Read Dagara, Northern Luka 22 Bible Online

Luka 22 - Dagara, Northern bible

Luka 22

¹A dipɛ̃ na bɛ ƴãw dãbɩl a cuw, bɛ na bʋɔlɛ kɛ́ a Zifʋ mɩnɛ Tɔl-gãw cuw a, tɩ pɩɛlɛ na.

²A bàwr-maal-nɩ-bɛrɛ nɩ a Naaŋmɩn wulu sɛ-sɛbrbɛ tɩ bɔbr'ɩ a lɛ bɛ na na ɩ kʋ a Yeezu a. Ɛcɛ bɛ tɩ zɔrɛ nɩ a nɩbɛ dɛ̃bɩ̃ɛ.

³Lɛ n'a a Sɩtaana tɩ kpɛ a Zuda bɛ na bʋɔlɛ Ɩsɩkarɩɔtɩ a pʋɔ. Ʋ tɩ ɩ n a Yeezu nɩ-toni pie nɩ ayi ƴen sob.

⁴Ʋ tɩ cen na tɩ wõ taa nɩ a bàwr-maal-nɩ-bɛrɛ nɩ a Ŋmɩn-yir-kpɛ̃ɛ gùrbɛ nɩ-bɛrɛ, a lɛ ʋ na na ɩ mɩl a Yeezu nyɔw kʋ̀ bɛ a.

⁵Nʋ̃ɔ̀ tɩ kpɛ n a nɩbɛ bɛ ŋa, bɛ wõ taa kɛ́ bɛ na kʋ̀ ʋ nɩ libie.

⁶Ʋ tɩ sàw na ɛ́ tĩ bɔbr a vo-vla ʋl ʋ na na tʋ̃ɔ́ nyɔw ʋ kʋ̀ bɛ ɛ́ a zu-sɛbla ta bãwnɩ a a.

⁷A dipɛ̃ na bɛ ƴãw dãbɩl a cuw bibir ʋl, bɛ na mɩ́ kʋ a Tɔl-gãw pele a, tɩ vɩɛ na.

⁸A Yeezu tɩ tõ n Pɩɛr nɩ Zã ɛ́ yel bɛ: «Nyɩ cen tɩ cɔbrɩ a Tɔl-gãw cuw dɩb tɩ dɩ.»

⁹Bɛ tɩ sowr'ʋ na: «Nyɩnɛ n'a fʋ bɔbr kɛ́ tɩ cɔbrɩ ʋ?»

¹⁰A Yeezu tɩ sɔw na: «Nyɩ cen a tẽw pʋɔ, nyɩmɛ wa tarɛ a, nyɩ na tuor'ɩ nɩr na tuo kʋ̃ɔ nɩ yuor a, nyɩ tuur ʋ tɩ kpɛ a yir nɛ pʋɔ ʋ na na kpɛ a,

¹¹ɛ́ nyɩ yel a yir sob: “A Wul-wul-kara sowre fʋ na: Nyɩnɛ n'a a dĩo be, mãa nɩ a ɩ̃ po-tuurbɛ na dɩ a Tɔl-gãw cuw dɩb?”

¹²A sob ʋl na wul nyɩ nɩ bɔwpɩɛ a gàrʋ́, ʋ yɛlmɛ na ɛ́ bom za be be. Be n'a nyɩ na cɔbrɩ a yele.»

¹³Bɛ tɩ cen na tɩ nyɛ̃ a za tu mɛ̃ a lɛ a Yeezu na yel a, bɛ cɔbrɩ a Tɔl-gãw cuw dɩb.

¹⁴A tɛm na wa ta a, a Yeezu tɩ zɩ̃ n a dɩb ƴãw ʋlɛ nɩ a ʋ nɩ-toni.

¹⁵Ʋ tɩ yel bɛ na: «Ɩ̃ tɩ bɔbr'a nɩ ɩ̃ pʋɔ za, k'ɩ̃ɩ lãwnɩ nyɩ dɩ a Tɔl-gãw cuw ŋa ɛ́ bãw wõ a tuo.

