Read Dagara, Northern Luka 20 Bible Online

Luka 20 - Dagara, Northern bible

Luka 20

¹Bibir kãw, a Yeezu tɩ be n a Ŋmɩn-yir-kpɛ̃ɛ pʋɔ kanɛ nɩ a nɩbɛ ɛ́ hiere a Yel-nʋ̃ɔ̀. Bɛ wa bere na a bàwr-maal-nɩ-bɛrɛ, nɩ a Naaŋmɩn wulu sɛ-sɛbrbɛ, nɩ a Zifʋ nɩbɛ nɩ-kore, wa ta a be,

²sowr'ʋ: «Nyɩnɛ n'a fʋ páw a sɔ́r ɩrɛ à à ŋá? Ɛ́ ãa n'ʋ kʋ̀ fʋ a sɔ́r ŋa? Yel tɩ nyɛ̃.»

³A Yeezu tɩ sɔw bɛ na: «Ɩ̃ mɩ̀ na sowri nyɩ nɩ sowr-been. Nyɩ yel ɩ̃ nyɛ̃:

⁴a suob a Zã na tɩ tɩrɛ a, Naaŋmɩn zie n'a ʋ yi bɩɩ nɩsaalbɛ zie n'a?»

⁵Bɛ tɩ ƴɛ̀r'a sɔw taa yel à ŋá: «Tɩmɛ wa yel kɛ́: “Naaŋmɩn zie n'a”, ʋ na sowri tɩ na: “Bʋ̃ʋ so nyɩ bɛ sàw de a Zã yele?”

⁶Ɛ́ tɩmɛ wa yel kɛ́: “Nɩsaalbɛ zie n'a”, a nɩbɛ na lɔb'ɩ tɩ nɩ kʋsɛbɛ kʋ, bʋ̃ʋ n'ʋ vɛ̃, bɛ tɩ bãwnɩ a na k'aa Zã ɩ n naaŋmɩn-ƴɛ̀r-manɛ.»

⁷Lɛ n'a bɛ tɩ sɔw: «Tɩ bɛ bãw a Zã suob yi-waa zie ɩ.»

⁸A Yeezu tɩ yel bɛ na: «A mãa mɩ̀ a, ɩ̃ kʋ̃ yel kʋ̀ nyɩ be ɩ̃ na páw a sɔ́r ɩrɛ à à ŋá a ɩ.»

⁹Al pùorí, a Yeezu tɩ lɔb'ɩ zʋkpar ŋa kʋ̀ a zu-sɛbla: «Nɩr kãw tɩ ƴãw nɩ púo sɛl divɛ̃ tɩɩr. Ʋ tɩ de ʋ na kʋ̀ nɩbɛ kɛ́ bɛ kaarɛ, ɛ́ bɛ wa lãw a wɔmɛ, ʋʋ yi yɔb na tɩ kɔwrɩ.

¹⁰A wɔmɛ deb daar na wa ta a, ʋ tõ n a ʋ tõ-tõ-bie kãw k'ʋʋ cen a po-kaarbɛ tɩ põ a tɩɩr wɔmɛ ír a ʋ dem tɩr. Ɛcɛ a po-kaarbɛ tɩ nyɔw nɩ a tõ-tõ-bie pɔb ɛ́ bɛr ʋ, ʋ lɛb kul nũ-zawl.

¹¹A púo sob tɩ lɛb'a tõ tõ-tõ-bie ƴen sob, bɛ mɩ̀ lɛb tɩ nyɔw pɔb, ɛ́ tʋ tʋ bɛr ʋ kul nũ-zawl.

¹²A púo sob tɩ lɛb'a tõ a ata sob, ʋ cen bɛ tɩ nyɔw ʋ pɔb ƴãw bàalʋ ɛ́ diw ʋ bɛr.

¹³A lɛ n'a a púo sob tɩ yel ʋ tʋɔra: “Ɩ̃ pãa lɛb ɩ ŋmɩn? Ɩ̃ na tõ n a ɩ̃ bi-nɔna za, a mɩnɛ kãw, bɛ na tɩ tɛr'ɩ ƴãwfʋ a ʋ zie!”

¹⁴Ɛcɛ a po-kaarbɛ na tɩ nyɛ̃ a bie ʋ waar a, bɛ tɩ yel'a kʋ̀ taa: “Nyɛ̃ a gbã-dɩrɛ! Nyɩ wa tɩ kʋ ʋ ɛ́ so a gbã-dɩ-bome!”

¹⁵Bɛ tɩ nyɔw nɩ a bie, a divɛ̃ tɩɩr púo pʋɔ be, lɔb bɛr yẽw ɛ́ kʋ.» «A na ɩ à ŋá a, a púo sob na ɩ bɛ nɩ ŋmɩn?

