɩ vuo ɩ, ʋ tɩ sɩrɩ na kpɛ naalʋ yaga.

²⁴A Yeezu na tɩ nyɛ̃ ʋ, ʋ sãw niwn a, ʋ yel'a: «Nyɛ̃ a tɛra dem Naaŋmɩn Naalʋ pʋɔ kpɛb na kpɛmɛ a!

²⁵Sɩza, nyɔ̃wmɛ na na yi mɩsɩn vʋɔrɩ́ a, a ɩ n mɔlɛ zuo a tɛra sob na na kpɛ a Naaŋmɩn Naalʋ pʋɔ a.»

²⁶A nɩbɛ na tɩ bɛrɛ wone a, tɩ yel'a: «Alɛ wa ŋmɛ̃ à ŋá a, ãa n'ʋ pãa na tʋ̃ɔ́ nyɛ̃ a faafʋ a?»

²⁷A Yeezu tɩ sɔw na: «Bom nɛ a nɩsaalbɛ na kʋ̃ tʋ̃ɔ́ ɩ a, Naaŋmɩn mɩ́ tʋ̃ɔ́ na ɩ.»

²⁸A lɛ n'a a Pɩɛr tɩ yel: «Nyɛ̃, tɩ bɛr'ɩ a tɩ bʋ̃-tɛrɩ za ɛ́ wa tuur fʋ.»

²⁹A Yeezu tɩ sɔw bɛ na: «Yel-mɩŋa sɩza, ɩ̃ yere na kʋ̀rɛ nyɩ, sob nɛ na sàw bɛr a ʋ yir, a ʋ pɔw, a ʋ yɛbr, a ʋ nɩbɛ bɩɩ a ʋ bibiir a Naaŋmɩn Naalʋ ƴãw a,

³⁰na páw nɩ à á ŋá za ʋ na bɛr a dɔwlɩ, a ƴɛrɛŋa, ɛ́ a pùorí ʋ cãà lɛb páw a nyɔ-vʋʋrʋ na be kʋralɛ a ƴãw pʋɔ.»

³¹A Yeezu tɩ tɛr'ɩ a nɩ-toni pie nɩ ayi taw yi n bɛ tɛwr zie tɩ yel bɛ: «Nyɩ nyɛ̃, tɩ dúor'ɩ a Zerizalɛm. A lɛ za a naaŋmɩn-ƴɛ̀r-manbɛ na tɩ dãw sɛb yel a Nɩsaal Bie ƴãw a na tu na.

³²Bɛ na nyɔw ʋ na ƴãw nɩ-bʋʋr-yoru nuru pʋɔ, bɛ ɩ ʋ la, tʋ ʋ zʋmɛ, ɛ́ pʋʋrɩ mʋtaar waarɩ ʋ.

³³Bɛ na fɔb ʋ na, ɛ́ kʋ ʋ, ɛ́ a bibie ata sob ʋ lɛb yi a kũu pʋɔ.»

³⁴Ɛcɛ bɛ bɛ tɩ bãw a ƴɛ̀rʋ ŋa pɛr ɛ. A ƴɛ̀r-bie á ŋá pɛr tɩ sɔwl'ɩ a bɛ zie, bɛ bɛ tɩ bãw ʋlɩ bom nɛ ƴɛ̀rʋ a Yeezu na ƴɛ̀rɛ a ɩ.

³⁵A Yeezu na tɩ tarɛ a Zeriko tẽw a, zɔ̃w kãw tɩ zɩ̃ n a sɔ́r nʋɔr zɛlɛ.

³⁶Ʋ na tɩ wõ nɩ-yaga na cere tɔlɛ a, ʋ sowr'a ʋlɩ bom nɛ na n'ʋ a.

³⁷Bɛ tɩ yel ʋ na kɛ́ Nazarɛtɩ tẽw Yeezu n'ʋ tɔlɛ.

³⁸A lɛ n'a ʋ tɩ ŋmɛ cɛl yel: «Daviir bidɛb Yeezu u, zɔ ɩ̃ nɩbaalʋ!»

³⁹A bɛlɩ dem na tɩ cere a nidaa a, tɩ tanɛ ʋ na k'ʋʋ bɛr gɔmɛ, ɛcɛ a zɔ̃w nɩ̃ɛ na lɛb tɩ bãw cɩɩrɛ kpɛ̃w za: «Daviir bidɛb ɩ, zɔ ɩ̃ nɩbaalʋ!»

⁴⁰A Yeezu tɩ tɛw na àr ɛ́ yel kɛ́ bɛ tɛr ʋ wa n. Ʋ na wa ta a, a Yeezu sowr'ʋ na:

⁴¹«Bʋ̃ʋ n'ʋ fʋ bɔbr k'ɩ̃ɩ ɩ kʋ̀ b?» Ʋ tɩ sɔw na: «Sore e, ɩ ɩ̃ lɛb nyɛrɛ!»

⁴²A Yeezu tɩ yel ʋ na: «Lɛb nyɛrɛ, a fʋ naaŋmɩn-sàw-deb faa fʋ na.»

⁴³A pɛr nɛ pʋɔ, ʋ tɩ lɛb'a nyɛrɛ ɛ́ tuur a Yeezu, danɛ nɩ a Naaŋmɩn. A zu-sɛbla za na tɩ nyɛ̃ à à ŋá a, bɛ mɩ̀ tɩ danɛ nɩ a Naaŋmɩn.