¹⁶Ɩ̃ sɩrɩ na yere kʋ̀rɛ nyɩ, ɩ̃ kʋ̃ lɛb dɩ ʋ towtow ɛ, ɛ́ gù ʋ wa tɩ maalɩ ʋ za baarɩ a Naaŋmɩn Naalʋ pʋɔ.»

¹⁷Lɛ n'a ʋ tɩ de koli-nyúura, puori a Naaŋmɩn yãanɩ ɛ́ yel: «Nyɩ de à á ŋá nyũ tɔ taa.

¹⁸Ɩ̃ sɩrɩ na yere kʋ̀rɛ nyɩ, ɩ̃ kʋ̃ lɛb nyũ a divɛ̃ ɩ, ɛ́ gù a Naaŋmɩn Naalʋ tɩ ta.»

¹⁹Al pùorí, ʋ tɩ de nɩ dipɛ̃, puori a Naaŋmɩn yãanɩ, nyɔw ŋma, ɛ́ kʋ̀ bɛ ɛ́ yel: «À ŋà ɩ n a ɩ̃ ƴã-gan ɩ̃ na tɩr a nyɩ ƴãw a. Nyɩ maalɛ à á ŋá lɛb tɩɛrɛ nɩ a ɩ̃ yele.»

²⁰Ʋ mɩ̀ tɩ ɩ n a lɛ a koli-nyúura ƴãw, a dɩb pùorí, ɛ́ yel: «A koli-nyúura ŋa ɩ n a Wõ-ta-paala na bin nɩ a ɩ̃ zɩ̃ɩ na cir a nyɩ ƴãw a.

²¹Ɛcɛ nyɩ nyɛ̃, a ʋlɩ sob na mɩlɛ mɛ̃ a lãw nɩ mɛ̃ na a dɩb zie ka.

²²A Nɩsaal Bie ʋl kule na, mɛ̃ a lɛ a yele na cɔbrɩ bin a, ɛcɛ baw-bio sob'ɩ a nɩr ʋl na mɩlɛ ʋ a.»

²³A nɩ-toni tɩ tĩ na sowre taa kɛ́ a bɛ buor sob'ʋ na ɩ à à ŋá.

²⁴A ʋ po-tuurbɛ tɩ wa zɛbr'ɩ taa a bɛ cara pʋɔ, kɛ́ a bɛ buor sob'ʋ na tʋ̃ɔ́ ɩ a bɛ za kpɛ̃ɛ.

²⁵Ɛcɛ a Yeezu tɩ yel bɛ na: «A nɩ-bʋʋrɛ na-mɩnɛ mɩ́ dɩrɛ nɩ naalʋ a bɛ nɩbɛ zu nɩ kpɛnʋ, ɛ́ a bɛlɩ dem na dɩrɛ nɩ-kpɛ̃ɛnʋ a bɛ nɩbɛ zu a, mɩ́ ƴãw na bɛ bʋɔlɛ bɛ maalbɛ.

²⁶A nyɩɩm zie a, à ŋá bɛ n'a ɩ. A ʋlɩ sob na ɩ a nyɩ za kpɛ̃ɛ a, ʋ nɩ̃ɛ ɩrɛ mɛ̃ a nyɩ za bibile a, ɛ́ a ʋlɩ sob na dɩ nɩ-kpɛ̃ɛnʋ a ɩrɛ mɛ̃ a tõ-tone a.

²⁷Buor'ʋ sɩrɩ ɩ kpɛ̃ɛ zuo buor: a sob nɛ na zɩ̃ dɩrɛ a n'ʋ bɩɩ a sob nɛ na dier a bʋ̃-dɩrɩ waar'ɩ a n'ʋ? A sob nɛ na zɩ̃ dɩrɛ bɛ n'ʋ ɛ? Ɛcɛ mãa a, ɩ̃ be n a nyɩ sɔgɔ mɛ̃ tõ-tõ-bie a.

²⁸A nyɩɩm a, nyɩ ɩ n a bɛlɩ dem na lãwnɩ mɛ̃ a ɩ̃ kpɩɛrʋ pʋɔ a.