¹⁶Ʋ na wa na wa kʋ a po-kaarbɛ bɛ ŋa ɛ́ de a púo kʋ̀ nɩ-yoru.» A zu-sɛbla na wa wõ a ƴɛ̀r-bie á ŋá a, bɛ yel'a: «Al bɛ ɩrɛ ɩ!»

¹⁷Ɛcɛ a Yeezu tɩ jɩ́r bɛ nɩ gbẽgbẽ ɛ́ sowri bɛ: «Alɛ wa ɩ à ŋá a, a Sɛb-sõw ƴɛ̀r-bir ŋa pɛr'ɩ bo: “A kʋsɩɛr ʋl a yir-mɩɛrbɛ na ír lɔb bɛr a, lɩɛb'ɩ a yir pɛr kʋsɩɛr[36]?”

¹⁸Nɩr za wa lo ŋmɛ a kʋsɩɛr ŋa a, a sob na kar a, ɛ́ nɩr za zu a kʋsɩɛr ŋa nãà lore a, ʋ na nɛ nɩ a sob ŋmɛr.»

¹⁹A Naaŋmɩn wulu sɛ-sɛbrbɛ nɩ a bàwr-maal-nɩ-bɛrɛ tɩ bɔbr'ɩ a Yeezu nyɔwfʋ a pɛr nɛ pʋɔ, ɛcɛ bɛ tɩ zɔ n a nɩbɛ dɛ̃bɩ̃ɛ. Bɛ tɩ bãwnɩ a na bɛlɛ na nɛbɛ ʋ lɔb a zʋkpar jɩɛr'ɩ a.

²⁰A lɛ n'a bɛ tɩ tĩ piwre a Yeezu. Bɛ tɩ tõ n nɩbɛ a ʋ zie, nɩbɛ na bɛlɩ ɩ nɩ-vɩɛlɩ a, kɛ́ bɛ tɩ piwri nyɔw ʋ a ʋ ƴɛ̀rʋ pʋɔ. Bɛ tɩ bɔbr kɛ́ bɛ ɩ a lɛ nyɔw ʋ ƴãw a na-kpɛ̃ɛ-lɩɛrɛ nuru pʋɔ.

²¹Bɛ tɩ sowr'ɩ sowru ŋa a Yeezu: «Wul-wul-kara a, tɩ bãwnɩ a na, a fʋ ƴɛ̀rʋ nɩ a fʋ wulu tu n sɔ́r, fʋ bɛ jɩ́rɛ nɩr niwn kpɩɛr a sob ɛ, fʋ wule nɩ a nɩbɛ a Naaŋmɩn sɔ́r nɩ yel-mɩŋa.

²²Yel tɩ nyɛ̃: sɔ́r be n be kɛ́ tɩ yarɛ a zuru-yar kʋ̀rɛ a Sezaar bɩɩ sɔ́r bɛ ka be?»

²³A Yeezu na tɩ bãwnɩ a bɛ yã-faa a, ʋ yel bɛ na:

²⁴«Nyɩ wul mɛ̃ libir ɩ̃ nyɛ̃. Ãa niwn nɩ ãa sɛbrʋ n'ɩ à á ŋá na wi a libir zu a?» Bɛ tɩ sɔw na: «Sezaar dem'a.»

²⁵A Yeezu yel bɛ: «Ɛ́ lɛ̀ɛ, nyɩ kʋ̀ a Sezaar a alɩ bome nɛ ʋ na so a, ɛ́ kʋ̀ a Naaŋmɩn alɩ bome nɛ a Naaŋmɩn na so a.»

²⁶Bɛ bɛ tɩ tʋ̃ɔ́ nyɔw ʋ a ʋ ƴɛ̀rʋ pʋɔ a nɩbɛ niŋé ɩ. A sɔwfʋ ŋa nɩ̃ɛ na tɩ ɓãá bɛ nʋɔr bɛ ɩ gbili.

²⁷Sadiseyɛ̃ bɛ mɩnɛ kãw tɩ wa na wa páw a Yeezu. Bɛlɛ nɛbɛ mɩ́ yel kɛ́ kũu-pʋɔ-lɛb-yibu bɛ be ɩ. Bɛ tɩ sowr'ʋ nɩ a sowru ŋa:

²⁸«Wul-wul-kara a, a Moyiir sɛb'ɩ nɔ-ƴãwna ŋa kʋ̀ tɩ: “Ɛ́ nɩr wa tɛr yɛb ʋ kul pɔw bɛ dɔw bie ɛ́ kpi a, ʋ̃ʋ kul a ʋ yɛb pɔw-kʋɔr dɔw kʋ̀ ʋ[37].”

²⁹Lɛ n'a yɛbr ayopõi kãw tɩ be be: a dãw-niwn sob kul pɔw bɛ dɔw ɛ, ɛ́ kpi,

³⁰a ayi sob kul a pɔw-kʋɔr,

³¹a pùorí, a ata sob mɩ̀ kul a pɔw-kʋɔr. A bɛ za ayopõi tɩ tɔ. Bɛ tɩ kpi na ɛ́ bɛ dɔw ɛ.

³²Tɛr lɛɛɛ a pɔw mɩ̀ pãa wa bɩɛrɩ kpi.

³³A na ɩ à ŋá a, a kũu-pʋɔ-lɛb-yibu daar a, a pɔw ŋa na ɩ n ãa pɔw, bɛ za ayopõi na kul ʋ lɩɛrɩ taa a?»

³⁴A Yeezu tɩ yel bɛ na: «A tẽw zu ka nɩbɛ nɛbɛ kule taa.

³⁵Ɛcɛ a bɛlɩ dem a Naaŋmɩn na nyɛ̃ bɛ sɛwnɩ a nɩdaar zie a, nɩ a kũu-pʋɔ-lɛb-yibu a, bɛl bɛ kule taa ɩ,

³⁶bɛ kʋ̃ lɛb tʋ̃ɔ́ kpi ɛ: bɛ ŋmɛ̃ na mɛ̃ malkɩ mɩnɛ a, bɛ ɩ n Naaŋmɩn bibiir, bɛ na lɛb yi a kũu pʋɔ a ƴãw.

³⁷Ɛ́ a kũu-pʋɔ-lɛb-yibu yele ƴãw a, a Moyiir mɩŋa wul'a a sãá a tuw ʋ na tɩ nyɛ̃ ʋ dɩrɛ a pɛr, a lɛ ʋ na tɩ bʋɔlɩ a Sore kɛ́: “Abraham Naaŋmɩn, Ɩzaakɩ Naaŋmɩn, nɩ Zakɔb Naaŋmɩn a[38].”

³⁸Nɩ-kũuni Naaŋmɩn bɛ n'ʋ ɛ, nɩ-vʋʋrɩ Naaŋmɩn n'ʋ. Ʋl ƴãw n'a bɛ za vʋʋrɛ.»

³⁹A Naaŋmɩn wulu sɛ-sɛbrbɛ bɛ mɩnɛ tɩ de nɩ a ƴɛ̀rʋ yel: «Wul-wul-kara a, fʋ ƴɛ̀r'ɩ vla!»

⁴⁰Bɛ bɛ tɩ cãà sàw sowre ʋ bom kãw za ɩ.

⁴¹A lɛ n'a a Yeezu tɩ yel bɛ: «Ŋmɩŋmɩn n'a bɛ na tʋ̃ɔ́ yel kɛ́ a Nɩ-kabra ɩ n a Daviir bʋ̃-dɔwra?

⁴²A Daviir tɔr za yel'ɩ à ŋá a Sɛb-sõw yielu sɛbɛ pʋɔ: “A Sore Naaŋmɩn yel'ɩ a ɩ̃ Sore: zɩ̃ a ɩ̃ dʋrʋ lowr

⁴³ɛ́ gù ɩ̃ wa tɩ fɛr a fʋ dɔ̃ dem ƴãw a fʋ pile, bɛ lɩɛbɩ a fʋ gbɛ́ɛ dɔwlʋ zie[39].”

⁴⁴A Daviir bʋɔlɛ ʋ nɩ ʋ Sore, ŋmɩŋmɩn n'a ʋ na ɩ a Daviir bʋ̃-dɔwra?»

⁴⁵A zu-sɛbla za tɩ bɛrɛ na wone a Yeezu ƴɛ̀rʋ. Ʋ tɩ yel'ɩ a ʋ po-tuurbɛ a zu-sɛbla niŋé:

⁴⁶«Nyɩ gù nyɩ tʋɔra a Naaŋmɩn wulu sɛ-sɛbrbɛ ƴãw: bɛ mɩ́ bɔbr'a kɛ́ bɛ su kpar-wowr cɔlɛ gʋɔr'ɩ, ɛ́ nɔnɛ kɛ́ a nɩbɛ puore bɛ a nɩ-yaga tuor-taa ziir, ɛ́ nɔnɛ a niŋé dà-kɔwr a puoru-dirú nɩ a cuwr dɩb ziir.

⁴⁷Bɛ dɩrɛ nɩ a pɔw-kɔbɛ lɔbr, ɛ́ mɩ́ bɛlɩ puore puor-wowr. A bɛ dɔwrʋ na zuo nɩ a nɩbɛ za dem.»