²⁹Ɛ́ a mãa a, ɩ̃ so nɩ a naalʋ na kʋ̀ nyɩ, mɛ̃ a lɛ a ɩ̃ Sãà na so ʋ kʋ̀ m a:

³⁰nyɩ na dɩ na ɛ́ nyũ a ɩ̃ bʋ̃-dɩrɩ dɩb zie, a ɩ̃ naalʋ-dɩb daar, ɛ́ nyɩ na zɩ̃ n naalʋ-dà-kɔwr zuru maal'ɩ a Ɩsɩrayɛl dɔwlʋ pie nɩ ayi a ƴɛ̀rʋ.»

³¹A Sore tɩ yel'a: «Sɩmʋ̃ ʋ, Sɩmʋ̃ ʋ, Sɩtaana zɛlɩ na k'ʋʋ dam nyɩ mɛ̃ pɔw na tɛtɛwr zɛla a.

³²Ɛcɛ ɩ̃ puor'a kʋ̀ b, kɛ́ a fʋ naaŋmɩn-sàw-deb taa bɔrɛ ɩ. Fʋ̃ʋ wa lɛb wa baar'a, fʋ̃ʋ tɩɛ a fʋ yɛbr.»

³³A Pɩɛr tɩ yel ʋ na: «Sore e, ɩ̃ gù n a gaso cenu nɩ a kũu, mãa nɩ a fʋ̃ʋ.»

³⁴A Yeezu lɛb yel ʋ: «Ɩ̃ yere na kʋ̀rɛ fʋ, Pɩɛr i, nʋra kʋ̃ kõ a dɩ̃a sɛr ɛ, ɛ́ fʋ ciiri gb'a ata kɛ́ fʋ bɛ bãw mɛ̃ ɩ.»

³⁵Al pùorí, a Yeezu tɩ yel bɛ na: «Ɩ̃ na tɩ tõ nyɩ, ɛ́ wɛr-wʋɔ, cɛkɔlɔ nɩ nafawr bɛ ka be a, nyɩ bɔ n bom gù u?» Bɛ sɔw: «Tɩ bɛ bɔ bom gù ɛ.»

³⁶A Yeezu yel bɛ: «Ƴɛrɛŋa ʋl a, ʋlɩ sob na tɛr wɛr-wʋɔ a, ʋ de, ʋlɩ sob mɩ̀ na tɛr cɛkɔlɔ a, lɛ mɩ̀ n'a. Ʋlɩ sob na bɛ tɛr zɛbr-sɔ-kpɛ̃ɛ a, ʋ kʋɔrɩ a ʋ kpar-kpɛ̃ɛ dà n.

³⁷Ɩ̃ sɩrɩ na yere kʋ̀rɛ nyɩ: a fɛr'a kɛ́ a sɛbrʋ ŋa tu a ɩ̃ ƴãw: “Bɛ sɔ́r ʋ na ƴãw nɩ-faar pʋɔ.” A yele na càarɩ mɛ̃ a, na sɩrɩ na tu.»

³⁸A po-tuurbɛ tɩ yel ʋ na: «Sore e, zɛbr-sɔ-bɛrɛ ayi n'ɩ a ŋan.» Ʋ sɔw bɛ: «A sɛw na.»

³⁹A Yeezu tɩ yi na cen a Olivʋ tɩɩr tãw zu mɛ̃ a kʋralɛ a. A ʋ po-tuurbɛ tɩ páw ʋ na.

⁴⁰Ʋ na wa ta a be a, ʋ yel bɛ na: «Nyɩ puore, taa wa kpɩɛr a bɛ̀lʋ pʋɔ ɩ.»

⁴¹Al pùorí, ʋ taw na yi a bɛ zie, zãá man kʋsɩɛr bɛ na lɔb a, ʋ tɩ gbĩ n dume ɛ́ puore

⁴²yere nɩ: «Ɩ̃ Sãà a, fʋ̃ʋ wa bɔbr'a, fʋ̃ʋ ɩ a tuo koli-nyúura ŋa ʋ zãá nɩ mɛ̃, ɛcɛ a ta ɩ a mãa pʋ-tɩɛrʋ n'ʋ maalɩ ɛ, a ɩ a fʋ̃ʋ dem.» [

⁴³Lɛ n'a ʋ tɩ nyɛ̃ malkɩ k'ʋ yi a salom zu wa kʋ̀rɛ ʋ fãw.

⁴⁴A pʋl-vʋ̃ɔ na tɩ nyɔw ʋ a, ʋ tɩ lɛb'a bãw puore kpɛ̃w za, ɛ́ a ʋ hanʋ tɩ ɩ mɛ̃ zɩ̃ɩ na ŋmarɛ lore a tẽsɔw a.]

⁴⁵Ʋ tɩ ìr'ɩ a puoru zu, wa a ʋ po-tuurbɛ zie wa nyɛ̃ a pʋ-sãwna ɩ bɛ gúr.

⁴⁶Ʋ tɩ yel bɛ na: «Bʋ̃ʋ n'ʋ ɩ nyɩ gúre? Nyɩ ìr puore k'aa bɛ̀lʋ taa tarɛ nyɩ ɛ.»

⁴⁷Ʋ na tɩ cãà ƴɛ̀rɛ a, nɩ-yaga wa tɩ sãá nɩ a be. A Zuda nɛ sob, a Pie-nɩ-ayi ƴen sob kãw, tɩ de bɛ nɩ niwn. Ʋ tɩ taw na ta a Yeezu k'ʋʋ nyɔw ʋ weri.

⁴⁸Ɛcɛ a Yeezu tɩ yel ʋ na: «Zuda a, weru n'a fʋ were a Nɩsaal Bie na weri nyɔw tɩr ɩ?»

⁴⁹A bɛlɩ dem na tɩ jil koli a Yeezu a, ɛ́ nyɛ̃ a lɛ a yele na na ɩ a, tɩ yel ʋ na: «Sore e, tɩ cɩɛr'ɩ a zɛbr-sɔ-bɛrɛ bɩɩ?»

⁵⁰A bɛ ƴen sob tɩ cɛ n a bàwr-maal-kara tõ-tõ-bie, cɛ a dʋrʋ tobr ɓɛl.

⁵¹Ɛcɛ a Yeezu tɩ sɔw na yel: «Nyɩ bɛr a, a man na.» Ʋ tɩ tɔ n a nɩr nɛ tobr sanɩ ʋ.

⁵²Lɛ n'a a Yeezu tɩ yel a bɛlɩ dem na tɩ wa a ʋ nyɔwfʋ a, a bàwr-maal-nɩ-bɛrɛ, a sojarɩ na gùre a Ŋmɩn-yir-kpɛ̃ɛ a nɩ-bɛrɛ, nɩ a nɩ-kore: «Nyɩ yi n a ɩ̃ ƴãw mɛ̃ nyãnyu-nɩ-kʋrɛ ƴãw a, nɩ zɛbr-sɔ-bɛrɛ nɩ dabɔlɛ.

⁵³Ɛcɛ bibir za, ɩ̃ mɩ́ tɩ be n a nyɩ zie, a Ŋmɩn-yir-kpɛ̃ɛ pʋɔ, ɛ́ nyɩ bɛ ír nũu tɔ n mɛ̃ ɩ. Ɛcɛ a ƴɛrɛŋa a, a nyɩ tɛm'ʋ ta, a lige kpɛnʋ n'a ta.»

⁵⁴Bɛ tɩ nyɔw nɩ a Yeezu, tɛr ʋ cen nɩ a bàwr-maal-kara yir. A Pɩɛr ʋl tɩ zãá na ɛ́ tuur.

⁵⁵Bɛ na tɩ gbɔw vũu a davʋra sɔwlɩsɔw bɛ za lãw zɩ̃ a be a, a Pɩɛr mɩ̀ tɩ zɩ̃ n a bɛ sɔgɔ.

⁵⁶Tõ-tõ-bi-pɔw kãw tɩ nyɛ̃ ʋ na, ʋ na zɩ̃ a vũu pɛr a, ʋ tɩ jɩ́r ʋ nɩ gbẽgbẽ ɛ́ yel: «A sob ŋa mɩ̀ tɩ be n a Yeezu zie.»

⁵⁷Ɛcɛ a Pɩɛr tɩ ciir'a ɛ́ yel: «Ɩ̃ bɛ bãw ʋ ɛ, pɔw i.»

⁵⁸Blã na wa pʋɔ a, nɩr kãw na tɩ nyɛ̃ ʋ a, tɩ yel'a: «A fʋ̃ʋ mɩ̀ a, fʋ pʋɔ nɩ a bɛ pʋɔ!» Ɛcɛ a Pɩɛr tɩ yel'a: «Ɩ̃ bɛ pʋɔ bɛ pʋɔ ɩ.»

⁵⁹Tɛm ɓil tɩ cɛ nɩ blã na ŋmɛ tɔl, ɛ́ kãw mɩ̀ yere kpɛ̃w kpɛ̃w za: «Yel-mɩŋa za, a sob ŋa mɩ̀ tɩ be n a Yeezu zie, ãa n'ʋ bɛ nyɛ̃ ʋ na yi a Galile a!»

⁶⁰Ɛcɛ a Pɩɛr tɩ yel'a: «Ɩ̃ bɛ bãw ʋlɩ bom nɛ fʋ na yere a ɩ.» Ʋ tɩ cãà na ƴɛ̀rɛ, ɛ́ daadaalɛ nʋra kõ.

⁶¹A Sore tɩ lɩɛb'a jɩ́r a Pɩɛr gbẽgbẽ. Lɛ n'a a Pɩɛr lɛb bãwnɩ a ƴɛ̀rʋ ʋl a Sore na tɩ ƴɛ̀r kʋ̀ ʋ a: «A dɩ̃a a, nʋra kʋ̃ kõ sɛr ɛ, ɛ́ fʋ ciiri gb'a ata kɛ́ fʋ bɛ bãw mɛ̃ ɩ.»

⁶²Ʋ tɩ yi n a yẽw tɩ kõ mʋta-zɩ̃ɩ.

⁶³A nɩbɛ bɛl na tɩ gù a Yeezu a tɩ ɩrɛ ʋ na laar ɛ́ pɔbr ʋ.

⁶⁴Bɛ mɩ́ tɩ pàw ʋ nɩ a niwn ɛ́ sowre ʋ: «Bãw naaŋmɩn-ƴɛ̀r-manɛ bãwfʋ! Ãa n'ʋ ŋmɛ b?»

⁶⁵Ɛ́ bɛ tɩ tʋ ʋ nɩ zʋm-bi-yaga a mɩnɛ.

⁶⁶A zie na wa vɩɛ a, a Zifʋ mɩnɛ nɩ-kore nɩ a bàwr-maal-nɩ-bɛrɛ, nɩ a Naaŋmɩn wulu sɛ-sɛbrbɛ tɩ ɓã n taa, ɛ́ bɛ tɛr a Yeezu wa n a bɛ ƴɛ̀rʋ-dɩb-lãw niŋé.

⁶⁷Bɛ tɩ yel ʋ na: «Fʋ̃ʋ wa n'ɩ a Kɩrɩta a, fʋ̃ʋ yel kʋ̀ tɩ.» A Yeezu tɩ sɔw bɛ na: «Mãa ɩ mɛ̃ ɩ̃ yel'a kʋ̀ nyɩ a, nyɩ kʋ̃ sàw kʋ̀ m ɛ.

⁶⁸Ɛ́ mãa mɩ̀ ɩ mɛ̃ ɩ̃ sowre nyɩ nɩ bom a, nyɩ bɛ sɔwr ɛ.

⁶⁹Ɛcɛ dɩ̃a na ta a, a Nɩsaal Bie na zɩ̃ n a Naaŋmɩn na tɛr kpɛnʋ a dʋrʋ lowr.»

⁷⁰Lɛ n'a bɛ za tɩ sowr'ʋ: «A ɩ lɛ fʋ ɩ a Naaŋmɩn Bie ʋ?» Ʋ yel bɛ: «Nyɩmɛ nɛbɛ yel k'ɩ̃ɩ ɩ ʋ na!»

⁷¹Lɛ n'a bɛ tɩ yel: «Bʋ̃ʋ ƴãw n'a tɩ cãà bɔbr dãsɩɛ dem? Tɩɩm mɩŋa wõ a nɩ a ʋ nʋɔrɩ́!»